الأحد، 20 يونيو، 2010

حد يدل الحكومة على باب الخمارة

حد يدل الحكومة على باب الخمارة

العلام شطارة.. والرزق حظوظ ... والعقول ابخات .... يعنى ممكن تكون خريج هارفارد... بس بختك قليل فى العقل .... وممكن تكون رجل اعمال بتعمل فلوس من الهوا ... بس ملاكش حظ فى العلام .... وممكن تكون عاقل بس رزقك قليل.... مقدمه لابد منها.

الحكومه الذكية... المكونه من الهارفارديين... ورجال الاعمال ... وبس... بعد ما طلعت من حرب السبعة فى المية نمو اقتصادى اللى هرت اهلنا بيها ...اكتشفت ان عندها 100 مليار عجز فى الميزانية ... الحكومة الذكية بقى فى نيتها انها تزود البنزين والسولار40% .... طبعا هيه قصدها تاخد.. من ولاد الجزمة اللى عندهم عربيات ....لكن الناس الطيبين اللى بيروحوا شغلهم مشى ... مش حتيجى جنبهم .... عادى جدا مافيش مشكلة ....

اللى حيحصل ان المواطن اللى كان بيمون ب100 جنية ... حيمون ب 140 جنية ...الاربعين جنية الزيادة دول حيطلعهم على طول.... من اول زبون .... والزبون حيطلعهم من اول زبون ..... وتفضل الحكاية ماشية لغاية الزبون اللى ملوش زبون ... يعنى الموظف .... مش مهم ... المهم نعوض العجز ... وبعدين نبقى نشوف موضوع محدودى الدخل والموظفين دة بعدين ...

و حيحصل اية ؟ طبعا على اساس ان احنا بشر مش ملايكة .... المواطن حيهرب من الضرايب ... والموظف اللى مش حيفتح الدرج على اخرة ... حياخد بحقة انتخة وتزويغ ... فتقوم الحكومة الفطنة ... ماهى الذكية حتكون مشت بقى .... تلاقى عندها عجز 200 مليار ... تعمل اية ... تروح مزودة البنزين تانى ....

مع ان الحل واضح زى الشمس ...كل الحكاية ان الحكومة الذكية او الفطنة او العبيطة ... اى حكومة .... تعمل حاجة بسيطة خالص .... تبطل تتأمز ... وماتسألش باب الخمارة فين.... وتوفر الفلوس اللى حتصرفها فى الخمارة ... وتجيب حاجة تغطى بيها ضهرها.... يعنى فيه 250 مليون تمن ماتشات عبيطة ... ومش عارف كام مليون تمن اعلانات شومان الهبلة .... وكام مليون بتوع اعلانات يسرا بتاعة اقوم صوت ... عليك وعلى عمرك .... وكام مليون منتخبات مابتعرفش تشرفنا ... وكام مليون حفلات الهشك بشك ...... وكام مليون بنزين طيارات الهارفارديين علشان يصطادوا لنا استثمارات اجنبية ....والله دول بس يوفرو مليار فوق الميت مليار العجز.

السيدة فى ضهركوا ... هيه صعبة قوى كدة ...ولا انا من اللى مالوش بخت فى العقول ولا حظ فى الفلوس ...

ولاشاطر فى العلام ...ردوا علييياااااااااااااااااااااااااااااااااااااااااااااااااااااااا

هناك 8 تعليقات:

  1. اديك قولتها ذكية وزيادة عن اللزوم

    تحياتي يادوك

    ردحذف
  2. مش عارفه انت قريت البوست بتاعي الى كان اسمه انا عايزه حقي ناشف ولا لا

    مره من ذات المرات كنت بادور على حاجه للشغل المهم كان فى كلمة ميزانية فى الموضوع

    قوم دخلت موقع حكومي بالصدفه البحته والله

    وبيتكلم عن ميزانية 2009 السيده فى ضهرك انت تدور عليه وتشوفه

    وتشوف المسخررررررررره الى احنا فيها

    والمليارات الى بتعدي من فوق راسك كده وانت قاعد ولا كأن في حاجه


    والله العظيم مسخرررررررررررررررره

    والله العظيم كماااااااان مسخررررررررره

    صدقنى الحكايه مش صعبه

    هاقولهالك تاني

    قراط ضميييييييييير يا علام قراط واااااااااحد

    ردحذف
  3. الا انت فين يا دوك الحلقه الجديده نزلت انشاله خير

    ردحذف
  4. دكتور إسلام
    انا مش عارف انت لسة صاحي وبتفكر لية هي كل الازمات والنكسات والمصايب والبهدلة دى ....لسة ما أصرتش فيك ...انت برضك لسة فيك نفس ...انت برضك فيك دماغ ...لسة برضك عندك قلم ؟
    طيب خد دي بقة وحطها مع رشوة شركة المرسيدس لمسؤلين كبار ..
    يمكن الناس تفوق وتعرف انه مخطط مدروس لدمار البلد

    «المصرى اليوم» تكشف: تحقيقات ألمانية فى قضية «رشوة» جديدة لمسؤولين مصريين فى هيئة اقتصادية

    م/ علي يونس

    ردحذف
  5. انها حلقة مفرغة تنتهي لتبدأ من جديد للاسف

    ردحذف
  6. الناس دي مش هتستريح الا لما تقوم ثوره جياع..وحسبي الله ونعم الوكيل..

    ردحذف
  7. هما وراهم غير انهم يرموا ملايين

    ربنا يحاسبهم بقى على قد اللى عملينه فينا

    ردحذف
  8. ده ذكاااااء خارق
    وافكار مدروسه ومخططه بعنايه
    ربنا يخلصنا وينجدنا من المؤامرات والخطط دى
    تمنياتى اليك بالسعاده

    ردحذف