الاثنين، 21 ديسمبر 2009

الكلمة فيها لمن غلب 1

الكلمة فيها لمن غلب(1)

هوة كدة...اخبط راسك فى الحيط ..اشرب من البحر ..ان كان عاجبك ....قالى الكلام دة ...قولت له : ياعم والنبى نتكلم بالعقل ...طاب بالمنطق ...طاب رد عليا حتى ...عبرنى ...حس بية ....ولاحياة لمن تنادى ...

طاب ياعم والنبى... قولى اقدم اقرار ضريبى على اودة وصاله والحمام عند الجيران لية ؟!!

طاب ياعم والنبى ...هوة مش الشقة اللى انا اشتريتها دى دافع تمنها من مرتبى اللى انت واخد علية ضريبة اصلا ادفع تانى لية مش دة برضة اسمة اذدواج ضريبى ؟!

طاب ياعم والنبى ...الشقة انا كنت جايبها من عشرين سنة بستين الف دلوقت وبسبب التضخم اللى انت سبب فية بقت بستميت الف انا ذنبى اية ؟!!

طاب ياعم والنبى ...الراجل اللى عندة اربع شقق كل شقة بخمسميت الف ياخد اعفا وانا اللى عندى شقة واحدة بستميت ادفع ضريبة لية ؟!

طاب ياعم والنبى ...مش الدستور بيكفلى سكن ادفع ضريبة علية لية ؟!!

طاب والنبى ياعم ابوس كعب رجلك رد علية ؟!

طاب سؤال يدل على غبائى استحملنى ورد علية ....الشركات بتعمل اعلانات علشان تقنع الزبون انه يشترى منتجاتها ...دا طبعا علشان الزبون حر يشترى او مايشتريش ...صح ؟!!!....طاب انت بتعمل اعلان لية ....هوة انا كزبون يعنى عندى الحرية انى ما اقدمش الاقرار الضريبى ؟!!سؤال تانى معلش غبى بقى استحملنى ....مش فلوس الاعلانات دى انا اللى بادفعها ولا انا متهيألى ؟؟!!

آة يانى ياأمة




هناك 7 تعليقات:

  1. دووول عايزين مصلحتك اولا :))))))))))

    بس احنا مش واحدين بالنا

    ردحذف
  2. مساء الخير
    ماهو ده زمن الجبايه المقنعه
    هيجيبوا فلوس منين يعني

    تحياتي

    ردحذف
  3. هي فعلا مينفعش معاها غير يااني يامه لانك حتدفع حتدفع بالذوق بالعافية حتدفع وياساتر ياساتر من قنطرة الدفاتر ي عبد القوي ههه

    ردحذف
  4. بصراحة أنا ما لقيت حد يعبرني وخبط راسي في الحيط وشربت من البحر وبوست الرأس ومحدش عبرني .. قلت لنفسي م فيش غيرك أنت يا رب إللي حتعبرني .. والحمد لله ..

    ردحذف
  5. اصل احنا نستاهل يا دوك

    احنا ليه نقدم ؟

    احنا ليه نعبرهم

    احنا ليه ما بناخدش موقف


    وبعدين ما طول عمرنا بنقولها ياباشا هو انا واقف فى ملكك ده ملك الحكومه

    لحد ما الشعب نفسه بقى ملك الحكومه

    انت عارف معنى القانون ده يطبق يعنى ايه

    يعنى الشعب المصري كله يصبح مؤجر للعين من الحكومه

    يعنى ايا انا عندي ملك وعقال ومش باجره وباستغله انا استغلال شخصي
    ويقولي ادفع عليه فلوس

    القانون ده مش دستوري

    القانون ده مش هايطبق وقول صبرني قالت

    القانون ده بعد كام شهر هايبقى مالوش صوت خالص

    ليه يخلي ملاين البشر دول يقدموا اقرارات ؟

    والاقي من كتر البجاحه وقلة الادب والصفاقه مكتوب فى النموذك

    اختار هى فيلا ولا شقه ولا اوضه على السطوح ؟؟!!!

    هو الى عنده اوضه على السطوح يقدم بها اقرار ضريبى ليه

    هو فى يا جدعان اوضه على السطوح فى اي مكان فى مصر تسوى نص مليون جنيه ؟؟؟

    النموذج مكتوب فيه يا دوك عندك كام حمام ؟؟

    تفتكر ناويين يحاسبونا على دخول الحمام ؟؟

    انا طول عمري باعمل رجيم عشان خايفه احسن يوزنونا بعد كده الى وزنه فوق المثالي يدفع ضرايب

    والى وزنه مثالي يدفع بدل دكاترة رجيم

    وما دام احنا موافقين وجرينا لامؤخذه زي المعيز نقدم وخوفنا واتخرعنا من البؤين بتوع الاعلان يبقى لا مؤخذه برضه نستاهل

    ولله الحمد ما عنديش املاك ولو عندي والله فى سماه ما انا مقدمه والجدع فيهم يورينى نفسه

    باحاول اقنع بابا ما يقدمش بس الراجل ده اكاديمى بزياده

    اااااااه يابا يانا يا امه فعلااااااا

    ليه ليه على الصبح تفكرني

    ليييييييييييييه ما انا كنت ساااااااكته

    الاقيش معاك حبوب ضغط يا دوك


    ايه ده لا لا لا مش من دواا لعيانين بتوعك ياعم ههههههههههههه

    ربنا يصبرناااااااااااااا

    ردحذف
  6. ازيك يا دكتور

    بجد والله دمنا اتحرق من الموضوع بتاع الضريبة دى

    مش فاهمة انا ليه مش في اى سبب منطقي

    ولا عمرى شفت اى حد بيعمل كدا غيرنا

    حضرتك قلت في البوست كل اللى عاوزة اقوله

    لما نشوف بكرا هاياخدو ضرايب على ايه تانى

    ردحذف
  7. النهاردة وانا في اللقاء كلنا قعدنا نقول احنا كلنا مكتئبين ليه؟
    وكل شوية نستعرض شيء من بلاوي البلد ونقول اهو ده احد اسباب اكتئابنا كلنا
    لحد ما عددنا يمكن 20 30 سبب
    الله ده كويس اننا لسه ماشين على رجلينا

    منهم لله وربنا يورينا فيهم يوم

    تحياتي وحسبي الله ونعم الوكيل في كل ضريبة اتفرضت على المصريين من أيام آمون رع :)

    ردحذف