الأربعاء، 3 مارس، 2010

الفرق بين الرجل والمرأة 6

الفرق بين الرجل والمرأة 6

سماح كانت زعلانة وزهقانة ومكتئبه ....كل ماتطلب حاجة من هشام ما يعملهاش ....ويدوخها ويطلع عنيها ويقطع قلبها ...وفى الاخر تقلب بعركة ....سماح بتقول انه المفروض ان هشام يعمل اللى هيه عايزاه ...من غير ماتطلب ....اشمعنى هيه محدش بيطلب منها حاجة ....وعامله زى المكنة الدايرة ليل نهار .....بتعملهم اللى هما عايزينة .....قصدها طبعا هوه وعياله ....

سماح مش فاهمه ان هشام مش زيها ....هيه زى ستات الدنيا كلهم ربنا خلقها علشان تدى ومن غير ماحد يطلب ....لكن هشام برضة زى رجاله الدنيا ...مابيعملش حاجة الا لما ينطلب منه ....خلقة ربنا بقى ...

سماح طبعا ماعجبهاش الكلام ...وقالت طاب ما انا باطلب وبرضة مابيعمليش حاجة ....طاب مابيعملش لية؟!!!......سماح برضة مش فاهمه ان هشام مابيسمعش طلباتها عادى كدا زى البنى ادميين ....لا هوة بيفهم انها بتقول له ....انت مقصر وما بتقدمش كفاية ....وده بيخلية يحس انه مش محبوب ومراته مابتقدرش تعبه ومابتثقش فيه ....فيقوم يدى اقل وساعات كتير مابيديش خالص .......

سماح بعد ماسمعت الكلام ده شاطت ....وقالت ايه هوة ده ...هوه احنا بندادى ...انا فاضياله هوه كمان ....رجالة ايه دى ...دا بدال مايقف جنبى ويساعدنى ...عايزنى اطبطب عليه ...دا ايه لعب العيال دة ....

سماح مش عارفه ان هشام ممكن يعمل لها كل اللى هيه عايزاه وبسرعه ويكون تحت أمرها ...بس لو هيه ظبطته ...سماح هديت وقالت ماشى اظبطة ....بس ازاى يا عم الخبير ؟!!! طبعا سماح بتتريق عليه ....ومش عاجبها كلامى ...ماشى ماشى بكره تعرف قيمتى ....المشكله ان انت لما بتطلبى بتطلبى غلط ....مابتبقيش مباشرة ...بتلفى وتدورى ....ومابتنقيش كلامك .... ليه بقى سماح بتعمل كدة ...اقولكوا ليه ؟ ....علشان خبرتها السابقه مع هشام لما كانت تطلب منه طلب ...يهب فيها ويقولها انت مابتبطليش طلبات ....بطلى بقى ترسمى لى خطط ...ارحمينى يا ابلة الناظرة ....فلما بتيجى تطلب منه حاجه بتبقى خايفه تقوم تلف وتدور ...يعنى مثلا تقوله احنا من زمان ما اتفسحناش ....هيه قصدها عايزة اتفسح لكن هوه فهمها انها بتقول له انت هاملنى ومقصر معايا ...فياريت يا سماح بلاش اللف والدوران...... ياهشام انا عايزة اتفسح سهلة دى ...

تانى حاجة بلاش لت وعجن وانت بتطلبى يعنى بلاش تقديم اسباب واعذار والاهم بلاش كلمه تقدر او تعرف دى .....لانك كل ما لتيتى وعجنتى وقدمتى اسباب وقولتى تقدر وتعرف ...مقاومته بتزيد ...يعنى قولى له هات جبنه رومى وانت جاى ....سهله خالص اهيه ...بلاش تقولى العيال بيحبوا ساندوتشات الجبنه الرومى ...ولنا بأعمل لهم جبنة بيضا بيرجعوا بالساندوتشات ...مع انى باحطلهم معاها طماطم ...بس عيالك مابيستطعموهاش ....مابيحبوش غير ساندوتشات الجبنه الرومى ....تعرف تجيب لنا وانت جاى ربع رومى .....علشان ساندوتشات بكرة .....

تالت حاجة والاهم اختارى الوقت المناسب للطلبات يعنى مايكونش قاعد يعمل شغله ولا يكتب تقاريرة ...وانت تدخلى علية هجم..... قوم غير لمبه الصالون المحروقه بقالها اسبوع ....

طبعا انا عارف ان كلامى مش على مزاج سماح ....طبعا مش عاجبها حكاية لخصى ومباشر والتوقيت والفته دى كلها ...بس يا سمسم الموضوع جايز مايكونش مهم بالنسبة ليكى ...بس هوة مهم قوى عند هشام لانه بيتعلق بكرامته وثقته بنفسة ورجولته كمان ....وبعدين مش اللى يهمك ان المشكلة تتحل .... مش مهم بقى ان كان الاسلوب على مزاجنا ولا مش على مزاجنا ...المهم النتيجة والمشكلة تتحل والدنيا تبقى فى البيس ...ولا ايه يا جميل

هناك 4 تعليقات:

  1. ده ايه هشام الملاك ده اللي متوجهتلوش اي ملاحظة وكله على دماغ سماح الحياة اخذ وعطاء تعايش بين اتنين مش بس طرف واحد

    ردحذف
  2. هههههههههههههههههههههههه
    شوف ورغم اني من زمااااااااااااااااان نفسي راجل واحد يقول مكنونات نفسه
    ولكن
    كل ست
    ست ست مش اي كلام
    بتعرف تقول ايه وامتى وازاي

    فيه راجل لما ينطلب منه الطلب يحب اللف والدوران
    وواحد تاني يحب انها تتحايل عليه
    وواحد تالت يحب مقدمة كريمة مختار ربنا يخليك لينا وتعيش وتجيب يا حبيبي
    وواحد ما يتاخدش غير وش وبجدية وكلام واحد اتنين تلاتة

    وكل راجل من دول لا يجوز استخدام طريقة النوع التاني معاه

    يعني اللي بيحب المباشرة وابوه قال له اوعى مرة تلبي لها اي طلب في ساعة حلوة بينكم لحسن تستغل الموضوع ده وتتكى عليك وتعتبرها ذلة
    ده مينفعش معاه غير انها تقول بشكل مباشر وبلا اي محايلة ولا مسايسة وتتجنب تماما طريقة الأفلام العربي وانها تقول له سونة بتحبني؟ طب هات لي كذا

    واللي كده كده ها يعمل بس بيحب انها تحايله مينفعش خالص مالص انها تكون مباشرة معاه وتشتغل مشيرة خطاب

    واللي بيحب انها تنفخ فيه
    ومع انه فاقس كل حاجة بس بيعمل نفسه عبيط بمزاجه مينفعش ابدا تطلب منه من غير مقدمات

    وختاما كل راجل ابن اصل وابن حلال وعاوز البيت يعمر
    1- بينضحك عليه بمزاجه تماما
    2- بيقر طريقة مراته في طلب اي طلب
    3- بيتجنب انه يحاول يربيها ويعودها لأن الدنيا لسه متقلبتش ومعروف ان جوزك على ما تعوديه مش العكس :)
    4- بيصبر وله الجنة ان شاء الله

    وعلى راي خواطر شابة ايه هشهش الملاك ده يا خوااااااااااااااااااتي

    ردحذف
  3. لا لا لا ده كتير بقى

    هاتي يا ستيته العضوات وتعالي

    يا سلام بقى

    بقى هو الحاج هشام المفروض اننا نعمله من غير ما يطلب
    انما ما نستناش منه يميز لواحده ان مراته مخنووووووووقه عايزه تتفسح

    مش المفروض يسمع لها لما تقوله على تفضيلات عياله طبعا
    يشغل باله هو ليييييييه

    حرام عليك يا دوك ناقس تقولي المفروض ما تدلعش بقى تجيله فى الدوغري وتقوله قدامي ياض

    مش كده ابدا مش عشان هو اناني مش شايف الا نفسه وطلباته يبقى هى المفروض تقول خلاص بقى اصله اناني خلقة ربنا

    لا بقى ما ينفعش ده يبقى ظلم واستهبال من هشام

    يعنى معقوله لما نلاقي حد بيدى نقوله خلاص ادي طول عمرك بلا مقابل وبلا ادنى اهميه لما تعطيه

    ان كان حبيبك عسل برضه يا دوك

    معقوله نشحت الاهتمام

    فكرتني بمحمد صبحي لما فى المسرحيه بقى روبت وكان بيقول هذه دعابه هل اضحك ؟

    وهى تقوله بوس يبوس امشي يمشي

    لا ما ينفعش مختلفه معاك بشده فى النقطه دي

    ما ينفعش نحول الحياه لطرف بيدى من غير يسأل وطرف بيستنى حد يطلب منه يدى ويمكن كمان يتلكك ويقول طريقة الطلب مش عاجباني ورجولتي نقحت عليا فمش هادي

    ما ينفعش طرف ياخد اهتمام وحنيه وطلبك مجاب يا سي السيد وطرف تاني يشحت الاهتمام


    كان المفروض تقول لهشام كمان احترم نفسك يا هشام ولما تقولك ان عيالك ما بيحبوش الجبنه البيضا مع انها بتحط عليها طماطم وابقى هات جبنه رومي

    افهم انها عايزاك تقدر تعبها مع عيالك الى انت مش حاسس بهم
    افهم انها بتعيشك وسطهم عشان تحس انها معاها راجل
    يختلف تماما لما تطلب منه الطلب عن انها تنده على البواب يجبه لها

    افهم انها محتاجه منك مفجأه حلوه تقولها بها شكراااااااا على تعبك
    تقولها حاسس بيكى من غير ما تتكلمي ومن غير ما تطلبي


    من فضلك يا دوك انا بالاصاله عن نفسي وعن عضوات الجمعيه وعن العضوه سماح تحديدا
    باطالب بتسليم هشام عشان نوضبه
    ههههههههههههههههه

    ليه تعمل كده فى هشام

    ردحذف
  4. يا سلام على شحصية هشام المرة دى
    نعحبنى قوى طريقة الرجل المباشر
    بس وى ما قالت ستيتة الرجال انواع
    بس والله ده افضل بدل اللف والدوران الذى تتفنن فيه السيدات
    تحياتى

    ردحذف