الجمعة، 19 مارس 2010

مرجيحة الزمن

مرجيحة الزمن

اسكتوا ...مش نسيت اخد الحبايه امبارح ...آه والله ...والهلاوس رجعت تانى ...لقيت نفسى راكب مرجيحة الزمن ...مرة تاخدنى ناحيه يوم السبت اللى فات ومرة تاخدنى ناحية يوم السبت اللى من خمسة وتلاتين سنه ...مرة اقابل فيها ابو ميدو ...ومرة اقابل فيها ابو كمال ....الغريبه ان السبتين شبه بعض ...اليوم اربعة وعشرين ساعة ...وبرضه الشمس بتشرق من الشرق وبتغرب من الغرب ....ما فيش جديد ...المرجيحة خدتنى على ابو كمال لقيته راجع هوة ومراته من الشغل بعد ما قبضوا المرتب ....ابو كمال بياخد تسعه جنيه ...وام كمال بتاخد سبعه جنيه ....وشويه ورجعتنى المرجيحه ناحية ابو ميدو ....لقيته راجع هوه وام ميدوا من الشغل بعد ما قبضوا المرتب ...ابو ميدو بياخد تسعميت جنيه ....وام ميدو بتاخد سبعميت جنيه ..... رحت لابو كمال لقيته بيدفع الايجار سته جنيه ونص ... يعنى اربعين فى الميه من دخله .....رجعت على ابو ميدو لقيته بيدفع الايجار خمسميت جنيه ....يعنى واحد وتلاتين فى الميه من دخله .... رحت على ابو كمال لقيته بيشترى كيلو لحمه بخمسه وتمانين قرش ....يعنى يعنى خمسه فى الميه من دخله ....رجعت لابو ميدو لقيته بيدفع خمسين جنيه تمن كيلو اللحمه ....يعنى تلاته فى الميه من دخله...رحت لام كمال لقيتها بتعمل كيكه للعيال فى حله الكيك ....رجعت لام ميدو لقيتها بتعمل تورته للعيال وبتزوقها بالكمبوت والكيوى ....رحت لأبو كمال لقيته بيجيب لمراته هديه عيد الجواز .... خاتم اربعه جرام من الصاغة ودفع اتناشر جنيه ....يعنى خمسه وسبعين فى الميه من دخله ...رجعت لابو ميدو لقيته بيجيب خاتم لمراته اربعه جرام ايجيبت جولد من المول بتمنميت جنيه ....يعنى خمسين فى الميه من مرتبه ...... رحت لابو كمال لقيت عيشته اغلى ....رجعت لابو ميدو لقيت عيشته ارخص ...رحت لابو كمال لقيت ماعندوش غير وظيفته ....رجعت لابو ميدو لقيت عندة بدل السبوبه اتنين ....رحت لابو كمال لقيته مبسوط عن ابو ميدو ...صحته احسن من ابو ميدو ...مزاجه اعلى من ابو ميدو ...باله مرتاح عن ابو ميدو ...مابياخدش فياجرا زى ابو ميدو ...المرجيحه وقفت وقعدت اسأل ليه ؟؟ لقيت ابو كمال ناصح ...مخلاش حد يضحك عليه ...ماخلاش حد يبيع له ال.... الطاقيه بالشيئ الفلانى لمجرد انها ماركه... سينييه ... ماخلاش حد يبيع له اوبشن ويدفعه تمنها وهوه مش بيستخدمها ....ماخلاش حد يبيع له افكار هبله وعبيطه وهوه مايعرفش يطبقها ...ماخلاش حد يبيع له جناح الفرخه بتمن الفرخه المشويه بسلاطتها وبابا غنوجها .... ماخلاش حد يسهره للفجر قدام التليفزيون ويحرق فى دمه وينكد عليه عيشته ...ماخلاش حد يقلبه ويطلع اللى فى جيبه ويعيشه الوهم ويملكه اسبوع فى عماره مش موجودة ...

اكتشفت ان مشكله ابو ميدو مش فى الواقع اللى عايشه ...مشكله ابو ميدو فى نظرته للواقع اللى عايشه ...

اسيبكوا بقى واروح اخد الحبايه علشان اعرف اعيش مع ابو ميدو فى الواقع بتاعه ماهو انا مش حينفع ارجع واعيش مع ابو كمال!!!

آ ه ...قبل ماخد الحبايه ...ابو كمال كان مبسوط بمزاجه ولا علشان ماكنش ايامه فيه 0900

هناك 3 تعليقات:

  1. ازيك يادكتور اسلام

    اخبار حضرتك ايه

    انا فاتنى كم بوست حلوين اوى

    تقريبا كنت انا في المرجيحة وقاعدة اقارن لحد ما بئيت مش مركزة خالص في الواقع

    ابو كمال كان باله مرتاح بعيشته البسيطة كان بيفكر بس يعيش هو وولاده عيشة كويسة مرتاحة وبيفكر في يومه

    ابو ميدو بئا الله يكون في عونه شايف ادامه اغراءات كتييير

    حضرتك نسيت الحباية او مش نسيتها بتكتب لنا بوستس رائعة

    ردحذف
  2. د. اسلام
    كان فيه ايميل جميل وده اللينك بتاعه
    http://alkadarwana.blogspot.com/2009/04/blog-post_18.html
    اكيد حتعرف ابو ميدو بائس ليه
    وليه ابو كمال مبسوط لان لا عنده موبايل ولاطالع روحه فى ميكروباس
    تحياتى

    ردحذف
  3. زمن ابو كمال عبرت عنه صباح في اغنيتها عالبساطة البساطة اما زمان ابو ميدو فهو زمان العالم فيه اصبح قرية صغيرة والمغريات كثيرة والكماليات متوافرة اكثر وأكثر وهو ما يجعله دوما لاهثا فقطار التطور يمر سريعا وهو يلاحقه
    تحياتي

    ردحذف