الأحد، 7 مارس 2010

الفرق بين الرجل والمرأة 9


الفرق بين الرجل والمرأة9

هشام وسماح لما حسوا ان العلاقة بينهم بدأت تتوتر قرروا ينزلوا يتفسحوا لوحدهم من غير العيال ...عدوا على بتاع الايس كريم ...ضرب كل واحد اللى هوه عايزة ...وميشيوا يتفرجوا على الفتارين وهما ماسكين ايديهم فى ايد بعض ....هشام : على فكرة ياسمسم أنا حاخد جزء من الفلوس اللى محويشينها ...اشتغل بيها فى البورصه ...الموضوع بيكسب كويس ....هشام كان بيفكر مجرد فكرة بيقولها لسماح ...لسه ماخدش قرار ...سماح بقى فهمت ان هشام بيتصرف لوحدة وبيعتبرها غير موجودة وملهاش رأى ....سماح راحت ردة بسخريه : هوة انت بتفهم فى البورصة ولا حتضيع لنا القرشين اللى شايلينهم للزمن ....هشام فهم ان سماح مابتثقش فيه وفى قدراته وبدا يهاجم :انت اصلك فاهمة ان البورصة زكى رستم يخسر الفلوس ويمسك قلبة بايدة ويقول قلبى ويطب ساكت ...هشام هاجم افكار سماح السلبيه ناحيته ...سماح حست انة بيستهزأ بيها ماسكتتش :يعنى انت اللى بتفهم فى البورصه ..عموما انت حر ...بس ياريت تبقى تشوف حد يعلمك بدال ماتعك وتطير القرشين ...وبدأ كل واحد يلطش فى التانى والموضوع اتقلب من نقاش الى جدال..لغاية ما هشام سكت وقفل بقه وفضلوا ماشيين ساكتين والفسحة اللى بدأت بالايس كريم ساحت على دماغهم ...والرسمه اللى كان راسمها هشام فى دماغة بعد مايرجعوا وينيموا العيال باظط ....يعنى نكد من كله...

المشكله مش فى الاختلاف المشكله فى الاسلوب اللى بندير بيه الخلاف .

هشام وسماح بدأوا النقاش ويادوب بعد دقيقتين بقى جدال ومن غير مايحسوا بدأوا يجرحوا فى بعض ...

هشام ماكنش واخد قرار فى موضوع البورصة كان لسه بياخد رأيها ...وبدال ماسماح تسمعه سمعت مشاعرها السلبيه ناحيته.....ايه بيتاجاهلنى يعنى ...ايه هو انا ماليش لازمة ...ايه هو انا طرطور ....وسخنت نفسها فكانت لازم ترد وتدافع عن ذاتها فقالت له هوه انت بتفهم فى البورصه ...لو هشام بيفهم كان عداها ...وكمل نقاش موضوعى ...بس هوه كمان خد الموضوع بشكل شخصى ..اه يعنى انا عبيط ...اه يعنى انا مايعتمدش علية...وسخن نفسه وفى الاخر سكت واتكتم علشان مايتخانقوش فى الشارع ....هوه السكوت وقفل الكلام فى الموضوع دا حل ....حنشوف

فيه تلت اساليب الازواج والزوجات بيستخدموها علشان يتخلصوا من الم الجدال ..هما فاكرين انهم بالاساليب دى بيتفادوا الموقف لكن فى الحقيقة العكس هوه اللى بيحصل .

اول اسلوب غلط وهوة اسلوب الهجوم ...لما الحوار يبدأيبقى بايخ ...الراجل يتحول للهجوم على اساس ان الهجوم خير وسيله للدفاع ....فيهاجم باللوم واصدار الاحكام السلبيه ...وانت مابتفهميش ...انت ايش عرفك ...ويعلى صوته ويصرخ وبكدة يغصب على الست انها تسمع كلامه وتتقبل وجهة نظرة ...ساعتها بيحس انه منتصر ...والحقيقة انه مهزوم لان الاكراه بيضعف الثقه فى العلاقة ...

الاسلوب التانى واللى استخدمه هشام وهو اسلوب الهروب ...او بالبلدى تكبير الدماغ ...يسكت ومايردش ..ومايتكلمش فى مواضيع شامم فيها ريحه جدال ..وشويه شويه يتحول الى الرجل الصامت اللىكل ستات مصر والغالم بتشتكى منه وتقول عليه فى القعده اياها ...طول ماهو فى البيت قاعد ساكت ومخروس ..ولما يجيله تليفون من صاحبه ياسلام على الرغى والضحك والقهقهة ......الرجاله مايعرفوش انهم بكدة بيجرحوا الستات بطرق غير مباشر ...والنتيجه تلاقى الست تقوم الفجر تشغل الغساله ...وتبدأ تطلع هما فى الاكل ليل نهار لغايه ماتبقى زى الفيل ..

الاسلوب التالت وهوة التظاهر والاستسلام ....ودة غالبا مابتعمله الستات ...بتتظاهر ان مافيش مشكله وان كله تمام ...وتلطع على وشها ابتسامه ساذجه تبين انها مقتنعة وموافقه على اللى بيقوله ...مع انها مضغوطة وزهقانه لانها بتحس انها بتدى بس مش بتاخد وساعات تستسلم وتقبل اللوم والنقد وتسكت ...وشويه شويه تفقد ذاتها وببقى مش مخليه الزبون عايز حاجة بس فى نفس الوقت مش سعيدة ....ودة برضه اللى بيخلينا نشوف واحدة بتطلب الطلاق بعد عشرين سنه جواز ....وتلاقى كل اللى حواليها مستغربين ...ازاى دول عمرهم ما اتخانقوا ...

الحل ياعم الخبير ....عارف اكيد زمانكوا بتقولوا كدة !

الحل ان الاتنين مايخدوش المواضيع بشكل شخصى ....مايفسروش كل كلمه على انها اهانه او سخريه ... مايهاجموش ومايهربوش ومايستسلموش ....وواحد فيهم اى واحد واكيد الواحد دة هوه الاعقل ...بغض النظر عن ذكورية المجتمع ...اى واحد فيهم يقف ويعتذر ...طبعا الاعتذار صعب على النفس ..مش اى حد يقدر عليه ....بس اعتذر بدون ماتعتذر ...اقف وخد نفس وقول او قولى انا شايف انك متدايقة ....وابدا فى مناقشة الموضوع ....الموضوع ..هه ....الموضوع مش الافكار السلبيه ونظريه المؤامرة وذكورية المجتمع ...حوار بين اتنين مصلحتهم واحدة ...مش مهم مين وجهة نظرة اللى تطلع صح ...مش مهم مين اللى يكسب فى الكلام ...المهم المصلحه للجميع

هانت فاضلى حلقتين الحلقة اللى جاية انا حاكتبها واللى بعديها انتوا اللى حتكتبوها علشان نخلص من موضوع هشام وسماح اللى صدعونى ....واشوف بقى موضوع حلو كدة اتكلم فيه ...بلا جواز بلا بطيخ على راى اخوانا السوريين

هناك 4 تعليقات:

  1. تحليل الكلام وحلوله مضبوطه وجميله
    كلامك ممكن غيرك يقوله ويعجب ناس كتير
    لكن للأسف احنا لما بنيجي نتعامل مع زوجتنا وازوجنا بتعامل زي متربينا وشوفنا اهلنا بيتعاملوا مع بعض ازي ومبنحولش نصلح من حياتنا واسلوبنا نهائي
    وزي بيقولوا الطبع دايما بيغلب التطبع
    لكن مش منطلق اقرأ واستفيد من اللي قريته واللي يعجبني يبقي سلوك عندي احاول اتعامل بيه
    وده للأسف في معظمنا
    إلا ماندر
    تحياتي

    ردحذف
  2. الأسلوب المرة دي مش صح خالص

    تسألني ليه
    كأنك سألتني

    أولا خدت المزة المطحونة يا عم هش وأكلتها يا دوب ايس كريم من سوبر ماركو فقرانين ملة
    طيب يابني خلي الليلة رومانسية لله وبعدين لكل مقام مقال

    ثانيا مش معنى خوفها - حتى لو كان بهبل - على فلوسك انك تستهزيء بيها وتقطمها وتكسر نفسها وتعمل فيها عمو الخطير


    ثانيا يعني ايه طريقة الحوار الغير متقدمة دي
    او بمعنى اصح
    دي الولية سوسو تعاني تخلف عقلي

    طب انا راضية ذمتك
    هو لسه فيه ستات هابلة ممكن تعمل كده؟
    مجتش شافتني وسبعي وجملي قال عاوز يشتري ارض زراعية
    علشان يكتر ارض الأجداد
    قال ارض الأجداد قال
    بقى انا العيال اللي خريجين سان جوزيف دول ها يعرفوا يروحوا ياخدوا من عمو المؤجر الإيجار

    مش تقول له انت بتفهم
    وكسة توكسك يا سوسو
    لا نافع فيكي تعليم ولا محو أمية

    لا ينفع موضوع توافقي عليه بدون نقاش وتفكير
    ولا حد بيجبرك تاخدي قرار فوري
    ولا هشام ها يعمل شيء - لو كان عاقل - الا برأيكم واستشارة ناس بتفهم
    وعيب خالص وسوفاج تكسري معنوياته وتقولي له وانت بتفهم؟

    انت بتفهم يا حبيبي
    عندك حق
    والله فكرة مخطرتش على بالي
    ما شاء الله عليك نفوخك ده ألماظ
    بس

    وبعد كوبايتين شاي
    وبعد بس
    حطي اللي انتي عاوزة يا سوسو
    خلاص ها يتقبل منك اي كلام موضوعي

    طب سألت حد موثوق منه؟
    حد علمك الموقف ها يمشي ازاي؟
    هو على العموم ياريت نبدأ بمبلغ بسيط نتعلم بيه ولو كان قدرنا الخسارة نبقى لم نضع البيض كله في سلة واحدة

    ارض زراعية يا حبي حلوة وعزوة وعلى رأي باباك بتاعتنا من الأرض للسما بس :)

    نعلمكم وناكل من بيت حسبو
    قطيعة
    محدش بياكلها بالساهل

    ردحذف
  3. امممممممممممممم

    بلا جواز بلا بطيخ

    هو تليفون المدام كام يا دوك كنت عايزه اطمن عليها يعني مافيش حاجه

    الا فتكرني هاهدي النفوس لا ابدا مش انا اطلاقا مش وش كداااااااا


    بالنوسبه لسماح

    اولا البت سماح دي انا هافكر تاني فى موضوع ضمها للجمعيه ده هاتجبلنا العار يا عالم

    ثانيا
    معلش نقطه حضرتك عشان هشام ابن عم مرات خالك كالعاده طنشتها

    هو كان هايحصله ايه هشام لما يفسحها بدون اغراض يعنى هاه ؟؟ لازم تكون الخروجه والايس كريم تبع مدرسة القرع والتثبيت مافيش لله ورسوله والقلب الي هايصدي من ريحة الطبيخ والفنيك ولا ايه

    وكان هايجراله ايه هشام لو كان قالها ايه رايك يا سماميحو يا حياتي انا بافكر اضارب فى البورصه بجزء من فلوسنا

    طبعا انا عارفه كان هايجراله ايه كان هاتشك فى لسانه طبعا لو قالها ايه رايك اصل ايه رايك دي بتنقح على احساساته الرجوليه المنظريه الهبليه

    وطبعا رد سماح منصب من انها تعامل فى الدنيا كمواطنه من الدرجه التانيه خصوصا لو ما كانتش بتشتغل
    اااااااه بفلوووووووووووووووووسي بقى وانا حر فيها

    على اساس انها بتشتغل خدامه ببلاش طبعا ومالهاش حق فى اي فلوس هى تعيش بلقمتها وجايز يعيارها بلقمتها كمان

    وطبعا ردت بكل رعونه وهبل وتلطيش فى الكلام مش باقولك مش ضماها للجمعيه هاتعرنا كده

    انا شايفه برضه انك تخلص موضوع هشام وسماح ده اصل هشام ده انا قربت اعمله كوفته واعلقه على طبق فى المدونه عندي

    هو اكيد ابن عم مرات خالك يعنى نعملك خاطر ولا ايه
    ؟؟؟

    تسلم يا دوك على تعبك مع البطيخ

    التليفون بقى ما تنساش وحياتك
    نيهايهاهاها

    ردحذف
  4. ياحرام يادكتور

    سماح وهشام دول صعبانين عليا اوى حتى اليوم اللى يخرجو فيه يحصل كدا
    وياحرام كل حد يدخل يكتب كومنت يتحكم فيهم ويقولهم اعملو دا ومش تعملو دا

    بس بجد يادكتور حضرتك اصبت جدا في الطرق التلاتة اللى بيتعامل بها الازواج مع اى نقاش

    وطبعا ستوتة وندى قالو كتير كنت عاوزه اقوله

    وعموما لو الاتنين سواء هشام او سماح بطلو يبصو للموضوع على ان لازم حد فيهم يكون منتصر لرأيه وان الهدف في الاخر هو مصلحة البيت وانهم جبهة واحدة مش اتنين يبئا كل حاجة هاتكون سهلة

    السلسلة دى يادكتور بجد تحفة

    ردحذف