الأربعاء، 24 مارس 2010

مع نفسه



مع نفسه

كان زهقان قرفان متدايق ...على رأى قرد الغناء العربى ...مش شتيمه والله ...دا مدح ...ماهو لما بيغنى بيبقى فيه مرونه وطاقه زى اللى بنحسدوا القرد عليها....المهم صاحبنا فكر بهبل انه يتصل بحد من معارفه علشان يقعد معاه يتكلم ويفضفض ...ماهو البنى آدم مننا لو ما فضفضش ينفجر ...مسك الموبيل لقى عليه ستميت اسم ...مابين اصحاب وزمايل... جيران واصدقاء ...قرايب ومعارف..المفاجأه ان ولا واحد فيهم ينفع ...ماكنش عارف هما ماينفعوش ليه ...بس اهو ماينفعوش وخلاص ...وقرر انه يخرج مع نفسه ...ماهيه الوحيدة اللى حتفهمه وتسمعه وتنصحه لله فى لله ...عزم نفسه على فنجان قهوه فى الركن البعيد الهادى ...وقعد يحكى لها اد ايه هوه مش مبسوط ...وازاى الناس مش عايزه تتقى ربنا ...وحكى لها عن الدنيا اللى مبقاش فيها حاجه حلوه ...وهوه بيحكى ..نفسه ماكانتش معاه خالص ...كانت بتسمعه من غير نفس ...ماكانتش طيقاه ولا طايقه كلامه ....وفجأه انفجرت فيه ....ياعم ارحمنا بقى ...انت بتدور على حاجه مش موجودة اصلا ...هيه دى العيشه ان كان عاجبك ...اعتقنى بقى لوجه الله ....انا كمان عايزه اعيش زى الناس ماهى عايشه ...عايزة اعمل زى الناس ما بتعمل ....وانت هارى امى ...عيب ...مايصحش .... ماينفعش ...مايجوزش ...ما الناس عايشه ومبسوطه اهيه ....رد عليها : ومين قالك ان الناس مبسوطه ....الناس تعبانه ...ردت عليه : الناس مش تعبانه انت اللى تعبان وتاعبنى معاك ....انت اللى عايز تصلح الكون ...انت مالك انت ...انت مالك باللى بيعملو فيديو كليب وبيشلحوا ...انت مالك باللى بيلبسوا نقاب ولا بيقصوا رجل البنطلون ...انت مالك بالراجل ومراته بتتدخل فى حياتهم ليه ....ماهم عايشين ومبسوطين وبيخلصوا من بعض ...ردعليها : ماهو ده بيأثر على العيال ....قالت له : وانت مالك .....العيال كده كده حيتربوا ويكبروا ...هما مرتاحين كده يا اخى ...سيب الناس فى حالها ...مش قاعد لى طول النهار تتريق على ده وتنصح ده وتشتم ده ... رد عليها : انا بقول الصح ...انا بقول الحق... قالت له : صح بالنسبه لمين ...وحق عند مين ...كل زمن وله نظامه ...وده نظام الزمن ده ...مش عارف تتعامل معاه تبقى دى مشكلتك ....مش مشكلتنا ...ماتقرفناش بقى ......رد عليها : ازاى بقى ماهو لو كل واحد شاف الغلط وسكت الدنيا حتخرب ...ردت عليه : ماتخرب يا اخى ...ماهى كده كده حاتخرب ...كده كده حتنتهى ...ماتكولش فيه وتوجع قلبك وقلبى معاك ...وعيش واتمتع بالدنيا .... قال: هوه علشان اعيش واتمتع لازم ابقى فاسد واشرب بانجو وانام للعصر وامشى مع نسوان ...هوه ده النظام اللى بتقولى عليه ؟!....وربنا ...ربنا مش فى الحسبان ولا ايه ؟!!!...ردت عليه : ربنا كبير يا اخى ...ربنا بيسامح وبيغفر ...انت اللى عايز تعيش فى الجنه ...لا يا بابا ...لا يا حبيبى احنا على الارض ...عايز تعيش معانا اهلا وسهلا ...حترتاح وتريحنى معاك ....مش عايز انت حر ...بس اعتقنى وسيبنى اعمل اللى انا عايزاه حتى لو غلط ...مش لازم كله يبقى صح ...وبعدين كفايه عليك كده ...وياريت تنسانى وماتقوليش اقعدى معايا تانى ...على فكره اوعى تفكر انك تمنعنى انى اعيش بمزاجى ...علشان لو حاولت حأنكد عليك عيشتك ...سلام ياعم الصح ...مشت نفسه وسابته قاعد لوحده ...وكمان القهوه بردت ...قال : ياه كان عندى ستميت واحد ماينفعوش يقعدوا معايا ...دلوقت بقوا ستميه وواحد ...مش مهم ..... طظ .......طظ فى الستميه .......طظ فى نفسى ....طظ فى العالم كله ....مادام ربنا معايا يبقى كله طظ .... نادى على الجرسون وطلب قهوه دوبل على الريحه بدل اللى بردت

هناك 7 تعليقات:

  1. اوقات كتير بكون فى نفس حالته
    بس انا مش بقول طظ لا انا بخلى نفسى تجرب علشان بعد كده ماتقولش عايزة اعيش زى ما الباقى عايش حتى لو غلط
    لان نفسى مابتعرفش تكون حد غيرها فبالتالى مابتقدرش تكمل و بترجع لى تانى
    مش كفايه نعرف ان الحاجة دى غلط علشان فعلا نبعد عنها .. طبيعة الانسان انه لازم يجرب و يتلسع علشان يصدق انه لازم يبعد عنها

    ردحذف
  2. هو على فكرة مكانش بيكلم نفسه كان بيكلم شيطانه كان بيكلم قرينه السئ اما النفس فهي على الفطرة والفطرة لايمكن ابدا ان تكون مرادف للخطأ

    ردحذف
  3. السلام عليكم
    أتفق مع رأي خواطر شابة
    دمتم جميعاً بود واحترام

    ردحذف
  4. دوبل على الريحه

    طب خليه يطلبلي معاه طيب

    الحقيقه انا باشبه برضه على الاخ ده

    مش معقول كده انت كل الناس الى بتكتب عنهم باشبه عليهم ولا ايه

    بس انا بانهي المناقشه بينى وبينها بانى برضه ما اعرفش اعيش زي الناس ما عايشه هابقى تعبانه اكتر

    والحته بقى حضرتك الى بتوجعني
    اما احس ان ما يشقينى انى بافكر وابص حواليا الاقي الى مش بيفكروا مرتاحين اكتررررررررررر
    ارجع واقول لا برضه اناعقلي عجبنى على كده نعمه من عند ربنا العقل والتفكير هانرفص النعمه يعنى

    المهم يعنى ان انا مش ريحه نفسي ومعذباها اخر عذاب الحقيقه زي اخينا برضه
    ان كان عاجبها هى الحقيقه مش عاجبها تمشيييييييييييي من الدنيا وتبقى خلصت ونستريح الراحه الابديه ان شاء الله

    فين القهوه طيب ياريت لو محوجه

    ردحذف
  5. النفس دى أنواع فيه النفس اللوامه وفيه النفس الاماره بالسوءشكلك قعت مع الثانيه عشان كده مش عاجبها حاللك وفى نفس الوقت لوقعدت مع الاولى كانت كبرتها فى دماغك وعملتلك انقلاب وعدم رضا على الوضع حوالليك

    ردحذف
  6. د. اسلام
    هى .......انت مالك دى ...انت مالك باللى بيعملوه غيرك من اخطاء وبلاوى
    وكلمة ..انت اللى عايز تصلح الكون يعنى
    دول اللى جايبينا الارض
    لو كل واحد قال لا دا مالى ومال اهلى ومال ولادى
    لو كل واحد رفض الغلط والسرقة والنصب كنا اكيد بقينا افضل
    بس يا خسارة ايد لوحدها ما تصفق
    والله يكون فى عون صاحبك وامثاله

    ردحذف
  7. دكتور اسلام
    ليك وحشة كبيرة كنت متغيبة
    وجاية اسلم واطمن
    باذن الله تكون انت واسرتك بالف خير

    ردحذف