صبره يارب
عم صابر ورث عن ابوة محل مديون وعربيه 124 موديل 1963 ...عم صابر كان عندة 10 عيال ربنا مايكتبهم عليك ....عم صابر كان بين نارين ...نار الديون والاعداء اللى فى السوق ...ونار مصاريف العيال وطلباتهم اللى مابتخلصش ....العيال كبرت وعم صابر لسه بيعافر لوحدة فى المحل والمصاريف ...وبدال ما العيال يقفوا جنبه ويسددوا الديون ....اجتمعوا على العشا وقرروا يطلبوا من عم صابر عربيه جديدة بدال حتة الحديدة اللى راكبينها دى ...اول واحد قال :احنا نجيب لادا حنينه فى بنزينها وقطع غيارها ...رد التانى :لادا ايه يا ابو لادا ...احنا نجيب يابانى ...رد التالت: الا اليابانى ....انت مش شايف اللى بيحصل فى التويوتا ...احنا نجيب لانسر ...رد الرابع : ما اللانسر يابانى يافالح ...احسن عربيه الالمانى ....نجيب اوبل ....رد الخامس : مادام دخلنا فى الالمانى نجيب مرسيدس ...رد السادس :ايوه ...علشان ندفع ضرايب اد دماغنا كل سنه ...احنا نجيب لكل واحد عربيه صغيرة احسن ...رد السابع: وليه صغيرة ...انا عايز عربيه كبيرة ...رد الثامن: بصوا احنا نجيب عربيه 7 راكب علشان تكفينا ...رد التاسع :ومين قالك انها حتكفينا كده فيه اتنين مش حيركبوا ....احنا نجيب عربيه برستيج نجيب كوبيه ....رد العاشر : كده ياعبقرى فيه تمانيه مش حيركبوا ....احسن حاجه ناخد فلوس وكل واحد يعمل اللى هوه عايزة ...العشر عيال راحوا لابوهم المحل وقالوا له احنا عايزين نغير العربيه الكهنه دى ...عم صابر قالهم خلاص تعالوا اشتغلوا معايا .... وكل واحد فيكوا يساهم فى العربيه ...انا معييش فلوس وعليه ديون .... العيال معجبهومش الكلام ...وطلعوا من المحل وهما بيبرطموا ...يعنى هوه يخرب المحل وعايزنا احنا اللى نصلحه ....احنا ملناش دعوة ...هوه السبب ...هوه اللى معرفش يدير المحل ...واحد فيهم راح رايح رافع قضية حجر على عم صابر ابوه ...والتانى فضل يسيح لابوه فى السوق لغاية ماطفش الزباين ....والتالت ساب الجمل بما حمل وطلع على الامارات ....والرابع اشتغل مع اكبر عدو لابوة علشان يخسره ....والخامس قاطع ابوه ومكلمهوش ...والسادس ربى دقنه وقص البنطلون وقال العربيه دى حاخدها فى الجنه ان شاء الرحمن ....والسابع قرر انه يعيش حياه البانجو والحشيش والحريم ...والثامن بقى بينام 18 ساعه فى اليوم ...والتاسع كل يوم الصبح يمسك يافطه مكتوب عليها مش حأفضل صابر على عم صابر ويقف بيها قدام محل ابوه ...والعاشر عمل مدونه وقعد يهلفط فيها ليل نهار ...عم صابر ماستحملش ...تعب ...وقع ...جروا بيه على المستشفى ...وهوه فى العنايه المركزة ولاده كانوا واقفين بره ....مش علشان يتطمنوا عليه ...لا طبعا دول كانوا واقفين بيفكروا لو الراجل ده مات ....مين اللى حيجيب لهم العربيه ...وان ماممتش ازى حيخلوه يجيب لهم العربيه اللى لغاية دلوقت مش عارفين هما عايزينها ليه؟!!!!!!!
الاولاد دي بجد قلبهم ايييييييه
ردحذفدا لو مكنش باباهم ماكانوش عملو في كدا
المفروض انهم يحمدوا ربنا علي ان باباهم مودجود ويحاولو يساعدوه
وهما قلبهم بقي قاسي كدا ليه
لو كان شد عليهم شويه مكانوش عملوا كدا
موش معني الطيبه ان يدلع ولاده وميخليهمشي يتحملو مسئوليه
معاك ربنا ياعم صابر
تقبلي مروري وتحياتي
طب تفتكر ليه ؟؟
ردحذفتفتكر عم صابر يستاهل كده ؟؟
تفتكر هو برضه غلطان ما رباش العيال دي كويس ؟؟
تفتكر هو كده بيسدد ديونه ؟؟
ولا مش دول كلهم ونصيبه كده وخلاص ؟
انا اميل الحقيقه لرأي ان عم صابر ما رباش العيال دي
اعترض على جملة عشر عيال ربنا ما يكتبهم عليك
الا اذا كنت تقصد بهم عشر عيال من النوعيه دي
المال والبنون يظلوا زينة الحياة الدنيا
لو كان فيا صحه كنت هاخلف عشره على فكره
بس انت عارف الفراخ البيضا يا اخويا بوظت البنيه الاساسايه للمجتمع
ياترى عم صابر رمز لمن واولاده واختياراتهم رمز لمن ومحلهم المديون رمز لماذا
ردحذففي بالي شئ سأحتفظ به الى أن أرى دفة التعليقات ستسير في اي اتجاه
تحياتي لك
ياااااااهـ!!
ردحذفعشر عيال مفيش
واحد فيهم يطلع
كويس ورحيم بأبوهـ!
ذنب مين؟حتقولى ذنبهم!
حأقولك مش لوحدهم اللى
عليهم الغلط !كمان هو
عم صابر لأنه وفر لهم
كل حاجة بالساهل
وللأسف دى غلطة
كتير من الاباء
والأمهات
دلوقتى من غير
ما يشركوا او يعرفوا
الاولاد بالمجهود بتاعهم
وبيحاولوا يبعدوهم عن كل
حاجة عانوا منها زمان.الاولاد
لازم يشتركوا مع ابويهم فى هموم الاسرة.
ويعرفوا كل حاجة عن واقع حياتهم وخصوصاً
ان الاولاد دلوقتى بقوا (مفتحين اوى اوى اوى)
انا عارفة عيد الأم بيعمل فيكم عمايله
ردحذفكل راجل بيطلع حاجات تقول
علشان مين بابا يخاطر يتعب ميت سنة
مين اللي نازل كع وشال عشانكم الهم مين :))
بلا اي اسقاطات
ربنا يعين كل صابر على همه
خواطر شابه
ردحذفاللى فى بالك صح
تحياتى لمحبى الرمز وماوراء الطبيعه....هاهاها برافو عليكى بجد
مش عارفه ليه حاسه انك بترمز للبلد فى القصه دى
ردحذفالموضوع مش مقصور على ابن واولاده وديونه
ده حال شعب باكلمه
بس برافو بجد
اسلوب صياغتها ممتاز
انت عارف انا من ساعة ما علقت على البوست ومشيت وانا قاعده اضيق فى عنيه كده واقول قصده ايه هاه قصده ايه
ردحذفهههههههههههههههههههه
ورجعت مخصوص عشان اقرا البوست تاني
وبرضه قلت هالبت قصده الى فى بالك يا بت يا كيداهم
بعدين لما دخلت التعليقات لقيت الكلام صحيح يا بوي
بس اهو طلع زي ما قلتلك ما رباهمش
ماهو لو كان قدم السبت كان لقى الحد قدامه
هع هع
تحياتي للدماغ العليا
احبكم يا مدوني مصر لما تشغلولي دماغي والله لولاكم كان زمانه صدى من دخان الطبيخ
د. اسلام
ردحذفحقيقى دا حال البلد
كل واحد عايز من غير ما بفكر ولا يتعب
واللى مش بجح بيسيب البلد ويطفش
واللى يدروش وكان هذا هوالحل
بس دى غلطة مين
؟؟؟؟؟؟؟؟؟؟؟؟