الأربعاء، 10 مارس 2010

الشو والبير

الشو و البير

الشو فى حد ذاته مش حاجه وحشه ...بالعكس ...دا بيشد الانتباه ويوصل المعلومه ...بس لما تكون معلومه محترمه ...حاجه كدة كويسه فيها عقل وفكر وهدف وتطوير...وبرضه مش عيب ان الواحد يعمل من ورا الشو ده فلوس وشهرة ...حقه مادام بينفع الناس ...لكن العيب اللى مبيبقاش عيب لو طلع من اهل العيب ...ان الواحد يقع فى بير الوضاعه والسفاله....العيب فى استغلال النفوذ والعلاقات والتحصينات ...العيب فى استغلال المنابر اللى بقت لكل من هب ودب مادام مظبط ومسستم ...وبدال ماتستغل فى التنوير والتطوير بقت تستغل فى الشتيمه والتلميحات الخارجه وتصفية الحسابات....بس تعمل ايه فى شهوة المال والشهرة والنفوذ...واللى تغلب به العب به ....مبدأ المفلسين والجهله واللى ملهومش مبدأ ولا قيم ...الهطوا فلوس وعبوا شهره وسلطه ...والبسوا البدله الموف والكرافته الزرقا .....بس برضه الخلفيه حتفضل حمرا ....وافضلوا ضلمونا بطلعتكم البهيه كل يوم وكل ساعة ....وياخوفنا لا تطلعولنا من فرن البوتجاز ....ويارعبنا واحنا بنشد السيفون ....آه يانى يامه على الحياه واللى فيها ....جاتكوا الهم مليتوا البلد ......بس ارجع واقول الحق على عبحق ...ماحنا اللى مش عايزين نتحكم عن بعد ....يالله ....الله يرحم المبادئ والاخلاق ...الله يرحم كل ثابت على مبدأه ويرضى كل منصور على نصره ....والفاتحه لسيدى ابراهيم الدسوقى وسيدى المرسى ابو العباس ....وبالمرة للسيد البدوى وكل الاوليه الجدد...

ويارب ترجع لنا بالسلامه ياريس ....ومعلش فقعنا مرارتك ...بس ماهو انت كمان اللى جبت لنا اللى خلونا كده... خلونا بعد ماكنا بنبنى السد بقينا منكمل عليه!!!!!!!!!!!!!!!!!

هناك 3 تعليقات:

  1. ده زمنهم
    زمن الشو بتاع العيب

    امبارح كان فيه برنامج مستضيف السيد شديد الركن سامي العدل
    اتذكر فيما اذكر ايام ظمان ان سامي العدل ده مكنتش تتمنه بعشرة جنيه صحيحة
    الأخ امبارح بيتكلم وكأنه أحد ملوك العرب
    انا اشرف زكي مبيعملش حاجة في النقابة من غير شورتي
    معروف للكل اني النقيب الفعلي ولكني مش بحب اظهر في الصورة
    يا ستي انا الخاااااااااااااااااال بتاع الوسط كله
    موافق على التوريث طبعا ده جمال احسن ناس
    الحجاب؟ مين حجاب ده اللي بتتكلمي عليه
    يعني ايه سنيما نظيفة دول ستات نفوخهم طق
    الجنس فلة وحلوة وانتي كخة يعني ايه بنعلم ولادكم العيب انا ابني اللي في الأميريكن سكول بياخد الحاجات دي من سن 7 سنين علشان كده مثقف وهو قاعد جنبي بيتفرج بعكسي انا كنت بتكسف لما اقعد جنب بابا اتفرج
    وغيره وغيره
    جميل قوي اني اتفرج على برنامج زي ده
    بيقول فيه بكل صراحة ان سمية الخشاب خدت في مسلسل رمضان 6 مليون جنيه
    لما اعرف كده انا وغيري
    ننبسط
    نهدى
    ننبط
    نعرف ان الحياة الدنيا دي مش بتاعتنا
    يمكن بعضنا يتوب لربنا علشان الأخرة هي امله
    واكيد الأغلب سيتبع الغاويين علشان يعوم معاهم على وش الفتة

    الشو بتاع العيب متوغل ومنتشر وقرب يقتل في القلب والله

    صباحك هنا

    ردحذف
  2. ما تفكرنيش يا دوك
    انا قلبي بيتقطع لما اشوف الاشكال دي

    ولما باشوف القنوات بتاعتنا الى ممكن بكل بساطه تقلب حال المجتمع ده راسا على عقب

    وترفعنا من الحضيض للسما بجد

    حتى المتخلف الى ستيته بتتكلم عليه بشركة الانتاج الهبله بتاعته ممكن يعملوا افلام تروج لنا احنا عالميا كفكر وكدين وكدوله حتى الترويج الاقتصادي كمان ممكن يعتمد على السينما

    بس احنا لا احنا مش فاضيين عندنا حاجات اهيف حاجات اقذر حاجات مكسبها اقرب ودوشتها اكبر

    باحزن من قلبي وانا شايفه كل صاحب فكر فى المجتمع ده بينداس
    وولاد التييييييييييييييييت هما الى منشالين على الاكتاف وبيلمعوا والناس بتسقفلهم

    حسبنا الله ونعم الوكيل






    بعدين احنا فينا من كده اكتب حاجه فى التعليقات قوم ترفعها فوق فى الموضوع وبالامضاكمان ماشي ماشي

    طب ما انا الوحيده الى علقت خليك فاكرها بقى

    ردحذف
  3. تعرف اليوم على الفذاء والدتي قالت لي لم البرامج الناجحة والتي ينفق عليها ببذخ هي فقط على شاكلة ستار اكادمي لما لا تكون عندنا نفس البرامج لتخريج علماء ولتخريج حفظة قرأن فأجبتها ان المقياس الان ليس ما يحقق النهضة او يفيد المقياس هو العائد المادي الذي يزداد كلما ازدادت هيافة المعروض
    انا كنت من متابعي البرامج الرياضية المصرية لكني انسحبت عندما تحولت الى زنقة ستات لتصفية الحسابات بين المذيعين ومن والاهم لذا فأنا قررت التحكم عن بعد والابتعاد أحسن من حصص العذاب اليومي وفقعة المرارة
    تحياتي لك

    ردحذف