الخميس، 4 مارس 2010

الفرق بين الرجل والمرأة 7

الفرق بين الرجل والمرأة 7

سماح كانت نار الله الموقدة ...ادينى نفذت اللى قولت عليه ياعم الخبير ...لخصت واخترت الوقت المناسب ..والطلب كان مباشر ...امبارح كان قاعد مابيعملش حاجة ...قولت له انزل هات لنا لبن وزبادى ...أهوه طلب متلخص ومباشر اهوه ...قام قايلى لا ...ما استحملتش بقى ...رحت منفجرة فيه ...هوة اللبن ده عشانى ...دا علشان عيالك ...انت مش عايز تعمل حاجة ولا تساعدنى ابدا ....انا مهرية ليل نهار وانت ولا هنا ....بترجع من شغلك تنام يا تتفرج على التليفزيون ....طبعا هوه ماسكتش ...المهم كانت ليله سودا ودخلت نمت مع العيال ...حسبى الله ونعم الوكيل فيك وفى نصايحك ...شاكلك كدة لامتجوز ولا تعرف حاجة عن الجواز ... طبعا دا عادى ...ماهو قالوا زمان ماينوب المخلص الا تقطيع هدومه ....فى الاخر انا طلعت سبب النكد والليله السودة وانها راحت نامت مع العيال ...قال يعنى هيه كل يوم نايمه جانبة ...ماشى ماشى ...هوة بصراحه الحق عليه برضة ...ما انا نسيت اقولها المرة اللى فاتت ....انها لو عملت اللى قولنا عليه ...ممكن برضة مايعملش او يقول لا ... نسيت اقول لها لو قال لا ...اسكتى يا سماح ما ترديش خالص ...وان ما قدرتيش تسكتى قولى مش مشكله انا حتصرف ...خليه يحس انه يقدر يقول لا وبرضة يلقى منك التقدير والحب .... وانك رغم اى حاجة مقدرة اللى بيعمله علشانك وعلشان عيالك ....ساعتها حيحس انه حر والحرية دى حاجة مهمه قوى عند الرجاله ...ولما يحس انه حر حيقول حاضر ...اتقبلى كلمة لا ...لانه لو قال لا وانت رديتى كويس حيشيلها لك والمرة الجايه حيقول ايوة وحاضر ....وممكن كمان يقول حاضر المرة دى مايستناش للمرة الجاية ...اى نعم هوه حيهلفط ويبرطم شويه ...برضه سيبيه ماترديش ...اصبرى واسكتى وماتخديش الموضوع بشكل شخصى ....

اللى ماتعرفيهوش يا سماح ان الراجل مجرد مايلبس وينزل ويجيب اللبن حيفك وينبسط لانه بيشوف نفسه اد ايه هوه راجل جدع وشهم وبيساعد عياله ومراته وبيجيب لهم طلباتهم ...فيرجع لك مبسوط وسعيد ....كملى عليه انت بقى ...مش قصدى اكسرى نفسه وقولى له ماكان من الاول ...ولا تقولى شوفت المشوار ماخدتش ربع ساعة كان لازم يعنى تناهدنى ...لا والنبى مش قصدى كدة خالص ...انا قصدى تكملى سعادته واحساسه بنفسه ...وهوة داخل قولى له ربنا يخليك لنا دا احنا من غيرك ولا حاجه ...حتلاقى سعادتة بتزيد وتقديره ليكى بيزيد والمرة الجاية حيجيب اللبن من غير ما تقولى له ....علشان خاطرى ياسمسم لو قال لأ اسكتى خالص او قولى مافيش مشكله وبينىله حبك وتقديرك ....

قبل ما يا سماح تنطقى وتلطشى فى هشام وفى الرجاله وتقولى ايه الدلع المرء ده ....ايه الحساسية الفارغة دى ॥حأقولك سر ...بس بينى وبينك ...ماتقوليهوش لعدوك ...الرجاله عبيطة ... ايوة يابت عبيطة وهبله كمان ...عندهم عقدة اسمها التقبل والتقدير ...طول ياختى مانتى متقبلاهم ومقدراهم يبقوا زى الخاتم فى صباعك ...لكن عديكى بقى لو حسوا كدا انك مش مقدرة تعبهم ولا بتحاولى تصلحيهم ولا تعدلى عليهم ...يتقلبوا ياختى وينكدوا عليكى وعالعيال وايامك تبقى هباب ...اهو انا قولت وعملت اللى عليه ...وانت حره بقى تسمعى ماتسمعيش انتى حرة بس ماترجعيش تقولى نمت فى اودة العيال بسبب نصايحك ....هه اقوم انا بقى.... اقعدى بالعافيه

هناك 5 تعليقات:

  1. مرة من نفسنا وجه نصائح لهشام ليه دائما سماح هي اللي مطلوب منها تهنن وتدادي أليست انسانة لها ايضا قلب ومشاعر وأحاسيس انصحه هو ايضا وعلمه انه اوقات هي لا تحتاج منه الا كلمة طيبة بل واحيانا نظرة رضا تكفيها لكنها لاتلقى منه الا الجمود
    لاتكن احادي النظرة ترى كل العيوب منها وترى أن الحل يجب ان يأتي ايضا منها وهو الملاك البرئ هو ايضا طرف في علاقة العطاء فيها يجب ان يكون متبادل

    ردحذف
  2. الحرية
    مطلب انساني طبيعي جداااااااااااااا
    لرجل أو لمرأة
    لا يوجد انسان يقدر يعيش مخنوق مع شريكه الساسي في الملعب

    الحرية مش سيبان لراجل او ست
    الحرية تقدير للمساحات الطبيعية بين البني ادمين
    والمحترم محترم بحرية او بخنقة


    الرجالة عبيطة؟
    أنا معرفش يا خويا انت اللي بتقول :)

    هم مش عبط هم بيحبوا الستات تداديهم
    وده ليه؟
    لأن ماما الله يكرمها الشرقية العربية ذات عقدة الذكر الباينة والمستخبية
    قالت له انت اللي ليا والعين الجوانية
    ده انت تقعد على البساط وتختار ست البنات
    ده انت نعمة وبنت الهابلة سماح ان شا الله تعمى


    هع هع هع والله اضحكتني اضحك الله سنك
    قال هات لبن
    لأ
    هع
    حقيقي هع

    لكل فعل رد فعل مساوي له في المقدار ومضاد له في الإتجاة
    الله يرحمك يا نيوتن ويبشبش الطوبة اللي تحت راسك

    لأ يا سوسو تعالي انا اقول لك يا حبيبتي

    انتي طلبتي اللبن
    هو مجبش اللبن
    اوعي تتخانقي
    اوعي يا بلهاء تنامي مع العيال
    ممكن هو اللي ينام مع العيال يا حبيبتي
    خروجك من أوضة النوم زي الإنسان اللي بيتخلى عن اغلى ما يملك .. الساعة مثلا :)

    ولو سمحتي له كمان ينام برة اوضة النوم ها اعتبرك ست خرونج ومش كينج كونج ابداااااااا

    الله يرحمها صاحبتي وانتيختي
    جه يعملها أول الجواز مرة
    قالت له لو بت براها مرة واحدة
    ها تبات براها على طول
    متخانق متهبب تنخمد هنا
    فعلا فين ستات زمان أيام ما كانت العشر بيضات بنص جنيه :)

    امال الحل ايه؟
    فوتي يا سموحة تماما
    واوعي تتهببي تلبسي وتنزلي تجيبي اللبن
    ده عند أنص
    انتي تقعدي ست الستات
    وتسيبي العيال تصوصو زي العصافير جنبه
    وتاني يوم وبكل هدووووووووووووووء متعمليش غدا

    تعرفي تبردي في اعصابك؟

    صدقيني ومن غير ما تذليه ولا تهيني نفسك ولا تنبطي بالكلام المر اللي بيقسي القلب
    كل شيء بعدها مش ها يتكرر

    الهدوء
    الصبر
    البوز .. نو
    الكلام المر .. أوعي
    غباء ماما مع بابا .. أشرحك

    البرود
    تقصير مساوي لتقصيره وبس
    أوضتك في إيدك
    كيدك في مخك
    مطوتك معاكي
    نكشك بقى ومصمم على خناقة
    أو يستعبط يقول لك مساء الفل يا جميل ... تشرحيه :)


    العواف بقى يا دكتور اسلام
    انا قلت اجي اهدي النفوس وأروح اشتري اللبن :)

    ردحذف
  3. طيب والله انت راجل بتفهم جدا جدا جدا

    عارف فعلا الكلمة الحلوة الهادية بتجيب نتيجة

    وبجد والله كل كلمة قلتها صح مليون في المية وبصراحة عن تجربة شخصية بالظبط هى دى الطريقة اللى تنفع مع الرجل

    ميرسي يادكتور اوى على سؤالك وذوق حضرتك

    ردحذف
  4. لسه لم أقرأ البوست الحقيقة

    لكن قرأت ما دنتوه على اليمين

    من ممنوع دخول كائنات اسرائيلية :)

    عجبني الفكر :)

    ردحذف
  5. لا انا عندي حل احسن

    احنا ندي لهشام شهادة معاملة الاطفال

    اسمحلي يعنى ولو انك تزعل جايز يكون هشام ده قريبك ولا حاجه من بعيد

    ده كده احنا دخلنا فى شخصيات غير ثويه

    مش واثق من نفسه ومن رجولته وعبيط كمان يعنى حاجه طين خالص

    طيب انا عايزه ذمتك يا دوك

    لما تقوله انزل هات لبن بعد ما تحياله وتدلعه وتشخلعه
    وهو كمان يقولها لا

    وهى بقى المطلوب منها تبقى اعصابها فى تلاجه وتقوله براحتك يا جملي
    مشيها جملي

    ولما يبقى بقى هو يتوافق مع نفسه ويحس انه راجل بكفايه وينزل يجيب اللبن

    حضرتك يكون العيال ماتت من الجوع

    يعنى انا معاك الكلام ده لما يكون مثلا طالبه منه موبايل قلم روج ديش ووشر

    انما لبن للعيال ؟؟

    عياله ؟؟

    ومطلوب منها النحنحه والمناحيه دي كلها

    ده يبقى طز فيه وطزين فى عياله والعيشه والى عايشنها

    والنبى يا دوك الهي يصلح حالك انا شايله المراره وربنا

    انت بتعمل فينا كده ليه يا دوك مش اخواتك الصغنين احنا ولا ايه
    هههههههههههههههههههههه

    ردحذف