مش عايز اتجوز 8

العروسة السابعة

المرة دى كنت عند واحد صاحبى ... شفت فى الشارع بتاعه بنت حلوة عجبتنى ... سألته عنها ... قالى :ناس كويسيين ... وابوها وامها موظفين حكومة محترمين ... والبنت ماحدش فى المنطقة كلها يقدر يقول عليها نص كلمه ... قولت على خيرة الله .... صاحبى خد لنا ميعاد .... الخميس طبعا ...وانا راجع من الشغل .... ايوه ياسيدى ...من غير تريقة ... جبت علبة الجاتوه وباليل خدت امى واختى ورحنا للعروسة .... امى واختى خرجوا يتفرجوا على الجهاز التحفه اللى العروسه جايباه ... وابو العروسة طلع يصلى العشا ...العروسة قال لى : اتفضل البيبسى ...ولا انت مابتحبوش ... وقبل ما أجاوب كملت : اصل انا بأموت فى حاجة اسمها بيبسى ... انا بأشرب فى اليوم على الاقل ازازه اتنين لتر ... هما بيقولوا لى ان ده خطر وبيسبب هشاشه العظام ... بس اعمل ايه ماقدرش اعيش من غير بيبسى ...امبارح على العشا رحت اجيب ازازة البيبسى من التلاجة ...مالقيتهاش ... زعلت قوى ...ماما قالت لى معلش اصلى خالتك سوسو كانت هنا وماكنش عندى حاجة اقدمها لها ... خالتى سوسو دى كل شوية تيجى وتقعد تشتكى من الواد فؤاد ابنها ... واد لعبى كده وملموم على شلة فسدانه ... طول النهار فى الشارع ... بقاله تلت سنين مش عارف ياخد الثانويه العامة ... انا مش عارفة الناس مستصعبة الثانويه العامة دى كدة ليه؟ ... انا خدتها من غير دروس .. اه والله وجبت مجموع كمان ... كنت باحفظ الكتب من الجلدة للجلدة ... كان عندى واحده صاحبتى اسمها سميرة ... كنا صحاب الروح بالروح ...مافترقناش الا لما خلصنا الكليه ... بس لغاية دلوقتى احنا صحاب ... موبيلات وكده .. وساعات بنتقابل ... مش كتير يعنى ماهى اصلها اتجوزت واتلخمت فى العيال وجوزها ... حاكم جوزها على طول مسافر اكل عيشه بقى ... فهية اللى بقت مسؤله عن كل حاجة ... سميرةواحنا فى الثانويه ... كانت بتاخد دروس ... وكانت تقولى يابت ماتيجى معانا .. احنا ساعات بنزوغ من الدروس ونطلع نتفسح ونتفرج على المحلات ... طبعا انا ماكنتش برضى .. علشان انا عارفة لو بابا عرف يطين عيشتى ... اصل بابا ده شديد قوى... هوه حنين بس مايحبش الكدب ابدا ... حتى فى شغله ... مزعل ناس كتيرة منة ... اصل بابا دة عامل زى السيف ...لايعرف شمال ولا يمين ... على فكرة بابا قالى انك مهندس كمبيوتر ... يعنى انت بتفهم فى الكمبيوتر ؟ ... اصل انا نفسى اشترى كمبيوتر ... نجلاء ... صاحبتى بتقول لى على الفيس بوك والمدونات ... نفسى اشوف الحاجات دى ... بس مستصعبه الكمبيوتر مع ان نجلاء بتقولى دا سهل قوى ... كل الحكايه اخد دورة ال سى دى فى اسبوع وابقى ممتازة فيه ... ولو انى يعنى ماليش فى حكاية التكنولوجيا دى ... انا بحب المسلسلات ... شوفت تمثيلية اهل كايرو ... كانت حلوة قوى ... والبت السوريه دى اللى اسمها كندة ... حلوه قوى ... بس بصراحة كدة مستغربة النهاية ... ازاى اب يقتل بنته ... ايه العباطة دى ...ولا تمثيليه زهره ... حلوه بس ماكنتش متبعاها قوى ... رمضان بقى وانت عارف ... ماهو انا اللى كنت بأحضر الفطار ...وانضف البيت ... ماهى ماما الله يكون فى عونها بتشتغل ... واختى ايدك منها والارض ... حاطه الام بى ثرى فى ودنها طول النهار وسرحانه ... معلش لسه صغيرة بكرة تكبر ... الا انت عند اخوات تانيه غير اختك اللى جات معاكوا دى ... بس الحق ... باين عليها طيبه .. ومامتك كمان ...شكلها طيبه ... حاكم انا طول عمرى ليه نظرة فى الناس وعمرها ماخيبت .... ايه ياباشمهندس انت مابتشربش البيبسى ليه ... اوعى يكون مابتحبوش ... دا أنا باموت فيه....

حاولت انى اتكلم واقول لها كفايه بقى ... بس ماقدرتش ... ايه دة ... يانهار مش فايت ... انا .. انا ... انا بقيت اخرس........

مش عايز اتجوز 7

العروسة السادسة

مش مهم مين اللى جاب لى العروسة ... ماهى ماعادتش تفرق ... ما خلاص ... بقيت اكره يوم الخميس ... ويوم الاربع علشان بعدة الخميس ... ويوم الجمعة علشان قبله الخميس .... الخميس ده قررت انى اروح فاضى وماخدتش جاتوه ولا بسبوسة ولا شيكولاته ... رجعت من الشغل ... دخلت نمت ... اختى صحتنى وقالت : قوم يا خالد حنتأخر على الناس ... قومت لبست واحنا نازلين امى صرخت : نسينا الجاتوه .... قولت: لا مش جايب وحنروح لهم كدة ... قالت لى الجاتوه فوق على السفرة ... قولت : جاتوه ايه اللى على السفرة ؟ ... قالت لى: ماهو الراجل صاحب محل الحلويات بعت علبة جاتوة مع الولد اللى بيشتغل عندة ... وقال انه خاف الا تكون رجعت متأخر من الشغل ومقدرتش تعدى عليه ... طلعت خدت علبة الجاتوه ... ورحنا للعروسه ... كالعادة ام العروسه خدت امى واختى وطلعوا برة... ابو العروسه قالى : بعدئذنك يابنى .... قاطعته : اتفضل ياحاج صلى العشا .... .. العروسه المرة دى ما كانتش حلوه ... ولا وحشه ... عاديه يعنى ... بس كانت لابسه فستان ماشى مع الطرحة والجزمه والاكسسوار ... اى نعم هوه عملى شويه مش بتاع مناسبه .. بس يدل على ان ذوقها حلو فى اللبس ... واتكلمنا ... اتكلمنا فى كل حاجه ... فى السياسة ... فى الاقتصاد ... والفن ... والثقافه ... طلعت بنت مثقفه وواعيه ومريحة فى نفس الوقت ... وفجأة وبدون سابق انذار قالت : انا موافقة من حيث المبدأ ... بس ليه شويه شروط لازم توافق عليها ... ... قولت مندهشا : اسمع ... قالت بس مش تقول ايوة .. وموافق... . قولت : امال اعمل ايه ؟ ... قالت الشروط دى لازم تتكتب فى عقد ويتسجل فى الشهر العقارى ... قولت باستغراب : طاب ليه كدة؟ .... قالت : علشان الرجاله مالهومش امان .... بنت خالتى جوزها اتجوز عليها بعد عشر سنين جواز واتجوز واحدة من دور عياله .... قولت : بس صوابعك مش زى بعضها .. فيه رجاله محترمين وبيعرفوا ربنا .... قالت : وانا ايه ضمنى انك تطلع واحد منهم ... ضحكت وقولت : سمعينى يا ستى شروطك ... قالت لى واحد ... تدفع لى 100الف جنيه اذا طلقتنى ..قولت : ياستى ربنا مايجيب طلاق ثم احنا لسه اتجوزنا ....وبعدين عقد ليه مش فاهم مش دة بيتكتب فى القسيمه ... قالت لى : لا ده مالوش دعوه بالمؤخر ... المؤخر لوحدة ... ده عقد مدنى غير الحقوق الشرعية ... اتنين ماتتجوزش عليه ولو اتجوزت عليه تدفع لى 50 الف جنيه وتطلقنى ... قبل ما افتح بقى كملت بسرعة وقالت : تلاته شغل البيت بالنص ... قولت طاب والنص ده حنحدده ازاى ... قالت : نتفق ... انا عليه الطبيخ وانت عليك غسيل المواعين ... انا انضف البيت اسبوع وانت تنضف البيت اسبوع ... انا عليه الغسيل وانت عليك التنشير ... صرخت : لااااااااا كدة ظلم ... انت يا دوب بتحطى الغسيل فى الغساله وتدوسى على الزرار ... لكن انا حيطلع عينى فى التنشير وينكسر ضهرى ... دا غير الحتت الصغيرة اللى تزهق فى تنشيرها ... ولا المشابك اللى بتقع منى ... لا ..والف لا .. قالت لى : خلاص انت عليك الغسيل وانت التنشير ... قولت اه .. كده ماشى ... فيه حاجة تانى ؟ ... قالت لى اه .. اخر حاجة ... العيال .... قولت بسخريه : انا مش حأعرف ارضع ... قالت لى : لا مش حترضع ... انت حتغيرلهم .... قولت لها ... انا موافق ... بس انا كمان ليه شروط ... قالت لى : حقك ... قول ... قولت : وبرضه فى عقد ويتسجل فى الشهر العقارى ...قالت لى : قول شروطك .... قولت : انا اصرف على البيت شهر وانت تصرفى على البيت شهر ...مصاريف مدارس العيال ... انت عليكى واحد وانا عليه واحد ... والشقه اللى حنسكن فيها تدفعى لى نص تمنها بسعر النهارده ... وتشيلى نص الشبكة ونص المهر ... وتكتبى انك متنازله عن حقك فى الخلع ... وانك اذا ما نفذتيش اى بند من البنود دى.... تدفعى لى 150الف جنيه ... قالت لى : انت بتهزر مش كدة ... قولت لها ايوة طبعا بهزر ... وقلدت اسماعيل ياسين وهوه بيقول سلاموووو عليييكو... صحيح... مافيش علاقة بين العلام والثقافة وبين الصحة النفسية.

الغازية والشاطر

الغازيه والشاطر

ياسلام لما الواحد يبقى شاطر... شاطر بجد ... يقعد كدة ويحط رجل على رجل والترقيه تجيله لغاية عندة ... تقوله :والنبى تعالى عندنا علشان نستفيد منك ومن علمك ... واهو برضه يكون لينا ضهر فى الزفت الدولى علشان مايفضلش كاتم على نفسنا ... اما المايل.... مايل جوة قبل برة ... يحرقها ويضيعها جوة ....ويبوس ايدين وجزم ولاد عمه... ويسب فى دينه علشان الحلويين يرضوا عليه بره .. وبرضه ياخد خازوق ... اصل حاكم الخوازيق دى مزاج مش اى حد يقدر يعرف طعمها ..... عارفين لو الشعب المصرى ده رجاله زى زمان ... رجاله كدة من اللى حرروا سينا وعدوا القناه ... رجاله من اللى لسه عندهم نخوه ....عارفين كانوا عملوا ايه ...؟ كانوا شالوا المشاعل وولعوها ومشيوا لغايه ما يوصلوا للاوبرا ... ويحوطوها .. ويفضلوا ينادوا ... بصوت يجلجل البلد ... ينادوا ويقولوا الغازيه لازم ترحل ... الغازيه لازم ترحل ... ساعتها الغازيه حتتنيل ترحل بقى ... وطبعا علشان ازمه الرجوله اللى صايبه البلد ... فمقدمناش غير ان احنا نكشف راسنا ... ساعة مغربيه ونقول : يارب ... يارب ... قضاءك وقدرك بحق جاه حبيبك النبى

نقص فى هرمون الرجوله

نقص فى هرمون الرجوله

ابو السيد قاعد على الرصيف قدام البيت بيشرب معسل ... المعسل فيه حشيش ... بس مش دى القضية ...الحكومة رايحة جايه عليه وعامله مش واخدة بالها وساعات بتقعد تشرب معاه ... برضة مش دى القضية ... واخد الرصيف هوه وشلته ومحدش عارف يعدى ... ولا دى حتى القضيه ... القضيه هوه بيجيب فلوس المعسل والحشيش منين لما هوه طول النهار والليل قاعد بيشد انفاس .... اكيد اكيد فيه حد هوه اللى بيديه فلوس المعسل والحشيش ... والاكل واللبس ليه ولعياله الاربعه ...السيد وصابرين وسكرة وعلى ...

نصرة .... مرات ابو السيد هيه اللى بتجيب الفلوس ... كل يوم تطلع من بيتها الساعة تمانيه وترجع مع ادان المغرب ... هيه بتقول انها بتشتغل فى مصنع حلويات ...بتعبى الطوفى اللى بتطلعة المكنه فى الكراتين ...وطبعا مش دى الحقيقة .. لانها عمرها مارجعت بحبتين طوفى من المصنع تحلى بيهم بق العيال .... الحقيقة ان نصره بتشتغل فى البيوت ... بتنضف وتلمع وتسيق وتشيل مراتب وتغسل سجاجيد ... وتستحمل مركبات نقص المدام... وعين الباشا اللى تندب فيها رصاصه ....نصره وهيه راجعة بتجيب الخضار والعيش وساعات كدة شويه سقط ... حتتين فشه على كرشة .... اهى حاجة تحسس العيال انهم مش بعاد قوى عن الحاجة اللى اسمها لحمه ... وطبعا مابتنساش علب المعسل ... او بمعنى اصح ماتقدرش تنسى المعسل وربع كيلو الفحم ...والاهم العشرين جنيه تمن حته الحشيش ...والا الليله تبقى هباب وتقوم الصبح عنيها زرقا ... طبع قصدى حوالين عنيها مش عنيها عنيها ... نصرة بترجع مهدودة ... تعمل الاكل للعيال وتعشيهم ... وترمى نفسها على السرير زى الفسيخه لا بتلف شمال ولا يمين ....ابو السيد بعد مايخلص حته الحشيش اللى بتخليه يشوف اللى ماحدش شايفة ... يشوف نفسه راجل قوى ... يدخل على نصرة الغلبانه علشان يأكد رجولته ... وطبعا مافيش اى مجال لكلمه لأ ... ولا مش قادرة ...ولا تعبانه ... والا العين التانيه هيه كمان حتزرق ...وبرضه حيثبت انه راجل ... القضيه الاكبر بقى ....ان حاله ابو السيد ونصره بدأت تنتشر ومبقتش حكاية ابو السيد ونصرة ... دى بقت حكاية ابو يوسف وعزة ... وابو زياد وشيماء ... لغايه ماوصلت لابو شرويت وسلاف ... اى نعم عزة وشيماء وسلاف ... مابيخدموش فى البيوت بس فى النهايه بقوا هما اللى بيصرفوا على البيوت وعلى مزاج الباشا .... ياترى تلوث مياة الشرب .. ولا المبيدات ...ولا الرى بمية المجارى ... ولا زهرة ودلاديلها الخمسة ولا الفساد ولا التوريث ولا البرادعى ولا طونى خليفة ... ياترى مين فيهم السبب فى حاله نقص هرمون الرجوله اللى بدأت تصيب رجالتنا ... يا جماعة الخير ياريت اللى يعرف السبب يقول علشان نبدأ ندور على العلاج ... الا لوفضلنا بالمعدل ده

حيجى يوم نقول فيه زى ماقال محمد ابو سويلم :علشان كنا رجاله ... ولا نغنى سوا ارضنا العطشانه نرويها بدمانا واحنا بنتسحل ... وسلم لى على الهجانه

ثقافة الموزز بين النظريه والتطبيق

ثقافة الموزز بين النظريه والتطبيق

واحنا فى ثانوى كنا بنزوغ بدرى نص ساعة عن ميعاد الانصراف ....علشان نقف عند مدرسة البنات ونشوفهم وهما طالعين من المدرسه ... لا كان فيه احتكاكات ولا تحرشات ولا حتى كلام ... كل الحكايه بص وشويه احلام يقظه ... كل واحد فينا فاكر نفسه صلاح وبيدور فى وش البنات اللى خارجين من المدرسة على سميحة ... يحلم بصورتها على مخدته وهوه نايم ... لعب عيال يعنى ...وانا بدور على سميحة بتاعتى خدت بالى من حاجة غريبة ... لقيت البنات وهيه طالع من المدرسة وماشيين فى الشارع يا اما ضامين كتافهم ورامينهم لقدام ... يا اما حاضنين الكتب بايدهم ... الموضوع شغلنى كنت حاموت واعرف ايه السبب وطبعا ماعرفتش .. السنه اللى فاتت وانا باجيب عيالى من المدرسه شفت البنات بتوع ثانوى وهما خارجين من المدرسه ....لقيت حاجة غريبه برضه ... المشيه اتغيرت .. فاردين نفسهم ... وشدين ضهرهم ... وفهمت اللى بقالى خمسه وتلاتين سنه مش فاهمه ... زمان البنات كانا بيخبوا حاجة بدأت تظهر وهما مكسوفين منها ... فبيحاولوا يداروها ... نوع من انواع الحياء والخجل ... لكن دلوقت بعد ماوصلت ثقافة الموزز ارض المحروسة بسلام.... بقى مافيش حاجة تستخبى ... دا بالعكس لازم تظهر وبكامل ابعادها .. لان الدنيا اتغيرت ... ماعدش جمال البنت فى حياءها وخجلها ووشها اللى بيحمر من نسمه الهوا ... دلوقت فيه ثقافة جديدة اسمها ثقافة الموزز ... الجمال لازم يبقى مادى ... ملموس ... واضح للعيان... ومجسم... حتى لو استخدمنا مواد صناعيه من اللى بيلزقوا بيها الازاز .... اللى يعبط بقى.... ان البت من دول بتتباها وتقول انا موزة ... اه كده عادى يعنى ...مش عارف هيه عارفه مفهوم كلمه موزة عند الرجاله ايه ولا بتكرر اللى بيتقال وخلاص ومش عارفة ان دور الموزة فى حياة الراجل لا يتعدى نص ساعة وبقيت اليوم كائن غير مرغوب فيه ... مش عارفه ان الراجل بعد شويه بيزهق من الموزة ويدور على موزة تانيه بمواصفات احدث وسن اقل ... مش عارفة ان الموزة مش اكتر من................ اقول ايه بس ....فرغتوا حتى العلاقة المقدسة من مضمونها ....كان لازمته ايه بقى الحرب الشعواء اللى بقالها خمسين سنه بتنادى فيها بالمساواه بين الراجل والمراه ... وان البت زى الولد مش كماله عدد ... وجمعيات حقوق المرأه ... وكراسى عافيه فى المجلس ... وقاضيه ومأذونه وهدى شعراوى ونوال السعداوى وزكيه زكريا .... مدام طلعت فى الاخر موزة ... طاب ماكان من الاول وبلاش الفرم ده ... عيب ... عيب يابتى ... لما تقدمى نفسك للمجتمع على انك موزة ... قدمى نفسك على انك انسان ليه كيان ومبادىءواخلاق وانوثه فى حدودها اللى تكرمك ... وصدقينى مهما شويه الصيع اللى حواليكى من كل ناحيه دول قالولك واقنعوكى انك لما تبقى موزة حتبقى حاجة كويسة ماتصدقيش ... الصح حيفضل صح ... وعمر مافيه حد محترم حيقرب منك علشان انتى موزة ... مش حيقرب الا موز زيك ... بينزل من بيته علشان يدور على شهواته بحرص خنزير ... وغدر ذئب .. ولؤم تعلب ... وافتراس اسد .....

ياترى هوه ده اللى انت بتدورى عليه ؟؟؟؟؟؟ سؤال فكرى فيه ..... التفكير مش عيب والله

مش عايز اتجوز 6

العروسة الخامسة

سامح صاحبى قالى: انت يا بنى مستعجل على الجواز وشيل الهم كدة ليه؟.... قولت له: انا عن نفسى مش عايز اتجوز بس امى واختى وابويا عايزين يفرحوا بعيالى ... وبعدين انت بتقول كدة ازاى وانت اول واحد فينا اتجوز ... قالى : ماهو علشان انت صاحبى مش عايزك تقع الواقعة دى ... اينعم الجواز شر لابد منه... وممنهوش مهرب بس اللى نقدر علية ان احنا نأجلة ... قولت له: انا عن نفسى عايز الغيه مش أأجله ! .. بس حكم القوى بقى ... قال لى : اسمع انا عندى ليك عروسة قمر ... بنت خاله مراتى ... عروسه ولا كلمة ... بس ماخلصتش جامعة ... سابت الكليه من تالته اداب... يوم الخميس عديت على الحلوانى اللى استقبلنى استقبال الفاتحين ... واخدت علبة شيكولاته مستوردة وامى واختى ورحنا ... كالعادة خبطنا ... دخلنا.... سلمنا ... ام العروسة خدت امى واختى عاشان توريهم هيه جايبة ايه للعروسة ... وابوها طلع يصلى العشا والسنه والشفع والوتر ... قعدت مع العروسة ... حلوة ... لأ حلوه حلوه يعنى ... حلاوه من العيار التقيل .. من النوع اللى بيحرق فى الزور ... بياض وشعر ناعم واصفر طبيعى مش اكسجين ... عين زرقا ... وجسم فيديو كليب ... وبدأنا نتكلم... سألت : انت ليه ماكملتيش جامعة؟...رفعت خصلة شعر من على عنيها وقالت : أكمل ليه .. انا جميلة ...قولت : وايه علاقة الجمال بالدراسة ؟ ... قالت ازاى بقى .. الوحشين بس هما اللى بيذاكروا ويدرسوا .. علشان يعوضوا قلة جمالهم ... لكن انا جميله ... قولت : طاب انت بتعملى ايه ؟ .. قالت بقوم الصبح ... بعد الضهر كدة بشوية .. ادخل على المطبخ .. قاطعتها : ايه بتعرفى تطبخى؟ ... قالت لى : لا طبعا ... انت عايز ايدى تبوظ من غسيل الاطباق .. قولت لها : امال بتدخلى المطبخ بتعملى ايه ؟ قالت لى : باحضر الزبادى بعسل النحل ...واعمل ماسك لمدة ساعة ... وبعدين احط شرايح الخيار على عينى واقعد ساعة ..وبعدين اغسل وشى وادهن كريم مرطب للبشرة ... وبعد كدة افك الرولو واظبط شعرى واقعد اتفرج شوية على التليفزيون ... فيه قناه جديدة للمكياجات ... روعة واسعارهم تحفة ... بعد العصر بانزل اروح السونا اللى فى الجيم اللى على اول الشارع ... وانا راجعة اعدى على ميمى الكافير بتاعى ... عنده واحدة اسمها صباح بتعمل باديكير ماقولكش بنت ممتازة بجد ... بس اللى بيدايقنى انى طول ما انا ماشية الولاد بيعاكسونى .. انا مش عارفة هما بيعملوا كدة ليه ... هما مش عندهم اخوات بنات ؟... بس بينى وبينك ساعات بأعذرهم ... قولت لها : طيب مابتقريش .. مابتدخليش على النت ... مابتساعديش ماما فى شغل البيت ؟... قالت بفزع : شغل البيت ... لأ طبعا انت عايز ضوافرى تتأصف ....والاتلسع من الفرن... ولا بخار الحله يطلع على بشرتى ... لا طبعا ... استحاله اخر حاجه ... وبعدين انت عايز تتجوز ولا عايز خدامة ؟! ... قولت : هيه الست لما تشوف شغل بيتها وعيالها تبقى خدامه ؟!... قالت لى : مش قصدى ... بس لما تبقى واحده فى جمالى يبقى حرام انها تبهدل نفسها فى شغل البيت.... قولت : بس انت كدة عندك وقت فراغ كتيير ....قالت : لأ طبعا .. دا حتى فية بيوتى سنتر جديد قالوا لى علية مش عارفه اروح اشوفه ... قولت ؟ انت مش محتاجه بيوتى سنتر ...قالت لى ميرسى ... بس بأفكر احقن شفايفى .. كدة جمالى يزيد ... قولت : بس انت كدة جميله مش محتاجة اى عمليات .. قالت لى : ميرسى .. كلهم بيقولوا لى كده ... ووقفت بصت فى المرايه اللى فى الصالون ورفعت شعرها ونزلته تانى ... ومشت باديها على حواجبها ... وبصت على نفسها من الجنب .. وقعدت وهيه بتقول لى اكيد ماقابلتش واحده فى جمالى ...انا بصراحه من النوع المجامل .. بس بصراحة اكتر ماقدرتش استحمل ولقيتنى باقول لها : الجمال مش كل حاجه يا ماما ... لان بعد اسبوع من الجواز حتعود عليه ومش حيبقى مبهر بالنسبه لى ... خصوصا ان نص اليوم حيكون مستخبى تحت الماسكات والكريمات .... .. قالت لى بفزع : يعنى ايه حتتعود عليه .. انت بتقول كده ازاى؟!!!....قولت لها : بصى يابت الناس انا عايز اتجوز واحدة جمالها من جوة ... عشرتها طيبة ... بينى وبينها مودة ... تقف جنبى فى زنقتى قبل ماتقف جنبى فى فرحتى... تربى لى عيال يطلعوا قادرين يحافظوا على دينهم ونفسهم فى الزمن اللى احنا عايشينة دة ... انا عايز اتجوز ست مش عايز اتجوز باربى ... ..أه نسيت اقولك كلها عشرين سنه ... وعلى فكرة العشرين سنه دول بيعدوا بسرعة قوى ... ساعتها حتكرمشى والخيار مش حينفع يشيل السواد اللى تحت عنيكى... ساعتها الحب حيكون للعشرة والاخلاق والتصرفات الحلوة ....ياحلوة ... منك لله يا سامح

مش عايز اتجوز 5

العروسة الرابعة

امى قالت شوف بقى يا خالد ... المره دى جايبه لك عروسة مافيهاش غلطة ... حلوه ومحجبة وبنت ناس طيبين ... وانا عارفه امها ... متربيين سوا ... كانت ساكنه قصاد بيت جدك ... امها دمها شربات ... واكيد ... اكيد البنت حتبقى زيها .... دى كمان العروسة معاها بكالوريوس تربية نوعية ... يعنى ست بيت ممتازة ... وعلى فكرة مش عايزة تشتغل .... خلاص انا خدت ميعاد الخميس الجاى .... وجه يوم الخميس اللى بدأت اكرهه .... قولت اجيب المرة دى تشكيله جاتوه على بسبوسه على ملفيه ... اهو من باب كسر النحس ... وصلنا ... خبطنا ...دخلنا ... قعدنا ... ام العروسة خدت امى واختى علشان توريهم هية مجهزة البت ازاى .... طبعا ومن غير ما اقول لكوا عارفين ابو العروسة طلع يعمل ايه ... ايوة .... يصلى العشا .... وقعدت مع العروسة ..هيه بصراحه حلوه ... بس طخينه حبيتين ...اينعم هية مش طخينة قوى ... بس بعد الجواز اكيد حتزيد عن كدة ... القصد مسكت كاس البيبسى وقالت لى : اتفضل ...انت ماشربتش ليه ؟ ...اقولك انا عامله رز بلبن بالمكسرات يجنن ... اجيب لك طبق ؟ قولت لها ...لا شكرا ... قالت لى: بلاش انا عامله جيلى بالموز تاكل صوابعك وراة ...اجيب لك كاس ؟...قولت لها : لا مرسى انا كنت عايز .... وقبل ما اكمل الجمله قاطعتنى وقالت : شاكلك كدة ماتغديتش ...احنا عاملين بط ورقاق ومحشى ورق عنب ...حأعمل لك طبق ... قولت انا عايز اتكلم معاكى ...قالت : ومالوا اتكلم وانت بتنأنأ ... قلت : اعفينى ... اصلى يا اتكلم يا انأنأ...قالت :شاكلك كدة مش واثق فى طبيخى ...دا انا احسن واحدة بتطبخ فى مصر ... محدش كل اكلى الا وكل صوابعه وراه...انت بتحب تاكل ايه .... قولت : والله مافيش حاجة محددة ...كله نعمة ربنا ...قالت : طبعا دا الاكل احسن نعمه عطاهلنا ربنا ... هوه احنا واخدين منها ايه غير الا كله الحلوة والنومة الحلوة ...قاطعتها : انت بتشوفى ايه فى الدش ... قالت لى : قناة فتافيت ... مافيش غيرها حطاها فى الفيفوريت ...قولت : طاب بتقرى ... قالت بأفتخار : انا عندى مكتبة كاملة ...ولا مكتبة الاسرة بتاعة ماما سوزان ...سالت : ايه الكتب اللى عندك ... قالت لى : كتاب منال العلم...وكتاب حورية ... وكتاب اسامة السيد.. وكتاب منى عامر ... دا غير اعداد مجلة فتافيت ... بس اللى لسه ماجبتهوش ... كتاب الشيف شربينى اللى لسه نازل ... بس انا حاجزاه فى المكتبة ودافعة عربون ... اقولك على سر ...انا عندى شرايط فيديو لاسامة السيد ... والكنز بقى اللى محدش يعرفة .... انا عندى كتاب ابله نظيرة... اتحدى ان حد يكون عنده الكتاب ده دلوقت ...قولت هيه دى نوعية الكتب اللى بتقريها بس ... قالت لى : لأ طبعا ... انا عندى كمان كل كتب الحلويات الشرقية والغربية ... دا غير انى مسجله حلقات نرمين هنو على سى ديهات ... سألت : انتى بتقضى يومك ازاى ؟ ...قالت لى : شوف انا يا تلاقينى فى السوبر ماركت يا تلاقينى فى المطبخ .... بص انا عارفه تلاقيك بتقول البت دى بتهجص ... وتلاقيها مابتعرفش تقلى بيضيتين .... قولت : لا والله ابدا ... قالت : استنى انا عامله كانالونى بننأنأ فيه واحنا بنتقرج على المسلسل ...حاجيب لك طبق تدوق .... وقبل ما أنطق كانت خرجت من الاودة ... وشويه ورجعت وهيه شايله صينيه عليها اية ؟ ياريت طبق الكانالونى ... دى عليها رز بسمتى بالكارى والفراخ ... طاجن باميه باللحمة الضانى ...صدر بطة ورقاق وطبق محشى ورق عنب ..وسلطة خضرا ... وسلطة طحينة ...وبابا غنوج ... وعيش وطبق بسبوسة بالقشطة ... وكنافة بالمكسرات... وجيلى ... ورز بلبن .. بصت لى وقالت : نأ نأ وانت بتتكلم .... طبعا الانسان ضعيف .. نأنأت والنأنأه قلبت اكل ... والاكل قلب تلبك معوى ... وازازه البيبسى الاتنين لتر اللى مع الاكل ماقدرتش تهضم ...وجات الاسعاف ... وهما شايلينى سمعت العروسة بتقول لمامتها : اخص عليه ياماما نسيت احط له الكانالونى

عيد سعيد

كل سنة وانتم طييبين وسعدا وفرحانين

الأن وحصريا واكسكلوسف

الأن وحصريا واكسكلوسف

اصحى يا نايم وحد الدايم رمضان كريم... خلى الله ورسوله اغلى من حياتك ....خلى زهرة يومك صلواتك الخمسة...خلى قضيتك نفس راضية وصفيه .... خليك عابد من غير كرمان وشيخ من غير همام .... اوعى اللص اللى اسمه الشيطان وخليك مع كتاب الله ... لو عملت ده حتبقى عتبتك خضرا مش حمرا...هوه ده رمضان وان سألت مجرب وقالك غير كده يبقى كداب ...

كل سنة وانتوا كلكوا طيبين ومبسوطين وفرحانين ومحققين كل اللى تتمنوه ويزيح من على قلبكوا الهم ويبعد عنكوا البرادعى وكله من اجلك انت

مش عايز اتجوز 4

العروسه الثالثه

قولت للحاجه واختى ... شوفوا بقى ... انا عايز واحدة متدينه ... حجاب وكده يعنى ... مش عايز بنات الفيديو كليب دول ... امى قالت ... بس لقيت لك طلبك ... بنت ام حمزة ... ابوها امام الزاويه اللى ورانا ... زاويه الجماعة ... راجل تقى وعارف ربنا ومراته ست كمل ... دى بتحفظ البنات الصغيرة القرآن ببلاش ... شوف بقى ناس زى دول بنتهم تبقى ايه ... قولت: نشوف ... قالت وهيه بتحضنى : خلاص اعمل حسابك نروح لهم الخميس الجاى ... يوم الخميس عديت على محل الحلويات وجبت صينية بسبوسة بالمكسرات ... خبطنا على الباب ... فتح ابو حمزة ... راجل فى الستينات ..لاطويل ولا قصير ... دقنه طويله .. لابس قميص والبنطلون مقصره شويه ذيادة ... مارفعش عينه من على الارض ... قال : اهلا وسهلا ... تفضلوا ... النساء يجلسون فى الصاله ...اما انت فاتبعنى الى الصالون ... دخلت الصالون ... حطيت صينبة البسبوسه على التربيزة ... فقال لى ابو حمزة : شكرا يابنى على الفالوذج ... ترددت وانا باقوله العفو يا مولانا ... فانا مش عارف هوه ايه الفالوذج ده ... وقطع ترددى دخول حمزه وهو يحمل صينية عليها ثلاثة اكواب من الينسون ... وضعها وسلم على... وقبلنى فى كتفى ... وقال : اهلا وسهلا .. جزاك الله خيرا يا اخى ... فالزواج عصمة للشباب فى هذه الايام السوداء ...واشار الى الينسون وقال : تفضل يا اخى قبل ان يبرد الينسون ... ولأنى مابحبش الينسون قولت : اعفينى يا أخ حمزة .. اصلى مابشربش الينسون ... فقال وقد بدأت تظهر عليه بوادر الغضب : يبدوا انك من الذين يشربون شراب الكفره ... البيبسى والنسكافيه ... وربما الكباتشينوا ايضا !!... قولت فى نفسى ...دا ايه الليله السودا دى ... والله يا اخ حمزه مش الفكره بس انا الينسون بيعملى اسهال ...عموما خلينا نتكلم فى الموضوع اللى جايين علشانه ... فقال : نعم بارك الله فيك ... ولكن فى البدايه انا الاحظ انك لاتطلق لحيتك ... فقلت : انشاء الله يا اخ حمزة ... فقال: نعم يا اخى جزاك الله خيرا ... فان اللحيه سنه مؤكده ... كما انها هى التى تفرق بيننا وبين الكفرة ... وهنا تدخل ابو حمزة فى الحديث : وفى اى مسجد تصلى الجماعة يا اخ خالد .. قلت : والله ماليش جامع محدد ... اول ما بتيجى الصلاه بادخل اقرب جامع ... قال : المفروض ان تصلى فى مساجد السلفيين وليس فى مساجد الحكومه ... فقلت : والله يا حاج انا شايف ان كلها بيوت ربنا ... مافيش فرق بين مساجد السلفيين ومساجد الحكومه ... فقال لى وهو ينظر الى حمزة : انت نبت طيب ولكن يحتاج الى قليل من الرعايه ...فقلت : عموما يا مولانا انا كنت جاى علشان اتعرف على بنتكوا ... فقال : نعم انت من حقك ان ترى وجهها هكذا وصانا الرسول الكريم حتى يؤدم بينكم ... اذهب يا حمزة ونادى اختك .... شويه ودخلت العروسه وهى تلبس النقاب ... وقالت : السلاموا عليكم ورحمة الله وبركاته ... وقفت ذوقيا وقولت وعليكوا السلام ... فقالت اجلس يا اخى فلا قيام لغير الله ... ثم اذاحييتم بتحية فحيو باحسن منها او ردوها ... وانا حييتك بقولى السلاموا عليكم ورحمة الله وبركاته ... وانت رددت بوعليكم السلام ... فهذا لا يجوز ... قولت وانا بدأت اتخنق من الدنيا ومن نفسى : معلش بس يمكن علشان الموقف ملخبطنى شويه ... فسألتنى : كم تحفظ من اجزاء القرآن ... فقلت : تلت اجزاء ... فقالت: فقط؟!!! عليك باكمال الحفظ ... واين تعمل ؟ قولت : فى شركة كمبيوتر ...انتفضت قائله: استغفر الله العظيم ... انه اداة من ادوات الشيطان ... ان به من الموبقات الكثير ... قلت: وبه من الخير الكثير ... ولا ايه رايك فى سى ديهات القرآن وتفاسيرة ... مش دى برضة حاجة كويسة ... قالت باذدراء : درء المفسدة مقدم على جلب المنفعة .. فقلت : وحضرتك بقى خريجة ايه ؟ فقالت : خريجه ... نحن لا ندخل الجامعة ... ان الجامعة مفسدة اختلاط وفسوق ...سكتت ثم قالت : ان من حقك الشرعى ان ترى وجهى ... ولكن لمدة دقيقة واحدة فقط ...نظرت الى ثم رفعت النقاب ... مش عارف ايه اللى خلانى افتكر الاستاذ عبد السلام مدرس الجغرافيا فى الاعدادى وهوه بيشرح لنا يعنى ايه غابات السافانا ... وقولت فى نفسى .. انا لا ادعى انى افهم فى الدين ولا فى الحديث ... بس ما اظنش ان رسولنا الكريم كان يقصد اللى فهمته الاخت دى واهلها من حديث النامصه ... فقلت لها : يكفى هذا يا اختى ماشاء الله تبارك الخلاق ... فقال ابو حمزة : هل ارتضيت ؟... قلت ان شاء الله ... ولكن لابد وان اعلمكم شيئا ... فقال : وما هو .... ؟ قلت : لو اراد الله لهذة الزيجة ان تتم فلن نعيش هنا ... فقال : واين ستقيمون ؟ قلت : فى شرم الشيخ ... لانى سوف انتقل الى فرع الشركة هناك ... فقام ابو حمزة منتفضا وقال صارخا : هذا لن يكون ابدا ...الا شرم الشيخ ... شوف يا بنى شرفت وانست .... احنا ماعندناش بنات للجواز ...............والى اللقاء مع العروسه الرابعة

مش عايز اتجوز 3

العروسه التانية

اختى قالت لى : سيبك يا خالد من ام خميس ومجايبها ... انا واحده صاحبتى .. ايمان ما انت عارفها ... قالت لى على بنت ممتازة ... بنت ناس ابوها عنده شركة استيراد وتصدير .. وساكنين على النيل .. عالم ستايل مش العقد اللى كنا عندهم .. وافقت ... يوم الخميس وانا جاى من الشغل جبت معايا تورتايه بالكمبوت والكريز ... ورحنا للعروسه ... الباب المره دى انفتح قبل ما حتى نضرب الجرس ... تقولش كانوا واقفين ورا الباب ... طلعت لنا ست ... ست ست يعنى ... مكياج وشعر اصفر وبدى بمبى وجيبه يادوب واصله للركبه ... ويا اهلا وسهلا ..يا اهلا وسهلا وسلمت على ماما وباستها وعلى اختى وباستها ... ايوة ... وعليه وباستنى ...واتفضلوا ...شرفتوا وانستوا .. تحبوا نقعد هنا ولا فى الصالون ؟ وقبل ما حد فينا يرد قالت نقعد فى الانتريه المريكانى قعدته اريح ... ومافيش دقيقه ودخلت العروسه شايله صينيه عليها جاتوه وشاى ... ملحوظة : الجاتوه ماكنش من التورتاية اللى انا جايبها ...العروسه حطت الصينيه ونطت قعدت جنبى ... او بمعنى اصح لزقت جنبى ...مدت ايديها وعطتنى طبق الجاتوه .. ماخبيش عليكوا انا اتكسفت... ماهو لو شوفتوها حتعزرونى ... بدى ستومك .. استريتش .. شعر مهفهف ... فيديو كليب كدة من الاخر علشان ما اطولش ... ام العروسه قالت لامى واختى ماتيجوا نقعد بره ونسيب الولاد يتعرفوا على بعض ... ماكنتش عارف ابتدى الكلام .. كان كل تركيزى ان عنيه ماتخونيش وتبص على حاجة من الحاجات الباينه دى ... مع انى بصراحه كان نفسى ابص ... العروسه قالت لى : انت موبيلك ايه ؟ .. قولت لها : نوكيا .. قالت لى : لأ ... قصدى الموديل ...ان .. اى فون .. كده يعنى ... قولت لها : والله الموبيل بالنسبه لى وسيله .... وقبل ما اكمل كلامى موبيلها رن ... ردت : ايوه ياوائل ... لا مش حقدر النهاردة يا وئول... روح انت ... اصل انا عندى عريس ... بصت لى من فوق لتحت وقالت : هوه مز بصراحة... بس شاكله كده مابيعرفش فى الموبيلات ...يالا باى حبقى اكلمك باليل ... قولت فى نفسى بليل ايه دى الساعه عشرة... قفلت الموبيل وقالت لى : انت بقى عامل جروب على الفيس بوك ؟ ....قولت لها مين وائل ده ... قالت لى ببراءه : دا صاحبى ... قولت لها : صاحبك ازاى يعنى ؟ .. قالت لى : صاحبى .. صاحبى .. بنخرج سوا .. ندخل سنيما ... نتعشى بره ..عادى يعنى ... ايه انت مالكش صحاب بنات ؟!!!.... قولت لها : بصراحة لأ ....قالت لى: غريبه مع انك مز ... قولت فى نفسى ايه حكايه مز دى ؟!!...سألتها بابا فين ؟!!! ... قالت لى : مش عارفه .. بس هوه اكيد فى الشغل ... هوه مابيبطلش شغل ... اجتماعات ... صفقات ... عشاء عمل ... على طول مشغول ... سألت : هوه مش عارف انى جاى ... قالت لى باستهجان : لأ عارف طبعا ... وقالى شوفيه لو عجبك ادينى رنه ...شوف ... انا حألبس فستان موف فى الخطوبه ... انت بقى حتلبس ايه؟ .... قولت لها : لو عملنا الخطوبه .... قالت لى : آه ... قولت لها : حالبس اسود طبعا ... بس يعنى افهم من كدة انك وافقتى عليه ؟!! ... قالت لى بفرحه : طبعا ... انت مز وصحابى حيتغاظوا منى لما يشوفوك ... استنى ... سابتنى ومشت وشويه ورجعت وفى ايديها سى دى ... وقالت : السى دى الجديد بتاع عمرو دياب ... تحفه ... بأموت فيه ... انا مشتركه فى الجروب بتاعه على الفيس بوك ... وقفت علشان امشى ... قالت لى : على فين ... قولت لها علشان الحق اسمع السى دى التحفه ... قالت طاب انت ماعطتنيش موبايلك ... قولت لها مرة تانيه ... خدت امى واختى ونزلت جرى ... وانا فى الشارع لقيتها بتنادى عليه من البلكونه ... خلود ... انت نسيت السى دى ..... والى اللقاء مع العروسة التالتة

مش عايز اتجوز 2

العروسه الاولى

ام خميس كتر خيرها قالت للحاجة على عروسه ماتتعيبش .....جمال وادب وتعليم وابوها موظف كبير ... ناس طيبين وفى حالهم ... والبت تعيش مش زى البنات بتوع اليومين دول .... امى اقتنعت واقنعت اختى وهما الاتنين اقنعونى ... يوم الخميس وانا راجع من الشغل جبت علبة جاتوه ... ماهو مايصحش ندخل على الناس ايد ورا وايد قدام ...كان ميعادنا الساعة تمانيه ... تمانيه بالدقيقة كنا بنخبط على الباب ... تمانيه وعشرة فتحوا لنا ... طلع واحد شكله كده ابو العروسه ... لابس جلابيه بيضا عليها نقط طبيخ ... باين عليه كان بيتغدى حاجه بدمعه ... طاقيه شبيكة على راسه ... وفى رجليه شبشب حمام من ابو صوبع ... بص لنا بقرف وقال هوة انت العريس ... قولت ان شاء الله ياحاج ... قال بزهق خشوا ... دخلنا ... حطيت علبة الجاتوه على تربيزة الصالون .... الراجل طلع وسابنا ... قولت لأمى شكلها كدة مش نافع ... قالت: يابنى متبقاش متسرع وماتحكمش بالظاهر ... قعدنا ربع ساعة لوحدنا وبعدين دخلت ام العروسه وفى ايدها تلت اطباق فاضيين ... سلمت وفتحت العلبة وحطت فى كل طبق حته جاتوه ... ومن غير شوك ... وقالت اتفضلوا ... ابو العروسه قعد على الكرسى ورفع رجل ونزل رجل ... اختى قالت ياحاج احنا جايين نشوف الانسه الكريمة بنتك لخالد اخويا ...قال : آه ... قالت : اسمحلها تيجى ... قال : آه بس قبل ماتشوفوها نتفق الاول ... قولت : نتفق على ايه يا حاج مش يمكن ماعجبش العروسه ... قال بحدة : آه .. مش مهم نتفق وبعدين تبقى تشوفها ... امى اتدخلت علشان تلطف الجو وقالت : ومالوا ياحاج طلباتك ايه؟ .... قال : آه ... شوفوا بقى .. انا صارف على البت دى دم قلبى ... آه ... علام واكل وشرب ولبس ... آه ... سبعه وعشرين سنه وانا بصرف ...آه يعنى مصروف عليها تقلها فلوس ... آه .. وبعدين انت ولا مؤخذة واخد واحدة موظفة ... يعنى بتدخل فلوس كمان ... أه .. دى بتقبض متين واربعين جنيه ...آه ... ماهى مدرسه بالحصه ... آه .. ولعلمك هيه بتساعد فى مصروف البيت ... آه ...امال حكفى اخواتها منين ...آه ... وعلشان نبقى على نور ... حتفضل تساعد فى مصروف البيت حتى بعد الجواز ...آه ... قولت : بس ياحاج انا ربنا كارمنى ومش عايز مراتى تشتغل ... قال : آه .. وماله ... حقك ... بس انت تدفع المتين جنيه ... آه .. امى تدخلت وقالت : ياحاج انت مش ملاحظ ان الكلام ده بدرى عليه ؟! ... مش الولاد يشوفوا بعض الاول ... الراجل نزل رجله من على الكرسى وقال : آه .. ومالوا ... بس توافقوا على الشروط الاول ...آه وياكده يابلاش ... انا بقى ماقدرتش استحمل ... وقفت وقولت : آه ... يبقى بلاش ياحاج .. يالا ياماما ... واحنا على السلم امى قالت ليه باستعطاف : والله ام خميس قالت غيركده خالص ... بس لما اشوفك يا ام خميس ...

والى اللقاء مع العروسه الثانيه.....

مش عايز اتجوز

مش عايز اتجوز

أنا اسمى خالد ...شاب مصرى زى كل الشباب المصرى .. الفرق انى فهمت وعرفت وآمنت وسلمت ان الدنيا يتتغير ...واتأكدت ان محدش حيقدر يقف قدام التغيير ده .. وياما تبقى شاطر وتنافس وتطور نفسك ...ياما تعيش حلم ان ايام الزمن الجميل حترجع تانى ... وزمن ميه المخلل بتاع الاشتراكية وشقة للايجار وكيلو اللحمه بجنية ونص... قادم من جديد ...من بدرى اخدت الكمبيوتر مجالى....اتعلمت لغات بجد... وخدت دبلومات بجد ...وحضرت دورات بجد ...مش علشان الم شهادات مختومه ومعتمدة...وبدأت كل دة وأنا فى ثانوي مستنتش لما أتخرج ...وأول ما أتخرجت اشتغلت من أول انترفيو في شركة مالتي ناشيونال ...ومن غير واسطة ...الناس دي رغم ان احنا مش بنحبهم (علشان احسن مننا ) يستاهلوا يكبروا ويحكموا العالم ... مبدأهم الشطارة والخبرة ...مايعرافوش مبدأ أهل الثقة وظبطنى يا معلم ...القصد ... عندى شقة أربع أود و صالة وعربية من الجداد وقرشين حلوين فى البنك ... بأترقى فى الشركة وبيجيلي عروض كتير من شركات كبيرة ... طبعا مش عايزة كلام ان كل اللي انا فيه بفضل وتوفيق ربنا... كل مشكلتي في الدنيا أمي واختي...عايزين يجوزوني ...انا مكنش عندي مانع...بس هوه انا لقيت حد عدل وقلت لأ ؟! ...اصل انا من الناس اللي مابتأمنش بحكاية الحب دي ... تبصلها وتبصلك .. رسايل ورنات .. دباديب وقلوب حمرا ... وسهر وشات ... والآخر ... ياما عيشه والسلام ... يا اما اخلعنى يا معلم .... فيعنى اذا كان ولابد من حكايه الجواز دى ... يبقى على الاصل دور ... على رأى سمير غانم ...المهم ياجماعة ان الكل يبقى مبسوط ... ماما يبقى عندها حفيد يقولها ياتيتا ... ولما تقعد مع شلة المسنيين تقول ابن ابنى فى مدرسة لغات بتاخد الشىء الفلانى ... وأختى تقول لصحابها والله بنت اخويا ... يقوموا يقولوا لها : أيه ده .. انت عمه ... تقوم تقولهم : اه والله .... ومراتى تخلص من بيت ابوها اللى حاسه انه سجن .. وتخلص كمان من اخوها اللى عامل فيها راجل مع انها بتقرطسه صح ... فتشم نفسها وتلاقى اللى تتحكم فيه ... والاهم لما تتكلم فى التليفون تلاقى اللى تقول عليه المنيل على عينه ... اما فلذات اكبادى فيلاقوا اللى يصرف عليهم فى مدرسة اللغات ... ويوديهم الساحل الشمالى فى الصيف ... ويجيب لهم البيتزا والكنتاكى والاسكوتر ابو عجل بينور ...

ولأن الراجل مننا يا ولداه مالوش فى نفسه حاجة ...بدأت من سن الخامسه والعشرين ولمدة عشر سنوات... رحله البحث عن عروسه ... والى اللقاء مع اول عروسه

بلد الالف مأذنة

بلد الالف مأذنة

الازهر حامى حمى الاسلام ....عندنا... وقالوا ان القرآن نزل فى مكه والمدينه ...واتقرأعندنا ... ولأننا شعب مؤمن عارف ربنا .... تلاقى كل تصرفاتنا وكلامنا ولبسنا .....بتقول ان احنا عارفين ربنا ..... شوف مثلا تصرفاتنا .... شوف اد ايه بنحب بعض ... اد ايه بنساعد بعض ونضحى علشان بعض ... جرب واطلب حاجة اى حاجة من حد ماشى جنبك ... شوف حيعمل ايه ... بالجزمة يابلحة .

اما اللبس بقى فدليل على التفقه فى الدين الى حد الوسوسه .... البنات لابسه طرح اربع طبقات واستك .... علشان مافيش شعرة تشاور عقلها وتبان ....الهدوم بقى ... بطلوا يلبسوا فساتين وجيبات ... ليه .. علشان مهما كانت الفساتين والجيبات طويله ممكن نسمة هوا ترفعهم ... فقرروا انهم يلبسوا بنطلونات وبديهات محزقة ... وورينى بقى يا هوا حتعمل ايه ؟ .

الكلام بقى ... ماشاء الله.....ما شاء الله .... ماتقابلش راجل ولا ست الا وعلى لسانه كلمتين ... الحمد لله ... واستغفر الله العظيم .... بس لهم طريقة خاصة فى القواله .... شوف ياسيدى ...الواحد من دول يشوف عربية من ام فلوس كتير دى معديه ....يقوم قايل شوف العربيات الغالية ... دا تلاقى عنده فيلا وبيلعب بالفلوس لعب ... عالم وكلاها والعه... ثم لحظة صمت ... ثم تنهيدة تنفخ عجلة عربيه نقل ...ثم الحمد لله .... ثم ماحدش بياخد اكتر من نصيبه ... بذمتكوا فيه ايمان وحمد اكتر من كدة .

اما بقى استغفر الله العظيم دى ... يبان فيها عبقرية المصرى المؤمن اللى على حق .. المؤمن البُرم .. اللى بيأمن نفسه ...شوف يا سيدى : نفخة بركانيه ...ثم يضرب كف بكف ... ثم استغفر الله العظيم ... ثم وصلة الذنوب ... ابن الجزمه (سب)... دى امه كانت غساله (قذف)....يروح يبص على بناته اللى دايرين على حل شعرهم (رمى محصنات) ... بذمتكوا فيه ايمان احسن من كدة ...قبل ما يعمل الذنب بيستغفر ... مش العالم الخايبه اللى بتستغفر بعد ما تعمل الذنب ... طاب لو ماتت قبل ماتستغفر مش كده تخش النار .

عارفين احنا تاعبانين ليه ... علشان صدقنا ان احنا بنفهم فى كل حاجة وعارفين اى حاجة ... والحقيقة ان احنا لا عارفين حاجة ولا فاهمين حاجة ... وحنفضل تعبانين وزهقانين ..... علشان لو مافضلناش كدة مش حنبقى مصريين

هأ و أو أو أأأأأأوووووو

والله حصل بجد مش تأليف

والله حصل بجد مش تأليف

عم بهجت مات .... 69 سنة خلصم بسرعة قوى ...عم بهجت مالحقش يعيش لنفسه ... طول عمره وهوه عايش لغيرة ...عم بهجت كان حارم نفسه من متع الدنيا ... كان دايما يقول : لما العيال وامهم ياكلوا يبقى انا اكلت .... ولما يلبسوا يبقى انا لبست ... ولما يتفسحوا يبقى انا اتفسحت ....

عم بهجت نام فى السرير اسبوع قبل ما يموت .... ومتهيألى كدة انه مات فى الاسبوع دة يجى ميت مرة من اللى كان بيسمعه من مراته وعياله .....لما الدكتور كان بيجى يبص عليه ... كانوا دايما بيسألوه هوه السر الالهى حيطلع امتى؟ ... وكان دايما يجاوب انا مش ربنا ... ادعوا له بالشفا ....وكان ديما ردهم : استغفر الله يا دكتور ... بس بالويم كدة ...

قبل الاسبوع ماينتهى وفى ليله النص من شعبان ... ليلة الموسم طلع السر الالهى .... الكل صوت ... الكل عيط .... وكتير اغمى عليهم .... واللى ماعيطش ولا صوت رمى نفسه فى حضن اللى جنبه ....شغلوا القرآن وقفلوا الباب على الامانه ....الصبح غسلوا عم بهجت ... والرجاله راحوا دفنوة بعد صلاة الضهر ... وقبل مايرجعوا .... كان البيت زى الفل مافيش أى اثر لأى حد كان اسمه عم بهجت ....

مرات المرحوم وبناته دخلو المطبخ ... حمروا الرومى ...وبوخوا الكسكسى ... وعملوا السلطه ... اتغدوا قصدى موسموا ... لموا السفرة وشربوا الشاى .... وقعدوا يستنوا المعزيين ..... فى القعدة كله كان بيعيط ... كله كان بينوح ... كله كان بيضحك على كله .... ومافيش يومين .... ياجماعة عم بهجت مات .... ايييييييييييييه كلنا لها .... عم بهجت ماات ... شوف انا حاخد الكرافتة البيج وخد انت الحمرا ...عم بهجت مااات ... الحزن فى القلب مش فى اللبس ....يانهار ابوكوا اسود .... عم بهجت مااااات ...مين عنده محامى علشان يعمل لنا اعلام الوراثه .... عم بهجت ماااااات ... شوف .... الشيخ قال فى التلفزيون ... ان العدة عدة زمان مش عدة مكان ... يعنى اخرج بقى اشم شوية هوا وافك من الهم ده .... ياولاد الكلب عم بهجت مات ....ايه دة ماله دة .... عبيط ده ولا ايه ... ولايكونش فاكر انه حيزعل عليه اكتر مننا .!!!!!!!!!!!!!

مافاضلش الا الإيه

مافاضلش الا الإيه

الاسبوع اللى فات كان موسم 27 رجب ... كل سنه وانتوا طيبين ...انا ما اعرفش عادة المواسم دى جابوها منين ... بس قريت مرة انها عادة شيعيه من ايام الفاطميين لماكانوا بيحكموا مصر ... ايوة ماهوالفاطميين حكموا مصر 200 سنه ... وبعدين اشمعنى هما يعنى ماطوب الارض حكم مصر ... القصد ... وانا نازل الصبح لقيت ورقة ملزوقة على باب الشقة مكتوب فيها ... هات دكر بط علشان الموسم بكره .... بس ...من غير كل سنه وانت طيب... ولاصباح الخير .... مش مهم ... وانا راجع من الشغل عديت على الفرارجى اللى قالى : خلاص ياباشا الدكورة خلصت ... انت اتأخرت ... ولأنى عارف انه لو مكلناش بط فى الموسم حيبقى اعوذ بالله ارتكبنا نوع من انواع الشرك الاصغر ॥دا غير ان حتحصل مشكله كبيرة انا مش قدها ... ميلت على الفرارجى وقولت له باستعطاف : ماينفعش اروح من غير دكر بط ... الفرارجى بص لى بشماته وقالى : مش قولت لك يا باشا الدكورة خلصت !!!!... طبعا انا مش محتاج اوضح ان الفرارجى كان قصدة على دكورة البط !!؟؟هيه اللى خلصت ... قولت له طاب ظبطنى وانا حأظبطك ... قالى : مانت ياباشا ناسينى من زمان !!!... قولت له ظبطنى وشوف .... قالى : عقبال ماتشرب فنجان القهوة حيكون الدكر جاهز ... بس .... ايه ؟ ... قولت له : ايه ... قالى : الإيه ولا ايه؟ ... قولت له :آآآآآه ... وفتحت الشنطه وعطيت له علبتين من الإيه ...اللى لونهم ازرق ..... بص للعلبتين كدة وقالى : دول يكفوا اسبوعين بس ؟ وبقيت الشهر ياباشا....؟؟؟؟... بصيت له باستغراب ... قالى وهوه بيفرد صدره... صحه ياباشا ... نوديها فين ؟!؟!... عطيته علبتين كمان وقعدت اشرب القهوة واتفرج علية ... مسك الدكر ...لوى رقبته ... دبحه... رماه فى حلة الميه المغلية ... كل ده فى ثوانى من غير رحمه ولا شفقه ... افتكرت لما كنت امسك دكر البط لأبويا علشان يدبحه ... كان بيفرهدنا ... وحتى بعد مايندبح كان يقوم ويقعد ويفرفر ... بس ابويا كان بيسيبه .... كان يقولى حرام دى حلاوة روح سيبه لغاية مايموت ... قعدت اقارن بين زمان ودلوقتى ... هوه ليه دلوقتى لا بقى فيه رحمه من اللى بيدبح ولا مقاومه من اللى بيندبح .... اه ..... ولابقى فيه عقل يفك الارتباط الشرطى بين الموسم ودكر البط والشرك الاصغر ...الواضح ان كل اللى فاضل ... الإيه ... وكمان الكداب يقول: اوديكى فين ياصحه

ملحوظة :

كان ائمة الشيعة فى خطبه الجمعه ايام حكم الفاطميين لمصر ... يشتمون سيدنا عمر بن الخطاب على المنابر بطريقة مميزة ... هذة الطريقة هى التى استخدمتها النساء فى المناطق الشعبية فى الخناقات والتى كانت تنتهى بكلمة ياعووووووووووومر .... دلاله على اقصى انواع الردح ...

كدة وكدة

كدة وكدة

مصر مافيهاش حاجة بجد .... جملة سمعتها ... ولما فكرت فيها لقيتها صح قوى ... مصر فعلا مافيهاش حاجة بجد ... مافيهاش حاجة بحق وحقيقى ... كله فيها كده وكده ... حكام كده وكده بيعيطوا على الشعب وعلى محدودى الدخل وبيزودوا المرتبات 30% ويغلوا الاسعار 300%...دبلوماسيين كده وكده ...ليل نهار بيغنوا بعبقرية الدبلوماسية المصرية ... ومش عارفين يظبطوا دول حوض النيل ... زراعيين كده وكده ... بيستوردوا اللحمه من دول المجاعة ...والقمح علشان يوفروا الميه لملاعب الجولف ... اقتصاديين كده وكده ... بيزودوا الدخل القومى ...بالضرايب وبيع البلد حته حته فى مزادات هيه كمان كده وكده... ديموقراطيين كده وكده .... هاريين ابونا بتداول السلطه .. وهما قاعدين فى اماكنهم من ايام عبد الوارث عسر وامينه رزق ... شيوخ كده وكده ... بينتصروا لنفسهم ويفتوا فى رضاعة الكبير وبول النبى .... مدرسين كده وكده بيربولنا اجيال كده وكده فى مراكز دروس خصوصية ممنوعه بقانون كده وكده وعاملين لها اعلانات فى الشوارع اكتر من اعلانات الانتخابات اللى هيه كمان كده وكده ..واللى حيجبولنا فيها سيدنا البدوى بعد ماطفوا نور نور ... ومدد ودستتين شمع .. وكله كده وكده ...منظمات حقوق انسان كده وكده ..قال بيدافعوا عن البنى ادمين اللى بيتهانوا فى اقسام البوليس ... ومش واخدين بالهم من الاهانه اللى بنتهانها فى الشارع والمواصلات والزباله والجرى ورا لقمة العيش ...حكومه ذكيه الكترونيه كده وكده ... جرب وقدم طلب وشوف الملف فيه كام ورقة ....اعلام كده وكده بيقول انه بيحب مصر وعلشان كدة بينشر غسيلها الوسخ ليل نهار على العالم ... فن وفنانين كده وكده ...كل ابداعتهم خمرة وقمار ونسوان عريانه وعشوائيات.....طب كده وكده .... علاج كده وكده ... جواز عرفى ... يعنى جواز كده وكده ... خلع ... يعنى طلاق كده وكده ... عيشه كلها كده وكده .........................ويبقى الوضع على ماهو عليه واللى مش عاجبه يروح لمحامى كده وكده ويلجأ للقضاء اللى هوه كمان بقى كده وكده ...... يابلد باعبيطة ...ياهبله

سيكو !

سيكو !

فاكر وانت معدى مرة فى البيت كدة .... ورحت لاطش كباية ولا فازة ولا طبق وموقعة وكاسرة ... فاكر اول حاجة عملتها ايه ؟... انا اقولك اول حاجة عملتها اية ؟... صرخت وقولت: مين الحمار اللى حط الكباية دى هنا .... أو قولت: فيه بنى آدم يحط الفازة فى المكان دة؟!! .... او قولت : الطبق مكانة المطبخ يابهايم .....

بينى بينك كدة ... الحمار والبنى ادم والبهايم مالهومش ذنب ... الذنب ذنبك انت ... انت اللى ماشى مسطول مش باصص قدامك ....

ماتقلقش دة شئ عادى بيحصل مع الناس كلها .... بس خلى بالك لما يبقى على طول على طول ... وعمال على بطال فيه حد هوة السبب وديما فيه حمار وبهايم موقفين حالنا ... يبقى كدة داخليين فى سكة السيكو ... وطريق ساعة تروح وساعة تيجى .

الحكومة عملت مترو الانفاق ... وكتبت على باب نزول وعلى الباب التانى طلوع .... الحكومة ممكن تعمل اية تانى ؟!.... احنا بقى نطلع من النزول ومن الطلوع ... ونفس الحكاية فى النزول والدنيا تبقى زحمة ... فنقول حكومة بت ستين كلب مش عارفة تعمل مواصلات مريحة...

الحكومة بتحط رادار على الطرق السريعة ... علشان تمسك الناس الوحشة اللى بتجرى بسرعة فتقلل الحوادث ... قوم اية الناس تنبه بعضها ويقلبوا النور لبعض علشان مايتمسكوش ... فالحوادث تكتر فنقول حكومة بت ستين كلب مش مهتمية بارواح البنى ادمين .

الحكومة بتوفر شغل بربعميت خمسميت جنية ... بس بعيد شوية عن حضن ماما ... مانرضاش ونضيع عمرنا على القهوة واحنا بنقول عايزين نتجوز ... بس نعمل اية حكومة بت ستين كلب المفروض توفر لنا شقق وعفش وعروسة ... وياسلام لو عيلين ... هواحنا لسه حنروح البيت ؟

خالد سعيد ... شهيد حقوق الانسان .... اولا : ربنا يرحمه ويغفر له ولينا ... ثانيا : خالص العزاء لأهله واصدقاءة .... ثالثا : ولا واحد .... ايوة.... ولا واحد من اللى كتب فى النت ولافى الجرايد ولاطلع على الدش يعرف الحقيقة ... ربنا بس هوه اللى يعرف الحقيقة ... كل الحكاية ...حكومة بت ستين كلب مافيهاش حقوق انسان ... والحقونا يا اوروبا ويا امريكا يابتوع حقوق الانسان ...يابلاد يامحترمة ... ياللى عمرها ماكان عندها جوانتناموا ... ولا ابوغريب .. ولاكلاب بتنهش فى بنى ادمين عريانين ملط .....

خالد سعيد لازم ياخد حقة ... موضوع غير قابل للنقاش ....بس الطريقة ازاى يا بشر .

كل الناس بتكدب ... انا وانت بنكدب ... كل الحكومات بتكدب ... وكل الشعوب عارفه ان حكوماتها بتكدب ... بس الشعوب السوية عندها ثقافة المصلحة العامة ... مش ثقافة أهو طلع غلك وخلاص ...واللى يحصل يحصل.

انا شايف ان الشعب المصرى بدأ يمشى فى طريق السيكو ... والحكومة من الشعب يعنى هية كمان ماشية فى طريق السيكو ... فانتظروا اى شئ غير ان مصر تكون بلد محترمة وشعبها شعب حضارى ...

قول ورايا ..... قول .... ساعة تروح ....وساعة تيجى ....هيه قول