من مذكرات سونيا سليم (مواطن وصيدلى وطبيب ) 8

من مذكرات سونيا سليم

(مواطن وصيدلى وطبيب ) 8

نهار داخلى :

غرفة نوم سونيا سليم ... المرايا .. الدولاب .. الشيزلونج ... التليفزيون ... الكومودينو ... سونيا تتقلب على السرير باسمة ... تمد يدها وتأخذ الريموت ... تعتدل وتقلب فى القنوات وتستقر على نشرة اخبار الفن ... تتابع المذيعة اللذيذة وهى تقول : دينا راقصة مصر الاولى تتعاقد مع اكبر فنادق القاهرة ...

صرخت سونيا : ايه ... من امتى بقت راقصة مصر الاولى ان شاء الله ... ؟ منااااال ... انتى يا زفته ... انتى يا نيله ..

دخلت منال وهى تتمتم استر يارب وقالت : صباح الفل ياست الستات ... انا بت اهوه عندى بتى زى ماقولتيلى ..

سونيا : بقولك ايه ياوليه انتى ... انا عفاريت الدنيا بتتنطط قدام عنيه ... روحى اعملى لى قوه وهاتيلى ترتر من تحت الارض ... اطلع من الحمام الاقى ترتر والقهوة ... ياللى اخفى من قدامى .

خرجت منال وهى تتحدث الى نفسها .. طاب القهوه واعملها ... لكن ترتر ده اجيبة منين ... وافاقت على جرس الباب فذهبت لتفتح فاذا به ترتر ...

قالت بفرح: ترتر والنبى انت فيك شىء لله ... والختمة انت ابن حلال ...انت ولى من الاوليه ... الست متعفرته وعايزاك ضرورى ...

ترتر : فله ياروحى ... وانا دايما تحت امرها وجاهز ..

خرجت سونيا : فين القهوه ...

منال : ثوانى ياستى ... اصل بس .. اصل كنت بس بافتح لترتر ...

سونيا : انجرى هاتيها ...

ترتر : خير ياست الكل .. شكلك متدايق ... قولى لى مين مزعلك وانا اشتمهولك بالأب والام كمان .

سونيا بتحدى : انا عايزة حسن ظاظا حالا ... عايزاه يصمم لى تابلوهين تلاته انزل بيهم الموسم ... السجاده بتتسحب من تحت منى يا ترتر

ترتر : فشر ... مين ده اللى يقدر يسحب السجادة مت تحت رجلين كوكب الرقص الشرقى ... بس ... بس ظاظا فى ايطاليا دلوقتى ..

سونيا : عارفة انه فى زفت ... يجيى على اول طيارة ... واديله اللى يطلبه ..

ترتر : فله ياروحى ... مانتى عارفة انه مابتفرقش معاه الفلوس ... دا صاحب مزاج ... وشهرته سبقاه .. دا احسن مدرب رقص فى مصر والوطن العربى .

سونيا : مش عليه ياترتر .. مشهور ومعوج على الكل بس مش عليه يا ترتر... قوله سونيا بتقولك هيه عايزاك فى مصر ...ولو عصلج قوله .. بأمارة التيكا تيكا بوم ..

ترتر : فله ياروحى .. وايه التيكا تيكا بوم دى ؟

سونيا : وانت مالك يابارد ... ياللى اعمل اتصالتك وهتهولى ... دينا بقت راقصة مصر الاولى ياترتر ...

ترتر : نعععععم ... من امتى ياروحى ... اهو ده اللى ناقص ... بكرة حيكون عندك ظاظا .... والاسبوع الجاى حتكونى ضيفة على كل الفضائيات ... مين دى اللى راقصة مصر الاولى .... فله ياروحى ... مبقاش ترتر لو حصل ... سلام

الى اللقاء ...

من مذكرات سونيا سليم (مواطن وصيدلى وطبيب ) 7

من مذكرات سونيا سليم

(مواطن وصيدلى وطبيب ) 7

ابتسمت سونيا ابتسامة شفقه وقالت : بتسألنى شوفتى سفاله كده ... ؟ اه شفت ... وشفت اكتر من كده .... طاب انت فى الاخر بتبيع دوا غالى حبيتين بس اهو فى الاخر  بتبيع دوا ممكن يشفى العيان ...بعت ضميرك ومبادئك ورشيت ... هيه سفاله مش حقولك لأ ... بس تيجى ايه جنب اللى  انا ببيعه ... انا بابيع لحمى كل يوم يادكتور ... انت راجل ...عمرك ماحتفهم مشاعر  ست بتعرى جسمها كل يوم قدام الرجالة ... عمرك ما حتحس بعنيهم وهيه زى السكاكين بتقطع فى لحمى ... انياب وضوافر بتغرز فيه ... عمرك ما حتحس يعنى ايه نفسك تشعر انك محترم ..

ايوه بيقولولى فى وشى ياست الكل ويانجمة النجوم ووسع يابنى للاستاذة ... لكن الحقيقة اللى جواهم .... دبيحة نفسهم ينهشوها ... اكيد سمعت عن زميلتى اللى جوزها صورها وهيه معاه فى السرير ... فيه زوج يعمل كده لو بيحترم مراته ؟...بيتجوزونا بس علشان تتحط فى السى في بتاعهم قدام الناس انهم ناموا معانا .. مش اسمه سى فى  برضه عندكوا .

ابتسم (ع ع ) ابتسامه حزينة ... واكملت سونيا ضاحكة  :هههه ... حتى اللى بيتجوزونا ويدونا اسمهم مابيحترموناش .. عارف انا كنت بأبقى فرحانه انك ماكنتش بترضى تتفرج عليه ... كنت باحس انك بتحترمنى.... اقولك ... فى المرتين اللى اتجوزتهم كنت مصممة انى ما اخلفش ... مرة حملت غصب عنى ... نزلته .... كنت حاروح فيها .. عارف ا نا نزلته ليه مع انى زى اى ست فى الدنيا بتحلم انها تكون ام ؟... علشان مايجيش يوم عليه والناس ماتحترمهوش علشان امه رقاصة ... اوعى تفتكر ان الصوت العالى والعين البجحة دى بجد ... انا اضعف من كده بكتير ... كل الحكاية انى بدافع عن نفسى قدام نفسى ... لكن الحقيقة.... انا .. بابيع .. لحمى ... اينعم عمرى ماكنت خاطيه ولا فيه راجل لمسنى فى الحرام ... بس تفرق فى ايه ما انا نمت مع كل واحد اتفرج عليه فى خياله ...السفالة ايه غير ان مدير اعمالك يبقى شاذ وانت عارف ... كل اللى حواليك خمورجية وبتوع حشيش وقوادين ... جو مقرف .. حتى لو كان فى الخمس نجوم .... وكله ليه ؟ عشان الفلوس والشهرة والغرور والعنجهية ... دى بقى السفالة اللى بجد ....عمرك انت شوفت سفالة كده ...

قام (ع ع) ليجلس على الطرف الاخر من الاريكة ... لحظات صمت طويله ... سرح فيها كل منهما مع نفسه يصارعها ... تمنت ان تتوب وتعتزل ويقبل ان يتزوجها  .. واقنع نفسه انه سونيا سليم ولكن باسلوب اخر ... فلماذا لا يتزوجها ويترك عمله وتترك الرقص ويبدأن حياة جديده نظيفة ...ووووووو

وافترقا على لقاء ... خرج ساهما ودخلت غرفتها ساهمه

الى اللقاء

من مذكرات سونيا سليم (مواطن وصيدلى وطبيب ) 6

من مذكرات سونيا سليم

(مواطن وصيدلى وطبيب ) 6

همست سونيا وهى تداعب خصلات شعره باناملها : حساك تعبان ...؟!!

(ع ع) : ايوه تعبان ... تعبان من 25سنه ... تعبان وانا شايف نفسى باكبر فى المراكز وازيد فى الفلوس على حساب العيانين الغلابه اللى باستغل عياهم ولهفتهم على صحتهم وابيع لهم ادوية غالية على انها السحر الشافى المعافى ... وانا عارف كويس قوى ان بدايلها فى شركات القطاع العام بنص التمن ونفس الكفاءة وعارف اكتر ان اللى بيتباع بخمسين جنيه تمنه على الشركة اتنين جنية ....بس لازم ابيع علشان الشركة تكسب وتكبر وتشترى شركات تانيه وتكسب اكتر وتكبر اكتر واكبر معاها واكسب معاها ... وعلشان نكبر ونكسب لازم نبيع بأى طريقة .. بأى تمن بأى وسيله ... والغاية دايما تبرر الوسيله ... وبدانا فى تنفيذ الجريمة الكامله ضد المواطن ... والعصابة كانت عبارة عن الشركة والصيدلى والطبيب .. الشركة بترشى الطبيب وبتدى خصم زياده للصيدلى ليمتصوا اخر نقطة دم فى العيان لحساب الشركة ...

سونيا بدهشة : الدكتور بياخد رشوة ؟!! طاب ازاى وليه ؟!

(ع ع ) : ازاى .. فيه طرق كتير حاشرحها لك ... ليه دى بقى علشان هوه بنى ادم .. وليه احتياجات .. واحنا اتعلمنا ازاى نشتغل على البنى ادم واحتياجاته وغرايزة ... شوفى ياستى .. كل بنى ادم وليه دخله .. يعنى فيه اللى بنخليه يكتب الدوا باننا نعمل له مؤتمر صغير ونجيب دكاترة ونخليه يشرح  لهم ونعيّشه دورالاستاذ... مش مهم بيشرح ايه المهم يقول .... والناس تصقف.. فيرجع يكتب .... وفيه الدكتور اللى ببيحب ياكل برة ... مرة كباب وكفتة .. مرة سمك وجمبرى ...فيرجع يكتب ... فيه فيه اللى بيحب الوجه الحسن ... فعينا شوية زى اللى شوفتيها كدة واحنا فى الموفينبيك ... فكرة الانيماشن اللى على الشواطىء فى القرى السياحيه مش اكتر ... احنا ما بنجبرهمش على حاجة ... احنا بس عايزين الادويه تتباع ... وكل واحده وشطارتها ... وفيه اللى بيبقى عايز فلوس وده اريحهم ... اكتب 100 علبه وخد الف جنية ... وفيه اللى عايز يسافر بره ... يعنى من الاخر .... خدامتك امنه ياسى الباشمهندز ... اطلب تلاقى ... بس المهم تكتب الدوا والعيان يشترية حتى لو مش محتاجه ...  الصيدلى بقى موضوعه ساهل ..اديله خصم زياده يبيع ابوه ...رشاوى ونصب واحتيال وما اشبه بالقواده الهدف واضح ... البيع ... المهم انك تبيع على حساب ايه على حساب مين مش مهم ... المهم تبيع ... الغريبة بقى ان النصب والاحتيال والرشاوى مابقتش متسابة للاجتهادات الشخصية ...بقى علم سموه الماركتينج وبقى بيتاخدله شهادات ... وكل ما الشهاده بقت من مكان عالى وبفلوس كتير ... كل ما كان ترقيتك اكبر ومرتبك اعلى ......

حلقة نصب لا تنتهى منتجها النهائى دم الغلابه  ... عمرك شوفتى سفاله كده

الى اللقاء

من مذكرات سونيا سليم (مواطن وصيدلى وطبيب ) 5

من مذكرات سونيا سليم

(مواطن وصيدلى وطبيب ) 5

فتحت منال الشغالة الباب لتستقبل سونيا بالزفة المعتادة : حمد الله على السلامة يا ست الستات .. نورتى بيتك يا نجمة النجوم ... ياكوكب الرقص الشرقى ... يا ......... وتوقفت عن الكلام عندما رأت (ع ع) ... عشر سنوات هى مدة خدمتها عند سونيا لم يدخل معها رجل الى البيت فى هذا التوقيت ... استجمعت نفسها وقالت : اهلا ياباشا

قالت سونيا بحده لكى تنهى الموقف : اجرى اعملى قهوه مظبوط للدكتور ... اتفضل يا دكتور ... البيت بيتك .

جرت منال وراء سونيا التى قالت بانفعال : ايه اللى جايبك ورايا .. مش قولت لك روحى اعملى قهوة مظبوط للدكتور ...

ردت منال وهى تحاول ان تطرد خواطرها : خير يا ستى انتى تعبانه كفالله الشر .؟

قالت سونيا وقد اشتد غضبها : فال الله ولا فالك ... تعبانه ايه يابت ... انتى بتبشرى عليه ؟

قالت منال وهى تحاول ان تنفى التهمه : بعد الشرعليكى ياستى ... والله ابدا.. بس ... اصل ... امال الدكتور جاى معاكى ليه الساعة دى ؟

سونيا وهى تحاول ان تسيطر على اعصابها : وانتى مالك يابارده .. روحى اعملى القهوه ... وبعد ماتقدميها تاخدى بعضك وتروحى تباتى عند بتك وماشوفش وشك الا بكرة العصر .

قالت منال وقد بدأت تتأكد من شكوكها : ستى ؟؟!!

ردت سونيا بصوت عالى : امشى نفذى اللى بقولك عليه ..

كررت منال بتوسل : بس يا ستى !!!

سونيا : مش عايزة ولا كلمه ... امشى اعملى اللى قولت لك عليه ...

ردت منال باستكانة : امرك ياستى ... ومشت وهى تتمتم ... استغفر الله العظيم ... استغفر الله العظيم ... دى ستى عمرها ماعملتها .

قدمت منال القهوه مع نظرة احتقار وقالت : تأمر بحاجة تانية يا دكتور ..؟

ادرك (ع ع) مايدور بخلد منال فقال وهو مطأطأ الرأس ينظر الى مقدمة حذائة : شكرا يامنال ...

خرجت منال وتركت الشيطان فى انتظار اتمام مهمته ...

اخذت سونيا الشاور ... وقفت امام دولاب ملابسها طويلا ... ثم استقرت على فستان ابيض باكمام طويلة وصدر مقفول وله ذيل طويل ... لملمت شعرها على هيئة ذيل الحصان ووضعت مكياجا خفيفا وقليلا من احمر الشفاه ... فتحت علبة المجوهرات واختارت عقدا من اللؤلؤ لفته حول عنقها ... واختارت عطرا خفيفا .. وذهبت .. رجعت مره اخرى الى المرآه لتتأكد ان ما تراه قريب الشبه من الملاك .

خرجت الى (ع ع ) فوجدتة ساهما ينظر الى مقدمة حذائة ولم يمسس القهوة ...

فقالت مداعبه : ياترى سرحان فى ايه ؟ .. ماتقولش سرحان فيّا .. مش حصدقك .

انتفض (ع ع) من المفاجأه وخرجت من فمة كلمة واحده وصمت بعدها : الله

قالت سونيا وقد تملكتها السعادة : ياااااه دى اجمل كلمة اتقالتلى فى حياتى ... واذدادت سعادتها عندما لاحظت ان نظرة الجوع التى لم تفارق عيناه قد اختفت فكانت سعادتها به وبنفسها لانها عرفت اخيرا نوع هذا الجوع الذى طالما حيرها ... وكانت قمة السعاده انها استطاعت ان تشبع هذا الجوع .. تشبع جوعه لإمرأه يتوب فى محراب ملائكيتها .. ويبكى خطاياه على اعتاب رقتها ... ويدفن شروره فى تابوت عذريتها ...

امسك بيدها ... اجلسها ...وجلس تحت قدميها ووضع رأسه على ركبتيها ...

رمى الشيطان حربته الثلاثية ... لف ذيله حول ذراعة .. وضرب قرنيه فى الحائط ... وخرج وهويرغد ويزبد قائلا : باظط ليلتك يا شوشو

كان نفسكوا ليلة شوشو تكمل ... صح ؟ اه منكوا اه ...

ملحوظة : يرغد = يغضب ..... يزبد =اذبد البحر اى قذف ودفع برغوته

ارغد واذبد تعبير قديم يدل على الغضب الشديد ... قديم شويه بس عجبنى ... بالبلدى كده دبدب فى الارض وقعد يزعق ..

الى اللقاء

من مذكرات سونيا سليم (مواطن وصيدلى وطبيب ) 4

من مذكرات سونيا سليم

(مواطن وصيدلى وطبيب ) 4

بعد الغدا ... وصلنى البيت واتفقنا نتقابل بالليل بعد ما اخلص نمرتى ... قالى  : حستناكى فى اللوبى .. من يوم ماقربنا لبعض وهو مابيتفرجش علية وانا بأرقص ... ولما كنت بأسأله : ليه مابتقعدتش تتفرج عليه زى الاول ؟ .. كان دايما بيهرب من الاجابة ...ما احترتش فى راجل زى الراجل ده . ..ساعات بأحس ان فى قلبه كل قساوة الدنيا وغدرها ... وساعات بأحس ان قلبه قلب اخضر لطفل برىء ...حتى الجوع اللى فى عنيه ... نوع غريب مش من النوع المفجوع اللى فى عيون الرجالة ... نوع كده مش عارفة افهمه ... حتى البت المعوجة السكرتيرة بتاعته ... طلعت بالنسبة له مش اكتر من كمبيوتر ... اورجانيزر .. منبة .. لا اكتر ولا اقل .. مراته ومابيجيبش سيرتها خالص ... حتى انا ... قاعدة جنبة بالمايوه طول اليوم ماشوفتش ولا لمحة واحده من عنية على جسمى ... راجل فى الاربعينات والموضوع مش شاغله خالص كده ؟!! غريبة قوى دى !!.. يكونش بيرسم لبعيد وبيدخل داخلة جديدة ... يبقى غبى ... غبى قوى كمان ... الحكاية مش مستاهله اللفة دى ... هوه اللى عاجبنى .. انا اللى عايزاه .. لو ماكنش عاجبنى ماكنتش قابلته ولا قعدت معاه ... كنت قلبته .. ما انا ياما قلبت رجالة .. مشاهير وصعاليك ...أغنيا وشحاتين ... سياسيين واعلاميين ... لا ... لا .. لا ..هوه مش غبى ... بالعكس بقى .. دا ذكى ... وذكى جدا كمان ... ماكنش وصل للى هوه فيه فى السن ده ... بس فيه حاجة مديقاه ... حاسة انه مش راضى عن نفسة ... ايه ده ؟ ... انا بافكر فيه كتير كدا ليه ؟!!... انا خايفة لاكون بدأت احبه .. وانا لما باحب بأبقى عبيطة خالص .. لا..لا ..لا ... احبه ده ايه ؟! .. فوقى يابت .. انتى نسيتى الموضوع ده من زمان ... خلاص بطلنا ... جبرنا ... مش حانعيده تانى ... بس وليه لأ؟ .. مش علشان فشلت مرة ولا اتنين اقفل على روحى بالضبة والمفتاح ...انا بنى ادمه ليها قلب ومشاعر ... انا مش رقاصة زى الناس ماهى شيفانى ... انا رقاصة بس علشان طلعت لقيت نفسى رقاصة ... لكن الحقيقة انا بنى ادمة .. انسانه ... بتحس ...... وقررت سونيا ان تحس .

بعد ماخلصت سونيا فقرتها ... ماهى قررت تسميها فقره بدل نمرة ... خرجت من الاوتيل مع (ع ع) ..

(ع ع) : تحبى تسهرى فين؟

سونيا برقة : عندى فى البيت

(ع ع) وقد اخذته المفاجئه : إيه ؟

سونيا وقد اذدادت رقتها : فى البيت ... نسهر انا وانت عندى فى البيت ..

(ع ع) وكأنه يحاول ان يهرب من مغامرة خطيرة : لو تعبانه خلينا مرة تانية ... الايام جاية كتير .

سونيا بدلال : لأ خالص ... بالعكس بقى ... انا فايقة قوى ... ومزاجى عالى جدا ... ورايقة جدا جدا ... وعايزة نسهر لوحدنا بعيد عن الناس وعيونها ودوشتها ممكن؟

(ع ع ) وقد انهارت مقاومته : زى ماتحبى ...

وانطلق فى طريقة الى منزلها ...

وسبقهما الشيطان ليجهز المكان ويعد واجب الضيافة سعيدا منتشيا بصيد اليوم الثمين .

الى اللقاء

من مذكرات سونيا سليم (مواطن وصيدلى وطبيب ) 3

من مذكرات سونيا سليم

(مواطن وصيدلى وطبيب ) 3

كنا قاعدين على البيسيسن فى موفينبيك الهرم ... بحبه قوى الاوتيل ده ... كله ارضى ... مافيهوش سلالم ... الهرم قدامك تحس اوانت قاعد كده انك منطلق .. حر .. مرتاح ..

دخلت علينا بنت قربت على التلا تين ... لابسة بدلة سوده محزقة .. جزمة 7سم .. رابطة ايشارب مشجر حوالين رقبتها .. فارده شعرها كرياتين ... وكوياه ... شكله اكرت قوى ... واشمه حواجبها .. ومصنفره وشها .. صارفة على نفسها كتير ... بتاخد كام البت دى ؟!

قالت : صباح الخير يافندم .. انا اسفة انى جيت لحضرتك هنا ... بس شركة السياحة مصممة تاخد الشيك النهارده ... وحضرتك عارف ... المؤتمر اخر الاسبوع .. وتذاكرالطيران لازم تكون فى ايد الدكاترة بكرة بالكتير ... الشركة التانية مش سيباهم .

رد (ع ع ) بضيق : أيوه أيوه ... انا مش فاهم هما متسربعين على ايه ؟!! هيه اول مرة بنتعامل معاهم ؟!!... هاتى ... هاتى دفتر الشيكات .

ناولته الشيك والقلم .. وهيه بتبص لى بنظرة انا افهمها كويس .

ابتسمت لى وقالت : ازى حضرتك يا مدام سونيا ... انا سعيدة قوى انى شوفت حضرتك ... انا من اشد المعجبات برقصك ...

رديت بابتسامة زهقانه : ميرسى يا حبيبتى .

اخذت دفتر الشيكات وقالت بشىء من الاهتمام : النهارده اليوم الفرى ... تقدر تاكل اللى نفسك فيه ... ومتنساش الفوار ... ميعاده كمان نص ساعة .

رد (ع ع ) : ماتقلقيش ... لو نسيت... ألم المعدة حيفكرنى .

قالت وهى فى طريقها للانصراف : فرصة سعيدة يا مدام سونيا ...

لم تنتظر الرد ... ولم ارد ... بس انا كنت متأكده انها حتبص وراها ... وبصت ... نفس النظرة .. نظرة الغيرة ... مش غيرة الست من ست احلى منها او مشهوره عنها .. لأ... دى نظرة غيرة ست على جوزها ... طاب ماهو فعلا جوزها ... ايه ؟ مش كاتبين كتاب ولا لابسين دبل عليها اساميهم ... برضه جوزها ... هو الجوز ايه غير ان الواحده تاخد بالها منه وتظبط له دنيته .. وتعرف مواعيد دواه واكله ... وتشاركة همومه وافراحه .. انتصاراته وانكساراته ... وهيه بتعمل ايه غير كده ؟؟ علشان مابيتقفلش عليهم باب واحد يعنى ... برضه محلوله ... كتير بينقفل عليهم المكتب بالساعات ...اينعم بيبقى شغل ... بس ماهو كله شغل.. وكله نجاح ... وضحكت فى نفسها ضحكة سونيا سليم .

افاقت سونيا على صوت (ع ع):  ايه ... مش حنتغدى؟

ردت سونيا   : مش لما تاخد فوار المعدة الاول ؟؟!!

لم يرد (ع ع) وحاول ان  يخفى اثار الدهشة التى بدأت نظهر على وجهه.

سونيا كمان  حاولت ان توارى اندفاعها وقالت : اكيد دوا المعده بيتاخد قبل الاكل ... الدكتور بتاعى كان بيقولى كده ؟؟!!

رد (ع ع) : فعلا دوا االمعده لازم يتاخد قبل الاكل بربع ساعة ..

سونيا : ماقولتليش انك مسافر يعنى .

(ع ع ) :مين قال انى مسافر ؟!

سونيا : مش السكرتيرة بتاعتك دى بتقول المؤتمر اخر الاسبوع ..؟

(ع ع ) ضاحكا ضحكة المنتصر دائما : لأ .. ده تظبيط دكاترة ... انا مش مسافر .

سونيا : يعنى ايه تظبيط ... انت ليه مش عايز تفهمنى ؟؟!!

(ع ع ) : انتى مصممة  بقى ... اوكيه ... واحنا بنتغدى حأفهمك كل حاجة ..

الى اللقاء

من مذكرات سونيا سليم (مواطن وصيدلى وطبيب ) 2

من مذكرات سونيا سليم

(مواطن وصيدلى وطبيب ) 2

بعد ماخلصت رقصتى قدام الناس بتوع شركة الادوية المالتى ناشيونال اللى كانوا حاجزين القاعة لحسابهم ودافعين شىء وشويات ... طلبونى اقعد شوية على تربيزة الخواجة رئيس الشركة ... استغربت ... من معرفتى بالخواجات ملهومش فى اللحمة قوى ... هما بيموتوا فى الشرب ... بير يا خويا مالوش قرار ... وده اللى اتأكدت منه لما قعدت على التربيزة ... بخبرة الايام والليالى فى الموالد وخدمة البيوت عرفت على طول ان المسيطر مش الخواجة ... اللى مسيطر الدكتور (ع . ع)... كان حبه للحمة واضح قوىفى عنية... تقراه اى بنت بضفاير  ... هو راجل حلو الحقيقة .. طول وعرض وهيبة وعشرتة للاجانب خلاته جانتى وذوق وشيك فى التعامل مع الستات ... من يوميها بدأت معاه علاقة ... لأ .. ماتفهمنويش غلط  ... انا رقاصة اه لكن ماليش غير فى الشرعى ... كل الحكاية ان الواد عجبنى .. وعمرى ما عرفت دكاترة قبل كده ... واللى بتشتغل شغلانتنا  لازم يكون عندها علاقات بكله ... الزمن علمنا كده ..... كله بينفع..

اتقابلنا واتكلمنا وطبعا جاب لى هدايا وطبعا قبلتها ... بس كل مرة اشوفه كان يقعد يحكى ... يحكى كتير عن الشغل والدوا والفلوس ... عمره ماحكى عن نفسه .. ولا قال انه مش مرتاح مع مراته ولا جاب سيرة عياله ... ولا حتى لف ودار بالكلام عن ان نفسه يدوق اللحمة ... امال الجوع اللى فى عنيه ده سببه ايه ؟! ... ولا ده رد فعل عادى لواحد قاعد مع رقاصة؟! ... بصراحة شغلنى ... خلانى عايزة اعرف هو عايز ايه بالظبط ... فقررت ان اتكلم معاه فى اللى بيحبة

 وسألت : هو الدوا بيكسب قوى كدة ؟!! انتو بتصرفوا جامد قوى ... وبتركبوا عربيات عاليه جدا .. دا انتوا صرفتوا 450 الف جنية فى العشوة اللى كانت عندنا الاسبوع اللى فات .!!

رجع بضهرة لورا وحط رجل على رجل وقال : بنكسب ؟!! دا احنا بنكسب ونكسب ونكسب ... العلبة اللى بتقف علينا بتلاته جنية بنبعها بستين جنية ... دا غير ان احنا كل كام سنه نخوف الحكومة علشان تذود لنا الاسعار ونهدد بان احنا حنبطل ننتج ... فيرفعولنا الاسعار فنكسب تانى ...

قالت بقلق : ازاى ده ... ماهو لو بطلتوا تنتجوا ... الناس مش حتلاقى دوا وتموت ...

قال ضاحكا ضحكة المنتصر دائما : اولا احنا مش حنبطل ننتج ... دا بيبقى تهديد بس ... وحتى لو بطلنا ننتج ... فيه الف بديل فى السوق وارخص ميت مرة كمان ....ماتخافيش على العيانين ...

قالت وقد اشتدت دهشتها : الله لما فيه بدايل رخيصة كده الناس مابتشتريهاش ليه ؟!

قال وهو مازال بنفس ضحكة المنتصر دائما : علشان الناس طيبة ومابتعرفش ... واللى يعرف هو الدكتور والصيدلى ... ودول بقى شغلتنا ان احنا نخليهم مايعرفوش ... ولو عصلجوا وقالوا احنا عارفين ... نخليهم ينسوا انهم عارفين علشان مصلحتهم حتكون فى انهم مايعرفوش او يعملوا انهم مايعرفوش ...

قالت بقوه : لا ...عندك  .... استوب ... انا بقى اللى عايزة اعرف

الى اللقاء

من مذكرات سونيا سليم (مواطن وصيدلى وطبيب ) 1

من مذكرات سونيا سليم

(مواطن وصيدلى وطبيب ) 1

بادىء ذى بدء : أقر أنا اسلام ايوب بإعترافى وتقديرى الكاملين لكامل حقوق الملكية الفكرية للكاتب الكبير احسان عبد القدوس وابداعة فى رسم شخصية سونيا سليم فى الراقصة والسياسى .

قوم فى يوم جرس الباب رن قبل الفجر بشوية ... قومت مخضوض .. قفلت على العيال اوضيتهم بالمفتاح وخلعت عصاية المساحة اللى فى الحمام واتسحبت وبصيت من العين السحرية ... قوم مالقتش حد ... روحت واخد جنب وفاتح حته من الباب وانا رافع ايدى بعصاية المساحة استعدادا للهجوم... وفجأه ..... ملقتش حد برضه... بس لقيت كتاب على ربع السجادة اللى قدام الباب واللى لسه شارينها من كارفور قال ايه علشان مكتوب عليها ولكوم بالانجليزى  ... القصد خدت الكتاب ...قفلت الباب بالترباس وركنت عصاية المساحة ورا باب الشقة استعدادا لأى مفاجأت ... وولعت النور فى الصالون وقعدت اقرأ الكتاب  ... لقيت مكتوب علية : مذكرات سونيا سليم ... وانا بافر فيه عينى وقعت على الباب الرابع صفحه 44 ... وكان بعنوان( مواطن وصيدلى وطبيب) ... يالاهول ما قرأت ...

 اول حاجة جات فى بالى لما قريت المصايب والفضايح ...انى لازم اقول لصحابى واهلى وجيرانى على الفيس والمدونة كل اللى عرفته ...ايوه .. ما اسيبهومش انا كده على عماهم ابدا ... دول عشرة برضك ولايك وكومنتات .. ويا برنس وياباشا ويانجم وياعالمى وياكوكبى ... وياما ظبطونى ...

فقررت انى انشر الباب الرابع ... بس العيب انه طويل حبتين ... وانا عارف انكوا خلقكوا ضيق واخركوا صورة تخبطوا عليها لايك واللى بعده ... بس اللى قدرت اعمله انى الخص الباب الرابع فى حلقات صغيرة ... فاللى عايز يتابع يعمل لايك علشان اعمله منشن فى الحلقة اللى بعدها علشان ماتتوهش فى الفيس ... او يدخل على مدونتى حنعيش يعنى حنعيش حيلاقى الحلقات كلها http://han2esh.blogspot.com/

واللى مش عايز لا ده ولاده .. هوه حر ... بس سونيا مقطعة الدنيا ومفضحة مفضحة يعنى ... حيضيع منكوا كتير على فكرة .

الى اللقاء

حٌب الحب

حٌب الحب

كان يحبها كثيرا ... كان يتمنى ان يقترب منها يوما ليبثها لواعج شوقة وسهده (حلوة لواعج دى... صح؟)... ولكنها كانت امنية عزيزة المنال ... فهى نادرا ماتتعامل مع احد ... كانت اميرة ... برنسيس ... او هو كان عايز يشوف كده ... الله اعلم .. نكمل ونشوف ..

فى يوم كان قاعد فى الركن البعيد الهادى وحاطط  الكاسيت ابو حجارة قدامة ومشغل شريط انت عمرى لام كلثوم ... سارح هيمان فى دنيا الخيال ... ( على فكرة ينفع ام بى ثرى بسماعة ومشحون وفلاشة لشيرين ولا اليسا ) كله ينفع ... فأصل الاشياء واحد ... وكلة بعد كده كوبى .. تكنولوجيا وفوتو شوب وكورل درو ... بتحسن وتلون وتديها طعم الزمن الجديد ... بس يفضل الاصل واحد ...فالانسان واحد فى كل مكان وزمان ... من ايام ادم ولغاية يوم القيامة لم يتعلم ولن يتعلم سوى انه لا يتعلم ... القصد علشان ما طولش :

فجأة وبدون سابق انذار ... سمع صوت جنبة بيقول : صباح الخير ..

التفت ليرد الصباح فوجدها امامة ... انها هى ... يالا الهول ... ارتجف وانتفض واحمرت وجنتاه ... انه لا يصدق نفسة ... انها هى ... هى من احب وسهر وسهد واشتاق وانجوى وانكوا ... نظرت اليه وقد قلت ابتسامتها خجلا وقالت : صباح الخير ؟

فرد متلعثما : صباح الفل ... اتفضلى ....

انها اجمل كثيرا عندما اقتربت ... اكثر رقة.. صوتها اكثر عذوبة... ملفوفة القوام كما انها تبدوا اكثر بياضا مما كان يعتقد ... انها تستحق كل هذا الحب ...!!!!!

قالت بحرج : انا اسفة بس اصلى بحب ام كلثوم ولما سمعتك مشغل الاغنية حبيت اسمعها .. دا لو مايدايقكش يعنى... وضحكت ضحكة غريبة حبتين ..

قال متجاوزا انطباعة عن الضحكة : لا طبعا اتفضلى ... دا حاجة تسعدنى ... وقال فى نفسه : دا حلم العمر يا حلم العمر ..

ضحكت نفس الضحكة وقالت : ميرسى

قال صديقى وقد بدأ يقاوم انطباعة عن تلك الضحكة : انتى بتحبى اية تانى لأم كلثوم ...

ضحكت نفس الضحكة وقالت : ياصباح الخير ياللى معانا .... ايوه ايوه والاغنية بتاعة يبوس الجدم ويبدى الندم على غلطته فى حج الغنم ...

ارتجف ولكن هذه الرجفة تختلف عن الرجفة التى حدثت عندما فوجىء بها وقال : تمام تمام ... حبيتى القصائد ؟

ضحكت نفس الضحكة ولكنها كانت مكتومة وقالت بشىء من الوقار المصطنع ليناسب موضوع الحديث : طبعا ... انا بحب الاطلال بتاعة محمد ناجى ...بتاعة هل راى الحب سكارى دى ..... الكلمات حلوة

قال وهو يتسائل لماذا تضحك هذه الضحكة البلهاء قبل كل جملة ؟!: فعلا محمد ناجى دا شاعر جامد

حبت تجود فقالت بعد ان ضحكة نفس الضحكة البلهاء : وكمان لحن بليغ حمدى كان روعة كدهون  ....

قال وهو يقاوم البكاء : فعلا ... ايوه ... بليغ بدّع وكدهون ... حاول ان يتمالك نفسة ان حب عمرة ينهار امامه كدهون ...لا ..دى واحده تانية... لا.. دى واحده تانية اكيد ...اللى حبيتها اميرة ... لا لا لا ..ايوة اميرة .. لكن دى هبلة...طاب والنعمة هبلة بقى  .. بس الحقيقة انها هيه ... الاميرة طلعت هبلة ... وكرهها كما احبها ... وبنفس القوة ... فضحكتها بلهاء ...و رقتها مصطنعة .. وعذوبتها متكلفه .. وما اكثر من ديفوهات قوامها ... وبعدين دى بيضة قوى ... بيضة من البياض الكالح البارد الرخم... انها لا تستحق كل هذا الحب ...

الحقيقة انه ماحبهاش ... هو حب الحب فيها ... وكمان ماكرههاش ... لكن كره غباؤة فيها ... البت غلبانه كل الحكايه انها عايشة متصالحة مع نفسها ومش فارق معاها ان اسمه احمد ناجى ولا محمد ناجى ... ولا فارق مين اللى لحن ولا حتى مين اللى غنى انشالله تطلع جملات كفته هيه اللى غنت الاطلال ... هيه ماطلعتش من الاغنية اصلا غير ب هل رأى الحب سكارى ؟؟.

ومازال قلبى مغلقا3

ومازال قلبى مغلقا 3

ماهو ماينفعش قفلة القلب دى !!... وبعدين ان ماكنتش احب دلوقتى امال حاحب امتى ... لما يبقى عندى 30 سنه ؟؟؟!!! وبعدين بقى انا لازم افوق واعترف انى لا ملكة ولا اميرة ولا حتى حصلت وصيفة ... انا بنت زى اى بنت لازم تعيش شبابها وتحس بقلبها وهو بينبض ... ودبرت سوسن امرا بليل ...فبعد مقارنات ومفاضلات بين عروض الحب الكتيرة مع بداية موسم الدراسة ... قررت سوسن أن تحب سمير ...

اخيرا قبلت سوسن احدى محاولات سمير المستميتة للتقرب منها وسمحت له ان يجلس معها وحدهم فى كافيتيريا الكلية وتعطية الفرصة التى طالما تمناها وتسمع اللى نفسه يقوله ...

بدا سمير فى الكلام ... عايز التعبير الصح ... انطلق الكلام من صدر سمير انطلاق صاروخ سكود من قاعدته لا يهاب اى جيل من اجيال الباتريوت ... كلام مليان مشاعر بريئة صادقة اينعم مراهقة مندفعة ... بس عايز الحق هو ده الحب اللى بجد ... حب منطلق برىء صادق طلع من قلب اخضر لسه الدنيا مادبلتهوش ... حب من غير حسابات ولا مراهنات ولا تحليلات ..

سمير اتكلم كتير قوى ... كلام متحوش بقاله تمنتاشر سنه ... كلامه كان جميل يسعد اى بنت فى الدنيا ويخليها طايرة فى السما ويحسسها بنفسها وبأد ايه هيه مرغوبة ..بس سوسن ماكانتش مركزه فى الكلام قوى ... كانت بتتصارع  مع نفسها علشان تأكد ان قرارها صح ... مش كفاية انه بيحبنى ... عروض الحب كتيرة ... لكن سمير شكله كويس .. بيلبس حلو ... ابن ناس يشرف .. وابوه بانى له شقة ... وبيجى الكليه بعربية ... هيه صغيرة اه بس اكيد لما حيتخرج حيجيب واحده كبيرة ... وكمان اول حرف من اسمه سين زيى بالظبط ..

انتهى اللقاء الاول وقد استقر فى وجدانها صحة قرارها ... وبدأت تمارس طقوس الحب .... ولكنها كانت طقوس بلا عقيدة .

لمست سوسن كل اجزاء وجه سمير بنظهرها .. واستقرت بعينها على عينيه وقالت فى رقة وحنان : خلى بالك من نفسك .

رد سمير وكأنه على اعتاب غيبوبة مشاعر حاده : وانتى كمان خلى بالك من نفسك ..... علشانى .

كان هناك من يراقب الموقف منذ بدايته ... انهم اصدقاء سمير المقربين ... بعد ان مشت سوسن ... اسرع الاصدقاء التلاثة المقربين الى سمير .... ولكنه نظر اليهم وهو مازال فى حالة غيبوبة المشاعر واشار لهم بالابتعاد ...

انها اول عيوب حالة الحب ... االندالة .. التنصل .. التخلص ... التملص ... من اصدقاء السوء اللى ياما استحملوا

الى لقاء 

ومازال قلبى مغلقا2

ومازال قلبى مغلقا 2

بعد مابتطلع سوسن من عند الكوافير بشعرها المفرود بفعل البرمننت المعروف دلوقتى باسم الكرياتين ... كانت بتبقى حاسة انها اميرة ... ملكة .. تنازلت وتكرمت وتعطفت وتلطفت ووافقت ان تمشى فى الشارع بين الرعية ... حلوه وشعرها مفرود والفستان مكسم عليها ... والحواجب معمولة اى نعم مش عند الكوافير ... بس معمولة  ... ناقصه ايه عن الاميرة؟!... ولا حاجة   ...

 والاميرة ماتحبش ... الاميرة بس .. تتحب ..... يعنى ايه اميرة تدى قلبها لحد ... مين ده اللى يستاهل انها تفكر فيه ؟... وتشغل نفسها بيه... وتقلق عليه ...لأ ... انا اميرة انا ملكة ... ده احساسها دايما وهية بتطلع من عند الكوافير واللى بيبدأ ينهار تدريجيا بعد شهرين حيث انتبات الشعر الغير مبرمنت ..

خلصت الثانوى ودخلت الجامعة وراحت للكوافير وفردت شعرها واستخدمت لاول مرة حقها الشرعى والقانونى والمجتمعى فى انها تعمل حواجبها فى النور وقدام الكل .... وقررت تطلع الملقاط من علبة الهندسة وتحطة على المكتب قدام الكل ... وهى مازالت تسأل نفس السؤال : طاب ما انا باعمل حواجبى بالملقاط من وانا فلا تلته اعدادى ... ماما ايه ؟ مابتاخدش بالها ولا بتستعبط ؟ ...

واذدادت جمالا ... واذدادت انوثه ... اذداد الاحبه ... ولكنها مازالت لم تحب ..وبتكرار عروض الحب وبتكرار الرفض ... ظهر السؤال الذى تهرب منه دائما ... لماذا لا احب ؟ هيه حقيقى مش عارفة ترد على السؤال .. يمكن علشان مالقتش الفارس اللى بتحلم بيه ؟! ... ولا علشان التربية الجامده اللى بتقول الحب ده عيب وان البنت المحترمة المفروض ماتحبش ...؟!! ولا علشان خايفة تحب فاللى تحبة يطلع مايستاهلش ؟!! بس فيه من اللى حبوها ناس كتير كويسة .. وصحباتها كانوا بيموتوا عليهم ... بس هيه لأ .... وفى يوم قررت ان تقبل احد العروض ... قررت ان تحب ... ان تعيش كما تعيش البنات .... ولكنها لم تكن تدرى ان الحب ليس قرارا نأخذه .... ولكنه ..... أمر ننفذه

الى لقاء 

ومازال قلبى مغلقا 1

ومازال قلبى مغلقا 1

اول مرة حبت كانت فى سنة سته ... يوميها كانت رايحة تجيب البشاورة من سته اول علشان الابلة تمسح السبورة .... وهية داخلة سته اول قابلت الواد الحليوة ابو شعر اصفر ابن الابلة وهوه طالع من الفصل ... كل الحكاية ثانيتين ... بس ماتعرفش ايه اللى جرالها ... وقفت سرحانه وساكته وسط الفصل ... الابله قالت : عايزة ايه يا حبيبتى ... مردتش ... كررت الابلة السؤال : عايزة ايه يا بنتى ؟

انتبهت وقالت بخجل : مش فاكرة ... الفصل كل ضحك ... الابله كمان ضحكت بس زعّقت فى العيال وقالتلهم : بس ياواد منك ليها ... تعالى يا حبيبتى اسمك ايه ؟ ...ردت: اسمى سوسن يا ابله ... قالت: انتى بقى سايبة فصلك وجايه هنا ليه ياسوسن ؟  .... قالت بفرحة : ايوه ... انا عايزة البشاورة يا ابله ...

اخدت البشاورة ورجعت فصلها ... وفضلت سرحانة طول اليوم ... كانت بتفكر فى ايمن ... كانت بتقول فى نفسها ياسلام لو انا كمان كنت بنت الابله ... كان زمانى فى ستة اول .. وكنت قعدت فى التختة اللى جنب ايمن ... ماهو ولاد الابلوات بيقعدوا جنب بعض وفى الصف الاول كمان ... دى اول مرة حست فيها بالحب.. او بالغيرة... من ابن الابله... ساعتها ماكانتش تعرف تفرق  ... وعايز الجد لغاية دلوقت مافيش حد عارف يفرق ... او بمعنى اصح ماحدش عايز يفرق ... عيشها كده زى ماهيه ... النخورة كتير بتبقى مش حلوة ...

يرجع مرجوعنا لسوسن ... سوسن كانت جميلة ... ومازالت جميلة ... كانت جميلة وعارفة انها جميلة ... من اولى اعدادى والناس بتقولها انها جميله واللى مابيقولش ... عنية كانت بتقول ... وساعات كتير كانت بتفرح بنظرات الاعجاب اكتر ماكانت بتفرح بكلمات الاعجاب  ... ماكنش فيه حاجة مقلله فرحتها بجمالها الا شعرها ... كان شوية مش حلو ... هيه كانت بتقول كده ... كانت بتكره كلمة اكرت ... كانت بتحوش فلوس العيديات كل سنه علشان تروح تفرده عند الكوافير ... امها كانت دايما تمانع ..كانت تتخانق معاها وتقولها : البرمننت ده حيوقعلك شعرك يا مايلة ... انت حرة !! انا زهقت...

 بس سوسن كانت دايما تقنعها خصوصا لما تقولها انا محوشة فلوس الكوافير ...فترد الام متجاهله فكرة الفلوس ومتنازلة عن تأثير البرمننت على شعر بنتها ومتقمصة لدور المربية الفاضلة  : بس خدى اختك الكبيرة معاكى وتعملى شعرك بس هه... مافيش عمايل حواجب

فترد سوسن بطريقة الامهات  : طبعا يا ماما انا لسه فى ثانوى ... لما ادخل الجامعة ابقى اعملهم ...

الى لقاء.

الإستحمام بين النظرية والتطبيق

الإستحمام بين النظرية والتطبيق

الاستحمام كلمة ليها مترادفات كتير بتختلف من منطقة لمنطقة ومن بيئة لبيئة ومن ثقافة لثقافة ... فالناس الهاى او اللى عايزين يعملوا هاى بيقولوا: بياخد شاور ... الطبقة المتوسطة اللى بتعافر علشان تفضل متوسطة بتقول : بيستحمى ... الطبقات الشعبية بيتقول : بيسّبح بتشديد السين ... وسط الدلتا بيقولوا : بيشّطف بتشديد الشين .. اما اصحاب اللحى فبيقولوا : ذهب ليغتسل ... كلها مترادفات بتدى نفس المعنى وهو ان الزبون بينضف ... القصد .

من زمااااان ولغاية دلوقت ولسنين جاية كتير ... مشكلة الام المصرية الكبرى انها تقنع الواد من دول انه يستحمى ... بالمحايلة ... بالزعيق .. بالشتيمة ... بالجرى وراه على السلم ... واحيانا كتير بتوصل للضرب بالشبشب والتكتيف ... وعادة الام بتنجح نتيجة فارق القوة والعزيمة والاصرار وتاخده وتقلعة وتبدأ تصبنه وتليفة ... ورغم نجاح الام الا ان الواد بيفضل يقاوم بس المقاومة بتاخد صور تانية ... العياط ... العياط من القهر والعياط من الصابون اللى بيدخل فى عنية... بعد معركة الاستحمام الاسبوعية وبعد ماالواد ما ينضف ويغير الفانلة واللباس المعفنين ويلبس البيجاما النضيفة ويسرح شعرة ... الطبيعى انه يكون مبسوط ... بس ده مابيحصلش .. بالعكس بيفضل زهقان قرفان متدايق ...

مع الايام حالة الرفض من الاستحمام بتفضل ملازمة الواد... اى نعم بتتحول ومبتبقاش القصة قصة ميه وصابون وليفة بتبقى قصة فكر وتفكير وافكار ... فبيفضل برضة  يهرب ويقاوم اى محاولة لتنضيف العقل اللى عفن من الافكار اللى عفى عليها الزمن ... بيفضل مستمتع بغباؤة وقصر نظرة وافكارة العتيقة ... ومابيعملش حاجة غير انه يمارس الولوله والندب والنواح على حالة اللى مايسرش عدو ولا حبيب وقلة بختة وحظة القليل ... الواد ده منه كتير قوى ... منه يجى كدة 80 مليون ... رافضين يسّبحوا ويغيروا فانلة التفكير ولباس الفكر اللى عفنوا ...

تحيا مصر

شكر خاص للدكتور محمد صقر صاحب السؤال المهم : هو ليه الواد من دول بيعيط لما امه بتحمية ؟.