الخميس، 7 مايو 2009

مين فينا الظالم (8)

مين فينا الظالم (8)

داليا بنت اخت عم مرسى ....ربنا عدلها لها على طول ...يادوب خدت بكالوريوس التجارة واتجوزت ....ماطولتش زى ما بيحصل اليومين دول حاكم نقص الرجالة فى السوق بقى مشكلة ...

داليا خلفت بت وسمتها ندى ...ندى كبرت ودخلت كى جى ون ....داليا قررت انها تجيب مدرس فى البيت علشان يدى ندى درس ...ماهى الحكومة صعبت المناهج ..الناس كلها بتقول كدة ...المدرس كان بيجى يومين فى الاسبوع ...يوم عربى ويوم حساب ....الاستاذ وصل ...دخلتة داليا الصالون ...ونادت على ندى اللى جابت كراستها وكتابها وقعدت مع الاستاذ....داليا قدمت الشاى للاستاذ وسابتهم وخرجت...داليا رفعت سماعة التليفون وكلمت مى صحبتها ...حكت لها عن نجلاء اللى اتخطبت اول امبارح ..ووصفت لها الشبكة والفستان بالحتة ...وطبعا مانسيتش المكياج اللى ماكنش لايق عليها وكانت مأفوراها زيادة ....ماهى بتدارى ديفوهاتها ...اهوة كل واحد بياخد نصيبة ...يدى الحلق للى بلى ودان ...وكلمتها عن شيماء اللى عايزة تتطلق علشان مسكت جوزها مع صاحبتها ....وحكت عن الفستان اللى جابنة علشان تحضر بية خطوبة اخوها اللى خلى ابوها يدفع دم قلبة فى حجز القاعة الخمس نجوم ....ياميلة بختنا اللى اتعمل فرحنا فى نقابة التجاريين ...وطبعا لازم تجيب سيرة الحكومة ...وقلة ادبها ...ومناهج العيال اللى بقت صعبة واد اية الحكومة بتكـّرة العيال فى التعليم ...وان الدروس بقت مشكلة فى كل بيت وازاى واكلة مصروف البيت ...قال يعنى العيال لما حيتخرجوا حيلاقوا شغل ....كنا احنا اشتغلنا بلا نيلة ....بس نعمل اية الناس كلها على دا الحال ...ماهى حكومة بت كلب اللى بتدية باليمين بتاخدة بالشمال ....مش عارفين يسيطروا على الدروس الخصوصية ...المفروض يمنعوها خالص ...بس تقولى اية ...تلاقيهم بيستفادوا من وراها ....عدت الساعة بتاعة الحصة فى مكالمة التليفون ...ومافاقتش داليا الا على صوت الاستاذ وهوة بيقولها خلاص يا مدام ...داليا حطت السماعة بعد ما قالت لمى حبقى اكلمك تانى ...داليا سألت الاستاذ بأهتمام : اية الاخبار يا استاذ مستوى ندى اية دلوقتى ؟؟...الاستاذ قالها : ماتقلقيش يا مدام ...مستوى ندى بيتحسن يوم عن يوم ....وبأذن الله مع استمرار المتابعة ...حتخش كى جى تو على الاقل... بجيد جدا ...داليا قالت : الله يطمنك يا استاذ ....وعطت لة الظرف وقالت لة اتعابك يا استاذ ....الاستاذ خد الظرف وشكرها وقالها مش عايزك تقلقى خالص يا مدام ...ندى دى زى بنتى ..وحخلى هالك احسن واحدة فى المدرسة ...داليا ودعت الاستاذ ...ورجعت طلبت مى ...قالت لها معلش كنت بادى الاستاذ اتعابة .....وكملت ساعتين كمان ...ماهى الحكاوى كتيرة ...واسرار الناس اكتر ..وحرمة البيوت اكتر واكتر ......

الآ.... اية هوة اللى صعب فى منهج كى جى ون ....يحتاج لمدرس خصوصى فى البيت ..ويحتاج نشتم الحكومة ..ويحتاج نسب النظام اللى مش قادر يمنع الدروس الخصوصية ...طاب ما بدال ماتقعدى ترغى فى التليفون بالساعتين وتجيبى فى سيرة الناس ..ماتقعدى مع بتك تشرحى لها ...انتى مش معاكى بكالوريوس ولا انا متهيئلى ....هية أ ب ت وواحد اتنين تلاتة دى حاجة صعبة محتاجة مدرس ...ولا محتاجة نشتم فى الحكومة اللى مش عارفة تمنع الدروس الخصوصية ...طاب الحكومة حتعمل لك اية؟! ....حتيجى تقف على باب العمارة تمنع المدرس انة يطلع لك ...ولا تبوظ الاسانسير علشان المدرس يتقطع قلبة وهوة طالع لك فيحـّرم يرجع تانى ...لكن ازاى ...ماهى كدة عملت اللى عليها ...اتطمنت من الاستاذ على مستوى البت ...وحملت الحكومة الذنب ...فية احساس بالراحة والرضا عن النفس اكتر من كدة ...يا حاجة يامتعلمة يا ام بكالوريوس.... والله خسارة فيكى كل مليم صرفتة عليكى الحكومة بت الكلب دى علشان تعلمك

ياترى انا عندى حق فى اضراب 17 مايو ؟؟!!

هناك 5 تعليقات:

  1. ازيك يا دكتور

    انا موجودة بس كنت تعبانة شوية

    ميرسي اوي على شرح كلمة حولي

    البوست دا عندك حق فيه جدا

    الكلاس بتاع بنتى مش فيه غير بنتى وبنت تانية وولد هما بس اللى مش بياخدو دروس

    طبعا بنتى في primary 1

    واللى معاها في الكلاس دول بياخدو دروس من kg1

    مع ان اغلب مامتهم متعلمات ومتفرغات مش بيشتغلو

    ومش بيعرفو ولادهم خدو ايه حتى

    دا الهوم ورك كمان المدرس بيحله معاهم

    ولو جينا للاكبر سنا اللى في اعدادي وثانوي هتلاقيهم
    طول النهار برا البيت بيلفو على المدرسين ويضيعو ساعات طويلة كان ممكن تفيدهم اكتر لو ركزو فيها في البيت

    واعتقد الحكومة مش ليها دخل في دا

    الغلط والتقصير مننا احنا او من المدرس اللى مش عنده ضمير ومش بيشرح كويس عشان الطلبة تاخد عنده درس

    ياريت الاضراب عن الفساد دا مش يكون 17 may بس
    ويستمر على طول

    ردحذف
  2. باقولك ايه يا استاذنا

    لو عندك ولد حفظه والنبى البؤين دول واحجزهولي للبت مريم
    معا نقضي على الدروس الخصوصيه
    ههههههههههههههههه

    الصراحه انا بابقى عايزه ادي بوكس لاي واحده من الستات دول وهى بتكلمني

    والله العظيم ومنه مش بس معاها بكالريوس

    نو
    دى اساسا مدرسه

    ناقصها ايه بقى الموكوسه دي عشان تدرس لولادها ؟؟؟

    وكلمه بقى بتعفرتني

    لا انا قلت اجيبلها مدرسين فى البيت من دلوقتي عشان تتاسس

    تتأسس ازاي يعنى هما اصلا بياخدوا ايه ؟؟

    ارزعي البت جنبك طول النهار خليها تكتب الحروف والارقام

    على فكره انا ولادي لغات وانا ما كنتش فى مدارس لغات
    كل الناس قالولي مش هاتعرفي تذاكري لهم بما فيهم جوزي
    بس انا اصريت اوديهم وقلتله يعنى انا بعد مش هاعرف اتعلم الى بيعلموه للابتدائي ده انا اروح احرق البكالريوس الى خدته

    وفعلا عملت كده وجت من مصلحتي اتعلمت فعلا ودماغي ما ركنتش فى الانجليزى بالعكس يمكن الانجليزى بتاعي اتصلح

    والحمد لله مريم دلوقتي فى ابتدائي وما قابلتنيش اي مشكله فى مذاكرتها

    باتمنى اصمد من غير دروس لحد اعدادي على الاقل

    ادعوووووولي


    احب اقولك ان الدروس بالنسبه للشعب المصري بقى زي الحشيش
    هههههههههههههههههههههه

    ادماااااان

    طب انت زعلان من بتوع الكي جي ؟

    طب شوف الى فى الجامعه

    البت اختي فى كلية تجاره بتاخد دروس فى كل المواد

    اقولها بتاخدي درس يا بنتي فى مادة كذا ؟؟؟
    ده انا فاكره انى ذاكرتها فى 3 ايام اينعم جبت مقبول فيها بس يعنى اهم 3 ايام

    هما بياخدوا دروس ويسقطوا خيبه بالويبه

    قلتلها مره يا بنتى دفعتكم بالصلاة على النبى 8000 باين او اكتر
    مقسمه للانتظام حوالي 35 سكشن

    يعنى على الاقل عشر معدين بيشرحوا بتكرار 3 مرات على الاقل من كل واحد

    مافيش ولا واحد من عشر معيدين بيشرح كويس فى السكشن تحضري معاه وتفهمي ؟؟؟

    عارف العيال بيطلعوا من الكليات والمدارس بقر ليه ؟؟
    عشان بيرحوا للمدرسين الى مش همهم يفهموا ويعلموا العيال ا نما همهم الدرجات

    يدوبوا الكلام الى هايجي فى الامتحان فى شوية مايه والعيل يشربهم ويروح الامتحان يرجعهم على ورقة الامتحان
    ويخرج كمان كنت

    حمار مع مرتبة الشرب

    مش ا نا قلتلك نهاجر اسهل ؟

    زي بعضه انت معاك حق في الاضراب

    ردحذف
  3. اه نسيت اقولك

    البت الى اسمها شيماء الى فوق دي تغير اسمها

    ايوه اي واحده اسمها شيماء لازم تكون بت كويسه وجوزها محترم جدا وصاحبتها برضه كويسه وتنفع مسؤلة الدعايا للاضراب
    هههههههههههههههههه

    فين المرتب ؟

    ردحذف
  4. الجروب الرسمي لجريدة الصباح العربي بيت المدّونين العربhttp://www.facebook.com/group.php?gid=83558910956#/group.php?gid=78080770039

    ردحذف
  5. وجهة نظرك محترمة جدا وممكن نخرج منها بشيء

    1- لا تقلدي الاقارب والجيران في تعليم ابناءك وانما علمي اللي تقدري تمشي فيه .. والمقدرة مش تعليم ام بس انما مثابرة على اكمال هذا التعليم

    2- العيال بيجيبوا الستات المصرييات لمس اكتاف من هموم المذاكرة وده مش موجود في بلاد عربية كتير وشفت بعيني روقان الامهات العرب من مختلف بقاع الأرض واحنا جنبهم منكوشين بنصرخ ونشتم ومنها لله مناهج البقر فعلا

    3- بنتي بعون ربنا ثم مساعدة زوجي لم تأخذ درس واحد وهي الآن بتخلص اولى ثانوي وعلمناها واسسناها صح وبعدها مشيت مع نفسها بكرم وفضل من الله بس من السنة الجاية ياباشا انت عارف النظام طبعا .. دروس حتى في مادة التربية القومية لأن المدارس بتقفل ابوابها اصلا

    4- طول ما فيه بقايا ضمير لدى بعض المدرسين الناس تقدر تصمد لكن لو انعدم الضمير بشكل كامل زي عند ابني اللي في رابعة ابتدائي وانا ست عندي اربعين اعمل ايه؟ مقدرش احفر معاه زي زمان
    وعليه مش كل الظروف زي الست بتاعة دروس كي جي وان لكن حكاية انها تسب وتسخط على حكومتنا غير الرشيدة
    اييييييييييييييون هي حكومة بنت تربتيت مش تيت واحد
    وبما اني عضو هيئة تدريس في السخامة كلية العلوم اقدر اقول لك ان المفتري على الاطفال قصاصنا منه في الآخرة

    الا انت اطلعت على كتب رابعة ابتدائي علوم؟

    ومالها قاعة نقابة التجاريين
    ولا الاطباء
    ولا المهندسين
    فلة ياروحي

    ردحذف