الجمعة، 8 مايو 2009

ثورة المظلومين

ثورة المظلومين

عم مرسى وعيلتة وجيرانة ...زهقوا ..تعبوا من الفتافيت ...عايزين من الهـُبر.. هما مش من نفسهم ولا اية؟!... كلة بيهبش ياعم الحاج ....امال نصيبنا فين ....عم مرسى وعيلتة وجيرانة قرروا انهم يثوروا ...يعملوا ثورة على الظلم والاستبداد ضد السراية والبشوات ..... عم مرسى وعيلتة وجيرانة لموا نفسهم وطلعوا يشاركوا فى اضراب 6 ابريل ... اتلمو على كفاية ونور والمحظورة اللى كانت موجودة بس من تحت لتحت!!..... .وعملوا الاضراب.... اضراب ضد التوريث.... وضد عدم تداول السلطة...... وضد الغلاء...... وضد الفساد... ايوة اهم حاجة ضد الفساد دى ..... فساد اية اللى انت جاى تقول علية ؟؟... ما نسال نفسنا الاول قبل مانطلع ونعمل اضراب نوقف فية حال البلد اكتر ماهو واقف ....... احنا ضد الفساد بجد بجد يعنى ؟! ...ولا احنا مع الفساد؟ ...ولو احنا ضد الفساد ....زعلانين من الفسدة لية ؟!....علشان احنا مش عارفين نبقى زيهم وزهقنا من الفتافيت......وعايزين الهبر؟ .....ولا احنا مابنحبش الفساد علشان الفساد وحش ؟!...... ولو الفساد وحش .......امال احنا فاسدين لية؟! ...اى نعم احنا فاسدين صغننين بس فاسدين ....الفساد هوة الفساد ....الفساد الكبير زى الفساد الصغير ...زى اللى بيساعد على الفساد ...زى اللى بيقبل الفساد على نفسة .... كلة فساد.... وحجة ان الحكومة بتسرقنى يبقى انا كمان اسرقها دى ماتكولش ....وان اتكلت ماتتبلعش .....وانت مالك يا اخى ؟! لنفرض ان فية واحد حرامى اعمل زية لية؟!!! ما تعمل الى عليك انت.... .اذاكانت الحكومة فاسدة فعلشان احنا فاسدين ...الحكومة هية احنا ...واحنا هما الحكومة ...احنا الاتنين بنظلم بعض وبنظلم نفسنا وبنخرب بيتنا بادينا ....ليـــــــــــة؟؟؟؟! .....لية حاطين شرط ان احنا موافقين نبطل فسادنا بس الحكومة تبطل هية الاول فسادها ......سيب وانا اسيب .......كنا دايما بنقولها لما كنا نمسك فى بعض واحنا صغيرين بنلعب فى الشارع...سيب وانا سيب .....مافكرناش احنا لما نقابل ربنا حنقول لة اية ؟ حنقول احنا كنا بنسرق علشان الحكومة كانت بتسرق ..؟؟... لوالكبار بطلوا يسرقوا كنا حنبطل احنا كمان !!.... طاب وانت مـالك؟! ...واحد بيسرق تسرق زية ليــــــــــــة؟ ....ماتقوليش علشان اوكل العيال .....برضة ماتكولش معايا وان كلت ماتتبلعش ....شوفلك حجة تانية!!! ......مافيش حد بيشيل ذنب حد ...كله حيتحاسب..... انت ناسى دى لية ....؟؟!! طاب ماتيجى ننضف ..... سهلة خالص .....حتقرر انك مش حتبقى فاسد حتى لو كل الى حواليك ولاد ستين كلب ....... بس .....خلاص ...شفت سهلة ازاى ....وصدقنى يوم ماننضف الحكومة غصب عنها حتنضف عارف لية ؟!!... علشان ساعتها حنقدرنطلب حقنا ... مش حنسكت علشان ماحدش يبص لنا فى السبوبة...... مايعكننش علينا ويسمم لنا الفتفافيت !!!!.... ...حنقوى برضا ربنا علينا .......حيكون اللى معاك ربنا مش حزب ولامحافظ ولاصول فى مباحث امن الدولة .....وبدال ماتتذل للجنية اتذل لربنا يا اخى ....... ويوم مانتذل لربنا حيعزنا .................. والله ......................................

طاب نعمل اية ياعم الحاج ؟؟؟؟

دة بقى عنوان البوست الاخير

هناك 11 تعليقًا:

  1. كلام جميل جدا

    اوافقك عليه تماما

    وانا قلت قبل كدا مش يمكن لو ربنا رضي علينا يتغير حالنا

    والى بيصبر على البلاء ربنا بيرفعه عنه

    طيب جربنا الفساد ومش نفع نجرب شويه نبطله ونشوف هايحصل ايه

    ردحذف
  2. تمام الله ينور يا فندم

    انا دايما اقول هى متلازمه

    صحيح لو صلح الحاكم صلح المحكوم

    ولكن كيفما كنتم ولي عليكم


    تحياتي لحضرتك

    ردحذف
  3. اللي عاجبني في دعوتك شيء بحلم بيه من زمان

    نصلح قاعدة الهرم المسوسة
    تنصلح الرأس تلقائيا
    بدل الصريخ والزعيق والشتم والتريقة والنكت

    تسلم ايدك
    مناصرة دعوتك في بوستي الليلة دي
    وبالمناسبة ها يكون عندي حوار شات بوكس
    يمكن نعرف نقول للناس
    لا تفسد ولو ليوم واحد

    تحياتي يا باشا

    ردحذف
  4. السلام عليكم

    حلوة اوى فكرة ان ما حدش هيشفع لحد ولا هيشيل ذنبه
    قال تعالى
    (وقالوا ربنا انا أطعنا سادتنا وكبراءنا فأضلونا السبيلا)
    مش هينفعونا بحاجة يبقى نعمل زيهم ليه

    وكمان فكرة ان احنا الحكومة والحكومة احنا فالعلاقة دايما تأثير وتأثر ولو حد فينا اتظبط الطرف التانى هيتظبط على طول

    كمان فكرة انهم بيعملوا القلق علشان الفساد وهما اصلا لما بيخرجوا فى القلق ده بيخربوا الدنيا ويا عينى ما بنقدر الا ع الغلابة

    على فكرة انا من البلد اللى كان منها عم مرسى صاحب اضراب 6 ابريل واحب اقولك ان عم مرسى وكل من يعرفه وكثير ممن لا يعرفه اختفوا الى حين اشعار آخر

    وتقبل تحياتى

    ردحذف
  5. حنعيش
    موافقاك فى كل حرف
    الدعوة جميلة
    بلاش بكون سيئين عشان غيرنا اسوء .
    تعالوا نتذلل لله ...
    بجد انا معاك وتسلم دعوتك

    ردحذف
  6. السلام عليكم و رحمة الله و بركاته

    أول زيارة لمدونتك
    و ان شاء الله مش الاخيرة

    بجد ما شاء الله عليك

    إن شاء الله هأعمل تنويه عندى على المدونة قبلها بكام يوم
    الفكرة رائعة

    و إن شاء الله تبدأ بيوم
    و تستمر و تكبر بإذن الله

    ربنا يجعله خالص لوجهه
    و فى ميزان حسناتك يارب


    دمت بود

    ردحذف
  7. ريم انا كدة اطمنت انك خفيتى تمام .....دايما كدة منورانى

    ردحذف
  8. صبرنى ..اية ...قلقان عليكى ...اوعى تكونى اتعديتى من ريم ....رد سطرين بس ...مش متعود على كدة ...امال فين الرغى....لا انا كدة بدأت اقلق

    ردحذف
  9. بنجاواتى يسمع منك ربنا وكل عم مرسى واهلة وجيرانة يختفوا من البلد .....سعدت بك

    ردحذف
  10. القد ...تسلمى ...وايدنا فى ايد بعض ..حنعيش ...احسن

    ردحذف
  11. ستيتة ..مش عارف اعمل اية ... فى مدونتك باشكرك ...وهنا باشكرك ...تانى ...متشكر لهذا الدعم القوى

    ردحذف