الاثنين، 18 مايو 2009

الاضراب ما لة وما علية

الاضراب ما لة وما علية
اخر حاجة اقفل بيها موضوع الاضراب ....على المدونة بس ... لكن اللى عايز يعمل الاضراب دة كل 17 من الشهر ...ياريت ...واللى عايز يعمل الاضراب كل يوم يبقى ربنا يكرمة ...
أولا : انا مش عايش فى مية المخلل ...ولا انا مثقف فوق العادة عندة كمبيوتر ونت وقاعد يعمل اضرابات ....ولا انا دون كيشوت بحارب طواحين الهوا ...لا ...انا حاسس بالناس وحاسس قوى كمان ...لسبب بسيط وهو انى من الناس دول ....واول يوم دخلت فية الدنيا بعد ماخلصت الجيش كان كل اللى فى جيبى خمسين قرش ...وماجبتش الكمبيوتر الا بعد ما اتجوزت بعشر سنين وبأستخدم النت المجانى بتاع المصرية للاتصالات ...دا علشان التسعين جنية بتوع الدى اس ال كتار عليا

ثانيا : لا الشكوى والحسرة ولا اللوم ولا النقد ولا مصمصة الشفايف ولا رمى همنا وخبيتنا على حد ..حيصلح حالنا ...بالعكس حيجيبنا ورا اكتر واكتر

ثالثا : الطريق الوحيد علشان نغير اللى حوالينا ...دا لو بجد عايزينة يتغير ...ان احنا نغير نفسنا ......توماتيكى حتلاقى اللى حوالينا اتغير ...ووالله والله وكمان والله دا مش كلامى دا كلام ربنا

رابعا :..احسان عبد القدوس قال جملة حلوة قوى ...قال يا عزيزى كلنا لصوص ...فكل اللى كنت طالبة ان احنا نحاسب نفسنا قبل ما نحاسب اى حد ...محدش فينا ولى فلية نطلب من اللى حوالينا يبقوا اوليا

خامسا : اللى يدور فى سبت الورد يلاقى ورد ...واللى يدور قى صفيحة الزبالة حيلاقى زبالة ...والنحلة علشان بتقف على الورد بتدى عسل ...والدبانة علشان بتقف على الزبالة ...بتموت شهيدة افكارها تحت مضرب الدبان

سادسا : طريق طولة 60كيلوا بامشى فية بصفة شبة يومية بقالى تسع سنين ...فى خلال التسع سنين دول اتعمل علية 3كبارى علوية ...وكمان كوبريين يوصلوا للطريق الدولى ... واحنا فى عز الازمة المالية اللى فى العالم الطريق دة بيتوسع علشان يبقى 6حارات مش تلاتة ..انا مش مهندس ....بس بالويم كدة ...الموضوع دة اتكلف كتير قوى ...السؤال هنا ...هوة احنا مابنشوفش دة لية ؟ولا احنا مش عايزين نشوف

سابعا : اى حد لة مطلق الحرية انة يختار انة يكون نحلة او يكون دبانة ...صدقنى انت حر ...والله انت حر ...بس كل اللى بترجاة ..انة مايحاولش يخلى النحلة تعمل نيو لوك وتبقى دبانة
سيها يا اخى ..هوة انت مش بتنادى بحرية الرأى ....ياساتر

ثامنا : فية واحد ماشتركش معانا فى الاضراب وما تقاش ربنا فى شغلة ...ومشدش فرامل الجرار بتاع القطر ...وراح يشرب معسل ...الجرار مشى لوحدة وكسر عربيتين وموت ناس كتير ...منة لله ...لو انا الحكومة بقى ..اعدام ....ومش حاسمع كلام اللى يقول حرام دا عندة عيال ...مالناس اللى ماتت برضة عندها عيال

تاسعا : حبدأ من بكرة سلسلة جديدة اسمها الكتالوج ...فكرة جديدة السبب فيها مراتى ...اشكروها لو طلعت حلوة ...ولو طلعت وحشة اش......كروها برضة

عاشرا : ختامة مسك ..قالى تعالى : ومن يتق الله يجعل له مخرجا ويرزقة من حيث لايحتسب . صدق الله العظيم

هناك 12 تعليقًا:

  1. اسلام
    اول تعليق
    اولا تشكر مراتك
    انت افكارك جميلة وصح ولايمكن تعاشر غير انسانة زيك
    ثانيا عجبنى اوى بند 7 واللى عايز يكون هو حر
    تجياتى لك
    وفى انتظار الكاتلوج

    ردحذف
  2. أزال المؤلف هذا التعليق.

    ردحذف
  3. التعليق التانى كمان
    ايه
    يادكتور
    انا حاعمل اضراب لوحدى والا ايييييييه

    ردحذف
  4. ازيك يادكتور اسلام

    الاول انا عاوزة اقولك ان كتير من صديقاتي وصديقات اخواتي نفذن الاضراب

    وواحدة من صحباتي كانت المفروض تخلص ورق لمامتها وقالتلى انها بسبب الاضراب قررت انها مش تدفع اي رشوة وقالتلى هو الورق لسا مش خلص بس مش مشكلة المهم اني حسيت انى لاول مرة راضية ومش زعلانة من نفسي

    شفت يا دكتور انك كنت عندك حق


    انا حاسه ان في حاجة مزعلاك وانا مش عارفه هى ايه بس اللى اقدر اقوله ان فكرتك كانت جميلة واكيد غيرت مفاهيم البعض

    احنا في انتظار السلسلة الجديدة وشكرا للمدام اللى اكيد هاتكون افكارها جميلة على الاقل بحكم العشرة مع صاحب الافكار الرائعة
    شكراااااا جزيلا ومقدما للمدام


    كل الرغي دا وانا تعبانة امال لو مش تعبانة كنت اتكلمت اد ايه

    ردحذف
  5. احب اقولك يا د. اسلام انى طبقت الاضراب

    وفى خلافى مع والدى يومها قررت انى بدل ما اعيط وأخاصمة كام يوم كالعادة انى اتكلم معاه واطلع كل اللى جوايا.

    حاولت أعامل اهلى بشكل أحسن والنتيجة كانت بردو أحسن


    فى انتظار السلسلة الجديدة اللى هتابعها من أولها ان شاء الله

    ردحذف
  6. السلام عليكم و رحمة الله و بركاته

    د.اسلام
    أولا تحياتى لحضرتك

    طبعا من طريقة الكلام
    ممكن استنتج -يمكن يكون مش صح-
    بس الظاهر ان كان فى كم محبطات ليك

    و ان الشعب دا فاسد مفسد
    و إذا يوم بئا كويس يموت

    عادى يا دكتور مش تاخد فى بالك
    و الحمد لله انك ثابت فى طريقك

    للأسف مشكلتنا إننا بنبص للواقع
    و لأسباب الارض فقط

    نسينا إن فى رب الاسباب
    و أن أمره بين الكاف و النون

    كل اللى طالبه مننا إننا نقدم نية خالصة
    و عزيمة صادقة
    و أول خطوة
    وهو هيكون معانا مش هيسيبنا

    لكن للأسف فى ناس تملكتها اسباب الارض
    و كل تفكيرهم فيها بس

    ربنا يرزقنا جميعا الفهم الصحيح و العمل الصالح
    و يتقبله منا يارب

    فى انتظار السلسلة الجديدة
    و تحياتنا لزوجة حضرتك

    دمت بود

    ردحذف
  7. القدر وانا ...اولا العفو بالنيابة عن المدام ...ثانيا ياريت نطبق بند سبعة كنا ارتاحنا

    ردحذف
  8. منوش ..ممكن اكون على خلاف مع بابا ...بس اللى متأكد منة انة مابيحبش حد اكتر منك ...جايز يكون فروق فى افكار الاجيال ...بس لو قربنا اكتر ...حنفهم بعض اكتر ..صدقينى الاب دة حاجة جميلة قوى ..وزى ما قالولى زمان ..اقولهالك ...مش حتحسيها غير لما تبقى ام ان شاء الله

    ردحذف
  9. سول ...شكلك كدة تعرفى مراتى ...وشكلهاكدة قالت لك على فكرة المدونة الجديدة ...عموما انتى صح ...وفعلا ربنا يرزقنا الفهم الصحيح والعمل الصالح وياستى اللىعايز يبقى دبانة هوة حر ...خلينا احنا فى الخلية

    ردحذف
  10. ريم ... فعلا زعلان ...بس زعلان على اللى مش عايز يشوف غير اللون الاسود ...زعلان على الدبان اللى كتر وبيزعل قوى لما يشوف نحلة ...اتفائل يا اخى بعد الليل دابما فية نهار

    ردحذف
  11. والله يا استاذنا انا دايما اقول

    الى يقعد فى مقلب زباله بيشم ريحه زفت ويشوف حاجات وحشه ويسمع صوت الكلاب والقطط بتتخانق على الزباله

    والى بيقعد فى حديقه مزهره بيشم ريحة الورد ويسمع صوت العصافير ويشوف الورد الجميل والمناظر الحلوه

    وان شاء الله اتمنى الناس تفهم الحكايه ده

    تحياتي ليك

    بتنزل بوستين من ورايا ؟؟

    ماشي ماشي

    ردحذف