الفرق بين الرجل والمرأة 10
هشام بيقول انا من يوم ما اتجوزت وأنا بأدى وبأضحى ....وماباخدش مقابل ...سماح بتقول محدش بيدى أدى ...محدش بيضحى أدى ...وبرضه بتقول مافيش مقابل ....هشام مش فاهم ان سماح بتدى ....وسماح مش فاهمه ان هشام بيدى ...الاتنين بيدوا بس بيدوا غلط ...هشام بيدى سماح اللى هوه عايزه كراجل مش اللى هيه عايزاه كست ....وسماح بتدى هشام اللى هيه عايزاه كست مش اللى هوه عايزه كراجل ....هما الاتنين بيدوا بس مش حاسين انهم بياخدوا المقابل...وعايشين بس مش مبسوطين مع انهم بيحبوا بعض ....مثال : راجل شغلته بتستدعى انه على طول مسافر طول الاسبوع بيقعد فى فنادق ويحضر فى قاعات وبياكل فى مطاعم ...لما رجع البيت مراته قالت له انا عزماك على العشا بره ....ادت ولا ما ادتش ...ادت ...بس ياترى هوه دة اللى عايزة ....لا ...لانه زهقان من برة وعيشة برة واكل برة ...اللى عايزه طاجن باميه بالحمه الضانى ياكله على الطبليه وهوة لابس البيجامه فى وسط العيال .
الرجاله والستات عايزين ست حاجات بس السته بتوع الرجاله غير السته بتوع الستات ....كدة مطلقه ؟ لا الرجاله برضه عايزين السته بتوع الستات والعكس ...بس هيه اولويات يعنى لو الست عايزه رعايه والراجل عايز ثقة ...معنى كدة ان الست مش عايزه ثقه والراجل مش عايز رعاية ...لا طبعا ...بس الاهم عند الراجل الثقه وبعدين تيجى الرعايه فى المرتبه التانيه ...والعكس عند الست .
1 سماح عايزه رعايه وهشام عايز ثقة :
لما هشام يراعى مشاعر سماح ويهتم بيها من قلبه سماح حاتحس ان هشام بيراعيها فتبدأ تثق فيه فهشام يحس بالثقه اللى محتاجها من سماح يقوم يهتم بيها اكتر ويراعيها اكتر فتثق فيه اكتر ....والعجله تلف
2 سماح محتاجه تفهم بفتح التاءوالفاء وهشام محتاج تقبل بفتح التاء والقاف :
لما هشام يسمع لسماح وهيه بتعبر عن مشاعرها من غير مايحكم عليها ولا يقدم حلول ...بس بيسمع ويتعاطف ويتواصل ...سماح حتحس انه بيفهمها فتبدأ تتقبل هشام من غير ما تحاول تغيرة فياخد احتياجه من التقبل فيبدأ يديها تفهم ......والعجله تلف
3سماح محتاجة احترام وهشام محتاج تقدير :
لما هشام بيدى سماح الاولويه فى حقوقها ورغباتها ...لما يقدر رغباتها ...لما يجيب لها ورد ولا هديه من غير مناسبة حتحس انه بيحترمها فتبدأ تقدرة التقدير اللى يستحقه ويحس هشام ساعتها ان اللى بيعمله مابيرحش على الارض فيحترمها اكتر ....وتلف العجله
4 سماح محتاجه الاخلاص وهشام محتاج للاعجاب :
لما هشام يخلص لسماح ويفخر بيها حتحس انه بيحبها وبيديها من وقته فتعجب بيه وتبدأ تتكلم عن اخلاقه وصفاته الحلوه فيحس هشام انها معجبه بيه فيخلص لها اكتر ....والعجله تلف..
5 سماح محتاجة التصديق وهشام محتاج للاستحسان :
هشام لما مايعترضتش على مشاعر سماح ومايجادلش ويصدق على كلامها فتبدأ تستحسن افعاله لان هشام دايما عايز يكون بطل وفارس فى عين مراته ..بدون تريقه سبعها وجملها...لما يلاقى دة يبدأ يصادق على كلامها .....والعجله تلف
6سماح محتاجه للتطمين وهشام محتاج للتشجيع :
لما هشام يهتم ويتفهم ويراعى ويحترم ويصدق سماح حتحس انها متطمنه ومحبوبه فتثق وتقدر وتستحسن هشام فيتشجع انه يطلع كل اللى عنده .....والعجله تلف
انا بدأت بهشام علشان ياخد الخطوه الاولى ...بس ممكن سماح هيه اللى تاخد الخطوه الاولى ...اى حد اى حد يبدأ بس العجله تلف .
الموضوع مش سهل والمهمه صعبه وعايزة تدريب وصبر ومحاوله ...بس اللى عايز العسل لازم يستحمل قرص النحل....السعاده والعيشه الهاديه تستاهل نتعب ونحاول ومنركبش دماغنا ونقف جنب شريكنا مش قدامه ...ونبطل كبر وعناد ونبطل نقول مجتمع ذكورى ونبطل نقول الستات اتفرعنت.
المركب واحدة وصلوها لبر الامان ....علشانكوا وعلشان حياتكوا ... والاهم علشان ولادكوا يكبروا فى بيئه صحيه وربنا يكرمنا وهما اللى يحرروا القدس .
فاضل حاجتين :
اولا :موضوع الفرق بين الرجل والمرأة دة من وحى كتاب الرجل من المريخ والمراة من الزهرة للكاتب د.جون جراى
ثانيا : فاضل نقطه مهمه جدا انا ما اتعرضتلهاش ...ونفسى انتوا اللى تكتبوها ...لان الموضوع ده ماينفعش فيه وجهة نظر واحدة ....وبصراحه انا لو كتبته حلطش جامد قوى ...علشان انا اصلا مخنوق من هشام وسماح ومش طايقهم من الاخر.
الموضوع اللى بقول لكوا عليه دة من وجهة نظرى سبب تسعين بالميه من الخلافات بين الازواج مع انه مابيتقالش وعمرة ما حيتقال ....اكتبوا اكتبوا ووقعوا غير معروف ...بس اكتبوا اللى ليكوا واللى عليكوا ...
البوست الجاى حيبقى العنوان بس ....وحاسيبه فاضى ....وحاخد التعليقات احطها فيه ...
مع اطيب تمنياتى بحياه سعيدة جديدة مديدة .....باى شله
اؤمن جدااااا بالكلمه دي
ردحذفهشام بيدى سماح اللى هوه عايزه كراجل مش اللى هيه عايزاه كست ....وسماح بتدى هشام اللى هيه عايزاه كست مش اللى هوه عايزه كراجل ....هما الاتنين بيدوا بس مش حاسين انهم بياخدوا
بالظبط ده الى بيحصل
عشان كده باطلب من كل طرف من فضلك حاول تجتهد وتعرف شريكك عايز ايه فعلا ده مش واحد صاحبك ولا هو واحده صاحبتك
معاك كمان فى نقطة مش مهم مين يبدأ عشان العجله تلف
مع الاحتفاظ بكون الرجل هو المسؤل الاول من وجهة نظري لاسباب كتير (مش عشان عنده حته زياده فى العقل والستات ناقصات عقل ودين) لا طبعا عشان ده مش دايما صح
المهم يعنى هو المسؤل الاول هو القبطان
ثالثا
طيب ماشي نتكلم بس اديلنا عنوان نتكلم تحته
يعنى انت عايزنا نتكلم عن ايه فى الجانب ده تحديدا
مشاكل ولا حلول ولا عن كل سماح وهشام
ادينا عنوان
خطوط عريضه اي حاجه يعنى
وبعدين ايه ده انا جيت هنا الصبح كتبت تعليق طويل عريض
وبعدين الكهربا قطعت
عارف لو ده ما اتنشرش هاعيط بقى
حبيبك يتمنى لك الراحة
ردحذفيدور عليها
يحب يشوف صدمتك لما يعمل لك مفاجئة حلوة
يحتويك وكأنك من دمه
وكأنك على أسمه
ينصرك ظالما أو مظلوما
يوم يبدأ كل طرف في عد مزاياه الشخصية ويرمي في ضهر الجراب مميزات الأخر
ده معناه اننا بنعد عد تنازلي للإنضمام لجمعية صامدون تحت الزواج
تحياتي وشكري على السلسلة اللي تعبتك دي وربنا يجعلها في ميزان حسناتك وينفع بك يارب
اهو شوفت بقى ؟
ردحذفمجرد ما شاورت من بعيد على البطحه الى بتوجع كله طلع يجري وما حدش قال حاجه
بنجعجع فى الفاضي احنا حلوين فى الجعجعه موت
من كتر ما باشوف عندي على المدونه بدأت اقتنع ان 99% من المشاكل بين المتجوزين سببها الخفي هى عدم التوافق الجنسي والمشاكل من النوع الى ما حدش بيتكلم عنها
والمشكله انهم هما نفسهم ما بيكونوش فاهمين ايه مشلتهم تحديدا
عارف لما يكون حاجه بتوجعك وانت مش عارف تحدد هى ايه ؟
انا بيجينى حالات على الاميل عباره عن كده عشان الثقافه فى الموضوع ده فى الحضيض فى مجتمعنا
انا كتبت بوستين قبل كده واحد نصائح للستات والتاني نصائح للرجاله
مش عارفه شوفتهم انت ولا لا بس هاجيبلك وصلاتهم
http://b3b3a.blogspot.com/2009/09/blog-post_26.html
http://b3b3a.blogspot.com/2009/10/blog-post_24.html
وكتبت قبل كده اسرار البنات واوجاع الرجال
هاتلاقيهم عندي برضه فى شهر مايو 2008 تقريبا
معلش انا جبت الوصلات عشان الكلام اكتر من انه يتقال فى تعليق
خلاصة القول فى موضوع هشام وسماح هو ايه كان وقعه الوقعه دى
ردحذفالفريكيكو
ردحذفهوه الصح يتقال الحمد لله اللى ماوقعش الوقعه دى ........هاهاهاهاى ....
على فكرةوالله ماكان قصدى هيه جات كدة ....عقل باطن بقى