الفرق بين الرجل والمرأة 8
فى اخر اليوم بعد ماخلصت سماح الغسيل والطبيخ والكنس والمسح ومذاكرة للعيال ....دخلت اوديتها وغيرت هدومها واتمكيجكت وحطت برفان ...هشام وقتها كان قاعد يتفرج على التليفزيون.....سماح خرجت من اودتها عروسة ....مشت بدلال وراحت قعدت جنب هشام ....وقالت له : اخيرا الولاد ناموا .... آه ...ماتخليش الشيطان يلعب بدماغكوا زى مالعب بدماغى وبدماغ هشام ....سماح ماكنتش عايزة غير انها تتكلم مع هشام ...كلام وبس ...ماهى طول النهار مابتتكلمش مع حد ....طول النهار شغل ومناهدة وبس ....نفسها تتكلم ...تحكى مع حد يسمعها ...
سماح : مش ابله عليه وقعت مع مرات ابنها تانى ...هشام وهوه بيغير القناه : تانى ...هما مابيبطلوش ...سماح : بصراحه بقى المرة دى أبله عليه عندها حق ...مرات ابنها فاكرة نفسها لسه صغيرة فى ثانوى ...جايبالها العيال وتقولها قال ايه ..انا نازله اتفسح مع صحابى ....هشام وهوه بيغير القنوات عايز يشوف مزه ولا بوسه من بتوع الافلام الاجنبيه : امم .....سماح أبله عليه قالت لها يابنتى عيالك اشقية وانا مابقتش حملهم ....هشام ساب الريموت بعد مايأس انه يلاقى فيلم مناظر ومسك الجرنال يقرا شويه ويبص لها شويه ...سماح بدأت تتخنق :انت معايه ولا بتقرأ...هشام : معاكى.... معاكى طبعا ....سماح بتحدى : طاب انا كنت بأقول ايه؟ ..هشام ...كنت بتقولى العيال اشقيا ...ياستى ماكل العيال اشقيه ...وبعدين انا بكرة حاشدهملك ...سماح : عيال مين اللى حتشدهم ...العيال.... العيال ....ضغطت سماح على اعصابها وقالت : مش برضه مرات ابن ابله علية غلطانه ...هشام:ياستى واحنا مالنا يخلصوا مع بعض ... سماح ماالست بتشتيكيلى ومش عارفه تعمل ايه ؟ ....هشام ببرود : سهله خالص ماتاخدش العيال ...سماح : بس والله الست دى صعبانه عليه تربى وتكبر وتتعب وبعد كدة ابنها يجيب لها واحدة تزهقها فى عيشتها ...هشام بسخريه : احبك ياحنين ... ماتشغليش بالك همه حيحلوها ...قومى انتى اعملى لنا العشا ....سماح بهدور غريب خالص : عارف لولا ان الواحدة مش لاقيه حد يكلمه والله ماكان لسانى يخاطب لسانك ...هشام ببله مغولى : ايه ناويه على نكد ولا ايه ؟! بقولك كل واحد عندة مشاكله احنا ناقصين مشاكل الجيران ...انا مش عارف ايه اللى مدايقك كدة ...سماح : لا مافيش وقامت من جنبه وهيه مش طايقاه ولا طايقه نفسها ...
شوفتوا رخامه كدة قبل كدة ...اكيد شوفتوا هشام مش فاهم ان اكبر غلطه بيعملها انه مابيسمعش سماح ...ومابيركزش معاها ...هوة عطيها ودنه اه ...بس دماغة مش معاها ...فسماح حست انه مش مهتم بيها وبكلامها مش بيفهمها ...الغلطة التانيه انه بيسخر من مشاعرها ولما تعبر عن ضيقها من اللى بيعمله ...يقوم يقولها مالكيش حق حتى تنفعلى ...فبتحس انه مش بيحبها ولابيقف جنبها مابتحسش بالامان اللى هيه عايزاه ...ممكن ياهشام ....يارخم .....تسمع وتنصت لسماح وتتواصل معاها ...ممكن تحترم مشاعرها واحاسيسها وافكارها ...حتى لو كانت من وجهة نظرك هايفة وماتستاهلش ...ياعبيط الستات مش زينا...دول بيعيشوا القصص بقلبهم مش بعقلهم ....بدليل ان الواحد تلاقيها قاعدة قدام المسلسل التركى من دول تعيط وتتشحتف وفى الحلقه الواحدة تخلص لها علبتين مناديل فاين متين منديل .... مع انها شافت المسلسل دة مرتين قبل كدة...عيش معاها وحسسها انك معاها ....وبعدين بطل اسلوبك الرخم دة ...والله انا نبهتك ....انت حر بقى ...انا حايشهم عنك بالعافية ...انت مطلوب ياحبيبى ....وانا مش حأقدر ادافع عنك اكتر من كدة ...لاحسن اروح فى الرجلين انا كمان ... انت عارف لما بيقلبوا بيبقوا ازاى ....سلام ياصاحبى
ايوه كده
ردحذفيا مساء العدل على الكفتين
اجدع شيء يحولنا كلنا لجمعية صامتون تحت الزواج هو اللامبالاه
واللي امر منها السخرية
واللي ألعن وأضل سبيلا كثرة النقد بسبب ومن غير سبب
وياسلام على ادعاء "الأرننة" وان الشريك التاني مبيفهمش حاجة وهشهش بس هو عم الخبير الخطير
قليلا من الإحترام
يودي في سكة كثيرا من الحب
والعطاء
والمودة والرحمة
لما أنظر لبيوت يعامل فيها أحد الشريكين بغير احترام
وبما اني شفت يبقى حصلت المصيبة الكبيرة
ان عدم الإحترام لم يقتصر على البيت بس
ولكن امتد ليظهر علانية
ساعتها بشوف في عيون شريكه كسرة النفس
وبدأ انذارات أجراس الخلع
مش لازم يكون خلع محكمة
ان شريك يعيش مع شريك مش محترمه ولا حابه ولا حاسس ان فيه اي بقايا أمل
ده لوحده خلع
ونعود لجمعية صامدون تحت الزواج
مشكرين على البؤين اللي في الأخر دول :)
تحياتي يا كابير
ايوا كدا يادكتور حضرك لحقت نفسك
ردحذفوبئيت كدا في السيف سايد
هههههههههههههههه
كلام حضرتك صح تماما وكلام ستوتة جميل اوى اوى
بس سماح برده ممكن تكون اذكى من كدا وتخليه يتكم معاها ويهتم بكلامها لو هى فعلا اختارت موضوعات تهمه وممكن يتواصل معاها فيها
هى كمان لازم تحسسه انها حد له عقل وممكن يتكلم في موضوعات مهمة مش خناقة ابله عليه
انا عارفه ان موضوعات زى كدا هى محور حياة سيدات كتير بس الست لازم تتعلم هى كمان تخرج من الاطار الضيق دا وتفكر تكون صديقة لجوزها تتكلم معاه في كل حاجة ممكن تجذبه حتى ماتشات الكورة
مش عارفه انا شايفه كدا ومش عارفه ممكن اكون مش صح اوى بس دا رأيي المتواضع
انا بس زعلانة من هشام سايب تكلمه تكلمه وقاعد يدور على فيلم متغاظة اوى منه بصراحة
يا سلااااااام
ردحذفطب ايه رايك ان سماح دي عايزه دروس بقى ما ينفعش كده
ده كان لازم ياخد مطوه فى وشه
وكمان بيقولها عشى ؟؟
يا نهاره بنى مقلم كحلي
وطبعا احاديثها مش عاجبها وبوسها كمان مش عاجبه بيدور على غيره فى الافلام الاجنبي
ماهو ده جزاءها طبعا
انها سمحتلك انت والمجتمع انكم تسرقوا عمرها وتحطوا دماغها فى التلاجه او فى حلة المحشي
وما يبقاش عندها حاجه تتكلم فيها ولا تعملها فى اهمية دماغ حضرته
ولو كان هو بيحكلها عن ماتش الكوره ومشاكل نادي الاسماعيلى مع سماد طلخا مافيش مشكله طبعا ده عادي ومهم اوي وشيق اوي ؟؟؟
طب انا لسه معلقه على البوست الى فات وشاده شعري هناك ساعتين
عموما انا طبعا باطالب بتسليم هشام
ولا اقولك سلمنى سماح وهى هاتقوم بالواجب
نيهاهاهاهاها
تسلم اديك يا دوك