وهم الزمن الجميل

وهم الزمن الجميل

الجيل اللى فات لما كبر فى السن وشعرة ابيض ونفسه بقى على الأد ..وبدا اللى حواليه يستغنوا عن خدماته الجليلة اللى كان بيذلهم بيها ... وبدا يحس انه مالوش دور فى اللى جاى ...لبس وش التقوى والعيب والحرام واللى ميصحش ... وشغل شريط فين ايام زمان ... ايام الاخلاق والمبادىء والقيم ... ايام صلة الرحم ولمه العيلة ... ايام الفن الجميل وقارئة الفنجان ومن اجل عينيك عشقت الهوى ... والافلام اللى كلها عظة وعبر مش الاسفاف والبلطجة ...

قوم تلف الايام والجيل المذلول يكبر وشعرة يبيض ونفسه يبقى على الأد ...واللى حوالية يستغنوا عن خدماته الجليلة .. فهوه كمان يلبس وش التقوى وعيب وحرام ومايصحش ويشغل سى دى ايام الزمن الجميل والعيلة واللمه والفن الجميل بتاع عبد اللطيف التلبانى وايمان البحر درويش .

ننجز بقى ...

الجيل اللى فات ضحك علينا وعيشنا فى احساس كبير بالذنب ان احنا وحشين ... واحنا بنضحك على الجيل الموجود ومعيشينه فى احساس كبير بالذنب انه وحش .

ننجز اكتر ...

مافيش حاجة اسمها الزمن الجميل ... مافيش حاجة اسمها اخلاق وعيلة ولمه وصلة رحم ... الحاجات دى فى خيالنا ... بنتمناها بس ... لكن مابنعملهاش ... الا من رحم ربى طبعا ودول قليلين قوى على فكرة .... لكن الكتار ... بيتكلموا بس .. بيطبطبوا على الجزء اللى فاضل من ادميتهم ويراضوه .. ويشحتوا نظرة الاعجاب بحالة الملائكية اللى متقمصينها ...

طاب والنعمة الشريفة كله كدب ... كله كان صايع ... واللى ماكنش صايع كان نفسه يبقى صايع ... ايوه .. لا كان فيه زمن جميل ولا اخلاق ولا فن محترم ولا دياولو... طول عمرها سرقة ونصب وعوالم والاخ مقاطع اخوه والابن عاق لابوة والبت ممرمطة امها .. كان الفن ..اوعى تكلمنى بابا ماشى ورايا .... لكن لومش ماشى ورايا عادى كلمنى مافيهاش حاجة .. كان فيه ايه الاساتوك ده اللى ماشى يتوك ده .. كان فيه المرأة المجهولة وعباس .. كان فيه نجلاء وميرفت مقضينها مايوهات وبوس .. كان فيه حمام الملاطيلى .. والمذنبون ..

احنا عالم وسخة ... والنعمة عالم وسخة ... ومش حننضف الا لما نعترف ان احنا عالم وسخة ... لكن طول ما احنا بنرمى وساختنا ورا سور الزمن الجميل ولا نرميها على الجيل الجديد اللى هوه وسخ جاهز بفعل تكنلوجيا السلفى ... مش حنشوف خير.. والعبى يامتطلقة ورقتك جات متطبقة .

يارب خد الاخوان والنوشتاء والبرادعى واهم حاجة عماد اديب وموزته .

يارب خلى حمدين... عذابة فى الدنيا اقوى ( انه عايز يبقى رئيس ومايطولهاش ).

الدبح بسكينة تلمة مشرشرة

الدبح بسكينة تلمة مشرشرة

فى العادى ظابط المباحث بيروح مكان الجريمة يعاين المكان ويبلغ النيابة ويطلب المعمل الجنائى .... ويبدأ يدور على الجانى ... ويدور كمان على دافع الجريمة ... لان معرفة دافع الجريمة بيديق دايرة البحث عن الجانى ... ودوافع الجريمة كثيرة ... عندك دافع السرقة ... او دافع الانتقام ... او دافع الجنس ... او حتى ساعات بيبقى دافع الشهرة ....المهم انه دايما فيه دافع ورا كل جريمة ...  ده العادى امال ايه بقى اللى مش عادى ؟

اللى مش عادى ان ظابط المباحث راح مره مكان جريمة ... قوم لقى العجب ... الجانى والمجنى عليه والشهود ... التلاتة مدبوحين بسكينة تلمة مشرشرة ... الاعجب بقى ان التلاتة اينعم مدبوحين بس صاحيين .. ايوه زمبؤلك كده .. صاحيين وقاعدين مع بعض بيتكلموا وياكلوا ويشربوا ... عادى خالص ...طبعا اخينا الظابط قال فى نفسة مادام صاحيين وبيتكلموا يبقى انا ماليش اى لازمة .... بس ازاى ؟ ... ما انا شايف ناس مدبوحة قدامى ... يبقى على الاقل اعرف الدافع ورا ام الدبح اللى مابيموتش ده ...

ودور الظابط على الدافع ... ولقى الظابط الدافع ... عارفين الدافع طلع ايه ؟ ... طلع الجهل والغباء المتخفى تحت عباءة الدين والاخلاء ( عارف انها بالقاف بس علشان السجع وكدهون ).....

طلع سلسال قهر وعصبية وبطريركية انتجت أب سلطوى جاهل اعطى أمرا بختان بنت فى عمر الزهور ليمنع تفتحها ويطفىء فيها رغبة الحياة ... ثم سلمها لزوج نتاج قهر وتعصب كى يمارس عليها ساديه وليدة ضعفه وخوائه ... لتتحول المدرسة التى نعدها  الى خاضع ذليل كسير محروم من التعبير عن ذاته او متطلباته ... ولكنها الذات ... تأبى وان تعيش ...فتبدأ حرب خفية للانتقام والحفاظ على ماتبقى من الذات ... وتستخدم فى الحرب الخفية اعراضا لامراض وهمية .. وزار وبخار واعمال سفلية ... وندب يومى على الحال والاحوال ... الى ان ياتى وقت تدور فيه الدوائر على الباغى اوقل على المتباغى ...ويضعف ابو الرجال ماديا او جسديا ... وتعود الزوجة لتنتقم ... تنتقم من الاب القاتل للمشاعر ومن الزوج القاتل للوجود ... ولكنه الخسران الاعظم ... فالانتقام يكون من الابناء وفى الابناء ... نفس القهر ... نفس القمع .. نفس التحريم ...نفس البطريركية نفس السلطوية .... ونفس توقيت الخصاء ....

وتخرج لنا المدرسة التى اعددناها شعبا فاقدا لمعنى الحياة يحاول ان يجد ذاته فى مظاهرة او ملتوفه اوقلشه على فيس بوك او تويتة ... وياسلام بقى لو ربنا كرمه بلايك طايرة كده  ... وقتها يكون ومالك الدنيا سواء ..

نسيت اقولكوا ان ظابط المباحث .. بعد ما عرف الدافع ... راح على المديرية ... قدم استقالته ... وهوه دلوقت على كورنيش كليوبترا حمامات ... بيشوى درة .. على فكرة هوه مبسوط قوى فى شغلة الجديد وبيفكر يطور ويجيب بطاطا .

احنا شعب عبيط ... صح .؟

الذبح تحت مقصلة النصيب

الذبح تحت مقصلة النصيب

محدش فينا بيعمل اللى هوه عايزة ... ممكن تقابل حد يقولك انا بأعمل اللى انا عايزة .. متصدقش ... دا بيضحك عليك او على نفسه ... دا بيكدب على فكرة ... بيكدب علشان يعيش او بمعنى اصح يتعايش ويرضى نفسه او بمعنى اصح يراضى نفسة ...

حتى لوحد عمل اللى هوه عايزة ... بعد شوية تلاقية بيكتشف ان مش ده اللى كان عايزة ... بيكتشف انه مش اصلى .. مش بيور ... صينى ... مغشوش بكلام الناس ونظرات الغريب وتحكم القريب وحكم التقاليد ...

تلاقى فينا اللى اشتغل شغلانه مش عايزها ...واللى اتجوز جوازة مش عايزها ... واللى دخل كلية مش عايزها ...واللى واللى واللى .

ورغما عن اننا عارفين ان احنا مش بنعمل اللى احنا عايزينه... وعارفين ان احنا مش مبسوطين ولا مرتاحين ... تلاقينا يا اخى برضه مكملين وفى الطريق الغلط ماشيين ... مكملين فى وظيفة بتحرق دمنا كل يوم ... مكملين فى جوازة كلها هم ونكد ... مكملين لان اباؤنا الاولون علمونا كده ...علمونا ان احنا لازم نكمل ونستحمل ونستمر ... لاننا لو عملنا غير كده وقولنا  لأ ... يبقى بنعترض على النصيب... بنعترض على المكتوب والقضاء والقدر .. بنتبطر ... والبطران اخرته قطران ....

وعليه ... وفى حفل بهيج ومراسم ملكية مبهرة ... يتم تنفيذ الحكم بذبح حياتنا تحت مقصلة النصيب لنقدمها قربانا لاصنام نعبدها كما عبدها اباؤنا الاولون .

الحق نفسك ... ماتخليش حد يستعبطك ويقولك : استحمل ده نصيب .. ولا يقولك : المكتوب مامنوش هروب ياولدى ... لانك لو ماكملتش فى الكليه اللى مش عايزها ودرست اللى انت عايزة ... دا برضة نصيب ومكتوب ... لو فكيتى خطوبة علشان مش مرتاحة ده برضة نصيب ومكتوب ...لو استقلت من الحكومة ده برضه نصيب ومكتوب ...

خصيمك النبى ياشيخ تجاوب على السؤال ده : هوه انت قريت المكتوب قبل ماعملت اللى عملته ؟ ... طاب لما هوه لأ ... ايه اللى عرفك بقى انه مكتوب .. مضيع عمرك فى وهم وهم وغم ليه ؟.

اختيارك هوه اللى مكتوب يامعلم ...ولان الله سبحانه وتعالى يعلم مسبقا باختيارك ... فكتبه عليك ...

وعلشان ما لخبطكش وافوت عليك فرصة انك تقول عليه دا راجل بتاع فلسفة وحيخوتنا معاه ... حألخصهالك :

اعمل اللى انت عايزة  وماتخافش ... حتى لواعتبرنا ان اللى عملته ده تغيير فى قضاء الله وقدرة ..... فأنت برضة بتغير قضاء الله وقدرة بقضاء الله وقدرة ..

الحق واعمل الصح فالعمر قصير وكل ما بتتأخر العمليه بتصعب والتغيير بيدخل دايرة المستحيل ..

واخيرا : الهى وانت جاهى تاخد الاخوان اخد عزيز جبار ... قادر ياكريم 

لا المية العكرة بتروب ولا الإخوانى بيبقى حبوب

لا المية العكرة بتروب ولا الإخوانى بيبقى حبوب

علشان الواحد يوصل لهدفه – دا لو كان ليه هدف من اصلة – يبقى لازم يعمل له خطة يمشى عليها ...ودى من بديهيات التخطيط...لكن الشطارة انه يكون مدرك ان مافيش خطة فى الدنيا بتمشى زى مالواحد راسمها ... دايما بتحصل مفاجأت ممكن تعطله اوتوقفة عن الوصول لهدفه .

النباهة بقى انه يكون عنده خطة بديلة و المعروفة اداريا  ب (بلان بى)... ودى الخطة اللى بيبقى مجهزها علشان يلجأ ليها ويكمل بيها مشواره ويوصل لهدفة لما الخطة الاساسيه بتبوظ .

ولاد الوسخة بقى المعروفين اعلاميا بتنظيم الاخوان الارهابى ... عندهم دايما بلان بى و بلان سى  وبلان دى ... عندك مثلا كان ايام الارتجاع اللى بيسموه ثورة 25 يناير كانوا حطين زعبولة القله المشهور بعبد المنعم ابو الفتوح بلان بى ... علشان لو الاستبن مانجحش يدخل هوه رئيس ويكمل الهدف المنشود .

ونحمد ربنا ان الخطة الاساسية بتاعة الاستبن فشلت زى مافشلت بلان بى بتاعة ابو الفتوح ...

قوم عملوا بلان سى .. اعتصام رابعة وحنفجر ياسيسى ومظاهرات ليليه وضنك وهرى ونحمد الله انها برضة فشلت فشل ذريع ...

قوم ايه بدأوا يلجأوا الى بلان دى ...تحت راية مختار نوح وثروت الخرباوى اللى اقنعوا الشعب على مائدة اعلاميوالعار وفى حضور نخبة الدمار ...اقنعوه انهم خرجوا من عباءة الاخوان ... واثبتوا صدق نواياهم تجاه الوطن والفوا كتب سبوا فيها الجماعة وفضحوا فيها مخططاتهم ... قوم ايه الشعب الطيب المسالم المفروض انه يصدق الفيلم الهندى الابيض واسود ده ...قوم لما يعملوا الحزب يقوم الشعب المتدين بطبعة يديلة صوته فى الانتخابات.... وتبدأ اللعبة الوسخة من جديد .

خد دى : لو قولنا لثروت ومختار واشباههم من المنشقين عن الجماعة الارهابية

انتوا ضد فكرة الاخوان ولا ضد اسلوبهم ؟... حيردوا يقولوا ايه ؟

حيردوا من غير مايفكروا ..احنا طبعا ضد اسلوبهم ..لكن الفكرة يامعلم ... تجرى مجرى الدم .. فى النخاع ... فى الجين وتحت الجلد...

خد بالك ياشعب مصر ... واعرف ان :

لا المية العكرة بتروب والا الاخوانى بيبقى حبوب .

ملحوظة لإعمال العقل  :

استبدال شعار الاسلام هو الحل بإشارة رابعة.... ده عادى ولا بالاجنحة ... ولا الشىء لزوم الشىء ..ولا هوه انا حأفضل أهاتى كده كتير ... ولا هوه فيه ايه بالظبط فى الايام السودا اللى احنا عايشينها دى ..

هوه انا قولت ان الاخوان ولاد وسخة فى البوست ولا نسيت ؟ ...عموما على سبيل الاحتياط ... الاخوان ولاد وسخة لا اكون نسيت اكتبها ولا حاجة .

شكر خاص للمفكر الصديق  الدكتور محمد صقر

البحث تحت عمود النور

البحث تحت عمود النور

جحا لما وقع منه الدرهم فى الاوضة الضلمة... طلع يدور علية فى الشارع تحت عمود النور ... دا طبعا على اساس انه من الغباء انك تدور على حاجة ضايعة منك فى الضلمة ! طاب حنشوف فى الضلمه ازاى طا ....

ولأن كل واحد فى نفسه امير وفاكر انه فاهم كل حاجة فى الدنيا ... وعبقريته ونباهته الربانى بتنقح عليه ..فتلاقى كله بيتتريق على جحا ويتهمه بالحمق والغباء ...مع اننا يا اخى كلنا بنعمل زيه بالظبط ..

كل واحد فينا ضايع منه حاجة بيدور عليها فى مكان تانى خالص غير اللى ضاعت فيه ... وياريتها تيجى على قد كده ... دا تلاقيه كمان زعلان قوى انه ملقهاش ... وده بقى المعروف اعلاميا بالعبط المزمن .

حأديك من الدست مغرفة ..."والدست هو البرام والمغرفة هى الملعقة الكبيرة " مع احترامى الكامل للقارىء العربى .

شوف ياسيدى .. الست اللى بتدور على السعاده مع جوزها فى سكة الندية .. وزيى زيك ... وانا ليه كيان وشخصية ... مع ان السعادة ضايعة فى بير الحنية والكلمة الحلوة .. وانت الراجل اللى حامينا وبتشقى علشانا .. واحنا من غيرك ولا حاجة وناقصنا كام مليون حاجة ... حتى ولو بالكدب ...سبحانك يارب ...ساعتها حتلاقى السعادة بتنط فى وشها من غير ماتدور .

كمان مغرفه : الراجل اللى بيدور على روقان البال بالشخط والنطر وكسر النفس واهمال البيت والعيال والقعده على القهوة وشرب المعسل ... مع ان روقان البال فى لم الشمل والطبطبه وجبر الخواطر وسندت الضهر .

كمان مغرفة ؟ .... ماش كمان مغرفة ..

صاحب الشغل اللى بيدور على المال والجاه بأكل حق العمال الغلابة ومص دمهم وشفط حقوقهم ..مع ان الجاه والمال والعز الحقيقى بان كل صاحب حق ياخد حقة ... بدعوه حلوة فى جوف اليل من عامل غلبان خد مكافأه وجاب بيها للعيال حتة لحمة... بسيرة باقية وسلسال مستور ومحمى بحب الناس مش برصيد يتأمم ولا تاكلة الضرايب ..

مرتضى منصور بيدور على حل لنادى ادمن المركز التانى فى تغيير مدرب وميدو والاخوين رحبانى مع ان حل المشكلة فى انه يدخل اللعبية مركز علاج الادمان قسم ادمان المركز التانى ..

اخر مغرفة ... القعر الشايط اللى بيترمى في الزباله .... الاخوان ... بيدوروا على سلطة ساحت راحت ماطرح ماراحت فى مظاهرات خايبة وتفجيرات وسخة ... مع ان السلطة تيجى .... بس بعد 80 سنه تانيين لما جيل الاتحادية واحداث المقطم وحنفجر ياسيسى ينسى زى ماجيل النقراشى والخاذندار نسى ...

كلنا بندور فى النور مع ان اللى ضاع مننا ضاع فى الضلمة ... ضلمة العقل والفكر والكبر وعبادة اصنام اباؤنا الأولون .

أسئله الى الاستاذ حمدين

أسئله الى الاستاذ حمدين

المرشح الرئاسى الاستاذ حمدين صباحى قال فى لقائه مع خيرى ان عنده 10 اخوات ... وقال كمان انه ورث 5 فدادين من الحاج عبد العاطى ... وقال كمان ان مدام سهام مدبرة جدا ورصيده فى البنك 700 الف جنية  ... وقال كمان انه ادار انتخابات اتحاد الطلاب فى الجامعة بكفاءة وبقى رئيس اتحاد الطلاب  وقال انه من افرازات مجانية التعليم والانجليزى بتاعة نص نص ... يعدى يعنى .

الاسئله بقى :

بما انهم 11 اخ ولو فرضنا ان منهم 6 بنات و5 ولاد والحاجة امهم ... يبقى بحسبة بسيطة الحاج عبعاطى كان يملك 45 فدان ... ربنا يبارك له ... مش دى القضية .. القضية بقى ... الحاج عبعاطى جاب ال45 فدان منين ... اللى فضلوا بعد قانون الاصلاح الزراعى بتاع عبد الناصر ... ولا اشتراهم ايام انفتاح السادات..... ولا حسنى خصخصهم له ؟

مدام سهام مدبرة جدا خلت ال7000 جنيه 700 الف جنية فى سنتين .... ازاى ... هه ازاى والنبى .؟

لما اللى يدير انتخابات اتحاد الطلبه ميزة تخلى اللى بقى رئيس انحاد الطلبه رئيس جمهورية ... هل معنى كده ان اللى كان امين لجنة الرحلات يبقى المفروض يبقى وزير سياحة؟

اخيرا لما واحد يبقى الانجليزى بتاعة نص نص ... يشتغل ازاى مترجم فى شركة مالتى ناشيونال وياخد مرتب كبييييير ...؟

 اخر اخر بقى ... انت مالك ومال السيسى ماتخليك فى حالك 

فوقوا يابتوع حمدين

فوقوا يابتوع حمدين

قالوا زمان اللى يتلسع من الشوربة يتفخ فى الزبادى .. وقالوا كمان اللى يتقرص من التعبان يخاف من الحبل ... واحنا كشعب اتلسعنا من حسنى واتقرصنا من مرسى ... فمن الطبيعى ان رد الفعل يكون الحرب من اجل اختيار حمدين رئيسا للجمهورية ... خصوصا ان حمدين استاذ ورئيس قسم فى انه يعمل من البحر طحينة ... بيعرف يلاعب احلام الشباب الرومانسية بكلمات الحرية والديموقراطيةوالعدالة الاجتماعية ... وكمان بيعرف كويس قوى ازاى يدغدغ مشاعر التمرد اللى جوة الشباب باسم الثورة مستمرة والقضاء على الاقطاع واجتثاث الفساد .

القصد ... بغض النظر عن اعتقادى الراسخ فى ان حمدين ظاهرة صوتية تنافس الطبلة فى قوة صوتها النابع من الفراغ الا انى حفترض ان النية ميه ميه وانه عايز يصلح ما افسدة الدهر ... وكمان مش حأركز على شواهد اسلوبه فى التفكير واللى ظهرت فى انه عايز يرجع عجلة الزمن لورا ويعيد للاذهان اغنية فدادين خمسة خمس فدادين ويدى قبلة الحياه لقانون الاصلاح الزراعى اللى كان فى وقتها حاجة جميلة لكن مع الايام اثبت انه السبب الرئيسى فى البناء على الارض الزراعية .

انا كل اللى عايزة ان احنا نطلع برة فكرة الحلم وفكرة الشخص ونبص على فكرة البلد... فكرة البيت اللى لاممنا وساترنا واللى لو انهار حنقعد كلنا فى الشارع نشحت ونبقى عرضة للاهانات البدنية والنفسية وربما للتحرش .

اولا : اوعى تصدق ان الشعب عامة والشباب اللى حوالين حمدين خاصة حيشتغل بسهوله .. تبقى بتحلم ياحلمى ... احنا الشعب اللى اخترع التكيه يا معلم ... ولو عايز امارة افتكر بعد الثورة قاموا كنسوا الميدان وبعديها بيومين رموا الزبالة من البلكونة تانى ... موضوع الشغل ده عايز وقت والوقت بفلوس والفلوس ملهاش غير سكة واحده .... الخليج يامعلم اللى برضة بيساعدنا مش حبا فينا لكن خوفا على نفسه ... والمثل بيقول اللى ياكل لقمتى يسمع كلمتى ... وكلمة الخليج واحدة ... عايزين السيسى .

ثانيا :عبط مرسى كان حيهد عرشة حيهد عرشة بس مش بالسرعة اللى حصلت ... اللى هد عرش مرسى ان مماليك الدولة ماكانوش معاه ... دول كمان كانوا ضدة .. والمماليك بعيدا عن الرومانسية مش من السهل التخلص منهم ... والحكمةوالعقل تقتضى انك ماتعاديهومش ...على الاقل تحيدهم عقبال ماتقف على رجليك ...ولوجه حمدين ... صدقنى المماليك هية اللى حتسيطر .

ثالثا : فكرة الهد اللى ساريه من ايام 25 يناير فكرة مفزعة ... لانه ببساطة لو هدينا ... والختمة الشريفة ما حنعرف نبنى ... السيسى بقى فرصة اخيرة بعتهالنا ربنا لترميم وتنكيس البلد .

رابعا : بلاش نعمل زى جحا ونحلم ونحلم ونحلم واحنا ماسكين زلعة اللبن ... ولما نفوق نلاقى زلعة اللبن مكسورة واللبن مسكوب ... وقتها لن ينفع البكاء على اللبن المسكوب .

اخيرا : ايها الشاب المتمرد المعروف اعلاميا بالثورى ... انت اول من سيدفع الثمن لانه ببساطة كل اللى بتصقف لهم مأمنين نفسهم كويس قوى ... بما فيهم السيسى ..

ملحوظة : وقت الحق والعدل  والجمال لسه ماجاش ... ومش حيجى على فكرة ... احنا فى الدنيا ياثورى مش فى الجنة .

الصياعة أدب مش فتح سوست

الصياعة أدب مش فتح سوست

أوعى تصدق اى حد يقولك انا عارف يعنى ايه روح ... كل اللى حيقوله افتكاسات وحوارات يامعلم .. لان الروح من امر ربى ...ورسولنا الكريم لما اتسأل عن الروح رد وقال : ليس المسئول عنها اعلم من السائل .

اما الحلاوة بقى نقول فيها زى ما احنا عايزين : الحلاوه كلمة جامعة لكل حاجة طعمها او شكلها حلو ... يعنى الجاتوه .. حلاوة .. البسبوسة..حلاوة ... العسليه ..حلاوة ...وعندك ايه الحلاوة دى يابت .. وحلاوة المولد ... وحلاوة النجاح ... وعندك ماتعلمش العبيط اكل الحلاوة ... وعندك حلاوة الروح ... واخيرا حلاوة روح .

حلاوة الروح كلمة بتتقال على حد شخصيته جميلة .. رقيقة .. طيبة ... متعاونه ... بتحب الخير وتكره الظلم .

اما حلاوة روح ... فدى كلمة بتتقال كناية عن الفلفصة .. ومقاومة الموت والتمسك بالحياة حتى اخر نفس ... ولأنى بحب فكرة المقاومة والتحدى ومابيأسش ... ماشوفتش فيلم حلاوة روح ومش حأشوفة لما يتعرض تانى ... اه ماهو فى زمن الوساخة فيها حرية رأى يبقى لازم يتعرض تانى ... عادى عادى .

بس انا ليه اسباب انى ماشوفتوش ومش حشوفة... وبرضة حاشتمة ... ايييه ... حرية رأى .... حد ليه شوق فى حاجة .

اهم سبب انى مابحبش حد يبيع لى بضاعة مضروبة على انها اصلى ... وجميلة الجميلات ومغرية المغريات المعروفة بهيفاء وهمى لاهيه جميلة ولا ذات انوثة طاغية ولا غيرة ... لانى شوفتها على حقيقتها فى رمضان اللى فات مع رامز الرزل جلال ... شوفت دكر سليط اللسان شوفت البذاءة والالفاظ اللى ماتتطلعش منى انا كراجل الا اذا جات سيرة الاخوان طبعا .

تانى سبب انى عمرى ما حأدفع فلوسى لمسخ متصابى زى سباك الصرف الصحى المدعو السبكى .

عموما هما بؤين محشورين فى زورى حأقولهم علشان ارتاح ..

بؤين للمشاهد الساذج : ماهو لو عايز تشوف مناظر ومش قادر تقاوم تستيرونك .. تاعب نفسك ليه مع هيفاء وقاعد على اعصابك طول الفيلم مستنيها تشلح .. ماعندك جوجول ... الع بتاع ابوه وببلاش .. ولا انت بتحب تذل نفسك .... ياحبيبى الافلام دى  بتجيب احتقان ... لكن مع عمك جوجول بتشوف وتخلص وتفوق وانت قاعد.

بؤين للسباك : احنا اسفين ياسبكى ... مات الكلام لان  من لم يكن له فى الموت واعظ لن تنفع معة المواعظ .

بؤين لهيفاء : لو دامت لناهد شريف ومديحة كامل ماكنتش وصلتلك يا مزة .

بؤ واحد كفاية لطارق الشناوى : انت عبيط ... صح ؟

بؤين لكل من قرأ البوست : انت اضفت ايه جديد لنفسك النهاردة يخليك تحترم نفسك قدام نفسك ؟

اخر بؤ : الصياعة  أدب مش فتح سوست ..... وعلشان ماتفهمنيش صح .. قصدى فتح سوستة المطوة

عواجيز الفرح الجدد

عواجيز الفرح الجدد

اى فرح تدخله تلاقى عريس وعروسة وكوشة ومعازيم وابوالعريس وام العروسة وفيديو ودى جى وبوفية ....... وشوية عواجيز .

العريس بيبقى فرحان لانه اخيرا حيحقق حلمه ويبطل عادات العزوبية السيئة ... والعروسة بتبقى فرحانه لان محدش بعد النهارده حيقولها عايزين نفرح بيكى بقى ... ابو العريس فرحان لانه قدر يكمل رسالته ويساعد الواد بمكافأة المعاش فى الجواز ... وام العروسة فرحانه ... بس قلقانه لا البت تتأخر فى الخلفة ... غلبانه قوى ام البنات ماهى شايلة الهم للممات..الولاد بيرقصوا علشان يحصدو نظرات اعجاب البنات .. كده رضا ماهو ميبقاش قلة جواز وقلة اعتنى كمان ... البنات بقى بتبقى مركزة حبتين ... مش مهم الاعجاب .. المهم يتنيل على عينه ويجى يخطبنى ... وتتعدد النظريات ... اللى بتبدع فى الرقص على اساس ان الرجالة مايملاش عينها غير التراب وومابتتحركش غير لما بتسخن ...واللى مابتعرفش ترقص .... بترسم الخجل وياكزوفى ياكزوفى وتتبنى نظرية ان الرجالة بتلف تلف ولما تيجى تتجوز بتدور على البنت المؤدبة ... وربنا بيرزق الجميع ... وربك لخواطر الغلابة جابر ... طبعا الدى جى وبتاع البوفيه وبتاع الفيديو .. مش فارق معاهم اى حاجة ولا اى حد .. المهم البقشيش ... قديمة قوى البقشيش دى ... ياسيدى ماتزعلش ... خليها التبس.

نيجى بقى للزغلول الكبير ... عواجيز الفرح ... عندك من 65 وطالع ... رجالة ونسوان ... ومافيش حاجة عاجبة يامعلم ... لا بدلة العريس المأرحة..ولا فستان العروسةالمتأجر.. ولا الشربات الاحمر... ولا الجاتوه البايت ..ولا ساندوتش اللحمة المستوردة .. ولا الكوشة اللى تقرف ... ولا القاعة اللى تعر ... ولا ابو العروسة اللى مهزأ نفسه ومهزأنا ونازل رقص ... ولا ام العريس اللى فاكره نفسها صغيره ومتمكيجه ... ولا العيال اللى بتتنطط زى القرود ...ولا الدى جى المسخرة اللى مشغل اغنية هاتى بوسة يا بت ...

والنعمة عاذرك ياجدو ... والختمة عاذرك ياتيتا ..ماهو الطبيعى انى لما اعجز وابقى مجرد بركة ماليش اى دور ولا اى كلمه فى اللى بيحصل حواليه ولا اقدر اعمل اى حاجة كنت بأعملها من 40 سنه واقعد كده اتحسر على شابى اللى عدى وراح واجتر مرارة انه مش راجع ... يبقى لازم اتريق واعيب واقول عيب وازاى وليه ومايصحش وماينفعش ... علشان كلنا نبقى فى الهم سواء ... كلنا فى الخيبة واحد ..وبكده اكون مش انا بس اللى صقتط ... الفصل كله هوه كمان صاقت ... كده نهدى حبتين ..ممكن اتفهم ده والتمس له العذر كمان ... لكن اللى مش قادر اتفهمه ولا التمس ليه العذر ان الشباب بقى عايش دور عواجيز الفرح ... مش فالح غير فى التريقة ومصمصة الشفايف  .. لاعاجبة حد ولا عاجبة طريقة ولا عاجبة فكرة ... بس ليل نهار تريقة على اى حد وكل حد ...العواجيز عذرهم ان العمر هرب والجسم تقل والزمن اتغير ... اى نعم هوه عمل اللى عليه على قد فكرة وزمنه وظروفه .. وكل مشكلته انه عايز حتة لحمه زيادة عن منابة ...طمع انسانى عادى جدا ومشروع كمان .. لكن انت ايها الشاب الثورى الجميل الطاهر البرىء النقى ... انت بتعمل ايه او عملت ايه ... دا انت ياراجل حتى المحاضرات بتزوغ منها ... فقط تريقة .

عزيزى الشاب العجوز صدقنى .... لو فضلت على كده ... انت الوحيد اللى حتدفع التمن ... نجاحك فى الدنيا مالوش غير طريق واحد واوعى تصدق حد يقولك غير كده ... طريقك للنجاح هوه انك تفحت فى الصخر ... لكن طريق التريقة والسخرية مابينجحش ولا بيكسب غير باسم الحرامى ... طريق التريقة عمره ماحيوصلك وحتلاقى نفسك بعد شويه ( مش كتار والله ) ... عجوز ضيع شبابه راس ماله وعزوته ....... فى الاوهام .

شكر خاص للدكتور محمد بيرو صاحب نظرية الشباب بقى عامل زى عواجيز الفرح 

آآآآه ... ياوطنطن

آآآآه ... ياوطنطن

اللى بيطرد امه اللى ربته وكبرته وعملته بنى ادم من الشقة علشان يتجوز فيها الامورة اللى حتفك زنقته وشرطها الوحيد انها ماتعيشش مع حماتها على اساس حبسة الحرية وكدهون .

واللى عايشة حالة الاستايل والكرياتينين والماركيتنج والمالتى ناشيونال وابوها بقى حمل عليها فتوديه دار السنين اللى بتاخد شىء وشويات على اساس ان هيه اللى بتدفع وكدهون .

واللى بيخون صاحبه علشان ياخد مكانه فى البيت والشغل على اساس ان كله مكتوب ومحدش بياخد رزق حد وكدهون .

واللى قررت انها تسيبله العيال وترفع قضية خلع علشان عايزة تعيش بقى ؟!! ... وهوه ... على قد حاله ومش مكفى طموحاتى وغيرة جاهز ومستنى الاشارة من الصوبع الصغير ..على اساس ان محدش بيعيش مره واحده وكدهون ... خدت بالك من ضمير الغائب اللى فى الجملة اللى فاتت ... ده فى اللغة بيبقى للتحقير وكدهون .

واللى بيشتغل ديلر ويبيع البيسه ويتاجر فى العمله ويهرب البضاعة من المينا على اساس ان الشاطر هوه اللى يعرف يجيب الجنى (الجنيه يعنى )وكدهون .

واللى بتورد المتعه لمن يشتهى مع الاستعداد لتوصيل الطلبات للمنازل وتوفير الاماكن والادوات اللازمة .. على اساس ان الناس تعبانه والبنات عايزة تلبس وتاكل زى غيرها وكدهون .

واللى فاتح هايبر ماركت فتاوى ... وقاعد على الكاشير يعد فلوس صكوك الغفران ويعمل عروض مجانية  للشهادة ...على اساس انه الوكيل الحصرى للدين فى منطقة الشرق الاوسط وكدهون .

واللى فاتحة مطعم تيك اوى وتوصيل الوجبات للفضائيات وخصم خاص للحم الغلابة الفيليه ودم اشهدا بالتلج المجروش على اساس ثورة ثورة وكدهون .

اللى بيرفع علم بلد تانية غير علم بلده ويهد فى اساسها وجيشهاعلى اساس عايزين نبدأعلى نضيف وكدهون .

واللى ابن وسخة كل شغلته انه يبرر لكل ده فى افلام ومسلسلات وسخة زيه على اساس ان الفن يرصد المشاكل ومايحلهاش وكدهون .

وفى النهاية .. اللى مش شايفين او مش عايزين يشوفوا او عاملين مش شايفين على اساس ان القرشين اللى تحت البلاطة يسترونا ومادام بعيد عن قفايا يبقى احنا فى الامان وكدهون .

بعد كل اللى فات حأسأل سؤال رفيع ... هوه اللى بيبيع ابوه وامه وعياله ودينه وشرفه ويروج للسفاله والوساخة والمطنش  ممكن يصعب عليه انه يبيع وطنه ؟؟؟!!!

والسؤال الرفيع يجيب سؤال ارفع : هوه يعنى ايه كلمة وطن ؟؟!!!

شكر خاص للمهندس احمد ايوب صاحب فكرة اللى قرر يبيع بييع اى حاجة حتى الوطن .

إستنى او خد لك تصبيرة

إستنى او خد لك تصبيرة

عايز العب فى الشارع مع العيال ....استنى لما بابا يرجع ويوافق ....التصبيرة :العب قدام باب االشقة ماهو بابا مش حيوافق اكيد  .

عايزآكل... استنى لما الاكل يستوى ... التصبيرة :خدلك شاندوتش جبنة بالطماطم.... ماهو الاكل لسه ماتحتطش على النار من اصله .

انا بحب بت الجيران ... استنى لما تكبر ... التصبيرة: حبها من طرف واحد ماهو الحب شعور مش للصغيرين وزى اختك وكدهون .

عايز العب فى اشبال النادى .... استنى لما تخلص ثانوية عامة ... التصبيرة : العب فى الخرابة علشان النادى عايز موافقة ولى الامر.

عايز اشتغل .... استنى لما تخلص تعليمك .... التصبيرة : اشتغل فى الاجازة  من ورا الحاج ليقولوا عليه مش عارف يوكلك.

عايز اعمل ماجستير فى جراحة الخيول .... استنى القسم يشوف  .... التصبيرة :  اعمل دبلومة ...علشان القسم مافيهوش غير جراحة البقر .

عايز شقة ... استنى لما الحكومة تبنى ... التصبيرة : خدلك ايجار مؤقت علشان الحكومة مش حتبنى يا اهبل .

عايز اخرج مع خطيبتى .... استنى لما تكتب الكتاب ... التصبيرة :اخرج معاها من ورا ابوها واعى حدش يشوفكوا ماهو لو عرف فيفسخ الخطوبة .

عايز سيكو سيكو ... استنى لما العيال تنام ... التصبيرة : ودى العيال الدرس وتعالى ماهى العيال مابتنمش قبل الفجر .

عايز عربية ... استنى لما الحكومة تخفض الجمارك ... التصبيرة : جيب عربية اوكا 800 سى سى (حلوه سى سى دى بتغيظ الاخوان ) ماهى الحكومة مش حتخفض الجمارك يا عبيط .

عايز احج ... استنى لما تجهز البنات وتسترهم ...التصبيرة : اعمل عمرة .. ماهو بعد ماتجهز االبنات حتشحت يامعلم .

عايز اعمل مشروع .... استنى لما البلد تهدى ... التصبيرة : حط القرشين فى البنك .. ماهى البلد مش حتهدى وياسيدى نوايه تسند الزير

فعلا ... انا زير .. ولولا النوايه كنت وقعت على دماغ اهلى اتكسرك ... الحمد لله انى لقيت التصبيرة غيرى لسه مستنى ..

 بس كل املى فى ربنا انى لما اموت واتحاسب ماستناش على الاعراف ... نفسى اخش الجنة على طول ... كفاية تصبييرة لغاية كده ...

التعميم بين النظرية والتطبيق

التعميم بين النظرية والتطبيق

التعميم فى اللغة له معنيان .. الاول بمعنى جعل الشىء عاما مثل عممت الدوله التعليم ... والمعنى الثانى وهو عمم فلان فلانا ... اى لبسه العمامة ... ومدلول العمامة فى اللغة المكانة والتقدير والقيادة ...لكن اللى بيحصل دلوقتى حاجة تانية خالص ... ومفاهيم مختلفة تماما .. مفهوم التعميم دلوقتى هو مفهوم تلبيس العمه بمعناها السىء .. اى بمعنى الضحك على الزبون واستعباطة وجعله يوافق على مالايريد ...ويقول مالا يعى ...  

طريقة تعميم الاسلامى للمواطنين :

اللى بيقول ان الاخوان ارهابيين يبقى بيعمم ودى بقى تبقى سقطة فكرية تدل على ان اللى بيقول كدة مابيفكرش تفكير علمى ومش موضوعى (الرسالة التحتية : اوعى تقول ان الاخوان ارهابيين الا يقولوا عليك مش موضوعى ومابتفكرش تفكير علمى ) .. فى البلاد المتحضرة والديموقراطية بيفرقوا بين اللى بيعمله الفرد اللى فى الجماعة وبين الجماعة ذاتها ( لو قولت ان الاخوان ارهابيين يبقى انت مش متحضر ومش ديموقراطى ) ...انا معاك ان اللى غلط او مسك سلاح وروع الخلق لازم يتحاكم ( شوفت انا حقانى ازاى ... مش زيك )... لكن الاخوان كجماعة ناس طيبين ولذوذين وامامير ... ذنبهم ايه انهم مايشاركوش فى حكم بلدهم ( خليك شهم واقف جنب ابن بلدك المظلوم )..يا اخى اعتبرهم مسيحيين  يا اخى (خلى عندك نخوه ودافع عن دينك واسلامك )... وياسيدى مش معنى ان صندوق التفاح فيه تفاحة بايظة يبقى نرمى الصندوق كله ( الاخوان فاكهة غاليه ... الاخوان تفاح ) ..ده مش من المنطق ولا الحكمة ( لو قولت ان الاخوان ارهابيين يبقى انت مش حكيم ولا عند منطق ... ياللى اثبت انك مش كده ) ...عارف.. حتقولى ان الاخوان بتضرب الشعب بالنار والتليفزيون مصور الكلام دة ... اهو هوه دة التعميم اللى بقولك عليه ... اولا: اللى شفتهم فى التلفزيون دول ممكن جدا مايكونوش اخوان ... يبقى لازم نستنى القضاء يقول كلمته (شوفت احنا بنحترم القضاء ازاى )... ثانيا : لو فرضنا ان دول اخوان ... مانعممش بقى ... دول قله من الشباب المتحمس اللى خايف على البلد فبلاش ناخد الجماعة اللى بتحمى الاسلام بذنب الشباب المتحمس ده (شباب ياعم ....شباب طايش ... سامحهم وخليك انت الكبير ).

السؤال هنا هوه فيه حد يدخل عليه الكلام ده ؟

الاجابة : نعم ... كما يقولها الشيخ يعقوب .

جرب كده وشيل مابين الاقواس ... وقول الكلمتين دول باسلوب حلو وطريقة شيقة مع تعبيرات صدق واستكانه على الوش ... وياسلام بقى لو اللى بيحاورة مطبلاتى من عينة ريشة الاعلامى المعروف باسم محمود سعد  ( افتكر فيلم دم الغزال )  ...وقابل يامعلم ... تأثر ودموع ونحنحة ويسقط حكم العسكر ... والشرعية لازم ترجع .

مضاد غنى(2)

مضاد غنى (2)

انك تجيب اللى انت عايزة فى الوقت اللى انت عايزة من غير ماتدور على جمعية ولا تعمل استبدال معاش... اكيد دى  تبقى حاجة جميلة .

انك لما تتعب تروح تتعالج فى مستشفى خاص تعاملك على انك بنى ادم علشان بتدفع لها ... وماتضطرش تروح مستشفى الكلب المعروفة اعلاميا بمستشفى وزارة الصحة ... اكيد دى تبقى حاجة جميلة .

لما تتجوز البت اللى بتحبها وماينكسرش قلبك وماتضطرش تكمل حياتك مع اللى وافقت على ظروفك المادية .... اكيد دى  تبقى حاجة جميلة .

لما تسكن فى شقة بتبص على مية البحر مش على مية المجارىولا شركة الصرف الصحى .... اكيد دى  تبقى حاجة جميلة .

لما تلاقى الناس بتحترمك وتبررلك افعالك وتيجى فى صفك وتقف معاك من منطلق الغنى غنوله والفقير اردحوله .. اكيد دى  تبقى حاجة جميلة .

الله ؟؟!! ... ماالغنى حاجة جميلة اهوه ... امال مبتبقاش غنى ليه ؟!!

أقولك انا :

علشان فهموك ان الرزق مكتوب ولما تعمل ايه مش حيتغير ... دا طبعا على اساس انهم قاريين كتابك من الجلدة للجلدة وعارفين انه مكتوب عليك الفقر.

علشان فهموك ان الرضا انه لما يكون معاك علبة السجاير وتمن ساندوتش مؤمن اللى طلع اخوان يبقى كفاية شغل النهارده ...بكرة ترزق بضم التاء.

علشان اقنعوك ان الطريق الوحيد للثروه هوه 0900 ولعبة الحياه والزرار الاحمر اللى قدام كاظم وشيرين .

لا يابابا لا ... اللى ماتعرفوش يا امور ان الغنى غنى علشان الفقير مقرر انه مايبقاش غنى ..مقرر انه يصدق شيخ الفضائيات اللى نازل من الهامر وقاعد قدام الكاميرا وبيقول له الفقر نعمة وبيدخل الجنه اسرع ... مصدق ان كل الاغنيا حرامية ونصابين وبيشربوا خمرة ...مقرر ان قرص الترامادول وسيجارة البانجو حتحل له مشاكله ... مقرر انه يصدق ان البرادعى يامنى وصباحى المتجرب 40سنه حيحقق له امانية .

من الاخركده مقرر انه مايشتغلش ... وانه يمارس عادته فى احلام اليقظة بسرية وهدوء .

اخى العزيز : الفقر وحش قوى ... الفقر اهانه لنفسك وذاتك وكيانك وقيمتك ... لو مش مصدقنى صدق رسولنا الكريم اللى استعاذ بالله من الفقر .

أعوذ بالله من الفقر ... فقرالعلم وفقر الافكار وفقر الصبر والاصرار ...اعوذ بالله من فقر العقل اللى بيخلينا نصدق ان الغنى حظ ونصيب وحالة ثورية مستمرة وماهواش شغل وتعب وعرق وسهر ومرمطة وشقى وتدبير وصبر وتوفيق من ربنا اللى الغنى المتقى عنده احب من الفقير ذوالمبادىء الجياشة .

اخيرا علشان انا عارف انى طولت المرة دى ... انا مصمم ان الفرق بين  الغنى و الغبى ... نقطة ... هيه نقطة ... حطيتها فوق تبقى غـنـى حطينها تحت تبقى غـبـى ...

حط النقطة فوق بقى حطها تحت انت حر بس المهم ماتجبهاليش إحياة ابوك ...

تاريخ مصر الحديث

تاريخ مصر الحديث

كان فيه مرة كلب ... سرق حتة لحمة ... مسكوه ضربوة قتلوه دفنوه ... وكتبوا على قبره ... كان فيه مره كلب .... سرق حتة لحمة ... مسكوه ضربوة قتلوه دفنوه ... وكتبوا على قبره ... كان فيه مره كلب... سرق حتة لحمة ... مسكوه ضربوة قتلوه دفنوه ... وكتبوا على قبره ... كان فيه مره كلب..... سرق حتة لحمة ... مسكوه ضربوة قتلوه دفنوه ... وكتبوا على قبره ... كان فيه مره كلب... سرق حتة لحمة ... مسكوه ضربوة قتلوه دفنوه ... وكتبوا على قبره ... كان فيه مره كلب... سرق حتة لحمة ... مسكوه ضربوة قتلوه دفنوه ... وكتبوا على قبره ... كان فيه مره كلب.... سرق حتة لحمة ... مسكوه ضربوة قتلوه دفنوه ... وكتبوا على قبره ... .......

شكر خاص للدكتور محمد صقر صاحب الفكرة 

التطور الطبيعى للمماليك (2)

التطور الطبيعى للمماليك (2)

شجرة المماليك اللى كبرت فى مصر طرحت مماليك صغنتطين ... اينعم ما قعدوش على كرسى الحكم ... بمزاجهم على فكرة ... بس حكموا وبيحكموا وحيحكموا البلد .

 فالمملوك الحديث هوه احسن واحد موجود فى الوجود يقدر يوصل للمناصب العليا ... يعنى مدير ... رئيس قطاع ... مدير عام .. وكيل وزارة ... استشارى ... بس اكتر من كده لا...رغم انه لو اراد لفعل بقوة قدراته الفذه  ...ولكنه لا يفعل ... وليه ؟ ماهوالحاكم الفعلى للبلاد بدون اى مسؤليه ...ان مبدأة: ليصدر الرئيس مايشاء من الاوامر والقرارات ... وانا انفذ مااشاء بالطريقة التى اشاء وقتما اشاء وكله يصب فى مصلحتى وتولع البلد باللى فيها .

والمملوك الحديث  علشان يحكم ويتحكم  بيشترى مماليك صغيرة علشان يساعدوه .. يربيهم زى ماهوه عايز ... يظبط اللى عايزة ... ويراضى اللى محتاجة  ... ويرشى اللى حينفعة ... ويكون اكبر شبكة فساد تتغلغل وتنتشر فى جسدالمحروسة تنهب وتسرق وتبيع اى حاجة وكل حاجة و فى النهاية يدفع رئيس البلاد او الحاكم الصورى للبلاد   الثمن...

وعلشان نقرب الفكرة نقول : انه فى 3 سنوات قامت ثورتين باربع  رؤساء 2 منهم فى السجن ... وخمس رؤساء وزرا واحد فيهم هربان فى الامارات وواحد بيشتغل شيخ عرب وواحد بيشرب ينسون وواحد فى السجن وواحد حى اكلينيكيا ... دا غير عشرات الوزرا اللى زى ماجم زى ماراحوا .. وشباب مات ومايعرفش مات ليه وجيش متمرمط فى الشوارع .. وشرطة ضايعة وجماعة ارهابية غبية واعلام تسريبات وحمدين وابو الفتوح وباسم الارجوز والنخبة الفاشلة ... ومدعكة يامعلم....

 والنتيجة ... ماحدش عارف يمشى الاستشارى اللى بيقبض مليون جنية شهرى وبيروح يقعد فى المكتب يومين فى الاسبوع يشرب قهوه ساده على روح مصر المحروسة محدش قادر يعمل حد اقصى للاجور .... وعندك مثلا مجلس ادارة النادى الاهلى ... وعندك مثلا روساء مجلس ادارات شركات القطاع العام ... وعندك مثلا بواب العمارة اللى جنبك ... وعندك وعندك وعندك ... بص حواليك حتلاقى كتتتتيييييير قوى .

...الثورة اى كان نوعها 25او 30او مستمرة.... ثورة غلط قامت على ناس غلط ... حسنى ومرسى دول غلابه والنعمة ... اللى عايز يتقام عليه ثورة بجد... هما المماليك اللى فى اجهزة الدولة ... هذا النبت السرطانى اللى بينتشر فى جسد المحروسة ومحدش عارف يوقفة....

العجيب بقى ان مصر الوحيدة فى العالم اللى عبيدها بيحكموا احرارها ...

التطور الطبيعى للمماليك (1)

التطور الطبيعى للمماليك (1)

بدأ حكم المماليك بنهاية الدولة الايوبية ... وأول من مسك الحكم من المماليك فى مصر هيه عصمة الدين أم خليل شجرالدر الأرمانيه ( على فكرة اسمها شجر الدر مش شجرة الدر )...واخر سلطان كان طومان باى اللى اتعلقت رقبتة على باب زويلة بعد هزيمته على يد العثمانيين فى موقعة الريدانية سنة 1517...

المماليك للى مايعرفش اصلهم ... هما عبيد ابيض ...كان السلاطين والملوك من ايام نجم الدين ايوب بيشتروهم من وسط اسيا ... وكانوا بيربوهم ويعلموهم العربى والقران والفروسية ويعملومنهم جنود تحميهم وتحارب معاهم ...ورغم ان المماليك عبيد بكل مواصفات العبيد ...الا انهم وصلوا للحكم وقعدوا على قلب مصر 267 سنه ... (احقاقا للحق هما عملوا حاجات حلوة كتير لمصر وكفاية انهم هزموا المغول بس مش دى قضيتنا النهاردة )والمماليك وصلوا للحكم لان عندهم مجموعة خطيرة من الملكات والمواهب والخبرات اللى تخليهم يمسكوا الحكم ونص ... كان مبدأهم فصل الاخلاق عن السياسة ... فكان كله عندهم مباح ... غش .. خداع ..  رمى بلى .. رمى جتت .. اغتيال .. خطف ... ماكنش عندهم عزيز ولا غالى ولا كانوا بيعرفوا معنى الرحمة ولا الرأفة ..ورغم العنف والافترى الظاهر الا ان مجتمع المماليك نقدر نقول علية مجتمع الخوف ( بس مش زى بتاع تتح )... مجتمع الخوف لانهم كلهم كانوا خايفين من بعض ... الملك خايف من مماليكة لينقلبوا عليه ... والامير خايف من مماليك الامير اللى جنبة ... والمملوك القديم مرعوب من المملوك الجديد ... مجتمع كله دسائس ومؤامرات .. حاجة كده تقرف ...

المماليك انتهوا كحكام وملوك سنة 1517 ... الا ان حكمهم كان شغال من تحت لتحت لغاية ماجة محمد على وعمل مذبحة القلعة ... ولولا ان امين بك نط بفرسه من على القلعة ... كنا اتخلصنا من الجين المملوكى للابد ... لكن بختنا بقى ان امين بك يعيش علشان يكون البذرة اللى تنبت فى ارض مصر وتطرح شجرة كبيرة جدورها ثابته فى الارض وفروعها مضلله على مصر كلها ... علشان تحجب عن المحروسة الشمس والهوا ... خد بالك من البخت ... اسم البذرة اللى نبتت فى ارض مصر هوه امين بك ... هه ..أمين ... واخد بالك ... نكمل المرة الجاية  

التطور الطبيعى للمرتزقة

                                  التطور الطبيعى للمرتزقة

المرتزقة مصطلح قديم كان يطلق على المحاربين .... اللى بيأجرو نفسهم فى الحروب... يعنى لما جيش يبقى داخل حرب وماعندوش عساكر كفاية ... يقوم يبعت يجيب المرتزقة دول ويتفق معاهم انهم يحاربوا معاه فى مقابل مبلغ من المال وساعات كتير بيكون فيه كمان نسبة من الغنائم ...

المرتزقه دول مش بيحاربوا علشان مبدأ أو قضية أو فكرة مقتنعين بيها زى ما انتوا عارفين ... هيه مابتفرقش معاهم الحاجات الصغيرة دى خالص.. يعنى ممكن يكون عارف انه فى جبهة الباطل ... وعادى جدا ... وممكن يكون متأكد انه مع الظلم فى خندق واحد ... وبرضه ولا اى اندهاش ... وتلاحظ انه طول عمرة من حرب لحرب ومابيحصلوش حاجة يا اخى ... عارفين ليه ... علشان جبان ..بيخاف قوى على نفسه فلما يحس ان الحرب كبيرة عليه او ان اللى اتفق معاه حيتهزم .. على طول يخلع او ينط يحارب مع اللى كان بيحاربة ...نوع واطى من البشر .

المشكلة بقى مش فى النوع الواطى ده .. عادى الدنيا فيها عالم واطية وسافلة كتير ... المشكله ان مع التطور الطبيعى لزمن باسم يوسف وشريف مدكور ... ظهر نوع جديد متحور من المرتزقة ... اوطى واسفل من النوع اللى احنا كنا بنتكلم عنه ... والنوع الاوطى ده وظيفته انه يبرر للمرتزقة الواطيين افعالهم ... مش بس كده ... دول يقنعوك ان المرتزقه دى حاجة جميلة ..وانك المفروض تخليهم مثلك الاعلى ... وان حلم حياتك انك تكون زيهم ...ماتستغربش ماهو زمن الخياطة فيه بقى اسمها استيلست ... والماشطة بقى اسمها خبيرة تجميل ... والمرمطون بقى اسمه مرشنديزر ...والجاهل المحال للاستيداع بقى اسمه خبير امنى ...والصايع بقى اسمه ناشط سياسى ... فطبيعى جدا ان المرتزقة يبقى ثورى ... مع احترامى الكامل للخياطة اللى سترانه ....والماشطة اللى بتحليلنا عيشتنا ... والمرمطون اللى شايل عننا البلاوى ...

 عفوا على التعميم بس طبعا انتوا فاهمين ان لكل ثائر ظروفة وكدهون .

الجلاد 2

الجلاد 2

نكمل موضوع الجلاد ونقول :

الجلاد مش بس بيحافظ على الحاجة من البهدلة ... لا ده كمان بيدى الحاجة اللى ماتساويش ... قيمة وسيما ... عندك مثلا لو جبت هدية رخيصة ... لكن لفتها بجلاد شيك وعملتلها فيونكة ... على طول قيمتها حتزيد بريق وجاذبية... جرب حط جلاد محترم مزهز تحت طقم الصينى ال999 قطعة ابو تلتميت جنية اللى من بتاع  غير مصاريف الشحن ... حيبان على طول انه طقم صينى محترم اصلى وارد تركيا وممضى من السيد اوردغان بذات نفسه .

ومن اهم وظائف الجلاد... انه بيدارى الوساخة ... يعنى لو عندك كتاب اندلق عليه شاى او كركدية وبلغة العامة كركرية  ... الجلاد يخليه جديد لنج ... لو الازاز اللى اتشرخ ... لزقت عليه جلاد ... حيبقى زوق فنى رائع وتاتشة طليانى ...

كل ده عادى ... اللى مش عادى .. او كنت فاكرة مش عادى بس طلع عادى .... ان احنا كمان كبنى ادمين بنستخدم الجلاد ... ايوه كلنا بنستخدم الجلاد علشان نحمى نفوسنا ونحلى تصرفاتنا والاهم ندارى وساخاتنا ... عندك مثلا لما يكون فيه عميل وجاسوس وخاين ... تلاقية يحط جلاد الوطنية والثورية والحرية والعداله الاجتماعية ... عندك مثلا الارهابى القاتل المجرم السيكوباتى كاره نفسه ... تلاقية حاطط جلاد نصرة الدين ورفع راية الاسلام ... عندك انصاف المثقفين وارباع المتعلمين الواحد فيهم حاطط جلاد المحلل السياسى والمحنك الاستراتيجى ...عندك الصايع الفاشل الخامورجى اللى عمره ما عمر ( بتشديد الميم ) فى شغلانه ... تلاقية حاطط جلاد الناشط السياسى والقيادى الحقوقى ...

لاحظ ان نوعية الجلاد مع الناس دى لازم يكون من الجلاد الفخم المستورد الغالى ... لكن زى اى حاجة فى الدنيا ... درجات ... عندك نوعية تانية غلبانه ... بتسترخص الجلاد ... عندك مثلا الست اللى بتشتغل علشان نفسها واثبات ذاتها وكيانها ......تحط جلاد علشان مستقبل العيال ... الست اللى نفسها تغير عفش الشقة وتشترى اللى نفسها فيه علشان تعوض ايام الفقر والجهاز اللى جالها بالتقسيط وجوزها مش راضى .... تحط جلاد البنات على وش جواز وعايزين نشرفهم قدام العرسان ( دا على اساس ... حوش حوش العرسان اللى بتقع )...الراجل اللى عايز يلحق سبنسة قطر العمر وعايز يتجوز تانى ... يحط جلاد حل مشكلة العنوسة واحياء سنة الرسول ....وعندك وعندك وعندك ... كلنا حاطين جلاد .... بس اللى مش واخدين بالنا منه ... انه جلاد شفاف ... مبين كل حاجة ... جلاد شفتشى كاشف كل عوارتنا .... اقولكوا المفاجأة ....

احنا ...مش ... مش .... واخدين بالنا ... احنا بنستعبط ... 

الراقصة والسياسى ......والاخوانى المنشق

الراقصة والسياسى والاخوانى المنشق

السياسى المخضرم ينوى كتابة مذكراته ... الراقصة اللولبية تفكر فى كتابة مذكراتها ... الاخوانى المنشق ينشر مذكراته... على طول يا معلم ...الطبعة الخامسه نازله بكرة ؟؟؟ بيتكلم فى ايه ده ؟ ...

القصد ..تفتح مذكرات الواحد من دول وتلاقى سسبينس يامعلم ..اثارة وغموض وعبقريات وفرسان ومحررين ... ولعب عالى قوى على منطقة السفالة اللى موجوده بداخل كل انسان ...فتلاقى حبة فضايح .. على شوية شماتة على تتبع لعورات الناس والخوض فيها ...على شوية فوازير من عينة .. م م الذى كان يعمل فراشا وكانوا بيبعتوة يصور ورق لما المكنة تعطل ... وازاى هذا الفراش دارت به الدوائر واصبح يشغل اهم منصب فى الدولة ...ويديك بقى ح م...ج م... هـ هـ .. يعنى هلس فى هلس على راى فاروق الفيشاوى فى الفيلم .

طاب ايه طا ...؟ جاى دلوقتى تقول وتكتب ... امال كنت فين من زمان يا أمور ؟ ماقولتش ليه اياميها اللى بتقوله دلوقت ؟ ... كنت خايف ليأذوك ولا السبوبة كانت كاسرة عينك ؟... ولا عم عشم كان واكلك فى ترقيه ؟ولا جاى تتوب على ادينا وتعترف وتتناول على رأى اخوانا المسيحين ...؟ ولا يكونش جاى تسيح للى ماعطوكش حقك ومقامك او اللى انت شايف انه حقك ومقامك ؟ .

الثلاثة يشتغلوننا يا جماعة ... بعد ماكلوا وشربوا وناموا وباسو وحضنوا و... جايين يكملوا علينا ويقلبونا ويبيعولنا مذكراتهم فى كتب او على الفضائيات .. علشان يوصلوا السبوبة اللى انقطعت ... حيجيلكوا تخمة ياولاد الجعانة ... اييييه مابتشبعوش ياكفرة

.. مش كفاية فلوسنا اللى قلبتوها ... كمان حتجيبولنا اكتئاب ... وتكسرونا قدام نفسنا وتورونا اد ايه احنا كنا مضروبين على قفانا ...احنا بقينا ماشيين فى الشارع رافعين حواجبنا ومبرقين عنينا وناسينا حتى نقفل بقنا بعد ماقولنا : ياااااه  كل ده كان بيحصل ؟؟!!!

عبوكوا على ابو زمن الماركيتنج والام بى ايه اللى بقى بيتباع فية كل حاجة علشان يشتريها الهطل امثالى   

البوس فى زمن مابعد الحداثة

البوس فى زمن مابعد الحداثة

انت بتقول ايه يا باشا ؟! ... هوه فيه سيما من غير بوس ..؟ ... السيما من غير بوس ماتبقاش سيما !.... ثم ان السيما اصلا اخترعوها علشان البوس .... بوس جوه وبوس بره ... يعنى البطل يبوس البطلة جوه الفيلم ... والواد بيبوس البت بره فى الصاله ... أو اللوج أو البنوار ... كل واحد وفلوسه بقى ... ولو ان دلوقت كله بقى صالة ... مافيش حد احسن من حد ... ثورة بقى ... عموما البوس الحاجة الوحيدة اللى مابيفرقش فيها الفلوس ... ممكن الفلوس تفرق فى الاكل فى الشرب فى اللبس .. لكن البوس ..لأ مابتفرقش البوس كله واحد ... الفقير زى الغنى ... كله بيبوس .

لا طبعا ياباشا ... فرق كبير طبعا ... البوسة زمان كانت بوسه ... ليها معنى ووطعم وتحس كده  انها طالعة من القلب .. بوسه كده مشتاقة .. خجلانه .. قلقانه ... حيرانه ... بترتعش ... بتهز الكيان كله ... كنت تعدى فى الصاله تحس ان السيما فيها زلزال ...لكن دلوقت ... هيييييه ... مافيش حاجة عادت زى زمان ... كله اتغير ياباشا ... ماعدتش فيه بوس زى زمان ... كله دلوقت مسك ... وحتى شوية البوس اللى فاضلين ...مابقوش بوس من اللى كنا بنعرفه ... بقى كده اشبة بالعض ... وبرضه العض بقى جوه وبرة ... البطل بيعض البطله جوه الفيلم ... والواد بيعض البت بره فى الصاله .... ماهو ياباشا محدش عايز يفهم ان طول ماجوه حلو بره حلو ... وطول ماجوه وحش بره وحش ... ما هو اصل الناس بتاخد خبراتها من السيما ياباشا .

هأهأ ... لا ... زمان كنت باتفرج على البوس لايف وانا معدى بين الكراسى ...لكن دلوقت بحكم السن والتكنولوجيا ... باقعد قدام الشاشة ... ماهما دلوقتى حاطين كاميرات علشان يكشفوا البوس اللى بيحصل فى الصاله ... هما بيقولوا كده ... بس الحقيقة هما حاطين الكاميرات علشان يتفرجوا ...... مش بقولك ياباشا ماعدتش حاجة تلذ زى الاول ... كله دلوقت بقى افتراضى .

هأهأهأ ... اكيد ياباشا ... دا طباخ السم بيدوقه ... وانا بقالى 30 سنه فى السينما دى ... لكن انا بقى حظى حلو ... جربت البوس بتاع زمان ... والعض بتاع دلوقت ... حق الله ... الاتنين حلوين ياباشا ... ماهو البنى ادم لازم ينوع برضك.

نورتنا ياباشا ... ماتغيبش علينا ياباشا ... الله يكرمك ياباشا .... الباشا ده راجل عسليه ... مابيجيش مره السيما الا ويدينى علبتين فياجرا من الاصلى بتاع فايزر ... الغريب انه عمرة ماجه معاه حد ... كل مرة بيجى لوحده ... الباشا ده باينه مالوش فى البوس ولا ايه ؟؟؟؟