الثلاثاء، 2 مارس 2010

الفرق بين الرجل والمرأة 5

تخلف ثلاثى الأ بعاد

استراحه قصيرة قبل ما كمل الحلقات اللى انا عارف ان ملهاش لازمة ....بس اهوة زكاة العلم افشاءة ...دا طبعا على اساس ان اللى بقوله علم ....استراحه قولت ابص فيها علينا اصلى من زمان مابصتش علينا ....قوم لقيت خير اللهم اجعله خير ...ان احنا ...او شويه من احنا ...او كتير من احنا ...مابنسمعش ...وان سمعنا مابنفهمش ...وان فهمنا ما بنعملش ....وان عملنا نرجع بسرعة الفيمتو ثانية لأول السطر ....علشان نستمتع بالشكوى ...ونتلذذ باحساس الظلم والقهر من الاخر ....ونرجع نلف وندور فى مثلث التخلف الثلاثى الابعاد ....ماهو كان زمان قبل الثورة كان فيه مثلث التخلف ...الفقر والجهل والمرض ....لكن دلوقتى اتطور زى ما كل حاجة بتتطور فى بلدنا للاسوأ ....بقى مثلث فقر التفكير وجهل بشهادات معتمدة ومرض نفسى باعراض سلوكية ...... بقى مهارة فى الاستخسار والاستكتار والاستكبار ...اما البعد الثالث بقى فهو سيل الاحكام سابقة التجهيزوسريعة التنفيذ...على حبة موروثات لافكار عبيطة لا هيه من ديننا ولا من سنة رسولنا ....ولا حتى من منطق الأداميين....

بنستكتر نقول كلمه كويسه للى قدامنا ...بنستكتر نمدح صفه حلوة فيه ...بنستكتر لحظه يحس فيها بنفسه ....وان ما استكترناش بنستخسر ....بنستخسر كلمة شكر على حاجة قدمهالنا ...بنستخسر نساعدة ماديا او حتى معنويا ....بنستخسر نشغل بالنا بمشاكله ....وان ماستخسرناش .....بنستكبر ...بنستكبر نتأسف له مع ان الغلط راكبنا من ساسنا لراسنا .....بنستكبر نقول له حاضر مع ان حاضر تريح ....بنستكبر نطلب مساعدته مع انه يتمنى يساعد ...بنستكبرونستخسر ونستكتر علشان احكامنا كانت جاهزة وقرارتنا دليفرى ...قررنا ان رد الفعل مش حيبقى فى صالحنا ...اه مش حيقدر اللى بنعملهوله ...وحيتعوج ...اه ماهو برة وجوة فرشتلك وانت مايل ومين يعدلك ...ماهو يا مأمنه للرجال يبقى حطيتى المية فى الغربال ...ماهو قصقصى طيرك لا يلوف على غيرك ..اكسرى نفس امه من الاخر .... آه ماهواكسر للبت ضلع يطلع لها اربعه وعشرين ...على اى اساس علمى طيب ...ماهو لازم تدبح لها القطة ....طاب ليه مش كلب ولا خايف يعضك .....وماهو وماهو وماهو ....واستعد للحرب ياباشا مش للجواز ...حرب اللى كسبان فيها خسران ...الاثنين خسرانين ...خسرانين السعادة اللى كانوا حيحسو بيها ....خسرانين الحياة الحلوة اللى كانوا حيعيشوها برغم الغلا والكوا والعشوائيات ....والفضائيات والبلوتوث وعبد الحميد المنكوش ...وشله المشلحين واحاسيس الحساسين ....والتوريث والبرادعى ... البرادعى ....طاب والله احسن واحد يحكمنا هوة البرادعى ....طبعا حتسألوا ليه ...ببساطة لان كل اللى ناقصنا بردعة ......واحسن واحد يحطلنا البردعة هوة البرادعى ...يبقى بالروح بالدم نفديك يابرادعى ...ولو انه يعنى شاكك انه حيجيبها مخططه ...ماهو كل واحد وعلامه بقى ...!!!!!!!

هناك 5 تعليقات:

  1. ورغم ان البوست ده ضبابي
    ومش فاهماه قوي
    يمكن نتيجة لتخلفي المتأخر
    ويمكن لمجرد اني اخالفك في الرأي وخلاص :)
    ويمكن لأن باقي لي شوية نونو وأقول زي اللمبي بلوبيف بلوبيف

    ولكن العجب كل العجب
    انه لمثار دهشة
    انني في اذبهلال

    انت بقى زيي مش ماشي في مولد سيدي البرادعي
    الحمد لله يارب
    اخدت مني كل حاجة واديتني حد عنده عقل موافقني في منطقي
    خلاص مش ها اقول بلوبيف
    ورغم اتفاقي مع كل كلمة بيقولها عمو البرادعي
    وفكره المستنير
    ومنطقية الحديث
    الا ان ما قاله لم يأتي بجديد
    اللهم إلا أن له ثقل ما خلى كلامه يطلع في التلفااااااااااز

    تحياتي

    ردحذف
  2. انا بقي شيفه انك معاكي حق
    كل اللي بشوفه ادامي حرب موش جواذ بطريقه خلتني حسه اني مفيش حاجه اسمها جواذ بالمفهوم الصح ودا اللي نفسي الاقيه
    كله بيحارب كله مع ان المفروض ان البيت دا هو واحه الامان فالصحراء القخلاء مبين الغلاء ولقمه العيش والطوابير وخلافه
    يبقي كملت بقي اشمعني البيت يعني
    يارب اهدنا لما فيه الخير لنا
    تقبلي مروري وتحياتي

    ردحذف
  3. اظن انك عارف انى فى حالة اعياء من مواجهة التخلف الثلاث الابعاد واللى مش ثلاثي وكل انواع التخلف

    وبقى عندي انا ثلاثيه تانيه

    اسمها تعبت زهقت وقرفت

    مش عارفه بصحيح هانعيش وسط الغباء ولا هانتخننننننننننننننننننق منه

    تحياتي يا دوك

    ردحذف
  4. ههه ضحكتني بالنسبة لموضوع البرادعي لكن ما فهمته انا انه ليس مرشحا بعد وان ترشحه رهين بتعديل الدستور لان ترشحه غير ممكن في ظل الدستور الحالي لكن الغريب ان الجميع يتحدث عن ترشحه المفترض وكأنه امر واقع
    بالنسبة لمثلث التفكير الذي تحدثث عنه هو صحيح وواقعي وان بنسب متفاوتة
    تحياتي

    ردحذف
  5. د. اسلام
    معاك حق
    هى مش ناقصة تعقيد
    ولا ناقصة توتر
    الاتنين موجودين بوفرة والحمد لله
    فبلاش نستعجل النكد
    ولازم نبسط كل شء علشان الحياة تستمر
    اما البرادعى فانا لازلت اشعر انه شوووو كبير للعرض فقط
    وان لم يكن برضه ما حدش من الحكومة ولا المعارضة حيسمج له بيها
    وخلى الشعب ينشغل بحاجة شوية
    تحياتى

    ردحذف