الصياعة أدب مش فتح سوست

الصياعة أدب مش فتح سوست

أوعى تصدق اى حد يقولك انا عارف يعنى ايه روح ... كل اللى حيقوله افتكاسات وحوارات يامعلم .. لان الروح من امر ربى ...ورسولنا الكريم لما اتسأل عن الروح رد وقال : ليس المسئول عنها اعلم من السائل .

اما الحلاوة بقى نقول فيها زى ما احنا عايزين : الحلاوه كلمة جامعة لكل حاجة طعمها او شكلها حلو ... يعنى الجاتوه .. حلاوة .. البسبوسة..حلاوة ... العسليه ..حلاوة ...وعندك ايه الحلاوة دى يابت .. وحلاوة المولد ... وحلاوة النجاح ... وعندك ماتعلمش العبيط اكل الحلاوة ... وعندك حلاوة الروح ... واخيرا حلاوة روح .

حلاوة الروح كلمة بتتقال على حد شخصيته جميلة .. رقيقة .. طيبة ... متعاونه ... بتحب الخير وتكره الظلم .

اما حلاوة روح ... فدى كلمة بتتقال كناية عن الفلفصة .. ومقاومة الموت والتمسك بالحياة حتى اخر نفس ... ولأنى بحب فكرة المقاومة والتحدى ومابيأسش ... ماشوفتش فيلم حلاوة روح ومش حأشوفة لما يتعرض تانى ... اه ماهو فى زمن الوساخة فيها حرية رأى يبقى لازم يتعرض تانى ... عادى عادى .

بس انا ليه اسباب انى ماشوفتوش ومش حشوفة... وبرضة حاشتمة ... ايييه ... حرية رأى .... حد ليه شوق فى حاجة .

اهم سبب انى مابحبش حد يبيع لى بضاعة مضروبة على انها اصلى ... وجميلة الجميلات ومغرية المغريات المعروفة بهيفاء وهمى لاهيه جميلة ولا ذات انوثة طاغية ولا غيرة ... لانى شوفتها على حقيقتها فى رمضان اللى فات مع رامز الرزل جلال ... شوفت دكر سليط اللسان شوفت البذاءة والالفاظ اللى ماتتطلعش منى انا كراجل الا اذا جات سيرة الاخوان طبعا .

تانى سبب انى عمرى ما حأدفع فلوسى لمسخ متصابى زى سباك الصرف الصحى المدعو السبكى .

عموما هما بؤين محشورين فى زورى حأقولهم علشان ارتاح ..

بؤين للمشاهد الساذج : ماهو لو عايز تشوف مناظر ومش قادر تقاوم تستيرونك .. تاعب نفسك ليه مع هيفاء وقاعد على اعصابك طول الفيلم مستنيها تشلح .. ماعندك جوجول ... الع بتاع ابوه وببلاش .. ولا انت بتحب تذل نفسك .... ياحبيبى الافلام دى  بتجيب احتقان ... لكن مع عمك جوجول بتشوف وتخلص وتفوق وانت قاعد.

بؤين للسباك : احنا اسفين ياسبكى ... مات الكلام لان  من لم يكن له فى الموت واعظ لن تنفع معة المواعظ .

بؤين لهيفاء : لو دامت لناهد شريف ومديحة كامل ماكنتش وصلتلك يا مزة .

بؤ واحد كفاية لطارق الشناوى : انت عبيط ... صح ؟

بؤين لكل من قرأ البوست : انت اضفت ايه جديد لنفسك النهاردة يخليك تحترم نفسك قدام نفسك ؟

اخر بؤ : الصياعة  أدب مش فتح سوست ..... وعلشان ماتفهمنيش صح .. قصدى فتح سوستة المطوة

عواجيز الفرح الجدد

عواجيز الفرح الجدد

اى فرح تدخله تلاقى عريس وعروسة وكوشة ومعازيم وابوالعريس وام العروسة وفيديو ودى جى وبوفية ....... وشوية عواجيز .

العريس بيبقى فرحان لانه اخيرا حيحقق حلمه ويبطل عادات العزوبية السيئة ... والعروسة بتبقى فرحانه لان محدش بعد النهارده حيقولها عايزين نفرح بيكى بقى ... ابو العريس فرحان لانه قدر يكمل رسالته ويساعد الواد بمكافأة المعاش فى الجواز ... وام العروسة فرحانه ... بس قلقانه لا البت تتأخر فى الخلفة ... غلبانه قوى ام البنات ماهى شايلة الهم للممات..الولاد بيرقصوا علشان يحصدو نظرات اعجاب البنات .. كده رضا ماهو ميبقاش قلة جواز وقلة اعتنى كمان ... البنات بقى بتبقى مركزة حبتين ... مش مهم الاعجاب .. المهم يتنيل على عينه ويجى يخطبنى ... وتتعدد النظريات ... اللى بتبدع فى الرقص على اساس ان الرجالة مايملاش عينها غير التراب وومابتتحركش غير لما بتسخن ...واللى مابتعرفش ترقص .... بترسم الخجل وياكزوفى ياكزوفى وتتبنى نظرية ان الرجالة بتلف تلف ولما تيجى تتجوز بتدور على البنت المؤدبة ... وربنا بيرزق الجميع ... وربك لخواطر الغلابة جابر ... طبعا الدى جى وبتاع البوفيه وبتاع الفيديو .. مش فارق معاهم اى حاجة ولا اى حد .. المهم البقشيش ... قديمة قوى البقشيش دى ... ياسيدى ماتزعلش ... خليها التبس.

نيجى بقى للزغلول الكبير ... عواجيز الفرح ... عندك من 65 وطالع ... رجالة ونسوان ... ومافيش حاجة عاجبة يامعلم ... لا بدلة العريس المأرحة..ولا فستان العروسةالمتأجر.. ولا الشربات الاحمر... ولا الجاتوه البايت ..ولا ساندوتش اللحمة المستوردة .. ولا الكوشة اللى تقرف ... ولا القاعة اللى تعر ... ولا ابو العروسة اللى مهزأ نفسه ومهزأنا ونازل رقص ... ولا ام العريس اللى فاكره نفسها صغيره ومتمكيجه ... ولا العيال اللى بتتنطط زى القرود ...ولا الدى جى المسخرة اللى مشغل اغنية هاتى بوسة يا بت ...

والنعمة عاذرك ياجدو ... والختمة عاذرك ياتيتا ..ماهو الطبيعى انى لما اعجز وابقى مجرد بركة ماليش اى دور ولا اى كلمه فى اللى بيحصل حواليه ولا اقدر اعمل اى حاجة كنت بأعملها من 40 سنه واقعد كده اتحسر على شابى اللى عدى وراح واجتر مرارة انه مش راجع ... يبقى لازم اتريق واعيب واقول عيب وازاى وليه ومايصحش وماينفعش ... علشان كلنا نبقى فى الهم سواء ... كلنا فى الخيبة واحد ..وبكده اكون مش انا بس اللى صقتط ... الفصل كله هوه كمان صاقت ... كده نهدى حبتين ..ممكن اتفهم ده والتمس له العذر كمان ... لكن اللى مش قادر اتفهمه ولا التمس ليه العذر ان الشباب بقى عايش دور عواجيز الفرح ... مش فالح غير فى التريقة ومصمصة الشفايف  .. لاعاجبة حد ولا عاجبة طريقة ولا عاجبة فكرة ... بس ليل نهار تريقة على اى حد وكل حد ...العواجيز عذرهم ان العمر هرب والجسم تقل والزمن اتغير ... اى نعم هوه عمل اللى عليه على قد فكرة وزمنه وظروفه .. وكل مشكلته انه عايز حتة لحمه زيادة عن منابة ...طمع انسانى عادى جدا ومشروع كمان .. لكن انت ايها الشاب الثورى الجميل الطاهر البرىء النقى ... انت بتعمل ايه او عملت ايه ... دا انت ياراجل حتى المحاضرات بتزوغ منها ... فقط تريقة .

عزيزى الشاب العجوز صدقنى .... لو فضلت على كده ... انت الوحيد اللى حتدفع التمن ... نجاحك فى الدنيا مالوش غير طريق واحد واوعى تصدق حد يقولك غير كده ... طريقك للنجاح هوه انك تفحت فى الصخر ... لكن طريق التريقة والسخرية مابينجحش ولا بيكسب غير باسم الحرامى ... طريق التريقة عمره ماحيوصلك وحتلاقى نفسك بعد شويه ( مش كتار والله ) ... عجوز ضيع شبابه راس ماله وعزوته ....... فى الاوهام .

شكر خاص للدكتور محمد بيرو صاحب نظرية الشباب بقى عامل زى عواجيز الفرح 

آآآآه ... ياوطنطن

آآآآه ... ياوطنطن

اللى بيطرد امه اللى ربته وكبرته وعملته بنى ادم من الشقة علشان يتجوز فيها الامورة اللى حتفك زنقته وشرطها الوحيد انها ماتعيشش مع حماتها على اساس حبسة الحرية وكدهون .

واللى عايشة حالة الاستايل والكرياتينين والماركيتنج والمالتى ناشيونال وابوها بقى حمل عليها فتوديه دار السنين اللى بتاخد شىء وشويات على اساس ان هيه اللى بتدفع وكدهون .

واللى بيخون صاحبه علشان ياخد مكانه فى البيت والشغل على اساس ان كله مكتوب ومحدش بياخد رزق حد وكدهون .

واللى قررت انها تسيبله العيال وترفع قضية خلع علشان عايزة تعيش بقى ؟!! ... وهوه ... على قد حاله ومش مكفى طموحاتى وغيرة جاهز ومستنى الاشارة من الصوبع الصغير ..على اساس ان محدش بيعيش مره واحده وكدهون ... خدت بالك من ضمير الغائب اللى فى الجملة اللى فاتت ... ده فى اللغة بيبقى للتحقير وكدهون .

واللى بيشتغل ديلر ويبيع البيسه ويتاجر فى العمله ويهرب البضاعة من المينا على اساس ان الشاطر هوه اللى يعرف يجيب الجنى (الجنيه يعنى )وكدهون .

واللى بتورد المتعه لمن يشتهى مع الاستعداد لتوصيل الطلبات للمنازل وتوفير الاماكن والادوات اللازمة .. على اساس ان الناس تعبانه والبنات عايزة تلبس وتاكل زى غيرها وكدهون .

واللى فاتح هايبر ماركت فتاوى ... وقاعد على الكاشير يعد فلوس صكوك الغفران ويعمل عروض مجانية  للشهادة ...على اساس انه الوكيل الحصرى للدين فى منطقة الشرق الاوسط وكدهون .

واللى فاتحة مطعم تيك اوى وتوصيل الوجبات للفضائيات وخصم خاص للحم الغلابة الفيليه ودم اشهدا بالتلج المجروش على اساس ثورة ثورة وكدهون .

اللى بيرفع علم بلد تانية غير علم بلده ويهد فى اساسها وجيشهاعلى اساس عايزين نبدأعلى نضيف وكدهون .

واللى ابن وسخة كل شغلته انه يبرر لكل ده فى افلام ومسلسلات وسخة زيه على اساس ان الفن يرصد المشاكل ومايحلهاش وكدهون .

وفى النهاية .. اللى مش شايفين او مش عايزين يشوفوا او عاملين مش شايفين على اساس ان القرشين اللى تحت البلاطة يسترونا ومادام بعيد عن قفايا يبقى احنا فى الامان وكدهون .

بعد كل اللى فات حأسأل سؤال رفيع ... هوه اللى بيبيع ابوه وامه وعياله ودينه وشرفه ويروج للسفاله والوساخة والمطنش  ممكن يصعب عليه انه يبيع وطنه ؟؟؟!!!

والسؤال الرفيع يجيب سؤال ارفع : هوه يعنى ايه كلمة وطن ؟؟!!!

شكر خاص للمهندس احمد ايوب صاحب فكرة اللى قرر يبيع بييع اى حاجة حتى الوطن .

إستنى او خد لك تصبيرة

إستنى او خد لك تصبيرة

عايز العب فى الشارع مع العيال ....استنى لما بابا يرجع ويوافق ....التصبيرة :العب قدام باب االشقة ماهو بابا مش حيوافق اكيد  .

عايزآكل... استنى لما الاكل يستوى ... التصبيرة :خدلك شاندوتش جبنة بالطماطم.... ماهو الاكل لسه ماتحتطش على النار من اصله .

انا بحب بت الجيران ... استنى لما تكبر ... التصبيرة: حبها من طرف واحد ماهو الحب شعور مش للصغيرين وزى اختك وكدهون .

عايز العب فى اشبال النادى .... استنى لما تخلص ثانوية عامة ... التصبيرة : العب فى الخرابة علشان النادى عايز موافقة ولى الامر.

عايز اشتغل .... استنى لما تخلص تعليمك .... التصبيرة : اشتغل فى الاجازة  من ورا الحاج ليقولوا عليه مش عارف يوكلك.

عايز اعمل ماجستير فى جراحة الخيول .... استنى القسم يشوف  .... التصبيرة :  اعمل دبلومة ...علشان القسم مافيهوش غير جراحة البقر .

عايز شقة ... استنى لما الحكومة تبنى ... التصبيرة : خدلك ايجار مؤقت علشان الحكومة مش حتبنى يا اهبل .

عايز اخرج مع خطيبتى .... استنى لما تكتب الكتاب ... التصبيرة :اخرج معاها من ورا ابوها واعى حدش يشوفكوا ماهو لو عرف فيفسخ الخطوبة .

عايز سيكو سيكو ... استنى لما العيال تنام ... التصبيرة : ودى العيال الدرس وتعالى ماهى العيال مابتنمش قبل الفجر .

عايز عربية ... استنى لما الحكومة تخفض الجمارك ... التصبيرة : جيب عربية اوكا 800 سى سى (حلوه سى سى دى بتغيظ الاخوان ) ماهى الحكومة مش حتخفض الجمارك يا عبيط .

عايز احج ... استنى لما تجهز البنات وتسترهم ...التصبيرة : اعمل عمرة .. ماهو بعد ماتجهز االبنات حتشحت يامعلم .

عايز اعمل مشروع .... استنى لما البلد تهدى ... التصبيرة : حط القرشين فى البنك .. ماهى البلد مش حتهدى وياسيدى نوايه تسند الزير

فعلا ... انا زير .. ولولا النوايه كنت وقعت على دماغ اهلى اتكسرك ... الحمد لله انى لقيت التصبيرة غيرى لسه مستنى ..

 بس كل املى فى ربنا انى لما اموت واتحاسب ماستناش على الاعراف ... نفسى اخش الجنة على طول ... كفاية تصبييرة لغاية كده ...

التعميم بين النظرية والتطبيق

التعميم بين النظرية والتطبيق

التعميم فى اللغة له معنيان .. الاول بمعنى جعل الشىء عاما مثل عممت الدوله التعليم ... والمعنى الثانى وهو عمم فلان فلانا ... اى لبسه العمامة ... ومدلول العمامة فى اللغة المكانة والتقدير والقيادة ...لكن اللى بيحصل دلوقتى حاجة تانية خالص ... ومفاهيم مختلفة تماما .. مفهوم التعميم دلوقتى هو مفهوم تلبيس العمه بمعناها السىء .. اى بمعنى الضحك على الزبون واستعباطة وجعله يوافق على مالايريد ...ويقول مالا يعى ...  

طريقة تعميم الاسلامى للمواطنين :

اللى بيقول ان الاخوان ارهابيين يبقى بيعمم ودى بقى تبقى سقطة فكرية تدل على ان اللى بيقول كدة مابيفكرش تفكير علمى ومش موضوعى (الرسالة التحتية : اوعى تقول ان الاخوان ارهابيين الا يقولوا عليك مش موضوعى ومابتفكرش تفكير علمى ) .. فى البلاد المتحضرة والديموقراطية بيفرقوا بين اللى بيعمله الفرد اللى فى الجماعة وبين الجماعة ذاتها ( لو قولت ان الاخوان ارهابيين يبقى انت مش متحضر ومش ديموقراطى ) ...انا معاك ان اللى غلط او مسك سلاح وروع الخلق لازم يتحاكم ( شوفت انا حقانى ازاى ... مش زيك )... لكن الاخوان كجماعة ناس طيبين ولذوذين وامامير ... ذنبهم ايه انهم مايشاركوش فى حكم بلدهم ( خليك شهم واقف جنب ابن بلدك المظلوم )..يا اخى اعتبرهم مسيحيين  يا اخى (خلى عندك نخوه ودافع عن دينك واسلامك )... وياسيدى مش معنى ان صندوق التفاح فيه تفاحة بايظة يبقى نرمى الصندوق كله ( الاخوان فاكهة غاليه ... الاخوان تفاح ) ..ده مش من المنطق ولا الحكمة ( لو قولت ان الاخوان ارهابيين يبقى انت مش حكيم ولا عند منطق ... ياللى اثبت انك مش كده ) ...عارف.. حتقولى ان الاخوان بتضرب الشعب بالنار والتليفزيون مصور الكلام دة ... اهو هوه دة التعميم اللى بقولك عليه ... اولا: اللى شفتهم فى التلفزيون دول ممكن جدا مايكونوش اخوان ... يبقى لازم نستنى القضاء يقول كلمته (شوفت احنا بنحترم القضاء ازاى )... ثانيا : لو فرضنا ان دول اخوان ... مانعممش بقى ... دول قله من الشباب المتحمس اللى خايف على البلد فبلاش ناخد الجماعة اللى بتحمى الاسلام بذنب الشباب المتحمس ده (شباب ياعم ....شباب طايش ... سامحهم وخليك انت الكبير ).

السؤال هنا هوه فيه حد يدخل عليه الكلام ده ؟

الاجابة : نعم ... كما يقولها الشيخ يعقوب .

جرب كده وشيل مابين الاقواس ... وقول الكلمتين دول باسلوب حلو وطريقة شيقة مع تعبيرات صدق واستكانه على الوش ... وياسلام بقى لو اللى بيحاورة مطبلاتى من عينة ريشة الاعلامى المعروف باسم محمود سعد  ( افتكر فيلم دم الغزال )  ...وقابل يامعلم ... تأثر ودموع ونحنحة ويسقط حكم العسكر ... والشرعية لازم ترجع .

مضاد غنى(2)

مضاد غنى (2)

انك تجيب اللى انت عايزة فى الوقت اللى انت عايزة من غير ماتدور على جمعية ولا تعمل استبدال معاش... اكيد دى  تبقى حاجة جميلة .

انك لما تتعب تروح تتعالج فى مستشفى خاص تعاملك على انك بنى ادم علشان بتدفع لها ... وماتضطرش تروح مستشفى الكلب المعروفة اعلاميا بمستشفى وزارة الصحة ... اكيد دى تبقى حاجة جميلة .

لما تتجوز البت اللى بتحبها وماينكسرش قلبك وماتضطرش تكمل حياتك مع اللى وافقت على ظروفك المادية .... اكيد دى  تبقى حاجة جميلة .

لما تسكن فى شقة بتبص على مية البحر مش على مية المجارىولا شركة الصرف الصحى .... اكيد دى  تبقى حاجة جميلة .

لما تلاقى الناس بتحترمك وتبررلك افعالك وتيجى فى صفك وتقف معاك من منطلق الغنى غنوله والفقير اردحوله .. اكيد دى  تبقى حاجة جميلة .

الله ؟؟!! ... ماالغنى حاجة جميلة اهوه ... امال مبتبقاش غنى ليه ؟!!

أقولك انا :

علشان فهموك ان الرزق مكتوب ولما تعمل ايه مش حيتغير ... دا طبعا على اساس انهم قاريين كتابك من الجلدة للجلدة وعارفين انه مكتوب عليك الفقر.

علشان فهموك ان الرضا انه لما يكون معاك علبة السجاير وتمن ساندوتش مؤمن اللى طلع اخوان يبقى كفاية شغل النهارده ...بكرة ترزق بضم التاء.

علشان اقنعوك ان الطريق الوحيد للثروه هوه 0900 ولعبة الحياه والزرار الاحمر اللى قدام كاظم وشيرين .

لا يابابا لا ... اللى ماتعرفوش يا امور ان الغنى غنى علشان الفقير مقرر انه مايبقاش غنى ..مقرر انه يصدق شيخ الفضائيات اللى نازل من الهامر وقاعد قدام الكاميرا وبيقول له الفقر نعمة وبيدخل الجنه اسرع ... مصدق ان كل الاغنيا حرامية ونصابين وبيشربوا خمرة ...مقرر ان قرص الترامادول وسيجارة البانجو حتحل له مشاكله ... مقرر انه يصدق ان البرادعى يامنى وصباحى المتجرب 40سنه حيحقق له امانية .

من الاخركده مقرر انه مايشتغلش ... وانه يمارس عادته فى احلام اليقظة بسرية وهدوء .

اخى العزيز : الفقر وحش قوى ... الفقر اهانه لنفسك وذاتك وكيانك وقيمتك ... لو مش مصدقنى صدق رسولنا الكريم اللى استعاذ بالله من الفقر .

أعوذ بالله من الفقر ... فقرالعلم وفقر الافكار وفقر الصبر والاصرار ...اعوذ بالله من فقر العقل اللى بيخلينا نصدق ان الغنى حظ ونصيب وحالة ثورية مستمرة وماهواش شغل وتعب وعرق وسهر ومرمطة وشقى وتدبير وصبر وتوفيق من ربنا اللى الغنى المتقى عنده احب من الفقير ذوالمبادىء الجياشة .

اخيرا علشان انا عارف انى طولت المرة دى ... انا مصمم ان الفرق بين  الغنى و الغبى ... نقطة ... هيه نقطة ... حطيتها فوق تبقى غـنـى حطينها تحت تبقى غـبـى ...

حط النقطة فوق بقى حطها تحت انت حر بس المهم ماتجبهاليش إحياة ابوك ...

تاريخ مصر الحديث

تاريخ مصر الحديث

كان فيه مرة كلب ... سرق حتة لحمة ... مسكوه ضربوة قتلوه دفنوه ... وكتبوا على قبره ... كان فيه مره كلب .... سرق حتة لحمة ... مسكوه ضربوة قتلوه دفنوه ... وكتبوا على قبره ... كان فيه مره كلب... سرق حتة لحمة ... مسكوه ضربوة قتلوه دفنوه ... وكتبوا على قبره ... كان فيه مره كلب..... سرق حتة لحمة ... مسكوه ضربوة قتلوه دفنوه ... وكتبوا على قبره ... كان فيه مره كلب... سرق حتة لحمة ... مسكوه ضربوة قتلوه دفنوه ... وكتبوا على قبره ... كان فيه مره كلب... سرق حتة لحمة ... مسكوه ضربوة قتلوه دفنوه ... وكتبوا على قبره ... كان فيه مره كلب.... سرق حتة لحمة ... مسكوه ضربوة قتلوه دفنوه ... وكتبوا على قبره ... .......

شكر خاص للدكتور محمد صقر صاحب الفكرة 

التطور الطبيعى للمماليك (2)

التطور الطبيعى للمماليك (2)

شجرة المماليك اللى كبرت فى مصر طرحت مماليك صغنتطين ... اينعم ما قعدوش على كرسى الحكم ... بمزاجهم على فكرة ... بس حكموا وبيحكموا وحيحكموا البلد .

 فالمملوك الحديث هوه احسن واحد موجود فى الوجود يقدر يوصل للمناصب العليا ... يعنى مدير ... رئيس قطاع ... مدير عام .. وكيل وزارة ... استشارى ... بس اكتر من كده لا...رغم انه لو اراد لفعل بقوة قدراته الفذه  ...ولكنه لا يفعل ... وليه ؟ ماهوالحاكم الفعلى للبلاد بدون اى مسؤليه ...ان مبدأة: ليصدر الرئيس مايشاء من الاوامر والقرارات ... وانا انفذ مااشاء بالطريقة التى اشاء وقتما اشاء وكله يصب فى مصلحتى وتولع البلد باللى فيها .

والمملوك الحديث  علشان يحكم ويتحكم  بيشترى مماليك صغيرة علشان يساعدوه .. يربيهم زى ماهوه عايز ... يظبط اللى عايزة ... ويراضى اللى محتاجة  ... ويرشى اللى حينفعة ... ويكون اكبر شبكة فساد تتغلغل وتنتشر فى جسدالمحروسة تنهب وتسرق وتبيع اى حاجة وكل حاجة و فى النهاية يدفع رئيس البلاد او الحاكم الصورى للبلاد   الثمن...

وعلشان نقرب الفكرة نقول : انه فى 3 سنوات قامت ثورتين باربع  رؤساء 2 منهم فى السجن ... وخمس رؤساء وزرا واحد فيهم هربان فى الامارات وواحد بيشتغل شيخ عرب وواحد بيشرب ينسون وواحد فى السجن وواحد حى اكلينيكيا ... دا غير عشرات الوزرا اللى زى ماجم زى ماراحوا .. وشباب مات ومايعرفش مات ليه وجيش متمرمط فى الشوارع .. وشرطة ضايعة وجماعة ارهابية غبية واعلام تسريبات وحمدين وابو الفتوح وباسم الارجوز والنخبة الفاشلة ... ومدعكة يامعلم....

 والنتيجة ... ماحدش عارف يمشى الاستشارى اللى بيقبض مليون جنية شهرى وبيروح يقعد فى المكتب يومين فى الاسبوع يشرب قهوه ساده على روح مصر المحروسة محدش قادر يعمل حد اقصى للاجور .... وعندك مثلا مجلس ادارة النادى الاهلى ... وعندك مثلا روساء مجلس ادارات شركات القطاع العام ... وعندك مثلا بواب العمارة اللى جنبك ... وعندك وعندك وعندك ... بص حواليك حتلاقى كتتتتيييييير قوى .

...الثورة اى كان نوعها 25او 30او مستمرة.... ثورة غلط قامت على ناس غلط ... حسنى ومرسى دول غلابه والنعمة ... اللى عايز يتقام عليه ثورة بجد... هما المماليك اللى فى اجهزة الدولة ... هذا النبت السرطانى اللى بينتشر فى جسد المحروسة ومحدش عارف يوقفة....

العجيب بقى ان مصر الوحيدة فى العالم اللى عبيدها بيحكموا احرارها ...

التطور الطبيعى للمماليك (1)

التطور الطبيعى للمماليك (1)

بدأ حكم المماليك بنهاية الدولة الايوبية ... وأول من مسك الحكم من المماليك فى مصر هيه عصمة الدين أم خليل شجرالدر الأرمانيه ( على فكرة اسمها شجر الدر مش شجرة الدر )...واخر سلطان كان طومان باى اللى اتعلقت رقبتة على باب زويلة بعد هزيمته على يد العثمانيين فى موقعة الريدانية سنة 1517...

المماليك للى مايعرفش اصلهم ... هما عبيد ابيض ...كان السلاطين والملوك من ايام نجم الدين ايوب بيشتروهم من وسط اسيا ... وكانوا بيربوهم ويعلموهم العربى والقران والفروسية ويعملومنهم جنود تحميهم وتحارب معاهم ...ورغم ان المماليك عبيد بكل مواصفات العبيد ...الا انهم وصلوا للحكم وقعدوا على قلب مصر 267 سنه ... (احقاقا للحق هما عملوا حاجات حلوة كتير لمصر وكفاية انهم هزموا المغول بس مش دى قضيتنا النهاردة )والمماليك وصلوا للحكم لان عندهم مجموعة خطيرة من الملكات والمواهب والخبرات اللى تخليهم يمسكوا الحكم ونص ... كان مبدأهم فصل الاخلاق عن السياسة ... فكان كله عندهم مباح ... غش .. خداع ..  رمى بلى .. رمى جتت .. اغتيال .. خطف ... ماكنش عندهم عزيز ولا غالى ولا كانوا بيعرفوا معنى الرحمة ولا الرأفة ..ورغم العنف والافترى الظاهر الا ان مجتمع المماليك نقدر نقول علية مجتمع الخوف ( بس مش زى بتاع تتح )... مجتمع الخوف لانهم كلهم كانوا خايفين من بعض ... الملك خايف من مماليكة لينقلبوا عليه ... والامير خايف من مماليك الامير اللى جنبة ... والمملوك القديم مرعوب من المملوك الجديد ... مجتمع كله دسائس ومؤامرات .. حاجة كده تقرف ...

المماليك انتهوا كحكام وملوك سنة 1517 ... الا ان حكمهم كان شغال من تحت لتحت لغاية ماجة محمد على وعمل مذبحة القلعة ... ولولا ان امين بك نط بفرسه من على القلعة ... كنا اتخلصنا من الجين المملوكى للابد ... لكن بختنا بقى ان امين بك يعيش علشان يكون البذرة اللى تنبت فى ارض مصر وتطرح شجرة كبيرة جدورها ثابته فى الارض وفروعها مضلله على مصر كلها ... علشان تحجب عن المحروسة الشمس والهوا ... خد بالك من البخت ... اسم البذرة اللى نبتت فى ارض مصر هوه امين بك ... هه ..أمين ... واخد بالك ... نكمل المرة الجاية  

التطور الطبيعى للمرتزقة

                                  التطور الطبيعى للمرتزقة

المرتزقة مصطلح قديم كان يطلق على المحاربين .... اللى بيأجرو نفسهم فى الحروب... يعنى لما جيش يبقى داخل حرب وماعندوش عساكر كفاية ... يقوم يبعت يجيب المرتزقة دول ويتفق معاهم انهم يحاربوا معاه فى مقابل مبلغ من المال وساعات كتير بيكون فيه كمان نسبة من الغنائم ...

المرتزقه دول مش بيحاربوا علشان مبدأ أو قضية أو فكرة مقتنعين بيها زى ما انتوا عارفين ... هيه مابتفرقش معاهم الحاجات الصغيرة دى خالص.. يعنى ممكن يكون عارف انه فى جبهة الباطل ... وعادى جدا ... وممكن يكون متأكد انه مع الظلم فى خندق واحد ... وبرضه ولا اى اندهاش ... وتلاحظ انه طول عمرة من حرب لحرب ومابيحصلوش حاجة يا اخى ... عارفين ليه ... علشان جبان ..بيخاف قوى على نفسه فلما يحس ان الحرب كبيرة عليه او ان اللى اتفق معاه حيتهزم .. على طول يخلع او ينط يحارب مع اللى كان بيحاربة ...نوع واطى من البشر .

المشكلة بقى مش فى النوع الواطى ده .. عادى الدنيا فيها عالم واطية وسافلة كتير ... المشكله ان مع التطور الطبيعى لزمن باسم يوسف وشريف مدكور ... ظهر نوع جديد متحور من المرتزقة ... اوطى واسفل من النوع اللى احنا كنا بنتكلم عنه ... والنوع الاوطى ده وظيفته انه يبرر للمرتزقة الواطيين افعالهم ... مش بس كده ... دول يقنعوك ان المرتزقه دى حاجة جميلة ..وانك المفروض تخليهم مثلك الاعلى ... وان حلم حياتك انك تكون زيهم ...ماتستغربش ماهو زمن الخياطة فيه بقى اسمها استيلست ... والماشطة بقى اسمها خبيرة تجميل ... والمرمطون بقى اسمه مرشنديزر ...والجاهل المحال للاستيداع بقى اسمه خبير امنى ...والصايع بقى اسمه ناشط سياسى ... فطبيعى جدا ان المرتزقة يبقى ثورى ... مع احترامى الكامل للخياطة اللى سترانه ....والماشطة اللى بتحليلنا عيشتنا ... والمرمطون اللى شايل عننا البلاوى ...

 عفوا على التعميم بس طبعا انتوا فاهمين ان لكل ثائر ظروفة وكدهون .

الجلاد 2

الجلاد 2

نكمل موضوع الجلاد ونقول :

الجلاد مش بس بيحافظ على الحاجة من البهدلة ... لا ده كمان بيدى الحاجة اللى ماتساويش ... قيمة وسيما ... عندك مثلا لو جبت هدية رخيصة ... لكن لفتها بجلاد شيك وعملتلها فيونكة ... على طول قيمتها حتزيد بريق وجاذبية... جرب حط جلاد محترم مزهز تحت طقم الصينى ال999 قطعة ابو تلتميت جنية اللى من بتاع  غير مصاريف الشحن ... حيبان على طول انه طقم صينى محترم اصلى وارد تركيا وممضى من السيد اوردغان بذات نفسه .

ومن اهم وظائف الجلاد... انه بيدارى الوساخة ... يعنى لو عندك كتاب اندلق عليه شاى او كركدية وبلغة العامة كركرية  ... الجلاد يخليه جديد لنج ... لو الازاز اللى اتشرخ ... لزقت عليه جلاد ... حيبقى زوق فنى رائع وتاتشة طليانى ...

كل ده عادى ... اللى مش عادى .. او كنت فاكرة مش عادى بس طلع عادى .... ان احنا كمان كبنى ادمين بنستخدم الجلاد ... ايوه كلنا بنستخدم الجلاد علشان نحمى نفوسنا ونحلى تصرفاتنا والاهم ندارى وساخاتنا ... عندك مثلا لما يكون فيه عميل وجاسوس وخاين ... تلاقية يحط جلاد الوطنية والثورية والحرية والعداله الاجتماعية ... عندك مثلا الارهابى القاتل المجرم السيكوباتى كاره نفسه ... تلاقية حاطط جلاد نصرة الدين ورفع راية الاسلام ... عندك انصاف المثقفين وارباع المتعلمين الواحد فيهم حاطط جلاد المحلل السياسى والمحنك الاستراتيجى ...عندك الصايع الفاشل الخامورجى اللى عمره ما عمر ( بتشديد الميم ) فى شغلانه ... تلاقية حاطط جلاد الناشط السياسى والقيادى الحقوقى ...

لاحظ ان نوعية الجلاد مع الناس دى لازم يكون من الجلاد الفخم المستورد الغالى ... لكن زى اى حاجة فى الدنيا ... درجات ... عندك نوعية تانية غلبانه ... بتسترخص الجلاد ... عندك مثلا الست اللى بتشتغل علشان نفسها واثبات ذاتها وكيانها ......تحط جلاد علشان مستقبل العيال ... الست اللى نفسها تغير عفش الشقة وتشترى اللى نفسها فيه علشان تعوض ايام الفقر والجهاز اللى جالها بالتقسيط وجوزها مش راضى .... تحط جلاد البنات على وش جواز وعايزين نشرفهم قدام العرسان ( دا على اساس ... حوش حوش العرسان اللى بتقع )...الراجل اللى عايز يلحق سبنسة قطر العمر وعايز يتجوز تانى ... يحط جلاد حل مشكلة العنوسة واحياء سنة الرسول ....وعندك وعندك وعندك ... كلنا حاطين جلاد .... بس اللى مش واخدين بالنا منه ... انه جلاد شفاف ... مبين كل حاجة ... جلاد شفتشى كاشف كل عوارتنا .... اقولكوا المفاجأة ....

احنا ...مش ... مش .... واخدين بالنا ... احنا بنستعبط ... 

الراقصة والسياسى ......والاخوانى المنشق

الراقصة والسياسى والاخوانى المنشق

السياسى المخضرم ينوى كتابة مذكراته ... الراقصة اللولبية تفكر فى كتابة مذكراتها ... الاخوانى المنشق ينشر مذكراته... على طول يا معلم ...الطبعة الخامسه نازله بكرة ؟؟؟ بيتكلم فى ايه ده ؟ ...

القصد ..تفتح مذكرات الواحد من دول وتلاقى سسبينس يامعلم ..اثارة وغموض وعبقريات وفرسان ومحررين ... ولعب عالى قوى على منطقة السفالة اللى موجوده بداخل كل انسان ...فتلاقى حبة فضايح .. على شوية شماتة على تتبع لعورات الناس والخوض فيها ...على شوية فوازير من عينة .. م م الذى كان يعمل فراشا وكانوا بيبعتوة يصور ورق لما المكنة تعطل ... وازاى هذا الفراش دارت به الدوائر واصبح يشغل اهم منصب فى الدولة ...ويديك بقى ح م...ج م... هـ هـ .. يعنى هلس فى هلس على راى فاروق الفيشاوى فى الفيلم .

طاب ايه طا ...؟ جاى دلوقتى تقول وتكتب ... امال كنت فين من زمان يا أمور ؟ ماقولتش ليه اياميها اللى بتقوله دلوقت ؟ ... كنت خايف ليأذوك ولا السبوبة كانت كاسرة عينك ؟... ولا عم عشم كان واكلك فى ترقيه ؟ولا جاى تتوب على ادينا وتعترف وتتناول على رأى اخوانا المسيحين ...؟ ولا يكونش جاى تسيح للى ماعطوكش حقك ومقامك او اللى انت شايف انه حقك ومقامك ؟ .

الثلاثة يشتغلوننا يا جماعة ... بعد ماكلوا وشربوا وناموا وباسو وحضنوا و... جايين يكملوا علينا ويقلبونا ويبيعولنا مذكراتهم فى كتب او على الفضائيات .. علشان يوصلوا السبوبة اللى انقطعت ... حيجيلكوا تخمة ياولاد الجعانة ... اييييه مابتشبعوش ياكفرة

.. مش كفاية فلوسنا اللى قلبتوها ... كمان حتجيبولنا اكتئاب ... وتكسرونا قدام نفسنا وتورونا اد ايه احنا كنا مضروبين على قفانا ...احنا بقينا ماشيين فى الشارع رافعين حواجبنا ومبرقين عنينا وناسينا حتى نقفل بقنا بعد ماقولنا : ياااااه  كل ده كان بيحصل ؟؟!!!

عبوكوا على ابو زمن الماركيتنج والام بى ايه اللى بقى بيتباع فية كل حاجة علشان يشتريها الهطل امثالى   

البوس فى زمن مابعد الحداثة

البوس فى زمن مابعد الحداثة

انت بتقول ايه يا باشا ؟! ... هوه فيه سيما من غير بوس ..؟ ... السيما من غير بوس ماتبقاش سيما !.... ثم ان السيما اصلا اخترعوها علشان البوس .... بوس جوه وبوس بره ... يعنى البطل يبوس البطلة جوه الفيلم ... والواد بيبوس البت بره فى الصاله ... أو اللوج أو البنوار ... كل واحد وفلوسه بقى ... ولو ان دلوقت كله بقى صالة ... مافيش حد احسن من حد ... ثورة بقى ... عموما البوس الحاجة الوحيدة اللى مابيفرقش فيها الفلوس ... ممكن الفلوس تفرق فى الاكل فى الشرب فى اللبس .. لكن البوس ..لأ مابتفرقش البوس كله واحد ... الفقير زى الغنى ... كله بيبوس .

لا طبعا ياباشا ... فرق كبير طبعا ... البوسة زمان كانت بوسه ... ليها معنى ووطعم وتحس كده  انها طالعة من القلب .. بوسه كده مشتاقة .. خجلانه .. قلقانه ... حيرانه ... بترتعش ... بتهز الكيان كله ... كنت تعدى فى الصاله تحس ان السيما فيها زلزال ...لكن دلوقت ... هيييييه ... مافيش حاجة عادت زى زمان ... كله اتغير ياباشا ... ماعدتش فيه بوس زى زمان ... كله دلوقت مسك ... وحتى شوية البوس اللى فاضلين ...مابقوش بوس من اللى كنا بنعرفه ... بقى كده اشبة بالعض ... وبرضه العض بقى جوه وبرة ... البطل بيعض البطله جوه الفيلم ... والواد بيعض البت بره فى الصاله .... ماهو ياباشا محدش عايز يفهم ان طول ماجوه حلو بره حلو ... وطول ماجوه وحش بره وحش ... ما هو اصل الناس بتاخد خبراتها من السيما ياباشا .

هأهأ ... لا ... زمان كنت باتفرج على البوس لايف وانا معدى بين الكراسى ...لكن دلوقت بحكم السن والتكنولوجيا ... باقعد قدام الشاشة ... ماهما دلوقتى حاطين كاميرات علشان يكشفوا البوس اللى بيحصل فى الصاله ... هما بيقولوا كده ... بس الحقيقة هما حاطين الكاميرات علشان يتفرجوا ...... مش بقولك ياباشا ماعدتش حاجة تلذ زى الاول ... كله دلوقت بقى افتراضى .

هأهأهأ ... اكيد ياباشا ... دا طباخ السم بيدوقه ... وانا بقالى 30 سنه فى السينما دى ... لكن انا بقى حظى حلو ... جربت البوس بتاع زمان ... والعض بتاع دلوقت ... حق الله ... الاتنين حلوين ياباشا ... ماهو البنى ادم لازم ينوع برضك.

نورتنا ياباشا ... ماتغيبش علينا ياباشا ... الله يكرمك ياباشا .... الباشا ده راجل عسليه ... مابيجيش مره السيما الا ويدينى علبتين فياجرا من الاصلى بتاع فايزر ... الغريب انه عمرة ماجه معاه حد ... كل مرة بيجى لوحده ... الباشا ده باينه مالوش فى البوس ولا ايه ؟؟؟؟

المتأملكين

المتأملكين

كل حاجة بتتطور وتتغير .. يعنى عندك مثلا مفهوم الرجولة قبل البيريل حاجة وبعد البيريل حاجة تانية خالص ... وعندك مفهوم الستات قبل صافيناز حاجة وبعد صافيناز حاجة تانية خالص ...... اما مفهوم الوطنية قبل الارتجاع المعروف اعلاميا بالثورة حاجة ... وبعد الارتجاع حاجة تانية خااااالص .

ونتيجة للتطور وتغيير المفاهيم ... ظهرت فى المحروسة بعد الارتجاع ...ظاهرة جديدة خالص ..ظاهرة المتأملكين ... اى الشياطين اللى لابسين توب الملايكة ... وهذه الظاهرة افرزت الى جانب الطوائف الانالوج القديمة من المنافقين والراكعيين والديوثيين ... افرزت طوائف جديدة من النوع الديجيتال زى الاعلاميين والنخبويين والحقوقيين والاخوان المسلمين والباسميين وغيرهم من المتاجرين بالعرض والدم والوطن والدين ... ورغم ان هؤلاء المتأملكين جاهلين وواطيين وولاد ستين فى سبعين ...الا انهم بكل بجاحة يا أخى تلاقيهم ليل نهار على الفضائيات متنطعين .. وقدام الكاميرا على غير العادة قاعدين مستحميين ومتبرفنين وللبدل والكرافتات السينيه لابسين ...وبفنون الكلام مهلفطين ..وبالمنطق والفلسفة منظريين ... وللحقايق قالبين وعلى كل حاجة واى حاجة معترضين ... المهم ... المهم انهم يطلعوا كاسبانين وللجيوب مالين ..وللقصور شارين والمرسيدس راكبين .... وحتى القبور ... بالبورسلين مبلطين ... ومش مهم ابدا على حساب مين ... على حساب الغلبانين ولا المساكين ... على حساب المغيبيين ولا المشتاقين ... مش مهم...

براحتكوا ياحلوين ... حقكوا يا امامير ياصغنططين ... ماهو الحق مش عليكوا ... الحق على اللى بيتابعوكوا ويهزروا ويضحكوا ويألشوا وفى الاخر ـ بعون الله ـ فى الحيط لابسين   .... اما انتوا يا متأملكين ... حلال عليكوا الفيز الامريكانى والالمانى ... حلال عليكوا فلوس الغلابة ... ياللى سافروا درجة  فى اى بى  على طيران لوفتهانزا واقعدوا فى النمسا ... وكملوا تجارة ولموا كمان وكمان .

اوعى تصدق انى ملاك ومش متأملك انا كمان ... والدليل البوست المكتوب عن المتأملكين الوحشين اللى بشتم فيهم مع انى من الرعيل الاول لمدرسة الشيطان النموذجية لغات .... الفرق الوحيد انى أول واحد بيعترف ...

اللهم احسن ختامنا ودبر امرنا ووفقنا الى طريق التوبة اليك 

اوهام بت عم احلام

اوهام بت عم احلام

نرمين ومروه وريم ... احمد وعلاء وشريف ....3بنات و3اولاد موجودين فى كل مكان تقريبا ...فى الجامعة تلاقيهم ...فى الشغل تلاقيهم ...فى النادى تلاقيهم ...فى اى حته حتلاقيهم....وأغرب مافى قصتهم انها بتتكرر كل يوم بنفس مشاهد السيناريو وكلمات الحوار .. مافيش تجديد ولا ابداع ولا أى افتكاسات ... احكى الحكايه:

احمد بيحب نرمين ...و نرمين بتحب علاء... وعلاء بيحب مروه ... لكن مروه بتموت فى شريف... بس شريف بقى بيحب ريم ...اما ريم  فبتموت فى احمد.

5 years later

احمد اتجوز مروة... علاء اتجوز ريم ...شريف اتجوز نرمين ...ملخبطه صح ؟

عادى ماهى طول عمرها ملخبطة ومحدش فاهم هيه رايحة فين ولا هوه فين الصح ولا ايه اصل الحكاية بالظبط ... وطول عمرها برضة بتقفل نفس القفلة... مش بقولوكوا مافيش اى ابداع ولا اى افتكاسات .

10  years  later

احمد ناجح قوى فى شغله ... عنده عمرو ونرمين ...طبعا انت فاهم هوه ليه سمى بنته نرمين ؟... احمد علطول برة ... علطول مسافر ...علطول مشغول ... على طول حاطط صورة على الموبيل وعاملها كلمة سر ... هوه بيقول كل ده علشان العيال .... وأنا بقول : هأ

علاء بقى موظف ...يرجع يتغدى وينام ... يقوم ينزل يقعد على القهوة يلعب دومينو..فى الشغل .. فى درج المكتب  التحتانى فيه صورة تحت الملفات ... هوه بيقول مش كل حاجة الشغل ...المهم انك تكون وسط عيالك .... وأنا بقول : هأ

شريف بقى سافر الامارات ... وطبعا مش مضطر يعمل كلمة سر على الموبيل ولا يحط الصورة تحت الورق فى درج المكتب ... هوه مكبرها ومعلقها فى الصاله ... قادر ... اخر مرة نزل فيها شريف اجازة كان من حوالى اربع سنين ... هوه بيقول نستحمل الغربة علشان نعمل قرشين للعيال ... وانا بقول : هأ

10 years later

داخل احدى محلات بيع الهدايا ... تقف سيده تناهز الخمسين من عمرها .. ذات جسد ينبىء بفشل جميع محاولات الشفط والحميه ..اثر عمليات الشد تؤكد بما لايدع مجالا للشك انه لا عمليات بعد اليوم ...بعض من الصلع الوراثى الخفيف يظهر بين خصلات الشعر المصبوغ باللون الدهبى ... يقف احمد بجوار هذه السيدة لايعيرها انتباهه .. فجأة تشد السيده احمد من  يده قائله : مش معقول ... احمد عوض .. يرد احمد بذهول : ايوه يافندم .. السيده السمينه : انت مش فاكرنى يا احمد ... انا نرمين زميلتك فى الكليه ...شذا ... ياشذا ... تعالى سلمى على عمو احمد  ...شذا : اهلا ياعمو...نرمين : شذا بنتى الكبيرة ... علاء ابنى الصعير فى ثانوية عامة ...خلينا نشوفك ياللا سلام .. شذا : فرصة سعيدة يا عمو .

احمد يتحدث مع نفسه ... مش ممكن تكون دى نرمين ... البت بتقولى ياعمو ... مسمية الواد علاء .. مين دى ؟ انا مين ؟ انا فين ؟

الغريبة ان اللى حصل مع احمد حصل مع علاء حصل مع شريف حصل مع البنات برضة ...حتة دين نتفة وهم .. وهم انه لو كنا خدنا اللى بنحبه كنا زماننا اسعد واكثر ابتهاجا بالحياة ...

الخايبين لاخدوا اللى بيحبوهم ولا حبوا اللى خدوهم ...كل اللى عملوه كل واحد سمى ابنه ولا بته على اسم اللى كان بيحبه ...بيسموها فى البلد عندنا ... بيحنس نفسه ... أى بيصبر نفسه ... زى لما بتكون جعان كدهوه والحاجة لسه ماخلصتش الاكل تقوم تقولك خد لك تصبيرة ...يعنى لقمة بجبنه .. حتة كيكة ..شاندوتش مخلل ..(قاصدها يالشين ).. اما فى زمن الماركيتنج .. بتاخد لك واحدة مولتو...

اسكتوا اسكتوا ... مش نسيت اقولكوا عن اسماء وهانى ... دول بقى قطعوا بعض حب قبل الجواز .. وجابو بت... ابوها صمم انه يسميه اسماء على اسم امها ... اسماء بنت امورة قوى ... هيه عايشة  دلوقتى عند جدتها ام امها ... ماهى الحضانه لجدة الام لو الراجل كسب القضية واثبت ان الام غير امينه على تربية الطفل ... قانون بقى

التطور الطبيعى للرجل المصرى

التطور الطبيعى للرجل المصرى

فيه ناس شايفة دارون ... عالم صاحب نظرية ... وفيه ناس شيفاه كافر ابن كلب ... وفيه ناس ماتعرفوش اصلا ... وفيه ناس مش مصدقاه ... وفيه ناس مقتنعة جدا بيه ...كل ده مش مهم ... انا اللى يهمنى الفكرة ... فكرة النشوء والارتقاء واثر الظروف والبيئة فى تطور الكائن الحى ... ولو طبقنا فكرة الخواجة دارون على الراجل المصرى ... حتلاقى ان النظرية اتثبتت لوحدها ... فالراجل بيمر براحل تطور كتيرة فى حياته ...

اول مرحلة هيه ...مرحلة الفار .... بتلاقيه بيلف ويدور ويهجم ويهرب زى الفار اللى فى المتاهة ... بيحاول يفهم اللى بيحصل حواليه ويكون ادراكه ومفهومه عن الدنيا عن طريق افكار المحيطين وحكم وامثال الاولين ... لغاية ماربنا يكرمه ويلاقى حتة الجبنه اللى حيعيش عليها بقيت حياته ... وبعد ماياقى حتة الجبنه ويعدى من خرم الابرة ويبدأ يمارس حياته الطبيعية اللى هيه من حقةوالنعمة الشريفة من حقة .. ويبدأ يشتغل والفلوس تجرى فى ايديه ... يبدأ فى ..

مرحلة الطاووس ... بيشترى اللبس اللى نفسه فيه ويمسك الموبيل التاتش .. ويعلق اللاب توب على كتفه ...ويخرج ويتفسح ويمسك المارلبوروفى ايده ويشرب الكانز ...ويعيش مزوق ومروق .. وشويه ويبدأ يدور على انثاه ... بنت الحلال اللى حيبنى معاها المستقبل ... وبكده يبدأ ...

مرحلة الاسد اللى بيبى عرينه ويدافع عن حريمة ... وبعد ماتخلص الزفة وتعدى الصباحية ويرجع من شارم وتعدى التسع شهور وتبدأ الاولاد فى الظهور يدخل الرجل المرحلة الاخطر والاطول فى تاريخه ...

مرحلة الحمار ... نازل شايل كيس الزباله وورقة الطلبات ... طالع شايل البامبرز واللبن والزبادى واللحمة والخضار ... رايح يودى العيال الدرس جاى يشترى لبس العيد والصيف والشتا والخريف والربيع ...واقف يركب لمبة للنجفة بدل اللى اتحرقت ... قاعد يلمع جزم العيال اللى بيشوطوا بيها الطوب ...وشوية والعيال تكبر ويبقى لهم كيان وشان وشنشان ...ويعرفوا  يروحوا الدروس لوحدهم ... ويشتروا هدومهم بنفسهم ...ويبقى لهم حياتهم وصحابهم وعلاقتهم ودنيتهم الخاصة ... فيبدأ الرجل مرحلة جديدة ...

مرحلة الكلب ... طول النهار يهوهو .. ومحدش بيعبرة ولا يسمع كلامه ... ياواد ماتتأخرش عن الساعة اتناشر ... يابت انتى مش حتتحجبى بقى ... ياواد انت مش حتبطل قاعده على الهباب النت ده ... يابت الكلب مافيش كوباية شاى لابوكى ... هوهوهو ... ولاحياة لمن تنادى ...

مع السن والايام اللى هربت ... مع السكر والضغط وخشونة المفاصل وضيق النفس ... يدخل الرجل المصرى المرحلة الاخيرة..

مرحله الــــبومة.... ايوه البومة ... تلاقيه قاعد على كرسى فى الصالة ... يبص بس ... لابيهش ولا بينش ... الدنيا حواليه بتتقلب ... وهوه قاعد يبص بس .

هييييييييييه..... جاى رايح منه له ... جاى رايح منه له ...

شكر خاص للمتر علاء صاحب نظرية التطور الطبيعى للرجل المصرى

الجـــــلاد

الجـــــلاد

الجلاد فى اللغه هو الشخص المسئول عن تنفيذ عقوبة الجلد على المجرم المحكوم عليه..... ولما يحبوا يقولوا ان مافيش عداله والموضوع فيه ظلم وكدهوه يسألك بتهكم : انت حتبقى قاضى وجلاد ؟.

اما الجلاد فى اللغة العامية فهو كل مايستر جلدة الكراسات والكتب ويحميها من زيت الطعمية اللى فى ساندوتشات الغلابة ... وزيت البونفريت اللى بيقع من الدينر بوكس اللى مع الطلبه ولاد الناس .

ولأن كل حاجة بتتطور ... الجلاد هوه كمان اتطور ...زمان كنا بنجلد بورق الجرايد ..وبعدين بورق عمر افندى وهانو ... وبعدين ورق المجلات زى المصور واخر ساعة ...وبعدين ظهر نوع من الورق المقوى لونه ازرق غبى ... لون بدلة المساجين كده ...وشوية شوية ظهر الجلاد البلاستيك سهل التركيب ... وبعدين الجلاد ذاتى اللصق سهل التثبيت ... ومحدش عارف بكرة حيبقى فيه ايه تانى ... تطور بقى يامعلم .

كمان فيه نوع من الجلاد بيستخدموه فى لف الهدايا ... احنا كنا بنقول عليه سوليفان .... ماعرفش هما بيسموه ايه دلوقت ....بس  اكيد ليه اسم حلو كده يمشى مع الموضةوالبرستيج والكانز وحالة شبق الظهور فى صورة ولاد الناس اللى صايبة الشعب كله .

القصد ... ورق السوليفان او الهدايا بيستخدم فى لف الهدايا اللى محلاتها بقت اكتر من محلات الفول والطعمية ....والهدف من لف الهدايا هو اعطاء قيمة اكبر للهديه وشكل احسن ... وساعات كتير لفة الهدية بتبقى اغلى من الهديه ذاتها .... علشان لما نقدم الهديه نعمل جو ... جو .. الله ايه ده ؟ ... مرسى قوى ... ربنا يخليك ... يارب تعجبك ... اكيد حتعجبنى ... طول عمرك ذوقك يجنن .... طاب افتح وقولى رأيك ... وهنا يتم فتح الهدية وتمزيق السوليفان.... وتظهر علامات الانبهار والسعادة ... وايه ده .. مش معقولة ... دا انا كان نفسى فيها من زمان ...تسلم الايادى (بغيظ الاخوان )... صاحب الهدية بيبقى مبسوط ... واللى جايب الهدية بيبقى مبسوط ... والمعزومين برضة بيبقوا مبسوطين ... واحد بس هوه اللى مبيبقاش مبسوط فى القعدة دى ... عارفين مين .... الحاجة ... الحاجة بتبقى متضايقة قوى من تقطيع ورق السوليفان ... خسارة ياولاد ... الورق ده ينفع .... ينفع فى ايه ياحاجة؟ .. ياخايبين ينفع يتحط فى النيش تحت طقم الكوبايات .... ينفع يتلزق على ازاز الشباك علشان الجيران ماتكشفناش .... ينفع يتحط على الحيطة علشان يدارى الرطوبة اللى واكلة الجدار .... ينفع نلف بيه هديه لحد ونوفر الفلوس .

 ..... ينفع كمان فى حاجة مهمه جدا ... ودى بقى اللى حكلمكوا فيها المرة الجاية

لان حالة الاستطراد صابتنى ونسيت اتكلم فى الموضوع اللى كاتب عشانه المدونة اصلا ..... الى اللقاء.

ابن حرام .... بس شرعى

ابن حرام .... بس شرعى

زمان كان مفهوم ابن الحرام عند المجتمع ... هوه الواد اللى مايعرفلهوش اب ... اللى بيلاقوه على باب الجامع او على باب الملجأ او على سرير المستشفى بعد ماتهرب امه أول ماتفوق من البنج .

وزمان لما كنا بنسمع كلمة ابن الحرام كان بيجى فى دماغنا على طول ... الدنيا وهيه ضلمة كحل ... اوالشوارع فاضية والسما بترخ والبرق منور الدنيا والرعد صوته فى صدرنا والشباك بينفتح من الهوا والازاز بيتكسر ...وتلاقى شوية كلمات بتترعش على لساننا من عينة ... الشيطان ... الكبريت جنب البنزبن ... ربنا يستر على ولايانا ... استغفر الله العظيم ... ماهى كبيرة .. زنا والعياذ بالله .

القصد ... رغم ان ابن الحرام مالهوش اى ذنب فى ان ابوه وامه عاشوا لحظة ضعف كان الشيطان فيها شاطر نساهم ربنا فزنوا ... الا انه ياولداه بن الحرام ده هوه اللى بيشيل الزباله كلها ... وفى أى مكان عايش فيه ... فى الملجأ .. عند ابن الحلال اللى خده يربيه علشان يكسب فيه ثواب ... او فى مجتمع تحت الكوبرى والاشارات ... بيعيش ابن الحرام مطارد ... مكتوب على ضهرة : ابن الحرام مخلاش لابن الحلال حاجة ... طاب يعنى هوه ابن الحلال كان عطاله حاجة بنفس راضية ؟! ... مكتوب على ضهره: العشرة ماتهونش غير على ابن الحرام ... طاب هوه شاف منكوا ايه غير الذل والاهانه والمعايرة والنبذ والطرد على ذنب هوه ماعملهوش ... وعايزينه كمان يحافظ على العشرة ... دا ايه البجاحة دى ؟؟!! .. مكتوب على ضهره : ابن الحرام يا قواس يا مكاس ... يعنى ابن الحرام يا يطلع مخبر يا بيلم الضرايب ...ماهو من اللى شافه منكوا ياولاد ال ...

عموما انا شايف ان ابن الحرام اللى مالهوش اب ممكن يكون ليه عذر انه يخون وينصب ويغدر ويبيع ناسه ويبقى عدو للمجتمع اللى لفظة ... ماهو ملقاش اللى يحضنة ويربيه وياخد باله منه وماشافش من صغرة غير الذل والاهانه والمرمطة .

لكن ايه بقى عذر ابن الحرام الشرعى  اللى ابوه الشريف كتب على امه العفيفة بقسيمة عند مأذون واتنين شهود وفرح وتورته واسماء الله الحسنى ...وهاتى بوسه يابت ؟ ايه عذر ابن الحرام الشرعى اللى اتعمل له سبوع وطلع لقى له سرير ومكتب ومدرسة ونادى ولبس عيد ... اللى له تيتا وجدو وانكل وطنط بيجيبوله شيبسى وشيكولاته وكانز ...؟

حد يقدر يفهمنى عذرة ايه ابن الحرام الشرعى ده انه ينصب ويغدر ويخون ويبيع بلدة وناسه ؟  عذرة ايه علشان يقتل ويفجر ويقطع طريق ..؟

سؤال للتفكير :

هوه يعنى ايه حرام من اصله فى الايام الوسخة اللى احنا عايشينها دى ؟

مصر مين يا اهبل انت !

مصر مين يا اهبل انت !

أمها من المدافعين عن حقوق المرأة ... من الستات اللى اتربوا على مقالات نوال السعداوى ... يعنى لا عرفت تبقى راجل ولا فضلت ست زى ما هيه .... والنوعية دى من الستات بتبقى نهايتها دايما الطلاق ... طلاق مادى بقى طلاق معنوى مابتفرقش ... والاطلاق يعنى اثار نفسية على البنية حبيبة امها .... اقلها  كره الاب ... وكبرت البنية بلا هوية ولا حنية ... واتوحد الاب مع الرئيس .... ويسقط يسقط حسنى مبارك .

هوه بقى فيه عرق صعيدى ... فلوس وعيلة وتقاليد ... والعلام فى الغرب مع تربية الصعايدة الناشفة تعمل صراع ... بقى الواد لا عارف يبقى الواد الغربى المفتح ... ولا عارف يبقى الصعيدى القفل ... طلق الغربية وعلشان يبقى حر ومايشلش مسئولية ابن ضهرة .... قال انا بتاع الحرية ... الواد يعتقد(من العقيدة ) اللى هوه عايزة ... ولان تربية الصعايدة بتكتم على النفس ياولداة ... ماصدق تجيلة الفرصة وينطلق ويظهر ويبان ويبات فى مدينة الانتاج ... وكلمتين من عينة شوفونية وبرجماتية وشموليه ....على لوك سيريالى واديها يامعلم وقول وهلفط والعبط كتير واللى عايز يصدق اكتر خصوصا لما الكلام بيبقى جاى على الهوى .

واتوحد الاب الديكتاتور مع الرئيس... ويسقط يسقط حسنى مبارك .

فى الزحمة بقى ومع الصوت العالى وشحنات الكبت المتطايرة ... يتحرر الضعف ويختفى الاحساس بالدونية وعدم الكفاءة ... وحط همك على همى وعيطى ياللى مانتيش غرمانة ... وأتولد الحب ... أو هكذا توهما ... واجتمعا الشتيتان .

ولاننا فى زمن العاهات النفسية ..  اصبح المسخ قدوة وفكرة وموضة وتنظير ... والبنات الامامير بقى كل حلمها ان حد يكتب عنها مقال ويقول بحبك ... بحبك ..

والولاد افرازات مجانية التعليم بقى نفسهم يقعوا على واحده مشهورة ... والوصفة سهله ... كلمتين من عينة شوفونية على برجماتية على شموليه ...وقناة واعلانين ...

طاب ومصر .... مصر مين يا أهبل انت  ! الولادة كانت فى امريكا والجنسية بقت مضمونة وانت يا اهبل اللى حتدفع تمن التذكرة ... من تمن التذكرة بتاعة السيما وشرا اللى مانتش عايزة من تأثير الاعلانات .... وبكرة ولا بعده .. سعيد حيطلق سعيدة ... وحتفضل انت تدور على سبب الطلاق .

ملحوظة :

علشان ضميرك يبقى مستريح ... عايز تشوفنى ماعنديش اخلاق ... واطى ...  معقد ... او خيالى مريض ... او عامل ابو العريف ... او عندى حقد طبقى ... براحتك ... مش مهم ... المهم انى متأكد انى انسان ... بشر ... يعنى نص شيطان ونص ملاك ... والشيطان حب يغتال شخصية متعارضة معاه فكريا ... والملاك كتب الحكاية بدون ذكر اسماء .... عادى عادى .... ماتعرضهاش 

رسالة من الشعب المصرى للكلب اوردغان

رسالة من الشعب المصرى للكلب اوردغان

انتى ولد اوردغان عامله زيطة وزمبليطة ليه على اسيادك مصريين يا كلبة ؟... انتى ولد خنزئوره .. بدال ماتخرفى فى كلام فارغ ... روحى شوفى خيبتك ... انتى  عامله راجل على مصر سيدك ... وانتى شرابة خرج ... طرطورة ... امسحى جوخ ... وافتحى سوستة ورا فى شورت احمر للاتحاد الاوروبى  ....

انتى أدب سيس سايبة افلام سكس ومجلات بلاى بوى يتباع على رصيف قدام مدارس اولاد .

انتى اخلاق يوك سايبة خمرة بين ايدين ناس .. وعامله فيها بتدافعى عن دين اسلام .

انتى خرسيس اخلاق يوك ... حفيد سلطان تنبل ياكل زى حلوف ويلم نسوان حوالية وينام للعصر ... انتى حفيد حرامى كبير كان ينهب خير مصر ام الدنيا ويخطف عمال مهرة علشان يعملوه بنى ادم .

انتى ملعونه تربية شوارع كنتى نامى تحت كوبرى وماترضيش تقاومى تحرش ...كنتى  بتبقى مبسوطة كلبة ... جايه النهارده عاملة راجل على ام الدنيا .

يالا ملعونة تعالى لمى بدلك وفساتينك ... تعالى لمى مسلسلات مافيهاش احتشام ... مافيهاش غير فساد اخلاق ... يالا تعلى خدى اخوان زباله وامشوا سوا سوا .

يلعن ابوك اللى يدور عليك يلاقيك سنبل ياكلب يا وسخ .