الفرق بين الرجل والمرأة10

الفرق بين الرجل والمرأة 10

هشام بيقول انا من يوم ما اتجوزت وأنا بأدى وبأضحى ....وماباخدش مقابل ...سماح بتقول محدش بيدى أدى ...محدش بيضحى أدى ...وبرضه بتقول مافيش مقابل ....هشام مش فاهم ان سماح بتدى ....وسماح مش فاهمه ان هشام بيدى ...الاتنين بيدوا بس بيدوا غلط ...هشام بيدى سماح اللى هوه عايزه كراجل مش اللى هيه عايزاه كست ....وسماح بتدى هشام اللى هيه عايزاه كست مش اللى هوه عايزه كراجل ....هما الاتنين بيدوا بس مش حاسين انهم بياخدوا المقابل...وعايشين بس مش مبسوطين مع انهم بيحبوا بعض ....مثال : راجل شغلته بتستدعى انه على طول مسافر طول الاسبوع بيقعد فى فنادق ويحضر فى قاعات وبياكل فى مطاعم ...لما رجع البيت مراته قالت له انا عزماك على العشا بره ....ادت ولا ما ادتش ...ادت ...بس ياترى هوه دة اللى عايزة ....لا ...لانه زهقان من برة وعيشة برة واكل برة ...اللى عايزه طاجن باميه بالحمه الضانى ياكله على الطبليه وهوة لابس البيجامه فى وسط العيال .

الرجاله والستات عايزين ست حاجات بس السته بتوع الرجاله غير السته بتوع الستات ....كدة مطلقه ؟ لا الرجاله برضه عايزين السته بتوع الستات والعكس ...بس هيه اولويات يعنى لو الست عايزه رعايه والراجل عايز ثقة ...معنى كدة ان الست مش عايزه ثقه والراجل مش عايز رعاية ...لا طبعا ...بس الاهم عند الراجل الثقه وبعدين تيجى الرعايه فى المرتبه التانيه ...والعكس عند الست .

1 سماح عايزه رعايه وهشام عايز ثقة :

لما هشام يراعى مشاعر سماح ويهتم بيها من قلبه سماح حاتحس ان هشام بيراعيها فتبدأ تثق فيه فهشام يحس بالثقه اللى محتاجها من سماح يقوم يهتم بيها اكتر ويراعيها اكتر فتثق فيه اكتر ....والعجله تلف

2 سماح محتاجه تفهم بفتح التاءوالفاء وهشام محتاج تقبل بفتح التاء والقاف :

لما هشام يسمع لسماح وهيه بتعبر عن مشاعرها من غير مايحكم عليها ولا يقدم حلول ...بس بيسمع ويتعاطف ويتواصل ...سماح حتحس انه بيفهمها فتبدأ تتقبل هشام من غير ما تحاول تغيرة فياخد احتياجه من التقبل فيبدأ يديها تفهم ......والعجله تلف

3سماح محتاجة احترام وهشام محتاج تقدير :

لما هشام بيدى سماح الاولويه فى حقوقها ورغباتها ...لما يقدر رغباتها ...لما يجيب لها ورد ولا هديه من غير مناسبة حتحس انه بيحترمها فتبدأ تقدرة التقدير اللى يستحقه ويحس هشام ساعتها ان اللى بيعمله مابيرحش على الارض فيحترمها اكتر ....وتلف العجله

4 سماح محتاجه الاخلاص وهشام محتاج للاعجاب :

لما هشام يخلص لسماح ويفخر بيها حتحس انه بيحبها وبيديها من وقته فتعجب بيه وتبدأ تتكلم عن اخلاقه وصفاته الحلوه فيحس هشام انها معجبه بيه فيخلص لها اكتر ....والعجله تلف..

5 سماح محتاجة التصديق وهشام محتاج للاستحسان :

هشام لما مايعترضتش على مشاعر سماح ومايجادلش ويصدق على كلامها فتبدأ تستحسن افعاله لان هشام دايما عايز يكون بطل وفارس فى عين مراته ..بدون تريقه سبعها وجملها...لما يلاقى دة يبدأ يصادق على كلامها .....والعجله تلف

6سماح محتاجه للتطمين وهشام محتاج للتشجيع :

لما هشام يهتم ويتفهم ويراعى ويحترم ويصدق سماح حتحس انها متطمنه ومحبوبه فتثق وتقدر وتستحسن هشام فيتشجع انه يطلع كل اللى عنده .....والعجله تلف

انا بدأت بهشام علشان ياخد الخطوه الاولى ...بس ممكن سماح هيه اللى تاخد الخطوه الاولى ...اى حد اى حد يبدأ بس العجله تلف .

الموضوع مش سهل والمهمه صعبه وعايزة تدريب وصبر ومحاوله ...بس اللى عايز العسل لازم يستحمل قرص النحل....السعاده والعيشه الهاديه تستاهل نتعب ونحاول ومنركبش دماغنا ونقف جنب شريكنا مش قدامه ...ونبطل كبر وعناد ونبطل نقول مجتمع ذكورى ونبطل نقول الستات اتفرعنت.

المركب واحدة وصلوها لبر الامان ....علشانكوا وعلشان حياتكوا ... والاهم علشان ولادكوا يكبروا فى بيئه صحيه وربنا يكرمنا وهما اللى يحرروا القدس .

فاضل حاجتين :

اولا :موضوع الفرق بين الرجل والمرأة دة من وحى كتاب الرجل من المريخ والمراة من الزهرة للكاتب د.جون جراى

ثانيا : فاضل نقطه مهمه جدا انا ما اتعرضتلهاش ...ونفسى انتوا اللى تكتبوها ...لان الموضوع ده ماينفعش فيه وجهة نظر واحدة ....وبصراحه انا لو كتبته حلطش جامد قوى ...علشان انا اصلا مخنوق من هشام وسماح ومش طايقهم من الاخر.

الموضوع اللى بقول لكوا عليه دة من وجهة نظرى سبب تسعين بالميه من الخلافات بين الازواج مع انه مابيتقالش وعمرة ما حيتقال ....اكتبوا اكتبوا ووقعوا غير معروف ...بس اكتبوا اللى ليكوا واللى عليكوا ...

البوست الجاى حيبقى العنوان بس ....وحاسيبه فاضى ....وحاخد التعليقات احطها فيه ...

مع اطيب تمنياتى بحياه سعيدة جديدة مديدة .....باى شله

الفرق بين الرجل والمرأة 9

الفرق بين الرجل والمرأة9

هشام وسماح لما حسوا ان العلاقة بينهم بدأت تتوتر قرروا ينزلوا يتفسحوا لوحدهم من غير العيال ...عدوا على بتاع الايس كريم ...ضرب كل واحد اللى هوه عايزة ...وميشيوا يتفرجوا على الفتارين وهما ماسكين ايديهم فى ايد بعض ....هشام : على فكرة ياسمسم أنا حاخد جزء من الفلوس اللى محويشينها ...اشتغل بيها فى البورصه ...الموضوع بيكسب كويس ....هشام كان بيفكر مجرد فكرة بيقولها لسماح ...لسه ماخدش قرار ...سماح بقى فهمت ان هشام بيتصرف لوحدة وبيعتبرها غير موجودة وملهاش رأى ....سماح راحت ردة بسخريه : هوة انت بتفهم فى البورصة ولا حتضيع لنا القرشين اللى شايلينهم للزمن ....هشام فهم ان سماح مابتثقش فيه وفى قدراته وبدا يهاجم :انت اصلك فاهمة ان البورصة زكى رستم يخسر الفلوس ويمسك قلبة بايدة ويقول قلبى ويطب ساكت ...هشام هاجم افكار سماح السلبيه ناحيته ...سماح حست انة بيستهزأ بيها ماسكتتش :يعنى انت اللى بتفهم فى البورصه ..عموما انت حر ...بس ياريت تبقى تشوف حد يعلمك بدال ماتعك وتطير القرشين ...وبدأ كل واحد يلطش فى التانى والموضوع اتقلب من نقاش الى جدال..لغاية ما هشام سكت وقفل بقه وفضلوا ماشيين ساكتين والفسحة اللى بدأت بالايس كريم ساحت على دماغهم ...والرسمه اللى كان راسمها هشام فى دماغة بعد مايرجعوا وينيموا العيال باظط ....يعنى نكد من كله...

المشكله مش فى الاختلاف المشكله فى الاسلوب اللى بندير بيه الخلاف .

هشام وسماح بدأوا النقاش ويادوب بعد دقيقتين بقى جدال ومن غير مايحسوا بدأوا يجرحوا فى بعض ...

هشام ماكنش واخد قرار فى موضوع البورصة كان لسه بياخد رأيها ...وبدال ماسماح تسمعه سمعت مشاعرها السلبيه ناحيته.....ايه بيتاجاهلنى يعنى ...ايه هو انا ماليش لازمة ...ايه هو انا طرطور ....وسخنت نفسها فكانت لازم ترد وتدافع عن ذاتها فقالت له هوه انت بتفهم فى البورصه ...لو هشام بيفهم كان عداها ...وكمل نقاش موضوعى ...بس هوه كمان خد الموضوع بشكل شخصى ..اه يعنى انا عبيط ...اه يعنى انا مايعتمدش علية...وسخن نفسه وفى الاخر سكت واتكتم علشان مايتخانقوش فى الشارع ....هوه السكوت وقفل الكلام فى الموضوع دا حل ....حنشوف

فيه تلت اساليب الازواج والزوجات بيستخدموها علشان يتخلصوا من الم الجدال ..هما فاكرين انهم بالاساليب دى بيتفادوا الموقف لكن فى الحقيقة العكس هوه اللى بيحصل .

اول اسلوب غلط وهوة اسلوب الهجوم ...لما الحوار يبدأيبقى بايخ ...الراجل يتحول للهجوم على اساس ان الهجوم خير وسيله للدفاع ....فيهاجم باللوم واصدار الاحكام السلبيه ...وانت مابتفهميش ...انت ايش عرفك ...ويعلى صوته ويصرخ وبكدة يغصب على الست انها تسمع كلامه وتتقبل وجهة نظرة ...ساعتها بيحس انه منتصر ...والحقيقة انه مهزوم لان الاكراه بيضعف الثقه فى العلاقة ...

الاسلوب التانى واللى استخدمه هشام وهو اسلوب الهروب ...او بالبلدى تكبير الدماغ ...يسكت ومايردش ..ومايتكلمش فى مواضيع شامم فيها ريحه جدال ..وشويه شويه يتحول الى الرجل الصامت اللىكل ستات مصر والغالم بتشتكى منه وتقول عليه فى القعده اياها ...طول ماهو فى البيت قاعد ساكت ومخروس ..ولما يجيله تليفون من صاحبه ياسلام على الرغى والضحك والقهقهة ......الرجاله مايعرفوش انهم بكدة بيجرحوا الستات بطرق غير مباشر ...والنتيجه تلاقى الست تقوم الفجر تشغل الغساله ...وتبدأ تطلع هما فى الاكل ليل نهار لغايه ماتبقى زى الفيل ..

الاسلوب التالت وهوة التظاهر والاستسلام ....ودة غالبا مابتعمله الستات ...بتتظاهر ان مافيش مشكله وان كله تمام ...وتلطع على وشها ابتسامه ساذجه تبين انها مقتنعة وموافقه على اللى بيقوله ...مع انها مضغوطة وزهقانه لانها بتحس انها بتدى بس مش بتاخد وساعات تستسلم وتقبل اللوم والنقد وتسكت ...وشويه شويه تفقد ذاتها وببقى مش مخليه الزبون عايز حاجة بس فى نفس الوقت مش سعيدة ....ودة برضه اللى بيخلينا نشوف واحدة بتطلب الطلاق بعد عشرين سنه جواز ....وتلاقى كل اللى حواليها مستغربين ...ازاى دول عمرهم ما اتخانقوا ...

الحل ياعم الخبير ....عارف اكيد زمانكوا بتقولوا كدة !

الحل ان الاتنين مايخدوش المواضيع بشكل شخصى ....مايفسروش كل كلمه على انها اهانه او سخريه ... مايهاجموش ومايهربوش ومايستسلموش ....وواحد فيهم اى واحد واكيد الواحد دة هوه الاعقل ...بغض النظر عن ذكورية المجتمع ...اى واحد فيهم يقف ويعتذر ...طبعا الاعتذار صعب على النفس ..مش اى حد يقدر عليه ....بس اعتذر بدون ماتعتذر ...اقف وخد نفس وقول او قولى انا شايف انك متدايقة ....وابدا فى مناقشة الموضوع ....الموضوع ..هه ....الموضوع مش الافكار السلبيه ونظريه المؤامرة وذكورية المجتمع ...حوار بين اتنين مصلحتهم واحدة ...مش مهم مين وجهة نظرة اللى تطلع صح ...مش مهم مين اللى يكسب فى الكلام ...المهم المصلحه للجميع

هانت فاضلى حلقتين الحلقة اللى جاية انا حاكتبها واللى بعديها انتوا اللى حتكتبوها علشان نخلص من موضوع هشام وسماح اللى صدعونى ....واشوف بقى موضوع حلو كدة اتكلم فيه ...بلا جواز بلا بطيخ على راى اخوانا السوريين

الفرق بين الرجل والمرأة 8

الفرق بين الرجل والمرأة 8

فى اخر اليوم بعد ماخلصت سماح الغسيل والطبيخ والكنس والمسح ومذاكرة للعيال ....دخلت اوديتها وغيرت هدومها واتمكيجكت وحطت برفان ...هشام وقتها كان قاعد يتفرج على التليفزيون.....سماح خرجت من اودتها عروسة ....مشت بدلال وراحت قعدت جنب هشام ....وقالت له : اخيرا الولاد ناموا .... آه ...ماتخليش الشيطان يلعب بدماغكوا زى مالعب بدماغى وبدماغ هشام ....سماح ماكنتش عايزة غير انها تتكلم مع هشام ...كلام وبس ...ماهى طول النهار مابتتكلمش مع حد ....طول النهار شغل ومناهدة وبس ....نفسها تتكلم ...تحكى مع حد يسمعها ...

سماح : مش ابله عليه وقعت مع مرات ابنها تانى ...هشام وهوه بيغير القناه : تانى ...هما مابيبطلوش ...سماح : بصراحه بقى المرة دى أبله عليه عندها حق ...مرات ابنها فاكرة نفسها لسه صغيرة فى ثانوى ...جايبالها العيال وتقولها قال ايه ..انا نازله اتفسح مع صحابى ....هشام وهوه بيغير القنوات عايز يشوف مزه ولا بوسه من بتوع الافلام الاجنبيه : امم .....سماح أبله عليه قالت لها يابنتى عيالك اشقية وانا مابقتش حملهم ....هشام ساب الريموت بعد مايأس انه يلاقى فيلم مناظر ومسك الجرنال يقرا شويه ويبص لها شويه ...سماح بدأت تتخنق :انت معايه ولا بتقرأ...هشام : معاكى.... معاكى طبعا ....سماح بتحدى : طاب انا كنت بأقول ايه؟ ..هشام ...كنت بتقولى العيال اشقيا ...ياستى ماكل العيال اشقيه ...وبعدين انا بكرة حاشدهملك ...سماح : عيال مين اللى حتشدهم ...العيال.... العيال ....ضغطت سماح على اعصابها وقالت : مش برضه مرات ابن ابله علية غلطانه ...هشام:ياستى واحنا مالنا يخلصوا مع بعض ... سماح ماالست بتشتيكيلى ومش عارفه تعمل ايه ؟ ....هشام ببرود : سهله خالص ماتاخدش العيال ...سماح : بس والله الست دى صعبانه عليه تربى وتكبر وتتعب وبعد كدة ابنها يجيب لها واحدة تزهقها فى عيشتها ...هشام بسخريه : احبك ياحنين ... ماتشغليش بالك همه حيحلوها ...قومى انتى اعملى لنا العشا ....سماح بهدور غريب خالص : عارف لولا ان الواحدة مش لاقيه حد يكلمه والله ماكان لسانى يخاطب لسانك ...هشام ببله مغولى : ايه ناويه على نكد ولا ايه ؟! بقولك كل واحد عندة مشاكله احنا ناقصين مشاكل الجيران ...انا مش عارف ايه اللى مدايقك كدة ...سماح : لا مافيش وقامت من جنبه وهيه مش طايقاه ولا طايقه نفسها ...

شوفتوا رخامه كدة قبل كدة ...اكيد شوفتوا هشام مش فاهم ان اكبر غلطه بيعملها انه مابيسمعش سماح ...ومابيركزش معاها ...هوة عطيها ودنه اه ...بس دماغة مش معاها ...فسماح حست انه مش مهتم بيها وبكلامها مش بيفهمها ...الغلطة التانيه انه بيسخر من مشاعرها ولما تعبر عن ضيقها من اللى بيعمله ...يقوم يقولها مالكيش حق حتى تنفعلى ...فبتحس انه مش بيحبها ولابيقف جنبها مابتحسش بالامان اللى هيه عايزاه ...ممكن ياهشام ....يارخم .....تسمع وتنصت لسماح وتتواصل معاها ...ممكن تحترم مشاعرها واحاسيسها وافكارها ...حتى لو كانت من وجهة نظرك هايفة وماتستاهلش ...ياعبيط الستات مش زينا...دول بيعيشوا القصص بقلبهم مش بعقلهم ....بدليل ان الواحد تلاقيها قاعدة قدام المسلسل التركى من دول تعيط وتتشحتف وفى الحلقه الواحدة تخلص لها علبتين مناديل فاين متين منديل .... مع انها شافت المسلسل دة مرتين قبل كدة...عيش معاها وحسسها انك معاها ....وبعدين بطل اسلوبك الرخم دة ...والله انا نبهتك ....انت حر بقى ...انا حايشهم عنك بالعافية ...انت مطلوب ياحبيبى ....وانا مش حأقدر ادافع عنك اكتر من كدة ...لاحسن اروح فى الرجلين انا كمان ... انت عارف لما بيقلبوا بيبقوا ازاى ....سلام ياصاحبى

الفرق بين الرجل والمرأة 7

الفرق بين الرجل والمرأة 7

سماح كانت نار الله الموقدة ...ادينى نفذت اللى قولت عليه ياعم الخبير ...لخصت واخترت الوقت المناسب ..والطلب كان مباشر ...امبارح كان قاعد مابيعملش حاجة ...قولت له انزل هات لنا لبن وزبادى ...أهوه طلب متلخص ومباشر اهوه ...قام قايلى لا ...ما استحملتش بقى ...رحت منفجرة فيه ...هوة اللبن ده عشانى ...دا علشان عيالك ...انت مش عايز تعمل حاجة ولا تساعدنى ابدا ....انا مهرية ليل نهار وانت ولا هنا ....بترجع من شغلك تنام يا تتفرج على التليفزيون ....طبعا هوه ماسكتش ...المهم كانت ليله سودا ودخلت نمت مع العيال ...حسبى الله ونعم الوكيل فيك وفى نصايحك ...شاكلك كدة لامتجوز ولا تعرف حاجة عن الجواز ... طبعا دا عادى ...ماهو قالوا زمان ماينوب المخلص الا تقطيع هدومه ....فى الاخر انا طلعت سبب النكد والليله السودة وانها راحت نامت مع العيال ...قال يعنى هيه كل يوم نايمه جانبة ...ماشى ماشى ...هوة بصراحه الحق عليه برضة ...ما انا نسيت اقولها المرة اللى فاتت ....انها لو عملت اللى قولنا عليه ...ممكن برضة مايعملش او يقول لا ... نسيت اقول لها لو قال لا ...اسكتى يا سماح ما ترديش خالص ...وان ما قدرتيش تسكتى قولى مش مشكله انا حتصرف ...خليه يحس انه يقدر يقول لا وبرضة يلقى منك التقدير والحب .... وانك رغم اى حاجة مقدرة اللى بيعمله علشانك وعلشان عيالك ....ساعتها حيحس انه حر والحرية دى حاجة مهمه قوى عند الرجاله ...ولما يحس انه حر حيقول حاضر ...اتقبلى كلمة لا ...لانه لو قال لا وانت رديتى كويس حيشيلها لك والمرة الجايه حيقول ايوة وحاضر ....وممكن كمان يقول حاضر المرة دى مايستناش للمرة الجاية ...اى نعم هوه حيهلفط ويبرطم شويه ...برضه سيبيه ماترديش ...اصبرى واسكتى وماتخديش الموضوع بشكل شخصى ....

اللى ماتعرفيهوش يا سماح ان الراجل مجرد مايلبس وينزل ويجيب اللبن حيفك وينبسط لانه بيشوف نفسه اد ايه هوه راجل جدع وشهم وبيساعد عياله ومراته وبيجيب لهم طلباتهم ...فيرجع لك مبسوط وسعيد ....كملى عليه انت بقى ...مش قصدى اكسرى نفسه وقولى له ماكان من الاول ...ولا تقولى شوفت المشوار ماخدتش ربع ساعة كان لازم يعنى تناهدنى ...لا والنبى مش قصدى كدة خالص ...انا قصدى تكملى سعادته واحساسه بنفسه ...وهوة داخل قولى له ربنا يخليك لنا دا احنا من غيرك ولا حاجه ...حتلاقى سعادتة بتزيد وتقديره ليكى بيزيد والمرة الجاية حيجيب اللبن من غير ما تقولى له ....علشان خاطرى ياسمسم لو قال لأ اسكتى خالص او قولى مافيش مشكله وبينىله حبك وتقديرك ....

قبل ما يا سماح تنطقى وتلطشى فى هشام وفى الرجاله وتقولى ايه الدلع المرء ده ....ايه الحساسية الفارغة دى ॥حأقولك سر ...بس بينى وبينك ...ماتقوليهوش لعدوك ...الرجاله عبيطة ... ايوة يابت عبيطة وهبله كمان ...عندهم عقدة اسمها التقبل والتقدير ...طول ياختى مانتى متقبلاهم ومقدراهم يبقوا زى الخاتم فى صباعك ...لكن عديكى بقى لو حسوا كدا انك مش مقدرة تعبهم ولا بتحاولى تصلحيهم ولا تعدلى عليهم ...يتقلبوا ياختى وينكدوا عليكى وعالعيال وايامك تبقى هباب ...اهو انا قولت وعملت اللى عليه ...وانت حره بقى تسمعى ماتسمعيش انتى حرة بس ماترجعيش تقولى نمت فى اودة العيال بسبب نصايحك ....هه اقوم انا بقى.... اقعدى بالعافيه

الفرق بين الرجل والمرأة 6

الفرق بين الرجل والمرأة 6

سماح كانت زعلانة وزهقانة ومكتئبه ....كل ماتطلب حاجة من هشام ما يعملهاش ....ويدوخها ويطلع عنيها ويقطع قلبها ...وفى الاخر تقلب بعركة ....سماح بتقول انه المفروض ان هشام يعمل اللى هيه عايزاه ...من غير ماتطلب ....اشمعنى هيه محدش بيطلب منها حاجة ....وعامله زى المكنة الدايرة ليل نهار .....بتعملهم اللى هما عايزينة .....قصدها طبعا هوه وعياله ....

سماح مش فاهمه ان هشام مش زيها ....هيه زى ستات الدنيا كلهم ربنا خلقها علشان تدى ومن غير ماحد يطلب ....لكن هشام برضة زى رجاله الدنيا ...مابيعملش حاجة الا لما ينطلب منه ....خلقة ربنا بقى ...

سماح طبعا ماعجبهاش الكلام ...وقالت طاب ما انا باطلب وبرضة مابيعمليش حاجة ....طاب مابيعملش لية؟!!!......سماح برضة مش فاهمه ان هشام مابيسمعش طلباتها عادى كدا زى البنى ادميين ....لا هوة بيفهم انها بتقول له ....انت مقصر وما بتقدمش كفاية ....وده بيخلية يحس انه مش محبوب ومراته مابتقدرش تعبه ومابتثقش فيه ....فيقوم يدى اقل وساعات كتير مابيديش خالص .......

سماح بعد ماسمعت الكلام ده شاطت ....وقالت ايه هوة ده ...هوه احنا بندادى ...انا فاضياله هوه كمان ....رجالة ايه دى ...دا بدال مايقف جنبى ويساعدنى ...عايزنى اطبطب عليه ...دا ايه لعب العيال دة ....

سماح مش عارفه ان هشام ممكن يعمل لها كل اللى هيه عايزاه وبسرعه ويكون تحت أمرها ...بس لو هيه ظبطته ...سماح هديت وقالت ماشى اظبطة ....بس ازاى يا عم الخبير ؟!!! طبعا سماح بتتريق عليه ....ومش عاجبها كلامى ...ماشى ماشى بكره تعرف قيمتى ....المشكله ان انت لما بتطلبى بتطلبى غلط ....مابتبقيش مباشرة ...بتلفى وتدورى ....ومابتنقيش كلامك .... ليه بقى سماح بتعمل كدة ...اقولكوا ليه ؟ ....علشان خبرتها السابقه مع هشام لما كانت تطلب منه طلب ...يهب فيها ويقولها انت مابتبطليش طلبات ....بطلى بقى ترسمى لى خطط ...ارحمينى يا ابلة الناظرة ....فلما بتيجى تطلب منه حاجه بتبقى خايفه تقوم تلف وتدور ...يعنى مثلا تقوله احنا من زمان ما اتفسحناش ....هيه قصدها عايزة اتفسح لكن هوه فهمها انها بتقول له انت هاملنى ومقصر معايا ...فياريت يا سماح بلاش اللف والدوران...... ياهشام انا عايزة اتفسح سهلة دى ...

تانى حاجة بلاش لت وعجن وانت بتطلبى يعنى بلاش تقديم اسباب واعذار والاهم بلاش كلمه تقدر او تعرف دى .....لانك كل ما لتيتى وعجنتى وقدمتى اسباب وقولتى تقدر وتعرف ...مقاومته بتزيد ...يعنى قولى له هات جبنه رومى وانت جاى ....سهله خالص اهيه ...بلاش تقولى العيال بيحبوا ساندوتشات الجبنه الرومى ...ولنا بأعمل لهم جبنة بيضا بيرجعوا بالساندوتشات ...مع انى باحطلهم معاها طماطم ...بس عيالك مابيستطعموهاش ....مابيحبوش غير ساندوتشات الجبنه الرومى ....تعرف تجيب لنا وانت جاى ربع رومى .....علشان ساندوتشات بكرة .....

تالت حاجة والاهم اختارى الوقت المناسب للطلبات يعنى مايكونش قاعد يعمل شغله ولا يكتب تقاريرة ...وانت تدخلى علية هجم..... قوم غير لمبه الصالون المحروقه بقالها اسبوع ....

طبعا انا عارف ان كلامى مش على مزاج سماح ....طبعا مش عاجبها حكاية لخصى ومباشر والتوقيت والفته دى كلها ...بس يا سمسم الموضوع جايز مايكونش مهم بالنسبة ليكى ...بس هوة مهم قوى عند هشام لانه بيتعلق بكرامته وثقته بنفسة ورجولته كمان ....وبعدين مش اللى يهمك ان المشكلة تتحل .... مش مهم بقى ان كان الاسلوب على مزاجنا ولا مش على مزاجنا ...المهم النتيجة والمشكلة تتحل والدنيا تبقى فى البيس ...ولا ايه يا جميل

الفرق بين الرجل والمرأة 5

تخلف ثلاثى الأ بعاد

استراحه قصيرة قبل ما كمل الحلقات اللى انا عارف ان ملهاش لازمة ....بس اهوة زكاة العلم افشاءة ...دا طبعا على اساس ان اللى بقوله علم ....استراحه قولت ابص فيها علينا اصلى من زمان مابصتش علينا ....قوم لقيت خير اللهم اجعله خير ...ان احنا ...او شويه من احنا ...او كتير من احنا ...مابنسمعش ...وان سمعنا مابنفهمش ...وان فهمنا ما بنعملش ....وان عملنا نرجع بسرعة الفيمتو ثانية لأول السطر ....علشان نستمتع بالشكوى ...ونتلذذ باحساس الظلم والقهر من الاخر ....ونرجع نلف وندور فى مثلث التخلف الثلاثى الابعاد ....ماهو كان زمان قبل الثورة كان فيه مثلث التخلف ...الفقر والجهل والمرض ....لكن دلوقتى اتطور زى ما كل حاجة بتتطور فى بلدنا للاسوأ ....بقى مثلث فقر التفكير وجهل بشهادات معتمدة ومرض نفسى باعراض سلوكية ...... بقى مهارة فى الاستخسار والاستكتار والاستكبار ...اما البعد الثالث بقى فهو سيل الاحكام سابقة التجهيزوسريعة التنفيذ...على حبة موروثات لافكار عبيطة لا هيه من ديننا ولا من سنة رسولنا ....ولا حتى من منطق الأداميين....

بنستكتر نقول كلمه كويسه للى قدامنا ...بنستكتر نمدح صفه حلوة فيه ...بنستكتر لحظه يحس فيها بنفسه ....وان ما استكترناش بنستخسر ....بنستخسر كلمة شكر على حاجة قدمهالنا ...بنستخسر نساعدة ماديا او حتى معنويا ....بنستخسر نشغل بالنا بمشاكله ....وان ماستخسرناش .....بنستكبر ...بنستكبر نتأسف له مع ان الغلط راكبنا من ساسنا لراسنا .....بنستكبر نقول له حاضر مع ان حاضر تريح ....بنستكبر نطلب مساعدته مع انه يتمنى يساعد ...بنستكبرونستخسر ونستكتر علشان احكامنا كانت جاهزة وقرارتنا دليفرى ...قررنا ان رد الفعل مش حيبقى فى صالحنا ...اه مش حيقدر اللى بنعملهوله ...وحيتعوج ...اه ماهو برة وجوة فرشتلك وانت مايل ومين يعدلك ...ماهو يا مأمنه للرجال يبقى حطيتى المية فى الغربال ...ماهو قصقصى طيرك لا يلوف على غيرك ..اكسرى نفس امه من الاخر .... آه ماهواكسر للبت ضلع يطلع لها اربعه وعشرين ...على اى اساس علمى طيب ...ماهو لازم تدبح لها القطة ....طاب ليه مش كلب ولا خايف يعضك .....وماهو وماهو وماهو ....واستعد للحرب ياباشا مش للجواز ...حرب اللى كسبان فيها خسران ...الاثنين خسرانين ...خسرانين السعادة اللى كانوا حيحسو بيها ....خسرانين الحياة الحلوة اللى كانوا حيعيشوها برغم الغلا والكوا والعشوائيات ....والفضائيات والبلوتوث وعبد الحميد المنكوش ...وشله المشلحين واحاسيس الحساسين ....والتوريث والبرادعى ... البرادعى ....طاب والله احسن واحد يحكمنا هوة البرادعى ....طبعا حتسألوا ليه ...ببساطة لان كل اللى ناقصنا بردعة ......واحسن واحد يحطلنا البردعة هوة البرادعى ...يبقى بالروح بالدم نفديك يابرادعى ...ولو انه يعنى شاكك انه حيجيبها مخططه ...ماهو كل واحد وعلامه بقى ...!!!!!!!

الفرق بين الرجل والمرأة 4

الفرق بين الرجل والمرأة 4

هشام وسماح رجعوا من عند حماه وحماتة بعد ما ظبطوا المسائل وهدو النفوس....بين ام سماح وابوها ....دخلوا ناموا ...قاموا الصبح فطروا ....نزل هشام لشغله ودخلت سماح تشوف اللى وراها قبل العيال مايرجعوا من المدرسة ...الساعةاتناشر رساله من هشام ورد من سماح ...الساعة واحدة وهشام بيحضر ورقه علشان يروح ...دخلت علية السكرتيرة وقالت له فيه اجتماع مع العضو المنتدب كمان ربع ساعة ....هشام قال فى نفسة استر يارب ....بدأ الاجتماع ...سخن الاجتماع ... كان فاضل شويه والعضوالمنتدب يشتم بالاب والأم ...الدنيا ولعت والتهديد بالرفد كان عينى عينك ....خلص الاجتماع ..وصل هشام البيت وهوه مش عارف وصل ازاى ...أتغدى مع سماح وهوه سرحان بيفكر فى اللى حصل واللى حيحصل ....سماح :ايه مالك ....داخل مكشر وبتاكل وانت ساكت ...هشام : مافيش ...مشاكل فى الشغل ...سماح : دا بس اللى مدايقك ....هشام وهوة قايم من على السفرة :أيوة ...سماح : مش حتكمل غداك ؟! هشام : لأ....هشام طلع الجرنال من الشنطة وقعد يتصفح فيه ...لا بيقرأ ولا حاجة ....دخلت سماح : اعمل لك شاى ...هشام : لا شكرا ...سماح : ايه انت متغدى برة ولا اية ...هشام بشرود : ابدا ....سماح : انت بتقطم معايا فى الكلام ليه ...هشام : ياستى والله مافى حاجه ...سماح: لأفيه انت متغير ...لو فيه حاجة قولى ....هشام : ياستى فى عرض جاه النبى سيبينى دلوقت ...سماح : خلاص خلاص ...ياساتر هيه الواحده ماتعرفش تتكلم معاك .... انا ماشية ...رمى هشام الجرنال وفتح التلفزيون وقعد يقلب فى الدش وهوه سرحان فى اللى حصل واللى حيحصل ...... مافيش خمس دقايق ودخلت سماح : مش انا شديت البواب النهاردة ....هشام: امممم ....سماح : بقى زى الجزمة ...جاب لى حجاتى اول واحدة فى العمارة ...هشام : كويس ...سماح : الا مش حتقول لى مالك ....هشام : بعدين ....سماح وهيه حتموت وتعرف فيه ايه :ماكملتش قرايت الجرنال لية؟....هشام : اصلى قريتة فى المكتب ...سماح : مش عايز حاجةاعملها لك ؟ ....هشام وهوه بيكز على سنانه : شكرا ...مرسى ...ربنا يخليكى ... سماح : هوه الواحد لما يكون فيه حاجة مديقاة مش المفروض يفضفض مع مراته ؟ .... وانفجر هشام : مافيش زفت حاجة ...ممكن تسيبينى لوحدى ..... طلعت سماح وهيه بتقول :ماله دة ...هوه انا جيت جنبة ...دا جزاتى اللى عايزة اخفف عنه ...صحيح خير تعمل شرا تلقى ...والنبى ما انا مكلماه تانى ....بس لو يقولى فيه ايه ؟..

هوه صحيح هشام ما يستاهلش الخير اللى بيتعمل فيه ...ولا اللى بتعمله سماح ده شر مش خير ...

لا ده ولا ده ...هما بس مش فاهميين

سماح مش فاهمه ان هشام زى كل الرجاله اللى فى العالم ...لما بيتحط تحت ضغط او تهديد او يكون فى مشكله ....بيحبس نفسه جوة نفسه ...بينعزل ...لغاية مايلاقى حل لمشكلته وان ملقاش بيلهى نفسه فى اى حاجة علشان ينسى المشكله دى ...هشام ساعتها بيبقى زى اللى فاقد الوعى ... مش حاسس ولا سامع اى حاجه ...مش شايف غير مشكلته ...

سماح مش عارفة ان المساعده اللى بتقدمهاله ساعتها غير مطلوبه ...لانه بيعتبرها اهانة ...واقرار منها بانه عاجز عن حل مشاكله ...هوه فى الوقت دة مش عايز غير انه يفضل لوحده .....وماحدش يضغط عليه علشان يحكى ....هوه مش عايز غير مزيد من الاحترام لعزلته ...اللى ماتعرفهوش سماح ...ان الفترة دى لما بتعدى وهشام يلاقى حل للمشكله اوحتى يتناساها ....بيرجع على طول زى الاول ...ويطلع من عزلته ويحكى لها كل اللى نفسها تعرفه....

ممكن يا سمسم تسيبيه فى حاله ....اصبرى على نفسك شوية ياستى ...حيطلع ويرجع ويحكى ويرغى .

هشام بقى مش عارف ان الستات غير الرجاله ....وانها لما بتبقى تحت ضغط ...بتتكلم وتحكى وتزعق وتفضفض زى ما حصل فى البوست اللى فات ....

افهم هيه بتفكر ازاى ....وافهمى هوه بيفكر ازاى .... وتقبلوا بعض

افهموا تسعدوا|...

تعديل جملة حوارية الفرق بين الرجل والمرأة3

الفرق بين الرجل والمرأة3

بعد معركة اللحمة بيومين ...اليوم التالت بقى.... بدأهادى جدا .... قام هشام صلى الصبح ولبس هدومه ...وقعد يفطر مع سماح...قعدوا يتكلموا ويحكوا وهما بيفطروا ...عطاها بوسة ونزل راح شغلة ...سماح دخلت تشوف اللى وراها قبل العيال مايرجعوامن المدرسة ....الساعة اتناشر هشام بعت رساله لسماح بيقولها وحشتينى ياروحى .....سماح ردت برساله انت اكتر ياقلبى....الساعة اتناشر ونصف مامة سماح كلمتها فى التليفون ...سماح طفت النار على الاكل وراحت تتكلم ....اتكلموا يجى ساعة ....بعدها قامت جرى تكمل الغدا وشغل البيت قبل ما هشام والعيال يرجعوا ...الساعة تلاتة سماح وهشام والعيال قعدوا يتغدوا ....الساعة اربعة ....سماح قعدت تشرب الشاى مع هشام ....سماح : انا خلاص ماعدش قادرة ... .ماما كلمتنى يجى ساعتين ...بتشتكى من بابا كالعادة..ماهما طول عمرهم على كدة ...طاب انا اعمل ايه يعنى ؟!....ماعندها اخواتى تخليهم يتدخلوا ...اشمعنى انا يعنى اللى كل مرة اتدخل واصالحهم واحايلهم ......هشام وهوة بيحاول يخفف عنها : ماهية دى امك ...ايه الجديد ...سماح وهى اكثر انفعالا :هوة انا ملاحقة على طلباتكم ...ولا الغسيل ولا الطبيخ ...هشام يقدم لها الحل : كبرىدماغك ....اروح لها ازاى والعيال اقعدهم من المدرسة يعنى ...محدش بيرحم ...انا عاملة زى الخدامة ...طول النهار واقفة على رجلى ....دا الصداع ماسك دماغى من الصبح ....هشام : اجيب لك حباية كيتوفان ....سماح : عارف انا زهقت من الزفت البواب دة ....ساعتين علشان يجيب لى كيلو طماطم ....هشام : بصى انت تكتبيلى اللى انت عايزاة وانا اجيبهولك وانا جاى وارتاحى من البواب ....سماح :انا حاسة ان كل اللى حوالية بينتش فية ...انا مش لاقية نفسى ...انا عمرى ماخدت اجازة ....هشام وبدأ يزهق : ماكل الناس على دا الحال ....انت عمرك ما فسحتنى زى الرجالة اللى بتفسح ستاتها .....عمرك ما قولتلى كلمه حلوة ...انا زهقت انا طهقت ...وقامت وسابت هشام وهوه بيقول فى نفسه ايه هوه اللى عمرك ما فسحتنى ....امال رحلة شرم اللى كانت فى الصيف دى اية ...حلم؟!....البت دى اتعبطت ولا اية ؟....مانا حليت لها كل المشاكل مش عاجبها ....نكدية كل الستات نكدية ....يلعن ابو الجواز على اللى عايز يتجوز ...

هوه صحيح سماح عبيطة ونكدية ؟ولاهشام هوه اللى عبيط؟

لا سماح عبيطة ولا هشام عبيط هما بس مش فاهمين .

هشام مش فاهم ان سماح زى اى ست فى العالم ...العاطفة والمشاعر عندها اعلى من المنطق والتحليل ...فالما بتحكى ...بتحكى بالعاطفة ..تلاقيها دايما تقول انا حاسة اناشاعرة ...دا غير انها بتعمم كل حاجة وتخليها فى المطلق ...يعنى تلاقيها بتقول عمرك مافسحتنى ...عمرك ماجبتلى ...عمرك ماقولتلى ...سماح ياهشام لما بتحكى بتبقى عايزة تفضفض مجرد فضفضة ...عايزة حد يسمعها ويطبطب على مشاعرها ...هيه مش محتاجة حلول ...ولا محتاجة حد يقولها تعمل اية....هيه مش محتاجة اكتر من كلمة الله يكون فى عونك ...فعلا والله انت بتتعبى ...هية عايزاك تقف جنبها عاطفيا ...وتشاركها متاعبها اللى بتزيد وتنفجر لما سعادتك بدال ماتواسيها تعرض عليها حلولك الجهنمية ...ياعم هيه عايزاك تسمعها بس...اسمعها ينوب اهلك ثواب

سماح هيه كمان مش فاهمة ان هشام زيه زى اى راجل فى العالم ...دماغة متسلسله منطقية...فية مشكلة يبقى ندور على حل ....مش نقعد نولول ...واللى بيزيد الطين بله ...انك ياسماح لما مابتسمعيش لحلوله العبقرية بيفهم انك بتضطهدية ...ومابتقدريش افكارة وحلوله ...وبياخدها بمحمل شخصى ...ويقول دى ماعادتش تثق فية وفى قدراتى على حل المشاكل ...شايفة انى ماليش لازمة ....مابقتش تحبنى ...

يا تش ...الله يسترك لما سماح تحكى لك حاجة ...اسمعها بقلبك ....وطبطب على مشاعرها ...وبطل تقدم حلول ...امسك نفسك ياسيدى .

ياسمسم هشام لما بيقدم لك حلول مش معناها انه بيعايرك ولابيتعالى عليكى ولامش مقدر تعبك....هوة كدة تركيبتة كدة ...اى مشكلة بيدور ليها على حل ...فهوة قصدة انه يساعدك مش يتنطط .

افهم هية بتفكر ازاى ...وانتى افهمى هوه بيفكر ازاى ....وتقبلوا بعض

افهموا تســــــــــــــــــــــــــــــــــعدوا !!!

الفرق بين الرجل والمرأة 2

الفرق بين الرجل والمرأة 2

بدأ اليوم هادى جدا ...قام هشام صلى الصبح ولبس هدومه ...وقعد يفطر مع مراته...قعدوا يتكلموا ويحكوا وهما بيفطروا ...عطاها بوسة ونزل راح شغلة ...سماح دخلت تشوف اللى وراها قبل العيال مايرجعوا من المدرسة ....الساعة اتناشر هشام بعت رساله لسماح بيقولها وحشتينى ياروحى .....سماح ردت برساله انت اكتر ياقلبى ....الساعة اتنين وهشام بيلم ورقة علشان يروح ....سمع الموبيل ...رنت سماح ....ايوة يا حبيبتى ....سماح : والنبى يا حبيبى وانت جاى هات لنا اتنين كيلو لحمة بتلو...لاحسن اخر كيس عملاه على الغدا النهاردة ....رد هشام : حاضرياحبيبتى...سماح : جيب من عبدة ماتجيبش من حد تانى ...رد هشام : ما انا طول عمرى بأجيب من عبدة ...سماح ايوة بأقولك يعنى ...واركن العربية فى الشارع اللى قبلة ...شارعة زنقة وزحمة لاحسن العربية تتخبط ...هشام : حاضر ....وماتديهوش اكتر من 44 جنية ماما جيباها منه امبارح ب44جنية .....هشام بغيظ مكتوم :حاضر..واقف على ايدة وهوه بيقطع وقوله انا عايزها من الحته اللى تحت الضلعة .....هشام بدأ يطلع دخان : ماشى ...سماح : وعينك علية ليحط جلد ولا شغت ...اوعى يستعبطك ...وانفجر هشام : اييييه هوة انا مش حاعرف اجيب كيلو لحمة ...حاضر ياستى حاروح اقول له الهانم بتسلم عليك وبتقولك هات اتنين كيلوا لحمة واتوصى ...سماح : انت بتتريق هى الواحدة ماتعرفش تتكلم معاك ...خلاص مش عايزة حاجة مع السلامة ...قفلت الموبيل وراحت طلعت غلها فى المواعين ....هشام رمى الموبيل على المكتب فى دخلة موظف يمضى منه ورقة ...خصم له يوم ....

ياترى مين الغلطان سماح ولا هشام ....سماح علشان عاملته على انه عيل صغير امه بعتاه يجيب كيس ملح ...ولا هشام علشان اتريق على سماح وزعق فيها ....

هوة فى الحقيقة لا هشام غلطان ولا سماح غلطانة ....هما بس مش فاهميين ...مش فاهمين ان الراجل غير الست ....

سماح مش فاهمه ان طريقة تفكير الراجل غير طريقة تفكير الست ..الراجل ياسماح حساس قوى ناحية اللى بيقدم له مساعدة ...بيفهمها على انها اشارة واضحه لعجزة وعدم قدرتة على تسيير الامور ..فلما انت تقولى له اعمل كدا ولا كدا ...فدا معناه ان انت مش واثقة فية وانه ماينفعش وانت بتصلحية ...مساعدة يعنى هوه ضعيف وعاجز وانت مابتحبيهوش .....هية بتوصل له كدا.

وهشام مش فاهم ان سماح لما بتقدم له نصيحة او ترشده لحاجة ... دا دليل على الاهتمام والحب ....هيه الست كدا بتبقى فرحانة وهيه بتراعى اللى حواليها وتساعدهم سماح عارفة انك شاطر وتقدر تعمل كل حاجة لواحدك ...ومساعدتها ليك معناها انها بتحبك ومهتمة بيك مش اكتر

بصى ياسماح حاولى ماتبقيش انتقادية وامسكى نفسك شوية فى موضوع النصايح دة وشوفى النتيجة حتبقى حلوة ازاى

وانت يا اتش سماح بتحبك بس هية دى طريقتها فى التعبير عن الحب.... افهمها ...واستحمل شوية نصايح يا اخى !!!!

ملحوظة : والنبى والنبى بطلى ياسماح تغييرى هشام ....ووالنبى والنبى يا هشام بطل تغير سماح ...لان لا هية حتتغير ولا انت حتتغير...وحتضيعوا وقت كتير على الفاضى ....افهم هية بتفكر ازاى ...وانتى افهمى هوه بيفكر ازاى ....وتقبلوا بعض

افهموا تســــــــــــــــــــــــــــــــــعدوا !!

سكر معقود

سكر معقود

أنا من الناس اللى مع تنظيم الأسرة ...خصوصا ان احنا بقينا كتير على الفاضى ...كغثاء السيل يعنى ...فالمفروض محدش يجيب اكتر من اتنين.....مش خوف لمانعرفش نجيب لهم المم ....دى الارزاق بتاعة ربنا ...بس الخوف ان احنا مانعرفش نربيهم فى زمن الماركيتنج اللى احنا عايشينة ....بس لما ربنا يريد محدش يقدر يقول لأ ....زى النهاردة السنة اللى فاتت ....ربنا رزقنى ببنتى التالتة ....آخر العنقود .....قعدت يجيى اسبوع ادور ليها على اسم ....ولأنى شايف ان الحياة حلوة وتستاهل ان الواحد يعيشها .....سمتها حنعيش يعنى حنعيش .....هوه فى الحقيقة انا ابوها الشرعى ...ابوها وامها كمان ....يعنى مش محتاجين دى ان اية ولا غيرة ...بس فية ناس كتير ربوها معايا ....وساعدونى كتير فى التغيير والبامبرز والافلام دى ....كبروها معايا لغاية ماشوفتها بتدخل مسابقات وتاخد مراكز ...حتى قبل ماتكمل السنه .....فاذا كانت مصر ام الدنيا ...فحنعيش يعنى حنعيش بنت المدونين ...بنت لماضة اللى قالت لى ازاى اعمل مدونة .....بنت صبرنى يارب اللى كل البنارات اللى شيفينها دى من تصميمها ......بنت ريم اللى بتفكرنى بالاميرة انجى فى فيلم رد قلبى ....بنت ستيتة اللى يارب تكون سامحتنى على سوء التفاهم ....بنت خواطر شابة اللى خلتنى قديش نفسى اتعلم لهجة المغرب العربى ....بنت عاشقة الرومانسية والقدر وانا ...بنت ام مالك اللى بفرح قوى لما الاقيها على المدونة ....بنت الشجرة الام اللى حتى لو اختلفنا فى وجهات النظر برضة اصحاب .....بنت عمود النور اللى دخل مرة واحدة طفطف ومرجعش ....بنت كل اللى دخل المدونة ...ودايما منورنى وكل سنة وبنتكوا بخير وبنتى طبعا .....

ملحوظة مكررة للمرة المليون :

هذة المدونة للآدميين فقط ....ارجو عدم دخول الكائنات الاسرائيلية حفاظا على نظافة المكان ...

ملحوظة مكررة للمرة المليار :

تحيا مصر ...تحيا مصر ....تحيا مصر ...حتى لو زعلتنى او قست علية

حى اكلينيكيا3

حى اكلينيكيا3

والله انا كأستشارى من كلية الهندسة عندى شوية توصيات ...على قد علمى ...توصيات يعنى غير ملزمة ...بس اهى محاولة ..لرأب الصدع ...حلوة رأب الصدع دى ....اهى كلمة فى النص تحسس الواحد انه لسه بيتباها ان لسانة عربى ...اوكى؟!

ايه رايكوا ماتيجى نبطل نقلق على بكرة ...نبطل نقلق على اللى بإيد الرحمن مش بإدينا ...ماتيجى مانفرحش قوى باللى جالنا ....ومانزعلش قوى على اللى راح مننا ...ماتيجى نطلع لسانا للشيطان ونقوله مش حتخوفنا من الفقر دا ربنا هوة الرزاق ...ماتيجى نشيل خرطوم المحلول من عروقنا ...ونرمى جهاز التنفس الصناعى ونعيش ...نعيش كل يوم على انه عيد ...ندور فية على العلم والمعرفة والقيم اللى راحت ...ماتيجى نقرا كتير فى تراثنا مش تراث غيرنا ...ماتيجى نعمل كرسى مخصوص لينا فى ركن فى البيت ونسترخى علية ...ماتيجى نقعد شوية مع اهلنا ونبوس ايد ابونا وامنا ...ماتيجى ناكل اكلنا ونشرب شربنا اللى بنحبة ...مش اللى غيرنا بيحبة ... ماتيجى نلبس لبسنا مش لبس حد تانى ....ماتيجى نتفسح فى الاماكن اللى كان لينا فيها ذكريات حلوة ... ماتيجى نفتح النيش ونطلع كاس من الكاسات اللى بقالها عشرين سنة فى مكانها ونشرب فيه ...ماتيجى نطلع ازازة الريحة اللى مركونة فى الدلاب من يوم ماجات من تمنتاشر سنة ...هدية طبعا... ونحط منها واحنا فى البيت .... ماتيجى ندلت كلمة وقت تانى وكلمة بكرة ولا بعدة .... ماتيجى نعمل اللى نفسنا نعمله من زمان .... ماتيجى نشتغل بكل طاقتنا ..مش بس على قد فلوسهم ...ماتيجى نقول لعيالنا واصحابنا ومراتتنا واجوزنا وابونا وامنا ان احنا بنحبهم ...مش عيب والله ...ماتيجى ندور على اللى يبضحكنا ...واللى بيحزنا لأ ... ماتيجى نساعد محتاج ولاندل حيران ولا نواسى حزنان .... ماتيجى ندور على حاجة مفيدة نعملها ....ماتيجى نفهم ونستوعب ان الساعة اللى عايشينها دى ممكن تكون اخر ساعة لينا فى الدنيا ...ماتيجى نقرب شوية من ربنا علشان هوة ربنا ...مش علشان عايزين منة عز وجل حاجة ولا خايفين انه عز وجل يدخلنا النار.....

ماتيجى نجرب ....مش حنخسر حاجة ...ماحنا جربنا كل حاجة ومكسبناش اى حاجة ...يمكن المرة دى نقدر نعيش بجد ...مش اكلينيكيا

حى اكلينيكيا 2

حى اكلينيكيا 2

بعد ماعرفت سبب تآكل عمود الخرسانة ...قولت بالمرة كدة ابص على بقيت العمارة ...اشوف تسيلة كدة ولا حتة محارة واقعة ...بالمرة ..قومت لقيت شروخ ...شروخ شروخ يعنى ....لقيت شقق واسعة وديكورات غالية وعفش مستورد ...بش مالقيتش فيها عيلة ...كل واحد مع نفسة ...محدش لية دعوة بحد ...لقيت نفوس محطمة ...وطلاق كتير ...وامهات بتبوس ايد ولادها علشان يزوروها ....لقيت بنات بتحط ابهاتها فى دار مسنين ...علشان مش فاضية ...بتجيب فلوس...

لقيت حاجات كتير بتسهل الدنيا وتوفر الوقت ....بس لقيت ان محدش بيلحق يعمل حاجة ....الوقت بقى علية عفريت ...والعمر بيطير ...

لقيت ماجستيرهات ودكتوراهات وام بى اية وجامعات مفتوحة ومقفولة وخاصة ..بس مالقيتش منطق ولا فكر ولا منهج ولا موضوعية فى الحكم على الامور....

لقيت استشاريين وخبراء بالعبيط ....بس استشاريين وخبراء على اليافطة بس ...لانى لقيت المشاكل اللى بالعبيط برضة مابتتحلش ...

لقيت ادوية واشعات وتحاليل ورنين مغناطيسى ومسح ذ رى ...حاجات ماكانتش موجودة زمان ...بس برضة مالقيتش لا صحة ولا عافية ....

لقيت صرف فلوس بالهبل ...وسواقة بسرعة ...وادمان نت وموبيل ...لقيت الضحك بقى فى المناسبات...والسهر بقى للفجر ...بس نوم قبل الفجر مايدن ...لقيت قوام الصبح بضرب الجزم ...لقيت ان محدش بيقرأ.... بيشيت بس ....وطول النهار والليل ماسكين ريموت الدش وقاعدين قدام التليفزيون مابيشفوش حاجة بيقلبوا فى القنوات بس.....

لقيت الكلام بقى كتير قوى ...والحب بقى قليل قوى قوى ....والكدب بقى بالهبل قوى قوى قوى ...

لقيت شهوة شراء زايدة بس مالقيتش حد بيستمتع باللى بيشترية ...

لقيت سفر الغردقة ولا شرم ولا حتى السعودية علشان نعمل عمرة ....اسهل بكتير من ان احنا نخبط على جارنا الجنب (اللى جنبنايعنى علشان ماحدش يفهم غلط)....

لقيت تخطيط وبلان وتحضير ...بس برضة مالقيتش حاجة بتتعمل ....

لقيت ماسج واى ميل وام ام اس ....بس مالاقيتش روح ولاايد فى ايد ولا طبطبة ولا مسحة ايد على راس...

لقيت شراهة وكومبو وكانز ...بس مالقيتش هضم ....

لقيت ناس طويلة لابسة نضارة سودا ونازلة من عربية غالية بس لقيت نفوسها ضعيفة ومركبات النقص بتموتها ....

كفاية ...

حىّ إكلينيكياً

حىّ إكلينيكياً

عمود الخرسانة اهم حاجة فى العمارة ....هوّه اللى شايلها ....لوتآكل العمود ...العمارة تتصدع ...زى معهد الاورام كدة ....ولو العمود وقع العمارة تتهد على دماغ اللى فيها ....زى هايتى كدة ....وعمود خرسانة حياتنا هوه اعصابنا ...واعصابنا بدأت تتآكل وحياتنا بدأت تتصدع ...عملت فيها استشارى من كلية الهندسة وقعدت ادور على سبب التآكل ...لقيت السبب حاجة كدة اسمها القلق ...القلق دة بياكل فى اعصابنا ... بينخر فيها زى السوس ...بيمحى اى لون او طعم او معنى للحياة.....

بنقلق لما نجيبش مجموع فى الثانوية العامة بعد الهم بتاع الدروس ...وان جبنا مجموع بنقلق لما ندخلش الكلية اللى احنا عايزينها مع ان مجموعنا كبير ...وان دخلنا الكلية اللى احنا عايزينها نقلق لمانعرفش نلاقى شغل فى زمن البطالة ...وان اشتغلنا بنقلق لنترفد بسبب الازمة المالية العالمية ....وان مااترفدناش نقلق لما نعرفش نعمل فلوس ..وان عملنا فلوس نقلق لاماتكفيش طموحاتنا ..... وان كفت نقلق لمانعرفش نزودها ...

نقلق لمانعرفش نحب ...وان حبينا نقلق لنفترق ...وان مافترقناش نقلق لامانتجوزش ...وان اتجوزنا نقلق لانتطلق ونخسر شقى السنين ...وان ما اتطلقناش ...نقلق لما نخلفش ....وان خلفنا نقلق لمانجيبش الولد ...وان جبنا الولد والبنت ...نقلق عليهم من الدش والنت ....وان بعدناهم نقلق لاميندمجوش مع المجتمع ...وان سيبناهم نقلق لينجرفوا فى تيار التشليح ...

بنقلق على صحتنا ...وان مرضنا بنقلق لمانعرفش نتعالج ...وان اتعالجنا نقلق لا الدوا مايجيبش نتيجة ....

نقلق لما الموبيل يرن ليل نهار ...ونقلق لما نعملة سيلنت (صامت) ليكون حد طلبنا....

نقلق لما نلحقش القطر ....وان لحقناه نقلق لمانلقيش مكان نقعد....وان قعدنا نقلق ليتقلب بينا فى العياط مع اننا رايحيين اسكندرية ...

نقلق لا الحزب الوطنى يفضل فى الحكم ونقلق لا الاخوان المسلمين يوصلوا للحكم ....

نقلق من حكومة رجال الاعمال لايقلّبونا ...ونقلق ليجيبوا حكومة اساتذة جامعة ليضيعونا...

نقلق من شيخ الازهر اللى بيحلل كل حاجة وأى حاجة لاحسن ندخل بسببه النار ...نقلق من شيوخ قناة الناس اللى بيحرموا اى حاجة وكل حاجة لنعيش فى نار ...

نقلق من الزرع المرشوش ...ونقلق من الاورجانيك ...نقلق من مية الحنفية لتجيب تيفود ...ونقلق من المية المعدنيه لماتطلعش معدنية ...نقلق من الكهربا والغاز والطاقة النووية للاغراض السلمية ...نقلق من امريكا واسرائيل وحزب الله ...نقلق من السودان ومنابع النيل والحوثيين,,,

بقينا قلقانين من كل حاجة ...دا حتى بقينا قلقانين من القلق ذاتة ....

ياترى ينفع نصلح العمود وننكس حياتنا قبل ما تتهد على دماغنا ....ولا حنفضل كدة مبسوطين وراضيين بأن احنا نعيش بس.............. اكلينيكيا

كشرى مصراوى

كشرى مصراوى

معرفش اية اللى خلانى اربط بين الاكلة المشهورة لكل بلد وبين افكار البلد دى وتوجهاتها واسلوبها ....امريكا مثلا عملية وسريعة فمشهورة بالكنتاكى ....السعودية مرحرحة فمشهورة بالكبسة لغ يامعلم ...ايطاليا المزاج والروقان فمشهورة بالبيتزا .....مصر كله على كله ولما تشوفة قوله فمشهورة بالكشرى المصراوى ...رز ومكرونة وشعرية وعدس وحمص على بصل وصلصة وشطة....وساعات يحطوة فى نص رغيف ...يعنى عيش كمان ...كله ماشى ....كله ينفع ...واقعد يامصرى كل من الطبق الكبير ...طبق فية الراسمالية بأفكار الاشتراكية...علية الديموقراطية بمفهوم الديكتاتورية ....على تداول السلطة بس بنفس الاشخاص ...على مابنطبعش مع اسرائيل بس نصدر لها غاز ونعمل واجب كمان ...على حجاب ملزق ونقاب ...ومرسيدس على تكتك...وكمبوند على اشلاء عشش الغلابة ..وبعد ماتاكل وتستطعم غصب عن عين اهلك....اطلب كمالة ...كمالة شوف الواوا...ويونيسكو مابيخدش غير رجالة ... على منتخب الساجدين على سامح الهربانين بقرار جمهورى ....دا الرقص على العارضة يشفع ...على قومية عربية على ملناش دعوة ياولية ...على سخنها يامعلم علشان 0900 ...على حقوق المرأة والطفل وحضارة وهرم وخوفو وشارع الهرم ودينا ولوسى ...والرجالة الخوجات توتو وميمى اللى بيرقصوا بلدى ...ولمبى... وبوبوس...... وابراهيم توشكى ..... شكل البلد دى قلبها حيقف قريب على رأى ابراهيم توشكى..... بس قلبها قلبها ....ماهو مافاضلش غير قلبها

مى وآسر اتجوزوا بعض

مى وآسر اتجوزوا بعض

آسر بعد مافك خطوبتة ....اكتشف اواتهيأله انه اكتشف انه بيحب مى ...حب حب مش اخوات وصداقة ...وفضل وراها لغاية ما اقنعها ...او برضة هية اللى سابتة يقنعها ..ماهو معناه اية انها كانت بتتدايق لما كان بيروح يتفسح مع خطيبته ...ومعناه اية لما كانت بتصلح بينهم وهيه من جواها بتتمنى انهم يسيبوا بعض ...معناة ايه غير انها بتحب آسر مش صداقة وأخوات والعبط دة ...الحقيقة ان ماحدش فاهم آسر قدها ...ومحدش فاهمها قد آسر ...وبعدين ماهما الاخوات فى الدراسة ممكن يتجوزوا مافيش مايمنع شرعا ...وان كان على قرطسة المجتمع ... دى سهلة ... المجتمع خد على كدة ...اخوات ..متجوزين ...متطلقين ...كاتبين الكتاب فى القسم ..ماعادتش تفرق ...شوية وحلاوة اللبانة تروح ويشوف غيرها وصلى على رسول الله ....واتجوزوا بعد ماعملوا فرح وزفة وفندق خمس نجوم دفعوا فيه دم قلبهم علشان يرقصوا ...ورقصوا ...ماتوا من الرقص ..الله بفلوسهم ...وبدأت الحياة ...الايام الاولانية كانت فى منتهى السعادة ...فاهمين بعض بقى ...حاسيين بعض ....(نفسى اعرف هما بيشيلوا الباء اللى قبل بعض لية....معلش يا اخونا فلاح بقى )...قريبيين من بعض ...المصيبة بقى فى قريبيين وحاسيين وفاهمين دى ...فاهمين وقريبيين وحاسيين زيادة عن اللزوم ...كل واحد فاهم التانى اكتر من نفسه ..حتى كلمات الاعجاب والحب اللى بينهم كانت معروفة مسبقا ...نظرة آسر للبنات الى فى الشارع وهوة ماشى مع مى مفقوسة ماهى عارفاه وعارفة زوقة ...كانت ردود افعال مى قدام اى موقف معروفة لآسر ...ماهوة اللى مربيها ...وشوية شوية ... التفاهم والاحساس اللى بينهم بقى عامل زى الفيلم الابيض والاسود اللى بيتشاف للمرة المليون ...بس اللى كان بيوجع مش انهم شافوا الفيلم قبل كدة ...اللى كان بيوجع انهم لازم يضحكوا ويبكوا ويتشدوا على نفس المشاهد اللى حفظوها... يضحكوا ويبكوا ويتشدوا بنفس الحماس اللى كان موجود فى اول مرة شافو فيها الفيلم ....وبدأت الخلافات ...خلافات من نوع غريب ...خلافات نتيجة عن زيادة الفهم مش نتيجة لعدم الفهم ...وبدأ آسر ومى يفكروا ...هوة كان صح انهم اتجوزوا ولا كان الاحسن يفضلوا صحاب ...وبعدين فكروا اكتر ...هما كانوا صحاب ولا اخوات فى الدراسة ولا دة كان حب ولا دى كانت طبطبة ..ولايكونش دة كان تعود ...لا لا دا كان حب تملك ...الاكيد انه دة طبع البنى آدم ...عايز كل حاجة ...ومش عاجبة اى حاجة ..آسر ومى حمدوا ربنا انهم ماخلفوش ...واتفقوا على الطلاق ...

وخسروا.... خسروا الجوازة وخسروا الصداقة والاخوة فى الدراسة

انا كدة خلصت بس ححكى ليكوا حدوتة....صلوا على النبى :

كان ياما كان فيه 3سمكات ...سمكة غبية وسمكة ذكية وسمكة اذكى ...كانوا عايشين فى بحيرة صغيرة جنب البحر ....وفى يوم عدى عليهم اتنين صيادين ...الاولانى قال للتانى شايف التلت سمكات دول ...واحنا رجعين نبقى نصطادهم ....السمكة الاذكى سمعت الكلام ماكدبتش خبر ....راحت نطة فى البحر وهربت بعمرها ....رجع الاتنين صيادين ...السمكة الذكية عملت نفسها ميتة وطفت على وش المية ...خدها الصياد ورماها فى البحر ...فنجت هية كمان ....الغبية بقى فضلت تلف وتدور حوالين نفسها .....وطبعا انتوا عارفين نهايتها ....كانت الذ عشوة سخنة بالفلفل والكمون

ماينفعش.... ماينفعش ... والله ماينفع ...ولا حل من التلاتة ينفع ...لأن اصلا العود معووج ...ومدام العود معووج عمر ضله ماحيطلع عدل ...ويارب... يارب...نسمع كلام ربنا علشان نرتاح ...

التتر

يارب نسمع كلام ربنا

((اخوات فى الدراسة))

قصة

صبرنى يارب

سيناريو وحوار

حنعيش يعنى حنعيش

بطولة

آسر

مى

شكر خاص لــــــ

جوز مى

مرات آسر

تصوير

خيال كل واحد

انتاج

الكتالوج للانتاج والتوزيع

اخراج

بلوج اسبوت

مى وآسر مابقوش اصحاب

مى وآسر مابقوش اصحاب

مى بعد ما أتجوزت عرفت انه مش حينفع ان الصداقة اللى بينها وبين آسر تستمر ..لا جوزها حيسمح بكدة ولا مرات آسر حتوافق على كدة ...آسر كمان وصل للحقيقة دى...وماتت الصداقة ...بس موت اكلينيكى ...ماهم كانوا مركبين لها جهاز تنفس صناعى ...وبدأت الحياة تمشى فى طريقها المعتاد ...وزى اى جوازة فى العالم لازم يكون فية اختلاف ...اختلاف طباع ..اختلاف ثقافة ..اختلاف رغبات ...العادى يعنى ...حاكم المشكلة مش فى الاختلاف المشكلة فى ازاى ندير الاختلاف دة ...وبدال ما آسر ومى يقربوا وجهات النظر بينهم وبين اجوازهم ...استسهلوا حالة الطبطبة على النفس ....آسر بدا يقول فى نفسة يعنى مش لو كانت مى وافقت واتجوزنا مش كان زمانى اسعد من اللى انا فيه دلوقت ..مى الوحيدة اللى كانت بتفهمنى حتى من غير ما اتكلم ...كانت عارفة انا بحب اية وبكرة اية ...وبدأت حاله الطبطبة والندم والحسرة تتضخم ...بقى كل حاجة تعملها مراتة يسأل نفسة ياترى لو كنت اتجوزت مى كانت حتعمل اية فى الموقف دة ...وعاشوا التلاتة مع بعض آسر ومراتة ومى ...وياعينى على جوز الاتنين خصوصا لما واحدة فيهم تكون فى الخيال ....مى بقى كان حظها مش حلو حبتين ...جوزها ماطلعش فرى ومتحضر ..طلع من الرجاله اللى بنسمع عليهم فى حداويت تيتا الحاجة ...عاشت ...ماهو كل اللى حواليها بيقولها عيشى ...بس مش دى العيشة اللى كانت عايزاها ...كانت عايزة واحد فاهمها ...فين ايامك يا آسر كان فاهمنى من غير ماتكلم ...كان عارف بحب اية وبكرة اية ...وكانت كل مايحصل حاجة بينها وبين جوزها تجرى تقعد مع نفسها وتحلم لها حلمين يقظة وتشوف آسر لو كان مكان جوزها كان حيعمل اية ..وتندم على خيبتها وقلة عقلها لما ما وفقتش أسر لما قلها نتجوز ...ممكن نستحمل ان احنا نعيش فى الخيال بس لما يكون موازى للواقع ..بس لما الخيال يغطى على الواقع تبقى المصيبة ....مصيبة لا ن احنا بنصدق الخيال وبنكدب الواقع ...لا آسر ولا مى استحملوا ومن غير ما يتفقوا كل واحد فيهم اتطلق .... واتقابلوا بعد سنتين ...كانت مفاجأة ...بس المفأجاة الاكبر ...انهم اكتشفوا انهم اتغيروا ...لا مى فضلت مى ولا آسر بقى آسر ...

وخسروا.... خسروا الجوازة وخسروا الصداقة والاخوة فى الدراسة

والى اللقاء فى الحلقة الثالثة

مى وآسر فضلوا اصحاب

مى وآسر فضلوا اصحاب

آسر بعد مافك خطوبتة ...ومى قالت له خلينا صحاب ....شاف بنت الحلال واتجوزها ..وبعدية بشهرين مى كمان اتجوزت ...البنت اللى اتجوزها آسر كانت جميلة ...جميلة فى كل حاجة ...شكل وروح وتعليم ....كمان جوز مى كان جميل فى كل حاجة ...رجولة وشهامة وعلم وثقافة ...الغريب ان الاربعة كانوا متفقين انهم يبقوا كلاس ...فرى ...حضارة....آسر اقنع مراته...اوهيه عملت انها مقتنعة ...بأن مى صديقة واخت فى الدراسة ...وعادى يعنى نتكلم ونحكى ونتقابل ...اخوات اخوات ...مى هية كمان اقنعت جوزها انه يخنق نخوته بحبل التحضر والفرى ..ويقتنع بأن آسر صديق واخ فى الدراسة ...وان الموبيلات والماسجات والمقابلات دى مابتدعداش حدود الاخوة عادى يعنى ....مرات آسر وجوز مى كانوا فاكرين ان الموضوع حيبقى عادى ..بس البنى آدم اية ياخوانا غير شوية دم واعصاب ...دا البنى آدم هه....والمجتمع وان كان عامل نفسة كلاس وفرى هوة كمان...بس ماكنش بالع الموضوع ..وماصدق يلاقى لبانة ..واية بالنعناع كمان ...بدأت مرات آسر تتلكك وتتخانق وتنكد علية ...وجوز مى هوة كمان بدأ يحس ان حبل التحضر بيحز على نخوتة كل مايشوف آسر ومى بيتكلموا مع بعض ...رغم انه عارف انهم اخوات فى الدراسة وانهم مايجوزوش لبعض ...دا طبعا غير كلام الناس وتلميحاتهم المكتومة وشوية شوية مرات آسر الجميلة فى الشكل والروح والتعليم ماستحملتش ...اتطلقت من آسر ...وعلى آخر لحظة جوز مى لحق نخوته قبل ماتفطس وفك حبل التحضر وطلق مى ...مى وآسر بقوا متطلقين ...وكمان مابقوش صحاب ...ماهو من غير مايقولوا لبعض ...كل واحد فيهم حمل التانى مسؤلية اللى حصل له ...خسروا الجوازة وكمان خسروا الصداقة والاخوة فى الدراسة

والى اللقاء فى الحلقة الثانية

صبرنى يارب على مى وآسر

صبرنى يارب على مى وآسر

آخر بوست لصبرنى ...من الاخر كدة.... روعة ...حاجة كدة من السنما الواقعية بتاعة عم صلاح ابو سيف....بصراحة البوست استفز فية رحلات الدماغ اللى كنت باعملها ...قولت ياواد ماتيجى نعيش مع اختنا مى واخوها فى الدراسة على رأى صبرنى ...آه ماهو اليومين دول مش زى زمان ...زمان كان فية اخ فى الرضاعة ....لكن فى زمن الماركتينج بقى فية اصناف كتير ...اخ فى الدراسة ...واخ فى المواصلات ...واخ فى الخروجات ...وأخ فى الأخ.....القصد علشان ما اطولش عليكوا لقيت فيه احتمالين مالهومش تالت ....الاحتمال الاول انهم يتجوزوا ...الاحتمال التانى انهم مايتجوزوش وكل واحد ياخد نصيبة ....لقيت الاحتمال التانى ينبثق على احتمالين ...يا ميتجوزوش ويفضلوا اصحاب ...يا مايتجوزوش ويفترقوا ...وفجاة لقيت الموضوع بيكبر معايا ....وماينفعش يتقال فى بوست واحد ....قولت اخد كل احتمال فى بوست ...ونمشى معاهم ....ونشوف حيوصلوا لفين ....وياترى اية الصح .....الى اللقاء فى الحلقة الاولى

الحقيقة الغائبة

الحقيقة الغائبة

ولأن الحقيقة دائما غائبة ....ولأننا غالبا لانعرف كل شى ولكن ندعى ذلك ...ولأننا دائما نكمل الأحداث من وحى افكارنا ...لكل ذلك ولغير ذلك ...ترتفع الاصوات وتعلوا الكلمات على خلفية الطبول الجوفاء....فتحدث ضجيجا يصم العقل عن التفكير ...ويصبغ التدوينة العربية باللون الاسود...حزنا على انسان بلا كرامة ولاوطن....ولاحقيقة ,,,

الحقيقة الوحيدة عندما ندرك اننا لانملك الحقيقةالكاملة.... هى ان لا نحكم على الاشياء...فى هذة الاحيان لانملك سوى ان نشاهد.. ونتابع...ونتسأل ...مجرد تساؤلات...ليس وراءها أى تجاوزات ...أو مزايدات ...أو مناورات ...أومرابحات ....فقط تساؤلات تبدو منطقية تحتاج الى اجابة ارجو ان تكون منطقية ....وبالبلدى علشان تكون سهله

--الطوب اللى بيترمى ناحية الغرب دة مش الاولى انه يترمى ناحية الشرق؟!

--اللى بيضرب الرصاصة فى قلب الفتحى علشان هوه مش حماسى ...مش الاولى يضربها فى قلب الاشكينازى ؟!

--هية البدلة المستوردة السينييه دى مين بيدفع تمنها؟!

--ماحدش حارب لنا حربنا (دا يمكن فية اللى كان عايز يبوظها ) طاب ليه عايزينا نحارب حرب غيرنا ؟!

--هوة مش من حقى احمى بيتى وحرمتة حتى لو من اخويا شقيقى؟!

--هوة لما حد بيحب يزور حد بيخبط على الباب ولا بينط من الشباك ؟!

--هل من المفروض اقدم اسباب حمايتى لبيتى واطلب الاذن ؟!

--فتحى وحماسى بيتفاوضوا بقالهم سنتين علشان يرتبوا البيت من الداخل ...هوة البيت مكركب قوى كدة؟!

--ام كلثوم زمان كانت حاسة باللى حيحصل لنا فغنت للصبر حدود ...حتى الصبر محتاج لحدود ...بس لما الصبر يبقى له حدود ...أكيد حتبقى حدود فولازية

وبرضة مش حأحكم علشان مش عارف كل الحقيقة