هل من يرصد كمن يعيش؟!!!!!!!

هل من يرصد كمن يعيش؟!!!!!!!

ثلاث قصص من الواقع حصلوا قدامى عينى....

الاولى:

بشير ونجيب وسعد ...منادى سيارات بالعافية ....وحارس امن بتلتميت جنية فى الشهر ....وقهوجى نصبة باتناشر جنية فى اليوم ....يوم الوقفة قرروا انهم يصلوا العيد ويستنوا الحاج انور حرب لما يدبح علشان يخدوا نصيبهم من اللحمة ويفطروا بية ....وكانوا ناويين مايناموش ويفضلوا سهرانين ....ولما ادنيا مطرت ....روحوا على انهم يتجمعوا فى صلاة العيد ...واتجمعوا بس قدام بيت الحاج انور مش فى صلاة العيد ...مع ان الصلاة ماكانتش بدأت ....صلاة العيد خلصت والناس روحت ...بشير قال لسعد :ماتعملنا كوبايتين شاى يدفونا عبال مالجزار يجى ...نجيب قال : مافيش حاجة ناكها انا جعان ...رد سعد وهوة بيعمل الشاى وقال: ياخى اصبر كلها نص ساعة ونعمل شوية شربة مكن على اللحمة ....بشير قال : انا جبت الحلة تحت السلم اول ما ناخد اللحمة نسلقها على طول ...قعدوا التلاتة عينهم على باب الحاج انور ...عدت ساعة واتنين والجزار ماجاش ... نجيب قام ومشى لأول الشارع يبص على الجزار ...وبشير راح للناصية التانية يمكن يجيى منها الجزار ...سعد بقى لم كبايات الشاى ورايح يغسلها ...وبرضة الجزار لسة ماجاش .... الدنيا كانت برد ....اتلموا التلاتة وقعدوا جنب بعض علشان يدفوا بعض ...ماحدش كان بيتكلم ...كله كان بيحلم بالشربة وحتة اللحمة ...بشير طلع من جيبة كيس وقالهم : اناجبت حبهان علشان الشوربة ....سعد قال :وانا جبت لمون علشان نعصر عليها ....نجيب قال : انا حاسس انى حاخد برد ..... وبدات صلاة الجمعة ...كل واحد فيهم بص للتانى عايز يقولة احنا حنصلى الجمعة ولا اية ....بس ماحدش نطق ....خافوا لا الجزار يجى ويخلص وهما فى الصلاة ....وتضيع حتة اللحمة ....واتفقوا من غير مايتكلموا انهم مايصلوش ...عدت ساعة واتنين وجة الجزار ...بشير ونجيب وسعد نطوا وخدوا بعض بالحضن وكأن ابو تريكة جاب جون فى الجزائر ... خدوا اللحمة حطوها فى الحلة وحطوا الحبهان ....اللحمة طابت نزلوها ......كانت العشا بتدن ساعتها....عصروا اللمون وكلوا اللحمة ومصمصوا العضم... وروحوا

الثانية :

كنت قاعد فى العربية باشرب سيجارة ....مستنى مراتى والعيال ينزلوا علشان نروح نعيد على الحاج والحاجة ....الشارع كان ضلمة ... ماكلة مقفل وبيعيد ....وشوية وشفت ست عجوزة شايلة على راسها كيس اسود شاكلة كده فية لحمة ....وماشى جنبها راجل عجوز بنضارة ...سمعتها بتقول له انا باشتغل اليومين دول فى بيت الدكتور شلبى الله يكرمة عطانى يجى كيلوا لحمة ....وبتنهيدة من القلب كملت كلامها وقالت والله انا تعبت قوى ياخويا ....رد العجوز وقالها : ربنا معاكى ياحاجة ....اهو كلة على دا الحال .

الثالثة :

شوية وانا قاعد برضة مستنى مراتى والعيال ...شفت راجل لافف على راسة كوفية ...عينة زايغة وبيبص على الارض كأنة بيدور على حاجة ...مافهمتش هوة مركز على الارض لية غير بعدين....ابوكوفية قابل راجل راكب عجلة وعليها كيس اسود ...وقفة وسألة ماحدش هنا بيوزع لحمة ....الراجل ابو عجلة شاور له على بيت وقالة : الحاج علاء دابح ....روح بس استنا لما امشى لاحسن يقول انى انا اللى قولت لك ....ابو كوفية راح لبيت الحاج علاء وقعد يخبط ...وشوية وبدأ ينادى ...وبعدين راح فاتح باب العمارة ودخل ...مافيش دقيقة وكان خارج ...مركز على الارض وايدة فاضية ....عارفين كان مركز على الارض لية ...علشان يشوف اثار الدم ...ماهو لوفية دم يبقى كان فية دبح ....ولو فية دبح يبقى فية لحمة .....

اد كدة اللحمة بقت حلم سنوى ممكن حتى انه مايتحققش ؟!

اد كدة انا وعيالى مفتريين ...دا انا بابوس ايد البت علشان تاكل اللحمة

اد كدة انا عامل فيها مرصد حلوان وباتابع وبارصد وبحلل ...وانا مش حاسس بالناس دى ...

طاب حأحس ازاى ...ما أنا مش عارف اجاوب على السؤال ...هل من يرصد كمن يعيش الواقع؟

ملحوظة1 :

مع العلم ان العربية اللى راكبها عربية الشركة يعنى لما اسيب الشركة حيخدوها ...والسيجارة اللى كنت باشربها سيجارة كليوبترا ....دا علشان مافيش ارخص منها

ملحوظة 2

ماحدش عند حل لحالة البندول اللى انا عايشها دى ...خلوا بالكوا لومالقيتوش حل حغير اسم المدونة واخليها حنموت يعنى حنموت

رحلة فى دماغ خروف

رحلة فى دماغ خروف

بمناسبة العيد كل سنة وانتوا طيبين ....حادخل فى دماغ الخروف واشوفة بيفكر فى اية

اتلم الناس ورفعوا الخروف على النص نقل ....ربطوة ومشت العربية .... وقف الخروف يتفرج على الشجر وهوه بيجرى ....سأل نفسة :امال الشجر فى البلد مابيمشيش لية ....ولا يكونش الشجر دة بتاع الجنة ....ما انا عارف انى رايح اندبح .....قال وانا كنت فاكر انهم بيوكلونى الفول والدرة علشانى ....اتاريهم بيسمنونى علشان نفسهم علشان لحمى يبقى لحم كتير ولذيذ ....علىفكرة انا مش زعلان انى حأندبح ....ماكلنا حنموت ماحدش حيفضل عايش على طول ...اللى حيدبحنى حيموت ...واللى حياكلنى حيموت ...حتى الحمار زميلى فى الزريبة حيموت ...رغم انة كان بيقولى شفت ميزة انك تبقى حمار ...ماهو بيموت كل يوم ميت مرة ...لما العيال بتطنطط على ضهرة مش دة موت ....لما بيشيل فوق طاقتة ومايقدرش يتكلم مش كدة برضة بيموت ....لما صاحبة بيضربة بالعصاية عمال على بطال وميقدرش يقول آة مش دة برضة اسمه موت ....ولما بيشتموا حد من البنى ادمين علشان غبى يقولوله ياحمار مش دة برضة موت ...انا بموت مرة واحدة لكن هوه بيموت كل يوم ....انا لما بموت اللى حوالية بيكونوا فرحانين لكن هوة لما بيموت اللى حوالية بيكونواقرفانين....انا الناس بتاكلنى وتاخد فروتىوجلدى ....لكن هوة لمابيموت بيرموة فى المصرف ويسدومناخيرهم وهما معديين علية .....كلنا حنموت ....احسن حاجة ان يكون لك فايدة حتى بعد ماتموت ....وقفت العربية قدام الجزار ....نزل الخروف كتفوة مسك الجزار السكينة وراح على الخروف ...اخر حاجة فكر فيها الخروف والسكينة بتقرب من رقبتة ....جميل ان يكون لك فايدة بعد ماتموت بس برضة الموت وحش ... وحش قوى ....خصوصا لما دمك يعلم على الحيطان بالخمسة

كل سنة وانتوا طييبين

كل سنة وانت طيبين وفرحانين ومبسوطين ومحققين كل اللى فى نفسكوا والسنة الجايه زايرين النبى

أسبوع الشمعة

أسبوع الشمعة

كان عندنا فرصة عمرنا سنة 73 لما انتصرنا فى حرب اكتوبر ....كانت كل الناس متجمعة ...وكان ممكن نعمل حاجة جامدة وننط فى اول الصف اللى فية الناس الكويسيين

وضاعت الفرصه ....والفرص مابتجيش كتير ...مرة او مرتين فى العمر ...دا بالنسبة للبنى ادمين ...شوف بقى الدول ....وجات لنا الفرصة اللى تجمعنا تانى بعد ماتش الجزائر ...اى نعم مش بحلاوة ولا قوة ولا نشوة نصر اكتوبر ....لكن اهى فرصة ....نقدر نكبرها ونطورها ونخمرها ونورى نفسنا قبل ما نورى العالم مين هما المصريين ...كل الحكاية ان الفضائيات المصرية ...هه المصرية مش القطرية ...والصحف المصريه مش الشروق الجزائرية ...يغيروا استراتيجيتهم لمدة اسبوع ....اسبوع واحد بس.... نسمية اسبوع الشمعة ....اسبوع ينوروا فية للشعب المصرى الطريق ويدوه الامل ....كل الحكاية يقدموا الحاجات الكويسة ....والله فيه حاجات كويسة....لكن الحاجات الوحشة هية اللى بتلعلع اكتر ...وصدقونى الاعلانات مش حتقل ....ولا المداخلات ولا 0900 بالعكس حيكسبوا اكتر.... وبرهان ....حيكسبوا فلوس وحيكسبوا احترامهم لنفسهم والاهم رضا ربنا عليهم ...اسبوع واحد بس مانعملش فيه لقاءات الا مع ناس بتفهم ...ناس عندها رؤية ...ناس متفائلة ...شباب من اللى بيبنى مصر بجد...شباب من بتوع العلم والتكنولوجيا والادب الراقى والفكر المستنير ...اسبوع ندى فية الناس اجازة من نوعية الجريئة والعبيطة واللى مابيستحماش وابو شعر ملبد...اسبوع اجازة من الفبديو كليب بتاع الاخت المشلحة والاخ ابو شعر فى صدرة ..سؤال على الماشى ...هية الناس دى مش خايفة يجىلها برد ولا ايه؟! .....اسبوع ننسى فية موقعة الحجاب وملحمة النقاب وانتفاضة اللحية ...اسبوع مانستفزش الناس بالفاسدين ولا نقولهم اجر الفنان اللى ماجابتهوش ولادة كام ...ولا المغنى اللى مقاطع الليفة بياخد كام فى الحفلة ....اسبوع نديع فية اغنية ياحبيبتى يامصر ....واغنية صورة ...اسبوع نعمل فيه لقاءات مع شباب عمل دكتوراة .....شباب طلع من مدرسة الحكومة وبقى مهندس ولا دكتور ....شباب من اللى محدش بياخد باله منهم ...زى الشاب اللى خدتة وكالة ناسا وكان ضيف على قناة الحياة من حوالى شهر ....ووالله ماكانوش ملاحقين على المداخلات اللى كلها فرحه وامل وسعادة ...هاتوا ناس من اللى عندهم قيم ومبادىء بجد رغم بساطتهم وفقرهم ...هاتوا مصر بجد ....ومعلش للسادة اللى مطفحينا أكتئاب واستفزاز روحوا مارينا ولابلاش مارينا تلاقيها ساقعة دلوقت ...روحوا الغردقة ...ارتاحوا من قرفنا وغبوتنا ....مش حيحصل حاجة دا حتى علشان نشتاق لكم ...

مصر حتبقى مصر بولادها ورجالتها وستاتها اللى بيحبوها ويستحملوها وينصروها

مصر حتبقى مصر بينا ...ولو احنا حلوين حتبقى حلوة ....ولو احنا معفنين ...العالم حيشم ريحتها وهما فى الطيارة ....

ساعدونى وادعوا لاسبوع الشمعة ...قبل مانبرد حاكم احنا بنسخن بسرعة وبنبرد اسرع....ونرجع نسب ونلعن ونشتم ونرمى خيبتنا على اسرائيل وامريكا وترجع ريمة لعادتها القديمة

اللهم بلغت اللهم فاشهد ووالله والله ما انا قادر اعمل اكتر من كدة وانت يارب اعلى واعلم

رحلة فى دماغ بنى ادم(6)

رحلة فى دماغ بنى ادم(6)

أبو احمد

ابو احمد بعد ماخلص صلاة الجمعة اشترى الاهرام ورجع على البيت ...قعد على كرسى الصالون اللى جنب الشباك ..نادى على ام احمد علشان تعمله فنجان قهوة .....قعد يقلب فى الجرنال لغاية ماوصل لصفحة الوفيات ...عينة وقعت على اسم رئيس مجلس ادارة الشركة اللى كان شغال فيها قبل مايطلع على المعاش ...مصدقش... رجع بعنية تانى ...ايوة...دا مكتوب المغفور له باذن الله ...يبقى مات ...لا حول ولا قوة الابالله ...الراجل دة كان ابن حلال دا هوة اللى رقانى وخلانى رئيس قطاع ...مع انى كنت اصغر واحد فى الشركة ... بس كنت كفاءة ... ايامها الموظفين كانوا مولعين منى ...مانا ماعنديش عزيز فى الشغل ...وياما قالوا علية ...بس ماكنش بيهمنى ...مشيت الشغل وخليت الشركة تعمل ارباح محدش قادر يعملها لغاية دلوقتى ...يعنى كنت خد حاجة من الارباح دى؟ ...فى الاخر يادوب المعاش مكفينى ...وحتى مش عارف اجوز الواد الصغير ...هية كدة اخرة خدمة الغز علقة ...دا انا ياما عملت للشركة ...عطيتها عمرى ...كنت واخد كل حاجة على صدرى ...كنت شايلها على راسى ولا اكنها ورث ابويا ...كنت مسئول عن كل حاجة ...الاستيراد والتصدير والمشتريات والمبيعات والموظفين... حتى الفراشين اللى كانوا بيزوغوا ويعملوا خط سير ...وخصوصا الزفت اللى اسمة سيد ...واد حلنجى بس على مين ...انا فاكر لما دخلت المكتب ولقيت علية كوم تراب ...مانضفهوش الجزمة ...رحت مزعق بعلو صوتى ...انت يا واد يازفت ياللى اسمك سيد.............
.....فاق ابو احمد على صوت ام احمد وهية بتقول له.....سيد مين ياحاج اللى بتندة علية ....ابو احمد بصلها وسكت ....قالت له القهوة ياحاج ....خد منها القهوة ومنطقش بس قعد يبص لها ....قالت له : مالك يا حاج فية حاجة ...خير يا خويا ...قالها :لا لا ولاحاجة ومسك الجرنال وكان على صفحة الفن ...شاف صورة سمية الخشاب ....بص فيها قوى وبعدين بص لام احمد ورجع بص تانى لصورة سمية الخشاب وقالها : روحى...... روحى ياحاجة حضرى لنا الغدا

حتة رخام

حتة رخام

1967 – 1977 ماكنش فاهم ايه اللى بيحصل

1977 – 1987 كان بيحاول يفهم ايه اللى بيحصل

1987 – 1997 كان فاكر انه فهم ايه اللى بيحصل

1997 – 2007 كان بيقنع اللى حواليه انه فاهم ايه اللى بيحصل

2007 – 2017 كان بيفهم اللى حواليه اللى فاهمه فى اللى بيحصل

2017 – 2027 كان اللى حواليه مش عايزينه يفهمهم اللى فاهمه فى اللى بيحصل

2027 وثانية بدأ يفهم اللى المفروض كان يفهمه فى اللى بيحصل

حتة رخام بيضا 40*40 محفور عليها:

هنا يرقد جثمان

العبيط

1967 - 2027

واللى بعدة.........................

ت ترتت تا مصر

ت ترتت تا مصر

البوست دة مش مترتب ...بأكتب فية اللى بيجى على بالى ...رتبوة انتوا بقى ...اوماترتبهوش ...عادى

فى حياة كل مصرى وهم كبير اسمه القومية العربية ...ووهم اكبر اسمة الاشقاء العرب ...ووهم اكبر واكبر اسمه الشقيقة الكبرى مصر ... او مش وهم ...عادى

نداء الى كل المصريين ...برجاء البحث عن كلمات الكرامة.. العزة ...الشرف ... الرجولة .. النخوة ...حيث ان هذة الكلمات قد تم فقدها منذ حوالى ثلاثين عاما فى غفلة من الزمن ...ومن يجدها يتصل ب0900 ولة جائزة عظيمة ...وهى وضع صورتة فى متحف التاريخ ....او فى البيت عنده ...عادى

اما تروح اى بلد فى الدنيا ...دايما تلاقى حد يقولك ورينى فيزة الاقامة ...على اساس انك ضيف والبلد مش بلدك ....لكن احلى حاجة بقى فى مصر ان محدش بيقولك فين فيزة الاقامة ....مع ان زيارتنا طولت قوى يااخى ....اوما طولتش ..عادى

طلعت فى دماغى اعمل فيها بيرم التونسى ...هيه كيميا ...شوية كلام ...لية نفسة النهاية ...وفية شوية سجع ...يبقى شعر... وان حد اعترض سمية زجل ... وان مانفعش قول شعر حر ....وان باظط خالص قول خواطر ...او ماتقولش حاجة ...عادى ماهيه دى مصر يا هبلة

الاوله م
الثانية ص
الثالثة ر

الاوله م ... ومين يقوللى ايه جرى لينا
الثانية ص...والصبر يأس من صبره علينا
الثالثه ر ...وربنا مش حيغير اللى بينا

الاوله م ... ومين يقوللى ايه جرى لينا ...بعد ما كنا رجاله
الثانية ص...والصبر يأس من صبره علينا ... علشان نرجع رجاله
الثالثه ر ...وربنا مش حيغير اللى بينا ...الا لو بقينا رجاله

الاوله م ... ومين يقوللى ايه جرى لينا ...بعد ما كنا رجاله ...بنحارب ونبنى بعزه ومهارة
الثانية ص...والصبر يأس من صبره علينا ... علشان نرجع رجاله...ونفهم بقى اصل العبارة
الثالثه ر ...وربنا مش حيغير اللى بينا ...الا لو بقينا رجاله ....ننصر دينه ونحارب اشكال الدعارة

ياللا باى بينا موبيلات اومش بينا عادى

شر. م . . الشيخ

شر. م . . الشيخ

دى المرة السادسة اللى اروح فيها شرم الشيخ ...ودايما باروحها مع الشغل ...لكن المرة دى كت مختلفة شوية ....كل اللى اشتغلناة كان يوم واحد بس ...ويومين فرى ...فرى فرى يعنى ...روحوا اعملوا اللى نفسكوا فية ...وكله على حساب صاحب المحل. ....قبل ما أسافر كانت نظرات الغيرة والغبطة وأحيانا الحسد محوطانى من كل ناحية ...دا غير يابختك ياعم ...أيوه ياسيدى ...ماشية معاك ياباشا ...ارزاق ...المهم رحت شرم الشيخ ...مافيش حاجة اتغيرت هيه هيه من عشر سنين ....لسه اول ما بتدخل من البوابة ...فرد الامن يوقفك ويقولك : شنطة العربية لوسمحت ...تفتح لة الشنطة ...يبص فيها ...يقفلها ...ويقولك بذوق مخلوط بالغباء الحاد : اتفضل يا بيه ....دا طبعا على اساس انى لو انا معايا قنبلة حأحطها فى شنطة العربية ...زى ماقولتلكوا كل حاجة زى ما هية ...لكن الواضح انى انا اللى اتغيرت ...القصد ...خلصنا يوم الشغل وبدأنا الفرى ...قولت ياواد ياللا بقى استمتع واغسل هم الشغل والعيال ومصروف البيت والعيشة واللى عايشينها ..ولبست الشورت والفانلة والكاب ...وطلعت على البيسين ..وزى العادة لقيت البنات والستات ناسيين النص الفوقانى من المايوة ...قولت بلاش البيسيين ...اطلع اقعد على البحر شويه ...لقيت البحر برضة زى ماهوه ...الستات والرجالة ناسيين المايوة كله بقى المرة دى ...قولت اطلع اقعد فى كافيتيريا اشرب حاجة ...لقيت كل اللى حوالية خمرة ...بينى وبينكوا الازايز شكلها تحفة ...تقولش فازات كريستال عصفور ....قولت ياواد احسن حل تروح تقعد فى اللوبى ...اهو تتفرج على اللى داخل واللى طالع حاكم الريسيبشن دة بيبقى عامل زى السوق....لقيت كل واحد مقعد على رجلة واحدة وهاتك يا كلام سر فى بقها ...ايوة كلام سر مش كلمة وتعدى .......بصيت الناحية التانية لقيت بنتين بيقولوا لبعض كلام سر برضة فى بقهم ....قولت ياواد احسن حل اطلع اودتى ...دخلت الاودة وفتحت التليفزيون ...طلع كلة من المتشفر يامعلم ...اتهببت وقعدت فى الفرندة ...قولت امدد كدة واتمتع بالمناظر الحلوة والخضرة ....مافيش دقيقتين ولقيت لوط بنات روسى استيراد خاصة –اكيد عليهم هدية مدفع ولا دبابة –بيتدربوا على الشو الروسى ...دخلت وقفلت الفراندة والتليفزيون واتصلت بالريسيبشن رد علية صوت ...صوت صوت ... ماى اى هلب يو ...كان فاضل بس تقول يابيبى ...قولت : مش عايز تليفونات ..واترميت على المرتبة الاماراتى ...ونزلت تحت اللحاف الفيبر ونمت ...نمت خمستاشر ساعة ...ماهو المثل بييقول الايام السودة ديتها النوم ...هية الناس كانت حسدانى على اية ؟ وكانوا بيقولوا أيوة ياعم حتتمتع لية ؟ دا مافيش متعة واحدة نقدر نقول عليها حلال ....وليه فى كل مرة كنت باجى شرم كنت باشوف نفس اللى شوفتة وكنت بأبقى مبسوط ...اشمعنى المرة دى مش مبسوط ؟ هوة انا اتعودت مثلا ؟ ولايمكن علشان كبرت ؟ ولا اكونش اتدينت وانا مش واخد بالى ؟....ولا هوة مبقاش فية حاجة interesting

؟ ولا دى مبادىء اكتئاب من العيشة واللى عايشينها ...ولا انا علشان فهمت ؟ ولا انا مش فاهم حاجة اصلا ؟ ...ولا دا العقل ؟ ولادة العبط بعينة ..؟مش مهم كل دة مش مهم ...السؤال اللى تعبنى بجد ...هوة اية دخل الشيخ بشرم ؟ يعنى اية العلاقة الجوهرية بين شرم وبين الشيخ ...نسيت اقول الفندق اللى كنت فية كان فندق سبع نجوم ...الفندق مش ناسى حاجة ...لازق تحت التليفزيون ورقة فيها اتجاه القبلة ...علشان لا سمح الله لو الشيطان وزك وحبيت تصلى ولاحاجة تبقى عارف مكان القبلة ....

فية حاجة اخيرة بأقاوم علشان ماأكتبهاش بس بصراحة مش قادر القافية حكمت زى ما بيقولوا ... أ ى ط لو حطينا كل حرف مكان النقط اللى فى العنوان بالترتيب طبعا مش كان الاسم كدة حيبقى اوقع ومقنع اكتر........؟؟؟؟؟!!!!!!!

من اجلك انت

بقيت الجملة اللى محدش بيقراها

من اجلك انت....................................... ياريس

الحق على عبد الحق

الحق على عبد الحق

لو انت مصرى على حق كنت قولت لقطر العياط لأ...لو انت مصرى على حق ماتقولش للتوريث لأ...... لو انت مصرى على حق قول للحرية لأ....لو انت مصرى على حق ماتقولش لقانون الطوارىء لأ......لوانت مصرى على حق قول للحجاب لأ....وماتقولش للمنى جيب لأ...قول للكرامة لأ....وماتقولش للتطبيع لأ....قول للتصدير لأ.... وماتقولش للصينى لأ....قول للعلم لأ....وماتقولش للجهل لأ....قول للدين لأ....وماتقولش للفيديو سليب لأ.....قول للمعارضة لأ ....وماتقولش للحزب الوطنى لأ....قول لاعدام هشام طلعت مصطفى لأ.....وماتقولش لبراءة تامر حسنى لأ.....قول للعفه لأ....وماتقولش للتحرش لأ.....قول للأمانة لا ....وماتقولش للرشوة لأ....قول للجواز لأ ....وماتقولش للعرفى لأ....قول للشغل لأ....وماتقولش للبطالة لأ...قول للنخوة لأ....وماتقولش للجينز والبدى لأ....قول للتكنولوجيا لأ....وماتقولش للاب توب لأ....وعلشان تبقى مصرى على حق ......حق حق ...لازم تهتف وتقول بالروح بالدم نفديك ياباشا ......وانشالله نموت ولا نروح فى ستين داهية .....بس ولى النعم يعيش ويتهنى ...وياخد قروض ويتمنى واللى يقع منة يوكلنا ....واهرشى لى يامه فى ضهرى

بيان رقم تسعين مليون وتلتماية وتلتاشر

قررنا نحن الناس اللى عارفة كل حاجة ....ان نبلغ الناس اللى مش عارفه مصلحتها ....انه نتيجة للدراسات والاستشارات المستفيضة للنهوض بمصرنا الغالية قررنا ماهو ات:

تم تغيير اسم مصرنا الحبيبة من جمهورية مصر العربية الى جمهورية مصر للامراض العقلية

ولو انت مصرى على حق اوعى تقول لأ

الفرق بين الرجل والمرأة 1

فرق فسيولوجى

ربنا لما خلق المخ خلقة نصين ...فصين....فص يمين وفص شمال ...وخلق بينهم صمام يوصل وينقل بينهم ...وخلى الفص اليمين مسؤل عن العاطفة والخيال والذوق والابداع ...اما الفص الشمال فمسئول عن الارقام والتحليل والترتيب والقرارات ...ولما خلق الرجل خلاه يستخدم الفص الشمال ....ولما خلق المرأة خلاها تستخدم الفص اليمين ...علشان كدة تلاقى المرأة حنينة اكتر ...ذوقها احسن ...خيالها اوسع ...ومن حكمة ربنا ..انه خلى الصمام اللى بيربط بين الفصين اوسع عند المرأة ...علشان تقدر تنقل من دة لدة بسرعة ...وعلشان كدة تلاقيها بتدير البيت بكل طلباتة ومشاكلة بطريقة يعجز عنها اجدع خبير معاه دكتوراة فى الادارة والاقتصاد من جامعة هارفارد...لأن البيت عايز فى ادارتة حد على طول فى حالة طوارىء....على طول فصين دماغة شغالين ...ولو خدتوا بالكوا من الست تلاقيها بترضع الواد ...وتخرط الملوخية وتتفرج على التمثيلية وترد على التليفون فى نفس الوقت ...الراجل بقى لو عايز تلخبطة ...اطلب منه حاجتين فى نفس الوقت ...حيفشل... وففى الحاجتين ....ولو بتلاحظوا شلة ستات قاعدين مع بعض تلاقيهم بيتكلموا كلهم فى نفس واحد وفى نفس الوقت سامعيين بعض كويس وبيردوا على بعض ....لكن الرجاله لأ ...مايقدرش ...فلما نطلب من الراجل يبقى زى الست ....نبقى عاملين زى اللى بيطلب من واحد مقطوع له رجل انة يدخل سباق 100 متر حواجز ....حكمتك يارب ...خليت التستستيرون (هرمون الذكورة) عند الراجل اعلى بكتير قوى من المرأة ...علشان الهرمون دة هوة اللى يخلية بيجرى ورا الست ....ويبوس ايد ابوها وخالها علشان يتجوزها ...وهية قاعدة فى بيت ابوها معززة ومكرمة ولا الاميرة ....شوفوابقى لو ان التستستيرون هو اللى عالى عند الست ...كان الراجل حيرضى انها تيجى تطلب ايدة ولا تقول له ياللا النهاردة ليلة الجمعة ؟؟!! شكل الراجل كان حيبقى وحش قوى ....-مع الاحتفاظ الكامل بحق المرأة فى ان تطلب زوجها ليلة الجمعة – عرفتوا بقى لية الراجل عينة زايغة ...غصب عنه والله مش بمزاجه ....تستستيرونة عالى ...نعمل ايه؟ نخلية مايبصش برة ازاى ؟ ....ماهو يا نخلية أغا علشان نرتاح ....ومش حنرتاح ...يا اما نرفع مناعته ونملى عينة ونهدى تستستيرونه ... مش عشانة بس ...عشانك انت كمان ...جربى كدة واقعدى فى البيت وانت رابطة الطرحة ...ولا عاملة شعرك كحكة ....ولابسة البيجامه ومية غسيل المواعين بلة وسطك ...وهباب الحله على خدك ...وشوفى حاسة بإية ؟؟!! وجربى كدة بعد ماتخلصى شغل بيتك ...وافردى شعرك ..والبسى قميص نوم حلو ...واتمكيجى ...واتبرفنى ...حاسة بإية؟ حاتحسى بانوثتك ...حتبقى فرحانة بنفسك وواثقة فيها ...وبالمرة ياستى حترفعى مناعة ابو تستستيرون ....بس خلى بالك ...ساعات بنعمل كدة من غير نفس ...وتضربى القميص الاحمر وانت بتقولى فى سرك ايكش يطمر فى المفترى ابن المفترية .....لأن اللى ماتعرفيهوش انه بيسمعك مع انك ما بتقوليهاش بصوت عالى ....أما انت بقى يا ابو عين زايغة ....وانت راجع كدة من الشغل وتعبان وعرقان ومترّب ....اول ماتدخل خد لك دش واحلق دقنك ...والبس بيجاما نضيفة ...بلاش تقعدش بال..... ياريتة كان بوكسر كنت عديتها ....ماهوانت طول النهار حلو وشيك ومتبرفن ...خليك كدة كمان فى بيتك ...كمل يومك وانت شيك وحلو وفرحان بنفسك وبمنظرك ....ماهواذا كان عندك شوية تستستيرون معذبينك ...فمراتك برضة عندها حبة تستستيرون ....

الأمور كلها بسيطة ...اولها نفهم..... وتانيها نقدّر.... وثالثها ننسى الافكار المسبقة ....ورابعها نبطل نتهم بعض ....وخامسها نحب نفسنا قبل مانحب اللى قدامنا ....وسادسها انا تعبت بس برضة حأكمل لأنى مقتنع ان الدنيا على حسب ما نعوزها ....حلوة أو مُرة ... احنا اللى بنختار

سؤال للتفكير وليس للإجابة:

لية اتحولت الحكاية الى واجب روتينى ...له طقوس محددة....وزى رسمى ...وميعاد معروف مسبقاً...ليلة الجمعة ؟

إذبحوا بقرة

إذبحوا بقرة

وجهة نظر تحاول ان تكون حيادية حتى لا اتهم بأننى لا أقول الحق ...ولكنها فى الوقت ذاتة يُأخذ منها ويرد ..وابدأها ببعض الاسئلة ...لماذا نستعذب دائما العذاب؟...لماذا نبحث دائما عن وسيلة تجعلنا فى صورة المظلومين ؟ ....لماذا نطالب بحقوقنا ولا نعترف بواجبتنا ؟... لماذا لانؤدى واجباتنا دون النظر الى التقدير ؟..-رغم اننا نردد دائما :لاشكر على واجب-...لماذا يقول الرجل دائما انا كالثور فى الساقية ...اعمل ليل نهار كى ألبى طلبات بيتى؟ ...لماذا تقول المرأة انا اعمل كالخادمة فى بيتى ...اغسل واطبخ واربى الاولاد؟...اليس هذا واجبهما ؟...ارى ان المشكلة اننا لا نعرف هدفا لحياتنا ...ونبحث ونبحث وعندما نجد هدفا غالبا مايكون هدفا ماديا...رغم ان هدفنا واضح كوضوح الشمس فى يوم بلا سحاب ..هدفنا هو .. نصرة دين الله واعمار الارض ...هدفنا ان نجعل اولادنا يحملون الراية من بعدنا ...ليسلموها لاحفادنا ...حتى اذا قامت الساعة وفى يدنا او يد ابناءنا او يد احفادنا فسيلة ...نغرسها ...ولكننا نسينا الهدف وتشاجرنا على الوسيلة وجعلنا الزواج تفاضلا وليس تكاملا ...نسينا.... وتناسينا حكمة الله فى خلق الرجل والمرأة ...وضعنا اصابعنا فى آذاننا حتى لا نسمع كلمات سكن ومودة ورحمة ويأثرون على انفسهم ...ورفعناها لنسمع كلمات حقى وكرامتى وحريتى وأنا ...برغم ان الحقوق محفوظة والكرامة مصانة...والحرية ملك للجميع .. وانا وانت مكرمين من الله عز وجل ...ولكنها التفاضلية....لم نحاول ان نفهم حكمة الله فى خلق الرجل بهذه الهيئة وهذه العقلية ...لم نحاول ان نفهم حكمة الله فى خلق المرأة بهذة الهيئة وهذه العقلية....لم نحاول ان نفهم مشاعر الرجل وتصرفاتة ....لم نحاول ان نفهم مشاعر المرأةوتصرفاتها ....لم نفهم ولم نتفهم ...لم نقبل ولم نتقبل ....وقررنا بعقلنا العاجز ان نغير خلق الله ..وطالبنا بمعرفة تفاصيل مواصفات البقرة ..رغم ان الامر كان سهلا ...اذبحوا بقرة ...اى بقرة ...لكن لماذا ننفذ الامر ؟! اليس لناعقول ؟! فالمرأة تريد ان يصبح الرجل مثلها ...يتكلم مثلها ..يفكر مثلها ...يشعر مثلها ...ينظر الى الامور مثلها ...وكذلك الرجل يريد نفس الشئ ...لو كان هذا هوالحل الذى يجلب السعادة ...فلماذا لم يخلق الله نوعا واحدا ؟! وحاشاه ...ولكنها الموروثات المتخلفة ...والمبثوثات التى تريد ان نصبح اكثر تخلفا ....انها شياطين النفس والإنس التى توسوس فى صدورنا حتى تبقينا دائما فى المرحلة صفر ....وكلما تقدمنا خطوة نرجع خطوتان ....ايها الرجل افهم وتفهم معنى المرأة ...ايتها المرأة افهمى وتفهمى معنى الرجل ....افهموا وتفهموا حكمة الله على مراد الله وليس على مرادكم ...وقتها تصبح الدنيا جنة الله فى ارضة ....حتى لو كانت هذه الارض هى مصرنا العظيمة ...وقتها ستجدون السعادة التى تبحثون عنها

وسأبدأ سلسلة قصيرة عن الفرق بين الرجل والمرأة فأرجوا تواصلكم لانها كما قلت وجهة نظر يُأخذ منها ويرد

ملحوظة : هذا البوست والسلسلة التى تلية من وحى بوست المخدماتى وليس ردا عليه

حتى على الموت لا أخلو من الحسد

حتى على الموت لا أخلو من الحسد

انا من البنى ادمين اللى بيقدروا اللى بيعملوة الزوجات ....وكمان من انصار حقوق المرأة....بس اللى بيقول عليها ربنا ...مش اللى بتقول عليها ماما امريكا...دا غير انى حاسس بكل كلمة كتبتها صبرنى فى بوست المخدماتى ...وبرضة علشان انا من البنى ادمين اللى دايما يشوفوا نص الكباية المليان ..كتبت البوست دة ...تضامنا وليس تعارضا مع صبرنى وكل صبرنى على وجه الارض

أولا : الشغالة بتاخد مرتب علشان تحوش وتقدر تجهز نفسها وتستر نفسها ...لكن احنا لقينا اللى يجهزنا ويعمل لنا الفرح فى قاعة المؤتمرات ويقطع لنا التورتة ام اربع ادوار

ثانيا : الشغالة بتاخد يوم اجازة بس لما بيتروح بتعمل فى بيتها شغل الاسبوع فى يوم علشان ماعندهاش شغاله...لكن احنا عندنا اللى بيساعدنا ...وبنزعل قوى لما نعمل شغل يوم فى

الاسبوع

ثالثا : الشغالة برضة لما بتروح بتذاكر للعيال وبتودى العيان المستوصف ...وتلبسهم من العتبة ...لكن احنا زهقانين من كراسة المتابعة والحجز اللى بعد اسبوعين عند الاستاذ الدكتور ..والزحمة اللى بقت فى المول

رابعا : الشغالة لما بتشتغل شغلتين بتروح تشتغل التالتة ...وبتصرف اللى بتاخدة فى البيت....واحنا لما نشتغل الصبح بيبقى علشان نثبت ذاتنا

خامسا : الشغالة بتلاقى اللى يقول حرام لبسها ووكلها ...وماتعرفوش انها بتوفر لقمتها وهدمتها لعيالها .....واحنا بنلبس الطقم مرتين ونقول كفاية زهقنا ...وبنخرج نتعشى برة

سادسا :الشغالة بتلبس اى حاجة وشكلها مش مهم ...بس اللى ماتعرفوش انها نفسها تلبس حلو وتروح تعمل وشها عند الكوافير بدل صاحبتها اللى بتشعوط لها وشها ...ولماتروح برضة بتضحك فى وش جوزها .....لكن احنا زهقنا من لانجيرى جويا ....بقى بيئة

سابعا : الشغالة لما بتتعب بنجيب لها الدكتور والدوا ..بس لما تروح مابتقدرش ترتاح وراها بيتها وجوزها ...لكن احنا ماما بتييجى تمرضنا وبنجيب دليفرى

ثامنا : الشغالة مابيتمنش على مرتبها ...اللى هية بتصرفه على بيتها علشان تكمل العيشة ...لكن احنا بنصرفة على الموضة والمكياج

تاسعا : الشغالة ممكن فى اى وقت تسيبنا وتمشى ...بس علشان لقت شغل فى حتة تانية بمرتب اعلى يساعد على المعايش ...لكن احنا بنسيب ونمشى علشان مارضيش يحجز فى مارينا

عاشرا : الشغالة لو اتعمل معاها حاجة مش تمام هية كمان حتخش النار.... ولما تروح برضة حتبقى حاجة ببلاش كدة ...وبرضة جوزها عينة على المسلكنين والعريانين ... ويبص عليهم من الخرم كمان

هما الرجالة كدة ...يندب فى عينهم رصاصة

حادى عشر : نحمدوا ربنا بقى ان احنا مش شغالة ...ونرضى بالشقى اللى بيخلى الجنة تحت اقدامنا

ونفتكر كلام نبينا محمد :امك ثم امك ثم امك ...ونعرف جايزتنا ولا لسة برضة بصين للغلبانة فى السبوبة ونفسنا نبقى شغالة

خموسين المبستر

خموسين المبستر

على حد علمى اعتقد ان احنا البلد الوحيد اللى عندة اسامى مثنى ...يعنى محمدين ...حسنين....حمدين ...عوضين ...خموسين ..ودة الاسم اللى لسة سامعة قريب ...ومعناة خميس وخميس ...هية زمان كانت اسامى ...بس الظاهر انها بقت افعال ...عموما انا مابحبش التعميم ...بس من اللى شايفة اقدر اقول انا نفسى بقيت اسلامين ...واللى حوالية ...اشرفين ...وايهابين ...وهشامين ...حتى بتى الصغيرة ...بقت روانين ...كلنا بقينا اتنين ..ورغم ان احنا اتنين بس عايشيين مع بعض مبسوطين ...مش زعلانين ...لابنتعارك ولابنتخاصم ...مع اننا يا اخى عكس بعض خالص....شوف مثلا خموسين ...خميس الاولانى اشتراكى بوليتارى ..وخميس التانى راسمالى امبريالى ...خميس الاولانى عندة تلاتين سنة ...خميس التانى على وشة كرمشة واحد فى التمانين...خميس الاولانى بيحب اللمة والافراح والهيصة ...خميس التانى حابس نفسة فى البيت وعندة اكتئاب ....خميس الاولانى جزمتة مقطعة ...خميس التانى ماسك موبيل نوكيا تاتش من ابو الفين جنية ...خميس الاولانى بيستحمل ويصبر ويكتم ...خميس التانى لوحد لمسة فى الاوتوبيس يصرخ ويصوت ويسب...خميس الاولانى ذكى وعبقرى وطموح ...خميس التانى غبى وبليد وكسلان ...خميس الاولانى يسمع درس الشيخ فى الجامع وهوه طالع يبوس ايدة ... خميس التانى بيطلع على المسرح يرقص مع الرقاصة وينقطها ...بس مش فى ايديها ....خميس الاولانى لسانة بينقط سكر ...خميس التانى كل كلمة وراها شتيمة ..خميس الاولانى بيحب مصر للنخاع ...خميس التانى بيشرط كرسى القطر بالموس ....خميس الاولانى بيسمع كلام الحكومة ...خميس التانى بيكره الحكومة عمى ...خميس الاولانى مايستغناش عن مراته ...خميس التانى بيحلم يتجوز هيفاء وهبى ولو يوم واحد ...

كلنا بقينا خموسين ...نسخن لدرجة الغليان وفجأة نبرد لدرجة صفر ...ولا اجدع بسترة ..وغطينى يامة وصوتى ...بس ماتنسيش بعد ماتخلصى صويت ..تصبغى شعرك وتتمكيجى وتروحى النادى

من حديقة مستشفى المعمورة للامراض النفسية والعقلية

اكتوبر 2009

(العيد السادس الثلاثون)

لا صينى ولا يابانى الصح هوة الربانى

لا صينى ولا يابانى الصح هوة الربانى

قررت انى اسمى كل حاجة با سمها كدة اريح ...وعلى فكرة بدون اى تجاوزات

بكار واد حليوة بعيون زرقة زى بتوع السيما اللى بيهبلوا البنات العبيطة واللى مش عبيطة بشكلهم وتصرفاتهم....بكار ماسبش واحدة عرفها الا وزنى معاها ....ايوة ...ماهوة زانى ...وبيتباها بكدة ....بس مابيقولش انا زانى ...بيقول انا دون جوان ...كدة بتبقى اشيك وتلم بنات اكتر ....ماهو فتك ومقطع السمكة وديلها ومقرقش شوكها كمان ...كان دايما يقول مافيش بنت ما قدرش اجيبها ....وفضل على كدة لغاية ماتعب وزهق

بكارة قررت انها تعيش ...خمرة ورقص وزنى ...عادى ...كانت بتزنى بسهولة فتح الكانز ...بس اوعى تفتكر انها من اياهم ...دى ماكنتش بتزنى الا مع اللى تحبة ويحبها ..... وطبعا كانت بتحب يوم بعد يوم ....وعمرها ماخدت فلوس... .فبلاش تبقى فلاح ودماغك تروح بعيد ..كل الحكاية انها مقتنعة ان جسمها دا شىء ملكها تعمل فيه وبيه اللى هية عايزاة ....بس بكارة كانت واعية ....فتح الكانز كان برة المنطقة خالص ...مش عايزين وجع دماغ....

الدكتور سقاطة ...زهق من العيانين الفقر وقرر يلم فلوس ....وفتح سنتر تجميل بس تجميل من نوع خاص ....ماهو كلة تجميل والفكرة الاساسية فى التجميل هو ارجاع الشىء لاصلة ....واقنع نفسة انه بيعمل خير ....بيرجع الشىء لاصلة ويتستر على الولايا اللى زنوا بس بيقولوا انهم انضحك عليهم .... دا غير انة بيرحم العيال اللىكانت حتيجى من انهم يسمعوا كلمة ابن الحرام ....اكيد كانو حيتدايقوا ؟؟؟

ام بكار قالت لبكار شوف بقى يا ابنى كفاية بقى سرمحة انت لازم تتلم بقى ...شوف لك واحدة بنت ناس محجبة تصونك وتصون شرفك ....بكار قال لها فعلا يامه انا تعبت شوفى انتى وانا موافق....ام بكار قعدت تدور وتلف فى دماغها مش لاية حد كويس ماهى مش عيزاها شريفة وعفيفة بس ...ياسلام لو تكون غنية كمان .... شوية ودخلت عليها اختها خدوا بعض بالاحضان وقعدوا يتكلموا فى موضوع جوازة بكار ....خالة بكار قالت لها جرى اية ياام بكار انتى ناسية ليه بت الدكتور سقاطة ....ادب وكمال جمال ...وحجابها مغطيها من ساسها لراسها

وابوها ربنا فتح علية وركب المرسيدس دلوقت ...ماكدبوش خبر وراح بكار وامة علشان يشوفوا البنت ...البنت عجبت بكار وامةقالت ادب واخلاق وتدين مافيش بعد كدة دا حتى ابوها مارضيش يسيبهم يتكلموا لوحدهم قال: الشرع قال لازم يكون فية محرم ...هيى دى اللى حتصون شرف ابنى ...واتفقوا على الشبكة والمهر وكافة شىء...وجه المأذون وفتح الدفتر وبدأ يكتب الكتاب

المأذون : اسم العريس انشاء الله

بكار : بكار سلف ودين

المأذون : اسم العروسة انشاء الله

د. سقاطة : بكارة سقاطة النتن

طبعا فية ناس ساذجة حتقول اية اللى حصل ليلة الدخلة .....اقولهم ولا حاجة ...مالصينى وصل ولو عايز كل يوم دخلة احنا تحت امرك

على فكرة ابن بكار كان ابن سبعة بس اللى يشوفة يقول ماشاء الله ابن تسعة ...وافى كدة وحلو ...بكار كان فرحان بية قوى ....وسماة بكرى

رحلة فى دماغ بنى آدم 5

رحلة فى دماغ بنى آدم 5

حماة امانى

الحاجة لولا لبست العباية ولفت الطرحة ونزلت علشان تقبض المعاش .....وبالمرة تجيب حاجات رمضان ....كانت خايفة علشان دى اول مرة تستخدم فيها كارت الفيزا...هية ماكانتش عايزة لافيزا ولا ميزا ...بس البنك اللى صمم....كانت خايفة لامتعرفش تستخدمة ...وخايفة من الحرامى اللى حياخد الفلوس اول ما تطلع ...لما وصلت للمكنة كان عليها زحمة ....اتطمنت شوية ...كدة مافيش حرامى ...وكدة ممكن تسأل حد لو ماعرفتش تستخدم الكارت ....وقفت الحاجة لولا فى الطابور وسرحت مع نفسها ....انا مش حأكتر من حاجات رمضان ....الواد وابوة مابيكلوهاش ...وفى الاخر بيترمى نصها .....هية مصاريف على الارض ؟؟ داحتى يبقى حرام ....هوة كيلو تمر مافيش غيرة ...على شوية زبيب على ربع جوز هند علشان الكنافة والقطايف ....وكفاية على كدة ...لازم امسك على ايدى ...انا لسة عايزة اجوز الواد الصغير ....وبعدين محدش عارف بكرة فية اية ....لازم اعمل حساب الزمن واسيب قرشين للعيال يستروهم فى الغلا دة ...خصوصا الواد احمد علشان حتى يساعدوة فى المعايش ....ماهو معاة واحدة خروبية ومتدلعة ...عاملة فيها بت ناس .....مابتكلش العيش ابو شلن بتاعنا ...قال اية ؟ مابعرفش ابلعة ياطنط .....طاب ماتشربى وراة حبة مية ياروح طنط ...دلع ومياصة ...ولا العفريت اللى عليها اللى اسمة بيتزا ...ماتطبخى يافالحة هوة الواد حيكفى منين فواتير التليفرى....ولا الهدوم اللى مابتجيش الا من المول ...مالها بس محلات القماش ..ماتنزل تشترى حتتين قماش وتفصلهم وتوفر لجوزها الشقيان اللى بيطلع من صباحية ربنا ...مابيرجعش الا نص الليل ....علشان يكفيها ويكفى العيال بتوع كى جى وان وكى جى تو ...مالها بس مدارس الحكومة ....الا ترد علية العيال فىمدارس الحكومة بيئة يا طنط ...وانا عايزة عيالى يطلعوا استيل ..وكل ما قول لها على حاجة تقولى مش واخدة على كدة يا طنط ..مش متعودة على الحاجات دى يا طنط ....والختمة الشريفة ما كنت عايزة الجوازة دى ...انا كنت عايزالة شيرين بت اختى ...ادب وجمال وكمال ...ومدرسة بالحصة عارفة قيمة القرش ...دا غير انها من دمة يعنى حتشيل همة ...بس هوة كدة طول عمرة عايز يعيش عيشة المعوجيين دول ...كان دايما يقولى ياما انا عايز اخد واحدة من ولاد الذوات ....عايز اناسب ناس هاى ...انا فاكرة لما جة من عندهم اول مرة ...كان فرحان قوى بكلمة مامى ودادى ...كان فرحان بالشقة الى فى الزمالك والامن اللى فى العمارة من تحت ... قالىوهوة مبسوط قوى: يامة دول قدمولى الشاى فى فناجيل ومعاة جاتوة على عربية تحفة ...دا غير السكر كان مكعبات يامة ...اهو بيشرب الفالح؟!

انا فاكرة لما جات لى فى عيد الام وجايبالى اسورة طلعت بخمس تلاف جنية ...كان باين عليها انها غالية بسانا كمان نزلت وزنتها تانى يوم .....اية جاى تقولى يعنى انك غنية ولما بتهادى بتهادى قيمتك ...بس انا ماقولتلهاش شكرا ولاحتى مرسى زى مابتقول ...ايوة خليت وشها يجيب الوان ...قولت لها اصل انا ماليش فى الدهب ...ماشى يا امانى يابت عديلة ...النهاردة ...حاجيب ممبار وسقط ...وابعت لك تيجى تفرشى جنبى على الارض وتحشى الممبار وتنضفى الكرشة ....واياك تقولى مش واخدة على كدة ياطنط ..ونشوف حدايق القبة ولاالزمالك ....فاقت لولا على صوت الست اللى وراها بتقولها دورك ياحاجة ....الحاجة لولا حطت الكارت فى المكنة وبصت للست اللى وراها وقالت والنبى يا اختى اعمل اية بعد كدة ؟؟؟!!

كل سنة وانتوا طيبين

كل سنة وانتوا طيبين

دا اول رمضان معى عيلتى الجديدة ....بجد بجد احلى رمضان كل سنة وانت طيبة ياصبرنى وانتى ياستيتة وطبعا الحنان كله ام مالك وريم اللى البوست الجاى مشاركة وجدانية منى ليها والقدر وانا وابراهيم وعاشقة الرومانسية ودكتور ياسرواحساس طفلة محبة للرومانسية وسول اللى محش سامع له حس وشمس النهار وكل اللى دخل وشرفنى فى المدونة كل سنة ورمضان عليكوا بخير وعايشيين ومتهنيين وعاملين اللى فى نفسكوا

رحلة فى دماغ بنى آدم 4

رحلة فى دماغ بنى آدم 4

حماة احمد

الحاجة عديلة حماة احمد قامت من النوم ...ركبها بتنشر عليها ....يادوب نزلت رجليها على الارض...وسندت على ايديها ....قالت فى نفسها ...جرى اية يابت يا عديلة ....انتى عجزتى ولا اية ....اوعى يابت الروماتيزم يغلبك...لا انا مش حاسكت على نفسى ...النهاردة حاروح للدكتور اللى قالت لى علية عنايات ...لما كنا فى النادى ....بتقول علية بركة ....يادوب حط ايدية على ركابها ...قامت زى الحصان ....شوف الولية المايصة قال لما حط ايدية صحت ....يعنى الدوا مش هوة اللى صحاها ....ماهى طول عمرها متدلعه وصحتها حلوة مع انها اكبر منى بسنتين ....طول عمرها بختها حلو ...جوزها مدلعها ومهنيها.....ومش مخلى فى نفسها حاجة .....حتى بناتها..... الناصحة جوزتهم معاها ....ماهى عملت شقةلكل واحدة ....حسرة علية ....طول عمرى شقيانة ...وتعبانة وماشفت يوم حلو ....البنات اتجوزوا والراجل مات...يعنى وهوة حى كان بيعمل اية ....ماهو ليل نهار كان منكد عليةوعلى عيشتى وكان كاتم على نفسى ...الا مافى واحدة فكرت تخش علية بحتة كيكة ولا نص صينية بسبوسة ...ولا يقولوا لى تعالى اقعدى معانا يومين ...بدال مانتى قاعدة لوحدك كدة ....وهوة انا حارضى اروح عند واحدة منهم ...علشان المعدول جوزها يسمعنى كلمة كدة ولا كدة ......خصوصا اللى اسمة احمد جوز امانى دة ...دة يهودى ...ماحدش بياخد منه لاحق ولا باطل ....والهبلة مش عارفة تطوية ....مش شاطرة اللى كل ماتيجى تقعد تشتكى منة ومن عمايلة ....بس والنبى ومن نبى النبى نبى لانكد علية ...واخد لها حقها العبيطة دى .....اللىمش دريانة باللى بيحصل حواليها ...دا طول النهار برة ...لاهى عارفة بيعمل اية ولا بيروح فين ....بس فالحة تقولى شغلة كدة ياماما ...لية هوة احنا مشتغلناش ولا اية ...دا تلاقية بيلعب بديلة ويتسرمح ...ايوة هوة الصنف دة كدة ......انا عارفاة ...ماهو لوماكنش بيلعب بديلة ...كان زمانة داخل عليها بجزمة ولا شنطة ولاحتة سيغة ...يبقى بيودى الفلوس اللى بياخدها فين ... مش بعيد يكون متجوز عرفى عينى عليكى يابتى ....بختك زى بخت امك ..ولا المنيل التانى اللى بيلهف مرتب البت على داير مليم ....لا...لا..والله لفوقلكوا ...بس ارجع من رحلة شارم الشيخ اللى عاملها نادى المسنين ....ورحلة مطروح اللى عملاها جمعية رسالة ...واخلص من العمرة ...واوريكوا ...النبى لا اخلص القديم والجديد ....مبقاش ورايا حاجة الراجل ومات والشغل وبقيت معاش والروماتيزم وحاروح للدكتور بتاع عنايات ايوة لازم اخد بالى من صحتى ..,,بناتى عايزينى ...قامت عديلة من السرير وراحت تتصل بعنايات تاخد منها نمرة الدكتور اللى بيحط ايدة يخلى الركب ولا ركب ابو تريكة

رحلة فى دماغ بنى آدم 3

رحلة فى دماغ بنى آدم3

حبيبة

يوم الجمعة حبيبة صحت قبل امانى واحمد ....قالت فرصة اتفرج على التلفزيون براحتى ....فتحت التليفزيون وقعدت تقلب فى القنوات ...جابت فيلم اجنبى البطل فية كان بيبوس البطلة...قالت فى نفسها هما بيبوسو بعض ولا بيعضوا بعض ....لو بابا صاحى دلوقت كان ضير القناة وقال مناظر زبالة ....ماعرفش هوة بيعمل كدة لية ؟ .... مع انة لما بيتتفرج لوحدة مابيديرش القناة ولا حاجة ...بابا دة له حاجات غريبة مش بفهمها ....فرصة وهما نايمين اجيب نيكلوديان علشان افرج على جيمى نيترون وساندى ...من زمان ماشفتهمش ....والمدارس قربت وحيغلسوا علية ...ويقولى قومى نامى علشان تصحى بدرى للمدرسة ....ماأنا اول يوم لازم اقوم بدرى علشان اقعد جنب صاحبتى هانيا واوريها الشنطة الجديدة اللى حيجيبها لى بابا ....انا حاخلى بابا يجيب لى شنطة عليها فلة ...انا بحبها قوى ...مع ان تيتا مابتحبهاش وتقول عليها اية البت الغم دى اللى على طول ملبسينها اسود ... بس انا عارفة ان بابا حايجيب لى اللى انا عايزاة ...انا بحبة قوى علشان هوة بيجيبلى كل اللى نفسى فية ...مع انة ساعات بيغلس علية ويشخط فية ويقولى قومى صلى ...انا لسة صغيرة ...تيتا بتقول كدة ....وبابا دايما يتعارك مع ماماويقول لها خلى امك تبعد عن البت ...وتبعد لية هية مش تيتا ولا اية ....وماما كمان مش بتحب تيتا ام بابا .....مع انها على طول بتجيب لنا هدايا ولعب وتدينا فلوس ...وبرضة ماما بتاخد مننا الفلوس ....لما هية مابتحبش تيتا بتاخد مننا الفلوس اللى بتديها لنا ليه....النهاردة حنروح نزور خالتى ...وحالعب مع الواد زياد كونكت فور واغلبة زى ماغلبتة الاسبوع اللى فات لما كانوا عندنا ...واغيظة واقولة يا مغلوب ....زى مابيغيظنى ويقولى يا طخينة ....طاب مايبص لنفسة وسنانة البايظة واللى مركب لها تقويم ....احمد صحى ونادى على حبيبة وقالها يابت سيبى التليفزيون وتعالى نامى جنب بابا ....هوة انتى علطول كدة سيبانى ونايمة جنب امك ...حبيبة قالت له بس بشرط تحكى لى حدوتة ...قالها ماشى يابت الكلب بس تعالى

رحلة فى دماغ بنى ادم 2

رحلة فى دماغ بنى ادم 2

أحمـــــــــــــد

جات لأحمد سفرية القاهرة تبع الشغل .....قطع تذكرة القطر ... واشترى المصرى اليوم علشان يسلى نفسة فى السكة ....وقف على المحطة يستنى القطر ...عينة جات على الساعة اللى على المحطة .....قال فى نفسة : آه يابلد.... الساعة دى من ايام الانجليز .... المحطة كلها من ايام الانجليز ... وبعدين الساعة دى بقالها عشرين سنة واقفة على ستة الا ربع...... ياه لو الزمن يقف كده ولايرجع عشرين سنة ....كان الواحد يغيير حاجات كتير ....كان يسافر برة ...ولايعمل مشروع بدل الذل اللى الواحد شايفة فى الشركة بت الكلب دى ...وينقى بقى .....ينقى واحدة حلوة كدة ....ياسلام يا واد لو تصبح تلاقى معاك مليون جنية .....أول حاجة اعملها أروح الشركة واكتب استقالتى على اوسخ ورقة ...وارميها فى وش المدير ....وقول له :يلعن ابوك وابوشركتك وابو الايام السودة اللى اشتغلتها معاك ....واضربة ...ايوة اضربة قلم سخن على وشة يطلع القديم والجديد ....وانزل من عندة اشترى عربية اوكتافيا بالتكييف والبور ....وابيع اللادا المعفنة اللى ذلانى كل يوم الصبح للى يسوى واللى مايسواش علشان يزقنى ...ولا على اية ابيعها ....ارميها ... واجيب شالية فى الساحل الشمالى ....وآكل برة ...ماقولش اوفر الفلوس ولما ارجع ابقى آكل ...وافضل جعان طول اليوم ...والاهم بقى ياحلو تدلع نفسك وتشوف لك يومين ....وتدور لك على بت حلوة كدة زى بتوع الفيديو كليب ....بس حاشطرت عليها ...آه الشرط نور ....حاشطرت عليها انها ماتهتمش بحد غيرى ...ايوة ...لاتقول عيال ولا بيت ولاطبيخ ولا غيرة ...اناوبس ...قايمة نايمة عشانى ....وكفاية كدة على ام العيال ...خلى بقى العيال تنفعها ....ماهى اصلها افترت قوى ...ولا اكنى بنى آدم يا اخى ....بقيت كارت فيزا تحطة فى المكنة يطلع فلوس ...لية هوة انا مش بنى آدم لحم ودم ومشاعر ...وبعدين حابقى جدع معاها ...عايزه تفضل على زمتى اهلاوسهلا....عايزة تتطلق هية حرة ...وساعتها حاديها قرشين حلوين .... انا عارف من دلوقت ....حتختار الفلوس .....وبعدين العيال كدة كدة حتتربى ....افرض انى انا مت ....كانوا حيعملوا اية ...حيكبروا ويتربوا ويتجوزوا ....عادى الدنيا بتمشى الواحد بس اللى بيعرضها ....وانا مش حاسيبهم كدة انا حاحطلهم قرشين باسمهم فى البنك ....اتنطر احمد على صوت الموبيل ....ماهى دى رنة المدير ...الو ..صباح الخير ياباشا ....معلش ياباشا ....والله غصب عنى ياباشا......ماهو القطر هوة اللى اتاخر ياباشا ....انا اسف يا باشا .....والله دا اول قطر بيطلع من عندنا ياباشا

اللىتشوفة ياباشا ...اتفضل ياباشا .....حط الموبيل فى جيبة ...وفتح المصرى اليوم يقرا المانشيت

الحكم باللإعدام على هشام طلعت مصطفى فى قضية سوزان تميم