رحلة فى دماغ بنى آدم 5

رحلة فى دماغ بنى آدم 5

حماة امانى

الحاجة لولا لبست العباية ولفت الطرحة ونزلت علشان تقبض المعاش .....وبالمرة تجيب حاجات رمضان ....كانت خايفة علشان دى اول مرة تستخدم فيها كارت الفيزا...هية ماكانتش عايزة لافيزا ولا ميزا ...بس البنك اللى صمم....كانت خايفة لامتعرفش تستخدمة ...وخايفة من الحرامى اللى حياخد الفلوس اول ما تطلع ...لما وصلت للمكنة كان عليها زحمة ....اتطمنت شوية ...كدة مافيش حرامى ...وكدة ممكن تسأل حد لو ماعرفتش تستخدم الكارت ....وقفت الحاجة لولا فى الطابور وسرحت مع نفسها ....انا مش حأكتر من حاجات رمضان ....الواد وابوة مابيكلوهاش ...وفى الاخر بيترمى نصها .....هية مصاريف على الارض ؟؟ داحتى يبقى حرام ....هوة كيلو تمر مافيش غيرة ...على شوية زبيب على ربع جوز هند علشان الكنافة والقطايف ....وكفاية على كدة ...لازم امسك على ايدى ...انا لسة عايزة اجوز الواد الصغير ....وبعدين محدش عارف بكرة فية اية ....لازم اعمل حساب الزمن واسيب قرشين للعيال يستروهم فى الغلا دة ...خصوصا الواد احمد علشان حتى يساعدوة فى المعايش ....ماهو معاة واحدة خروبية ومتدلعة ...عاملة فيها بت ناس .....مابتكلش العيش ابو شلن بتاعنا ...قال اية ؟ مابعرفش ابلعة ياطنط .....طاب ماتشربى وراة حبة مية ياروح طنط ...دلع ومياصة ...ولا العفريت اللى عليها اللى اسمة بيتزا ...ماتطبخى يافالحة هوة الواد حيكفى منين فواتير التليفرى....ولا الهدوم اللى مابتجيش الا من المول ...مالها بس محلات القماش ..ماتنزل تشترى حتتين قماش وتفصلهم وتوفر لجوزها الشقيان اللى بيطلع من صباحية ربنا ...مابيرجعش الا نص الليل ....علشان يكفيها ويكفى العيال بتوع كى جى وان وكى جى تو ...مالها بس مدارس الحكومة ....الا ترد علية العيال فىمدارس الحكومة بيئة يا طنط ...وانا عايزة عيالى يطلعوا استيل ..وكل ما قول لها على حاجة تقولى مش واخدة على كدة يا طنط ..مش متعودة على الحاجات دى يا طنط ....والختمة الشريفة ما كنت عايزة الجوازة دى ...انا كنت عايزالة شيرين بت اختى ...ادب وجمال وكمال ...ومدرسة بالحصة عارفة قيمة القرش ...دا غير انها من دمة يعنى حتشيل همة ...بس هوة كدة طول عمرة عايز يعيش عيشة المعوجيين دول ...كان دايما يقولى ياما انا عايز اخد واحدة من ولاد الذوات ....عايز اناسب ناس هاى ...انا فاكرة لما جة من عندهم اول مرة ...كان فرحان قوى بكلمة مامى ودادى ...كان فرحان بالشقة الى فى الزمالك والامن اللى فى العمارة من تحت ... قالىوهوة مبسوط قوى: يامة دول قدمولى الشاى فى فناجيل ومعاة جاتوة على عربية تحفة ...دا غير السكر كان مكعبات يامة ...اهو بيشرب الفالح؟!

انا فاكرة لما جات لى فى عيد الام وجايبالى اسورة طلعت بخمس تلاف جنية ...كان باين عليها انها غالية بسانا كمان نزلت وزنتها تانى يوم .....اية جاى تقولى يعنى انك غنية ولما بتهادى بتهادى قيمتك ...بس انا ماقولتلهاش شكرا ولاحتى مرسى زى مابتقول ...ايوة خليت وشها يجيب الوان ...قولت لها اصل انا ماليش فى الدهب ...ماشى يا امانى يابت عديلة ...النهاردة ...حاجيب ممبار وسقط ...وابعت لك تيجى تفرشى جنبى على الارض وتحشى الممبار وتنضفى الكرشة ....واياك تقولى مش واخدة على كدة ياطنط ..ونشوف حدايق القبة ولاالزمالك ....فاقت لولا على صوت الست اللى وراها بتقولها دورك ياحاجة ....الحاجة لولا حطت الكارت فى المكنة وبصت للست اللى وراها وقالت والنبى يا اختى اعمل اية بعد كدة ؟؟؟!!

كل سنة وانتوا طيبين

كل سنة وانتوا طيبين

دا اول رمضان معى عيلتى الجديدة ....بجد بجد احلى رمضان كل سنة وانت طيبة ياصبرنى وانتى ياستيتة وطبعا الحنان كله ام مالك وريم اللى البوست الجاى مشاركة وجدانية منى ليها والقدر وانا وابراهيم وعاشقة الرومانسية ودكتور ياسرواحساس طفلة محبة للرومانسية وسول اللى محش سامع له حس وشمس النهار وكل اللى دخل وشرفنى فى المدونة كل سنة ورمضان عليكوا بخير وعايشيين ومتهنيين وعاملين اللى فى نفسكوا

رحلة فى دماغ بنى آدم 4

رحلة فى دماغ بنى آدم 4

حماة احمد

الحاجة عديلة حماة احمد قامت من النوم ...ركبها بتنشر عليها ....يادوب نزلت رجليها على الارض...وسندت على ايديها ....قالت فى نفسها ...جرى اية يابت يا عديلة ....انتى عجزتى ولا اية ....اوعى يابت الروماتيزم يغلبك...لا انا مش حاسكت على نفسى ...النهاردة حاروح للدكتور اللى قالت لى علية عنايات ...لما كنا فى النادى ....بتقول علية بركة ....يادوب حط ايدية على ركابها ...قامت زى الحصان ....شوف الولية المايصة قال لما حط ايدية صحت ....يعنى الدوا مش هوة اللى صحاها ....ماهى طول عمرها متدلعه وصحتها حلوة مع انها اكبر منى بسنتين ....طول عمرها بختها حلو ...جوزها مدلعها ومهنيها.....ومش مخلى فى نفسها حاجة .....حتى بناتها..... الناصحة جوزتهم معاها ....ماهى عملت شقةلكل واحدة ....حسرة علية ....طول عمرى شقيانة ...وتعبانة وماشفت يوم حلو ....البنات اتجوزوا والراجل مات...يعنى وهوة حى كان بيعمل اية ....ماهو ليل نهار كان منكد عليةوعلى عيشتى وكان كاتم على نفسى ...الا مافى واحدة فكرت تخش علية بحتة كيكة ولا نص صينية بسبوسة ...ولا يقولوا لى تعالى اقعدى معانا يومين ...بدال مانتى قاعدة لوحدك كدة ....وهوة انا حارضى اروح عند واحدة منهم ...علشان المعدول جوزها يسمعنى كلمة كدة ولا كدة ......خصوصا اللى اسمة احمد جوز امانى دة ...دة يهودى ...ماحدش بياخد منه لاحق ولا باطل ....والهبلة مش عارفة تطوية ....مش شاطرة اللى كل ماتيجى تقعد تشتكى منة ومن عمايلة ....بس والنبى ومن نبى النبى نبى لانكد علية ...واخد لها حقها العبيطة دى .....اللىمش دريانة باللى بيحصل حواليها ...دا طول النهار برة ...لاهى عارفة بيعمل اية ولا بيروح فين ....بس فالحة تقولى شغلة كدة ياماما ...لية هوة احنا مشتغلناش ولا اية ...دا تلاقية بيلعب بديلة ويتسرمح ...ايوة هوة الصنف دة كدة ......انا عارفاة ...ماهو لوماكنش بيلعب بديلة ...كان زمانة داخل عليها بجزمة ولا شنطة ولاحتة سيغة ...يبقى بيودى الفلوس اللى بياخدها فين ... مش بعيد يكون متجوز عرفى عينى عليكى يابتى ....بختك زى بخت امك ..ولا المنيل التانى اللى بيلهف مرتب البت على داير مليم ....لا...لا..والله لفوقلكوا ...بس ارجع من رحلة شارم الشيخ اللى عاملها نادى المسنين ....ورحلة مطروح اللى عملاها جمعية رسالة ...واخلص من العمرة ...واوريكوا ...النبى لا اخلص القديم والجديد ....مبقاش ورايا حاجة الراجل ومات والشغل وبقيت معاش والروماتيزم وحاروح للدكتور بتاع عنايات ايوة لازم اخد بالى من صحتى ..,,بناتى عايزينى ...قامت عديلة من السرير وراحت تتصل بعنايات تاخد منها نمرة الدكتور اللى بيحط ايدة يخلى الركب ولا ركب ابو تريكة

رحلة فى دماغ بنى آدم 3

رحلة فى دماغ بنى آدم3

حبيبة

يوم الجمعة حبيبة صحت قبل امانى واحمد ....قالت فرصة اتفرج على التلفزيون براحتى ....فتحت التليفزيون وقعدت تقلب فى القنوات ...جابت فيلم اجنبى البطل فية كان بيبوس البطلة...قالت فى نفسها هما بيبوسو بعض ولا بيعضوا بعض ....لو بابا صاحى دلوقت كان ضير القناة وقال مناظر زبالة ....ماعرفش هوة بيعمل كدة لية ؟ .... مع انة لما بيتتفرج لوحدة مابيديرش القناة ولا حاجة ...بابا دة له حاجات غريبة مش بفهمها ....فرصة وهما نايمين اجيب نيكلوديان علشان افرج على جيمى نيترون وساندى ...من زمان ماشفتهمش ....والمدارس قربت وحيغلسوا علية ...ويقولى قومى نامى علشان تصحى بدرى للمدرسة ....ماأنا اول يوم لازم اقوم بدرى علشان اقعد جنب صاحبتى هانيا واوريها الشنطة الجديدة اللى حيجيبها لى بابا ....انا حاخلى بابا يجيب لى شنطة عليها فلة ...انا بحبها قوى ...مع ان تيتا مابتحبهاش وتقول عليها اية البت الغم دى اللى على طول ملبسينها اسود ... بس انا عارفة ان بابا حايجيب لى اللى انا عايزاة ...انا بحبة قوى علشان هوة بيجيبلى كل اللى نفسى فية ...مع انة ساعات بيغلس علية ويشخط فية ويقولى قومى صلى ...انا لسة صغيرة ...تيتا بتقول كدة ....وبابا دايما يتعارك مع ماماويقول لها خلى امك تبعد عن البت ...وتبعد لية هية مش تيتا ولا اية ....وماما كمان مش بتحب تيتا ام بابا .....مع انها على طول بتجيب لنا هدايا ولعب وتدينا فلوس ...وبرضة ماما بتاخد مننا الفلوس ....لما هية مابتحبش تيتا بتاخد مننا الفلوس اللى بتديها لنا ليه....النهاردة حنروح نزور خالتى ...وحالعب مع الواد زياد كونكت فور واغلبة زى ماغلبتة الاسبوع اللى فات لما كانوا عندنا ...واغيظة واقولة يا مغلوب ....زى مابيغيظنى ويقولى يا طخينة ....طاب مايبص لنفسة وسنانة البايظة واللى مركب لها تقويم ....احمد صحى ونادى على حبيبة وقالها يابت سيبى التليفزيون وتعالى نامى جنب بابا ....هوة انتى علطول كدة سيبانى ونايمة جنب امك ...حبيبة قالت له بس بشرط تحكى لى حدوتة ...قالها ماشى يابت الكلب بس تعالى

رحلة فى دماغ بنى ادم 2

رحلة فى دماغ بنى ادم 2

أحمـــــــــــــد

جات لأحمد سفرية القاهرة تبع الشغل .....قطع تذكرة القطر ... واشترى المصرى اليوم علشان يسلى نفسة فى السكة ....وقف على المحطة يستنى القطر ...عينة جات على الساعة اللى على المحطة .....قال فى نفسة : آه يابلد.... الساعة دى من ايام الانجليز .... المحطة كلها من ايام الانجليز ... وبعدين الساعة دى بقالها عشرين سنة واقفة على ستة الا ربع...... ياه لو الزمن يقف كده ولايرجع عشرين سنة ....كان الواحد يغيير حاجات كتير ....كان يسافر برة ...ولايعمل مشروع بدل الذل اللى الواحد شايفة فى الشركة بت الكلب دى ...وينقى بقى .....ينقى واحدة حلوة كدة ....ياسلام يا واد لو تصبح تلاقى معاك مليون جنية .....أول حاجة اعملها أروح الشركة واكتب استقالتى على اوسخ ورقة ...وارميها فى وش المدير ....وقول له :يلعن ابوك وابوشركتك وابو الايام السودة اللى اشتغلتها معاك ....واضربة ...ايوة اضربة قلم سخن على وشة يطلع القديم والجديد ....وانزل من عندة اشترى عربية اوكتافيا بالتكييف والبور ....وابيع اللادا المعفنة اللى ذلانى كل يوم الصبح للى يسوى واللى مايسواش علشان يزقنى ...ولا على اية ابيعها ....ارميها ... واجيب شالية فى الساحل الشمالى ....وآكل برة ...ماقولش اوفر الفلوس ولما ارجع ابقى آكل ...وافضل جعان طول اليوم ...والاهم بقى ياحلو تدلع نفسك وتشوف لك يومين ....وتدور لك على بت حلوة كدة زى بتوع الفيديو كليب ....بس حاشطرت عليها ...آه الشرط نور ....حاشطرت عليها انها ماتهتمش بحد غيرى ...ايوة ...لاتقول عيال ولا بيت ولاطبيخ ولا غيرة ...اناوبس ...قايمة نايمة عشانى ....وكفاية كدة على ام العيال ...خلى بقى العيال تنفعها ....ماهى اصلها افترت قوى ...ولا اكنى بنى آدم يا اخى ....بقيت كارت فيزا تحطة فى المكنة يطلع فلوس ...لية هوة انا مش بنى آدم لحم ودم ومشاعر ...وبعدين حابقى جدع معاها ...عايزه تفضل على زمتى اهلاوسهلا....عايزة تتطلق هية حرة ...وساعتها حاديها قرشين حلوين .... انا عارف من دلوقت ....حتختار الفلوس .....وبعدين العيال كدة كدة حتتربى ....افرض انى انا مت ....كانوا حيعملوا اية ...حيكبروا ويتربوا ويتجوزوا ....عادى الدنيا بتمشى الواحد بس اللى بيعرضها ....وانا مش حاسيبهم كدة انا حاحطلهم قرشين باسمهم فى البنك ....اتنطر احمد على صوت الموبيل ....ماهى دى رنة المدير ...الو ..صباح الخير ياباشا ....معلش ياباشا ....والله غصب عنى ياباشا......ماهو القطر هوة اللى اتاخر ياباشا ....انا اسف يا باشا .....والله دا اول قطر بيطلع من عندنا ياباشا

اللىتشوفة ياباشا ...اتفضل ياباشا .....حط الموبيل فى جيبة ...وفتح المصرى اليوم يقرا المانشيت

الحكم باللإعدام على هشام طلعت مصطفى فى قضية سوزان تميم

رحلة فى دماغ بنى ادم1

رحلة فى دماغ بنى ادم

قررت اعيش دور قارىء افكار على المدونة بس!!!.... مش طالع فى الفضائيات!!!..... بس مايمنعش لو جات الفرصة اهبش فيها ....ماهو محدش يقول للسبوبة لأ....ولا اييييييييييييييييييييييية؟

نتكلم جد بقى...دى فكرة جديدة عبارة عن خمس دقايق فى دماغ بنى ادم وهوة مع نفسة نشوف هوة بيقول اية ؟

يارب تطلع حلوة......يارب

أمانى

بعد ما قطفت أمانى الملوخية حطيتها على الصينية ....جابت المخرطة وقعدت على الارض تخرطها...قالت لنفسها : جربت كتير وقليل ...بس الملوخية مابتطلعش ملوخية الا بالمخرطة ...لا الخلاط نفع ولا الكبة شفعت...ياه الايام بتجرى بسرعة ...انا فاكرة لما كنت باروح لجارتنا ام حمدى استلف منها المخرطة لماما ...كانت ديما تدينى طوفى وتقولى حلى بقك يابت ...الله يرحمها كانت ست طيبة قوى ...ولا عم بدر البقال هوة كمان كان بيدينى طوفياية لما كنت باجيب منة التموين ....نسيت اقول لأحمد يصور شهادة الميلاد بتاعة البت حبيبة علشان نضيفها على بطاقة التموين ....هوه مش حقنا ولا ايه ...احسن من عين الحكومة اللى مابناخدش منها حاجة ...كلة بالغلا والكوى ...لما اخلص عايزة اكوى قمصان أحمد الا يجى يفتح صوتة ....ماهى نقصاة هوة كمان ...مابخدش غير زعيق ونرفزة ...مافيش رحمة ...مافيش مرة يدخل علية بهدية ....بلاش هدية ...يقول كلمة حلوة ...الا اول كلمة يقولها وهوة داخل : الاكل جاهز؟... واقع من الجوع...طبيخ وغسيل ومسح ومكوة وطلبات عيال وطلبات جوز ...ادى الجواز اللى كنتى حتموتى علية ياهبلة ....طلبات طلبات ....دا لسة طلبات رمضان ....دا انا لازم اقول لماما تيجى تفطر معايا اول يوم ماهو ماينفعش تفطر لوحدها اول يوم رمضان.....ماانا اعمل اية؟... لاهية راضية تقعد عندى ولا احمد راضى نقعد عندها ...وانا اعملهم اية بقى ....بالمرة وانا باجيب حاجة رمضان ابقى اشترى شنطة للبت حبيبة ....مع ان شنطتها لسة بحالتها ...بس اعمل اية فى ابوها اللى مابيرفضلهاش طلب....بتتدلع ومابتذاكرش .....ياختى يعنى هما اللى ذاكروا وتعبوا وسهروا وخدوا شهادات عملوا اية؟ ...قعدوا فى البيت زى الخدامين ....وياريت عاجب ...كلة بينتش فية ...محدش مقدر ...محدش راحم....ياسلام لو الواحدة كدة يكون عندها عربية ...وتسافر كدة لوحدها بعيد كام يوم ....وافرد شعرى واقلع الطرحة ....والبس بنطلون جينز ....وبلوزة كت ....والبس مايوة وانزل البحر....واسمع مزيكا وارقص واسهر واعمل زى البنات بتوع اليومين دول واروش ....استغفر الله العظيم ...استغفر الله العظيم ...اية اللى بتقولية دة يا بت ....انتى اتعبطى ولا اية ....اييييية ....حتخيبى على كبر ولا اية ؟ ....استغفر الله العظيم فوقى يابت دا بدال ماتقولى عايزة اعمل عمرة ....بس ماهوبرضة مش حرام ان الواحدة تشوف نفسها.....والعيال اسيبهم عند ماما يومين تلاتة ايه اللى حيحصل يعنى ....مالناس بترمى عيالها بالاسبوع والاتنين....يوووة

استغفر الله العظيم اللهم اخزيك يا شيطان....خدت امانى الملوخية وراحت علشان تفورها ...قعدت تسقطها حبة حبة علشان ماتسقطش .....جرس الباب ضرب ...راحت تفتح ...لقتة احمد ...احمد دخل من الباب واول كلمة قالها :الأكل جاهز؟.....انا واقع من الجوع

خصيمك النبى تدعي له يغور

خصيمك النبى تدعي له يغور

جلبى جايد نار ...جملة طول عمرى بأسمعها بس عمرى ما حسيت معناها زى اليومين دول ...بقالى اسبوع بأغلى ...نفسى اوطى على الارض اخد طوبة حمرة ....واحدفها فى دماغ الكائن اللى فى بالى واعور بيها اهله ...واشفى غليلى ...حتقولو لى طوبة حمرة لية ...ماهو لو متغاظ منه قوى كدة ....احدفة بظلطة اهى اجمد من الطوبه ...اقولكوا لاااااااااااااا ...لانى اتعلمت ايام زمان لما كنا بنتعارك مع العيال بتوع سنة ستة اللى فى المدرسة اللى قدامنا ....ان الطوب الاحمر احسن فى التعوير....علشان بيتفرفت فى الجرح من جوة يقوموا فى المستشفى يضطروا ينضفوا الجرح قبل ما يخيطوة ...وبكدة الزبون يتعذب تلت مرات ...مرة لما الطوبة تيجى فى دماغة ...ومرة لما ينضفولة الجرح ...ومرة لما يخيطوة ...نوع من انواع العذيب الذيادة ....زمانكوا بتقولوا دا ارهابى وغلاوى ومعندوش رحمة ...بس هوه يعنى شفتونى عملت حاجة ...اهو كلام ابن عم حديت ...فضفضة تهوى على النار اللى جوايا من الكائن اللى رجلة والقبر ومش عايز يتقى ربنا ....ياشيخ عيب على سنك دا انت عندك خمسة وسبعين سنة يا متصابى ...بتبيع دينك بدنياك يا شايب ...تبيع دينك علشان تترقى يا عايب ...يا اخى ترقية الندامة عليك وعلى اهلك ... ولعت فى الخلق وقولنا الناس هيه اللى غلطانة كان المفروض تمسك طفاية حريق زى ماهى ماسكة الموبيل .....غلطت فى الطرحة وقولنا زلة لسان من كائن بيقول انة فنان ....اخرة المتمة جاى تصقف وتكافىء اللى بيغلط فى الاديان .....اقولك اية ...روح يا شيخ الهى وانت جاهى تترقى وتغور من وشنا ...وتسافر لاسيادك ...وتنول رضاهم قادر يا كريم والهى تموت هناك ....ولا بلاش لساعتها يرجعوك على حسابنا ويدوك لقب شهيد ما هو كله دلوقت بقى شهيد ...والشهيد بقى ارهابى ...؟!!!!

على فكره انا رجعت فى كلامى .... والختمة الشريفة خسارة فيك الطوبة الحمرة ...خليها... يمكن تنفعنا ...اهو نحك بيها ضمايرنا يمكن تنجلى ولانخوتنا يمكن تورد ...ولا نحطها قدامنا تفكرنا لما كنا عيال رجالة قبل مانكبر ونقعد ندعى زى الولايا

الحبال الدايبة

الحبال الدايبة

وانا صغير فى المدرسة....كانوا المدرسين يحكولنا على السراب ....ويقولولنا لما تمشى فى الصحرا ....تشوف مية قدامك ...بس لما توصلها ماتلاقيهاش ......عجبتنى قوى حكاية السراب دى ....وبقيت ادخلها فى كل كلامى وحكاياتى ......وبقيت ادخلها فى مواضيع التعبير علشان اخد نمرة حلوة......كل دة وانا لاشفت السراب ولاغيرة.....وفى يوم كنت مسافر على الطريق الصحراوى الساعة اتنين الضهر .....وشفت السراب على الاسفلت.....بقيت اجرى بالعربية وهوة يجرى قدامى ....كانت لعبة حلوة هونت عليا المشوار .....وخلصت السكة بسرعة ...سرحت شوية مع نفسى ....لقيت السراب مش بس فى الصحرا ولاعلى الاسفلت .....اكتشفت ان الحياة كلها سراب .....من ساعة ما بنيجى الدنيا واحنا بنجرى ورا سراب كل مايتهيئلنا ان احنا وصلنا نلاقى سراب ابعد نقوم نجرى وراة ....بنجرى ورا الشهادة وتطلع سراب ....نجرى ورا النجاح نلاقية سراب ....الفشل سراب ....الحب سراب ....الجواز سراب ....حتى العيال هما كمان سراب ....الصحاب سراب ....الاعداء سراب .....الفلوس سراب ....المتع والفسح سراب ....الزعل سراب ....والسعادة هية كمان سراب ......وكل ما نخلص سراب نجرى ورا سراب ...نجرى ونجرى ونجرى لغاية ما ينقطع نفس اللى جابونا ....سألت نفسى : احنا بنعمل فى نفسنا كدة ليه؟....مالقيتش غير اجابة واحدة : ما اهلنا كانوا بيعملوا كدة .....سألت تانى : طاب احنا بنقلدهم لية ؟....مالقيتش برضة غير اجابة واحدة : غباوة ...ايوة غباوة ....والله غباوة ...بنجرى ورا سراب الدنيا وسايبين الحقيقة اللى احنا جايين الدنيا علشانها ....نعبد ربنا ونعمل لاخريتنا ...مش لاقى حاجة اقولها غير المثل اللى دايمنا تقولة الحاجة : اتعلقى يا خايبة بالحبال الدايبة

هٌوة احنا غلابة ولا عٌبط

هٌوة احنا غلابة ولا عٌبط

اشترى بدلة نضيفة او أجرها ....لمع الجزمة ...واحلق عند جولدن فينجر واضرب الجيل ....وعدى على اى مدير قناة فضائية...اومذيعة ...او مٌعد ...اوحتى ريجيسير ....وظبط معاة تطلع فى برنامج ....واختار موضوع ...اى موضوع !!! واعمل حاجة من اتنين يا تكشكشها قوى يا تعرضها زيادة عن اللزوم يعنى يا تقول حرام والدين بيرفض ....يا تقول فكوها وسيبوا الناس تعمل اللى هية عايزاة .....وياريت تختار موضوع فى الدين ...وياسلام بقى لو اخترت موضوع عن الجنس ولا الشذوذ ....فلة يا معلم ....ومتنساش شوية حاجات كدةحتنفعك وتزود السبوبة ....اول حاجة اختار الصفة اللى حتتحط على الشريط ...عندك شوية حاجات اختار منها اللى يعجبك ....عندك استشارى وطنى ...خبير دولى ...محاضر عالمى ....فلة مالتى ناشيونال .....روش اخر حاجة ....تانى حاجة خلى المذيعة او المذيع اللى حيقدمك ....يقول على الشهادات اللى خدتها من اكسفورد.... ونورث كارولينا ...ويوكوهاما ...داغير الخمستاشر دبلومة والستة ماجستير ....الاربع دكتورهات .... وياسيدى اللى مش مصدق يروح اكسفورد ولا يوكوهاما يسأل فى الارشيف .... وطبعا مش حقولك .... لما الكاميرا تيجى عليك اتكسف كدة واتواضع ....وابدا بقى وسخن وشعلل زى مانت عايز ...وكل ما تهلفط زيادة وتسخن وتشعلل ...السبوبة حتزيد ...ماهى الاتصالات حتزيد..... والمداخلات حتزيد ..والفاصل ونواصل حتزيد ...والاعلانات حتزيد ....بس نصيحة بسرعة حلقتين تلاتة ورا بعض على كام ندوة كدة على الماشى ....علشان احنا بنزهق بسرعة .....نصيحة كمان حب لاخيك ما تحب لنفسك ....الهط وسيب غيرك يلهط ......ماتنساش ان فية طابور من المستشارين والمحاضرين والمبدعين اللى قاعدين على قهوة الانتاج الاعلامى مستنين السبوبة ..... وتحيا مصر ويحيا شعب مصر الغلبان ال......طيب ويكتر يارب مستشارية وخبراءة ومحاضرية
رحت لابويا وانا مذهول قولت له يابا : الكلب ركب الجمل
رد بهدوء غاظنى : ماهو يابنى الحق علية نخ لية

وحشتونى

وحشتونى

وحشتونى بجد وقوى كمان

شكرا جزيلا لصبرنى وام مالك على السؤال وبرضة شكرا للى سأل عنى بس فى سرة .الحمد للة مش عيان ولا بصيف بس كنت بعيد عنوكوا بوضب الشقة يعنى ببساطة ساعات بانام فى اوضة النوم الصبح الاقينى فى البانيو........ اسبوع وافوق ونرجع للكتالوج اوعوا تكونوا نسيتوة
سلام ياعائلتى الكبيرة

الكتالوج (9)

الكتالوج (9)

خدعة العمر

طلعت من الباب ويادوب نزلت سلمتين ....رجلى مابقتش شيلانى ....رحت قاعد على السلم ....ماحسيتش باية اللى بيحصل حواليا ....ولا مين طالع ولا مين نازل ...كنت عامل زى اللى قاعد فى اوضة ديقة فى بدروم ....شباكها حديد باصص على الرصيف ... جدرانها متبيضة بالجير ومنشعة مية من الرطوبة ....نورها جاى من لمبة سهارى بتضلم اكتر ما بتنور ....وبابها خشب مسوس مقفول بترباس كبير ...وانا جوة الاوضة دى ونفسى مكتوم لا قادر يطلع ولا قادر يدخل ...وصوتى محبوس والعرق مغطينى من راسى لرجلية .... فوقت على صوت ست عجوزة وهية بتهزنى وبتقولى مالك يابنى فية حاجة ....بصيت لها وماردتش ...والله كنت عايز ارد بس صوتى ماكنش قادر يطلع ......سالتنى تانى فية حاجة يا ضنايا ...اتسندت على الدرابزين ووقفت ...وقولت لها لا ياأمى مافيش حاجة ....وطلعت من باب العمارة ووصلت للعربية وفتحت الباب ....اول مرة اخد بالى انى عندى عربية ....بقاللى عشرين سنة با سوق ....واول مرة اخد بالى انى عندى عربية ....طلعت الشقة ولأول مرة برضة اخد بالى ان فية يافطة على الباب عليها اسمى ....وحمدت ربنا ان البنات وامهم فى النادى علشان مايشوفنيش بالحالة دى ....اية دة وكمان عندى اشتراك فى النادى ....عملتة امتى دة ؟!....اترميت على السرير ....وعينى لزقت فى السقف ....وشفت فيلم قصة حياتى ....من ايام ما كنت بانط من على لسور المدرسة علشان اروح السيما اشوف فيلم بروسلى .....لغاية مادخلت الكلية وافتريت فى الكفتريا مش المحاضرات طبعا ...ولما عديت على الجماعات الاسلامية ولما ضحكوا علية وخلونى اوزع منشورات ....اللى لغاية دلوقت ماعرفش كان فيها اية ...بس كان دفاع عن الاسلام ....!!! وشفت ايامى فى الحزب الاشتراكى الوحدوى التقدمى .....والجيش والصحرا وبرانى اللى من ليبيا مسافة نص ساعة ....والسنتين ونص اللى دورت فيهم على الشقة علشان اتجوز ....والبنات اللى اتعمل فيهم مجهود غير طبيعى علشان يجوا ....والشغل وصراعاتة ....والترقية والمدير ومدير المنطقة ...والامانى اللى ماتحققتش والاحلام اللى اتقلبت كوابيس ......مشوار ابن كلب ...مالوش اى لازمة ....ايوة مالوش اى لازمة ...ماهو اخر المشوار ...رقم متعلم علية بالماركر .....ولستة طويلة الممنوع فيا اكتر من المسموح ...واوامر وان ماكنش اوامر تبقى نصايح وان ماكنتش نصايح تبقى مصمصة شفايف ....وحبة عين امة ....وياكبدى علية دا لسة صغير وولادة لسة لحمة حمرا ....ومبقاش غير انى اعمل صوان واجيب مقرىء واقف اخد العزا فيـّة ....وفجأة خطر على بالى الاية الكريمة اللى بتقول . قالى تعالى : كبر مقتا عند الله ان تقولوا ما لا تفعلون . صدق الله العظيم . قولت لنفسى هوة اللى على الشط عوام ولا اية اجرى ياواد على الكتالوج ..... قمت اتوضيت ومسكت المصحف وقريت ....

قالى تعالى : هو الذى خلقكم من طين ثم قضى اجلا واجل مسمى عندة ثم انتم تمترون .صدق الله العظيم .الانعام 2

قالى تعالى : ولنبلونكم بشىءمن الخوف والجوع ونقص من الاموال والانفس والثمرات وبشر الصابرين . صدق الله العظيم . البقرة 155

قالى تعالى : ام حسبتم ان تدخلوا الجنة ولما يعلم الله الذين جاهدوا منكم ويعلم الصابرين . صدق الله العظيم . ال عمران142

قالى تعالى : وعسى ان تكرهوا شيئا وهو خير لكم . صدق الله العظيم .البقرة 216

بعد ماخلصت قمت لبست الترينج ونزلت علشان العب مع العيال فى النادى ...وحاكمل مشاريعى ...وحكمل المدونة ...وحكمل حياتى ...وحنعيش يعنى حنعيش ...بس المرة دى حاخد بالى اكتر واستمتع اكتر وحاعيش الحياة اكتر واكتر ...

الخدعة بقى فين ....شوف ياسيدى ...وانا رايح النادى رن الموبايل ....دكتور المعمل اللى عملت فية التحليل ....قالى عايزينك ضرورى فى المعمل ....دخلت علية ...قام من على المكتب وسلم علية وهاتك يا اسف ويا اعتذارات ...قولت له ياعم لخص فية اية ...قالى تحليلك اتلخبط ما واحدة اسمها اسلام ...كانت جاية تعمل تحليل سكر حمل ...وبدال مالدكتورة تكتب اسمها على التقرير كتبت اسمك ....وعطانى التقرير بتاعى اللى طلع مافيهوش سكر ....وقالى دى ورقة تعمل فيها التحاليل اللى انت عايزها لمدة ست شهور ببلاش ......قطعت الورقة وقولت له المهم تشوف الست اللى طلعتوها ماعندهاش سكر دى ...انت عارف ان كدة يبقى خطر على البيبى ....شوفتوا بقى كنت حاطلع واحدة ست وحامل كمان ............ بس خلاص

فاصل اعلانى ونواصل تانى

استرجل ياعيل

عارف البغل جامد لية ؟....علشان بياكل شعير .....عارف التور مفترى لية ؟....علشان بياكل شعير ...عايز تبقى جامد ؟.... عايز تبقى مفترى ....استرجل واشرب انت كمان مية شعير ...قربع علبة تبقى عشر رجالة فى بعض ....اتصل بـ 0900 توصلك العلبة لغاية باب النادى ...

للتواصل مع شركة قربع لمشروبات البهايم

العنوان : معصرة الطوالة .... زريبة المعلم قربع ......توشكى

E.mail : ARSAK @ HABAL .com

الكتالوج (8)

الكتالوج (8)

ظلم نفس

ممكن يكون الفرق فى السن هوة السبب ...ماهو الراجل عندة اربعين سنة والست عندها خمسة وعشرين سنة ...ولا يمكن علشان امة الست العجوزة قاعدة معاة فى الشقة....ولاجايز علشان الراجل موظف حكومة ومرتبة على قدة....وبيشتغل ليل ونهار ومش فاضى يفسح ....ولايكونش حماتة اللى بتدخل فى حياتة لغاية ماوصلت لجدولة مواعيد الحقوق الشرعية ......ولااحتمال يكون خالها وخالتها وعمة واخوة الكبير اللى كانو بيهدوا النفوس ....ولاربما تكون اختة اللى عندها تلاتين سنة ولسة ماتجوزتش يكون لها يد ...ولايكون ابن خالتها المحامى اللى قوى قلبها واقنعها انها حتطلع كسبانة من الجوازة والف مين يقدر جمالها ويتجوزها بعد ماتتطلق...ولا المستشار ابن عمة اللى اقنعة انه ممكن يمرمطها فى المحاكم وفى الاخر حتخلع وتسيب الجمل بما حمل ...ولاتكونش محكمة الاسرة اللى قوت المفترى وجات على الغلبان ...ولاهوة افترى الرجالة ولايكون كيد بنات حوا ...ولا قلة العقل ....ولا الموروثات المايلة بتاعة جوزك على ماتعودية وادبح لها القطة ...ولا يكونش علشان ماتفقناش من الاول ....من الاخر يولعوا الاتنين بجاز ...كل واحد يستحمل اللى بيعملة فية عقلة ....اللى مزعلنى ان كل دة حصل بعد ولادة يوسف ....واللى ماشفش ابوة رغم انة دلوقت عندة سنتين ....مع ان ابوة خد حكم رؤية ....بعد ماطلبها فى الطاعة لما هية رفعت علية قضية طلاق ولزقت فيها قضية نفقة بس هية ماسكتتش ....ورفعت علية قضية تبديد قايمة .....داغير قضية الضرب اللى ماعرفتش تجيب عليها شهود....وطبعا كل قضية قصادها قضية ...دا غير استخدام التكنولوجيا ....فى الضغط النفسى ....يعنى الرسايل اللى على الموبيل اللى بتجيب سيرة الام والاب والاخت والسمعة ....والاحلى بقى ...ورق القضايا اللى بيتصور ...ويتحط فى ملف علشان الواد لما يكبر يشوف امة كانت بتعمل اية فى ابوة ....كل دة حصل فى تسع شهور جواز!!! ...هوة السؤال هنا .... لية كدة ؟؟!! اية اللى خلاهم يعملوا كدة ؟!! اخر ماذهقت من التدوير على الاسباب رجعت للكتالوج اللى محدش بيبص فيه لقيت الموضوع ابسط مما يمكن بس المشكلة ان الكتالوج محطوط فى دولاب الصينى اللى بيسموة دلوقتى النيش .....وبعدين يا اخى لسة حاقوم وافتح النيش وابص فى الكتالوج يا اعم ارحمنا دا هوة اللى بيقول ...يارب ارحمنا دا انا بقى اللى بقول

قالى تعالى : وان خفتم شقاق بينهمافايعثوا حكما من اهلة وحكما من اهلها ان يريدا اصلاحا يوفق الله بينهماان الله كان عليما خبيرا . صدق الله العظيم. النساء 35

قالى تعالى : خذ العفو وامر بالعرف واعرض عن الجاهلين .صدق الله العظيم الاعراف 199

قالى تعالى : واذا طلقتم النساء فبلغن اجلهن فامسكوهن بمعروف او سرحوهن بمعروف ولا تمسكوهن ضرارا لتعتدوا ومن يفعل ذلك فقد ظلم نفسه ولا تتخذوا آيات الله هزوا واذكروا نعمة الله عليكم وما انزل عليكم من الكتاب والحكمة يعظكم به واتقوا الله واعلموا ان الله بكل شىء عليم. صدق الله العظيم .البقرة 231

تاج وامرى لله

يا اخونا اتدبست فى تاج من سول........ ماشى ماشى

من أنت ؟

واحد من سبعين مليون واحد

وما الذى تفعله هنا ؟

اقول اللى فى نفسى

إسرائيل تقصف كل جنوب ممكن بحثا عنك ، أى شمال ستقصد؟

اكيد اللى حضرب منة اسرائيل

أنت مكلف بحذف حرف من حروف اللغة العربية .. أيها ستختار ولماذا ؟

السين ..لانة مأجل كل حاجة فى حياتنا

لو قدر لك أن تدخل السجن فما هي القضية التي تتمنى ان تدخل بها إليه؟

لا يا عم الا السجن

بالمناسبة.. منذ متى اكتشفت نفسك؟

وانا عندى 34 سنة كتير مش كدة بس انا اللى لاقيها لوحدى

على مفترق طريق الافتتان ، اليمنى تقول ( إلى حلمك ) واليسرى تقول : ( إلى مالم يحلم به البشر ) ، أي الطرق ستسلك ؟

لو فهمت السؤال صح ...انا لا عايز اروح لا يمين ولا شمال كدة رضا وربنا يحسن ختامنا

نحن لا نعيش حياتنا بل نتعلم فيها كيف نعيش ما تعليقك؟

صح بس المفروض ما نقعدتش كتير نتعلم

بجملة واحدة فقط أكتب تعريفاً لكل كلمة من الكلمات التالية

الوطن

بجد بجد تحيا مصر

الأم

الحضن والدفا والضهر

الليل

دماغ يا معلم

الحب

هوة اللى بيدينا الامل

أمريكا

واحد بيدور على مصلحتة زعلان منة لية ما تعمل زية!

المرأة

لو رجعت مرأة الدنيا حتبقى حلوة

الصمت

والله العظيم دهب وبندقى كمان

الانترنت

نعمة كبيرة محدش عارف قيمتها

أخترمنصباً واتخذ قرارا ؟

وزير الشباب والرياضة

اللعبة اللى متحققش بطولات حألغيها

قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟

مستتنيين لما يتجوزوهم بعد كدة مش صموت بقى ....الخرس حيبقى من نصيب عم قيس وصحابة

أن تكون مطلوبا لارتكابك جريمة ، خير لك من ألا تكون مطلوباً مطلقاً " ، هل تتفق مع هذه العبارة ؟ علل

هوة دة يا دة ؟!!!

إلى أين تمضي كلمات الحب .. بعد أن نقولها؟

الى غير رجعة

هل تجد علاقة بشكل أو بآخر بين المرأة وقطاع الطرق ؟

الاتنين بيخطفوا اللى معدى

هذا فراق بيني وبينك .. متى ولمن تقولها ؟

مافيش فرق بين حد والتانى كلنا بشر وكلنا بيتنا من ازاز

كيف هو غداً ؟

انت عايز تشوفة ازاى؟؟؟؟

تمرر التاج لمين ؟

الدكتور محمد الزبون الجديد صاحب مدونة قرات لك

الزائر رقم الف لمدونى

صبرنى

ريم

ام مالك

ستيتة

د ياسر عبد الفتاح

نبضات قلب ولهات

الكتالوج (7)

الكتالوج (7)

آآآه ....يادماغى

عجيزة ....ابوة سماه كدة ... تقولش قلبة كان حاسس ....عجيزة اتخرج من كلية الآداب قسم علم نفس .... عجيزة لسة بابا وماما ربنا يديهم الصحة ويديم عليهم المعاش بيصرفوا علية ...عجيزة مافيش قهوة ولا كازينواولا سيبر فى البلد مايعرفهوش ...عجيزة يقوم من النوم كل يوم الضهر ....وعلى اول كشك سجاير يشترى العلبة الكليوبترا البوكس وعلى القهوة عدل ...ويديها فى دومينوا عادة وامريكانى لغاية العصر ...يروح يتغدى وينام ......يقوم المغرب وجرى على السيبر لغاية الفجر ..... بقالة على الحال دة خمستاشر سنة من يوم ما اتخرج ....ابوة وامة متحسرين علية ...ومش عارفين يعملوا معاه اية ....بيقول انة مستنى لما الحكومة تشغلة ....عجيزة استاذ فى الشكوى ورئيس قسم احلام اليقظة ودكتوراة رمى الجتت...قالى : ماهو لو كنت دخلت طب كان زمانى شغال من اول ما اتخرجت ...قولت : ومدخلتش طب لية يا عجيزة ...قالى : ماهو انا مابحبش العلوم ..وبعدين يعنى لو كنت دخلت علمى ...تفتكر يعنى كنت حاجيب مجموع ...انت مابتعرفش هما بيعملوا اية فى التصحيح ...دول مابينجحوش غير اللى بيعرفوهم ....مانتش سامع عن الامتحانات اللى بتبقى فى ايد العيال قبل اللجنة ..قلت : طاب ماشتغلتش لية بشهادتك ؟! ... قالى : وهيه دى شهادة ...ماهو ابويا بقى الله يسامحة هوة اللى غصب علية ادخل الكلية الهباب دى ....ماهو لو كان سابنى اختار الكلية اللى على مزاجى كان زمانى بقيت حاجة تانية ....... قولت : طيب ماتعلمتش صنعة لية ؟!... قالى : اية ...صنعة ...ميكانيكى يعنى ولا سروجى !!!.....آه ...علشان محدش يرضى يجوزنى بتة ...ماهى الناس دلوقتى مش عايزة غير الشهادات ....ماحدش بيبص للصنايعية ....وبعدين بعد التعب اللى تعبتة فى التعليم عايزنى ابقى صبى ميكانيكى ولا صبى نجار ...طبعا مستحيل ...كرامة الواحد بالدنيا ....قولت: طاب وبعدين يا عجيزة ؟!....قالى : وبعدين اية الحكومة اكيد حتشغلنا ...ماهو مش معقول حتسبنا كدة ....قولت : طاب لو الحكومة ما شغلتكش ؟ .... قالى : انت عارف اية اللى حيلخص؟... ان الواحد يجيب لة عربيتين ملاكى زيرو ....وياجرهم ...فى الافراح ...فى المشاوير ...انت عارف الساعة بكام ؟ الساعة بميت جنية ...يعنى لو العربية اشتغلت ست ساعات بس ...يعنى العربيتين يجيبوا الف ومتين جنية فى اليوم يعنى فى الشهر ستة وتلاتين الف جنية ...لخص يا عم الحاج ...سألتة : وانت معاك تمن العربيتين ؟ ...قالى لا ما انا حاجيبهم تقسيط ....سالته تانى ...انت معاك المقدمة ؟ قالى ربك كريم.... وقبل ما ارد علية لقيتة بيقولى : انا مضطر امشى علشان عندى بولة استيميشن ....عايز اعوض واخد بتارى اصلهم طلعونى الكوز امبارح ....سلام .....سالت نفسى هوة عجيزة زعلان لية انة طلع الكوز امبارح ...هوة مش عارف انة الكوز بقالة خمستاشر سنة ...بس تقول اية ماهو مابصش فى الكنالوج ..

قالى تعالى : ان الله لا يظلم الناس شيئاولكن الناس انفسهم يظلمون. صدق الله العظيم .يونس 44

قالى تعالى : وأن ليس للانسان الا ماسعى . صدق الله العظيم .النجم 39

قالى تعالى : الذين ضل سعيهم فى الحياة الدنيا وهم يحسبون انهم يحسنون صنعا.صدق الله العظيم الكهف 104

قالى تعالى : ان الله لا يغير ما بقوم حتى يغيروا ما بانفسهم .صدق الله العظيم . الرعد 11

فاصل اعلانى ونواصل تانى

هوّة توتو أحسن منك؟

توتو الولد الجميل بياكل بيتزا مط ...وانت ياحبيبى بابا حارمك من البيتزا ...توتو الولد الجميل بياخد هدية كمان ...يعنى توتو الجميل بياكل ويلعب... وانت يا عينى قاعد فى البيت بتاكل اكل ماما المعفن ...قوم بسرعة اتصل بـ 0900 من ورا بابا ...ايوة من ورا بابا علشان تدبسة ...ماهو يستاهل علشان مابيحبكش ....ياللا ياحبيبى توتو مش احسن منك

للتواصل مع المعلم مط :

العنوان : حوواوشى المط ....امام مقلب الزبالة .....الهرم .

E.mail : ARSAK @ HABAL .com

الكتالوج (6)

الكتالوج (6)

توكيل تويوتا

ابو تقى ميكانيكى شاطر ….كان شغال عند الاسطى احمد كبالن فى ورشتة …ورشة عظمة …والزباين بالكوم …بس الاسطى كبالن كان بيضحك على الزباين ….كان يصلح قطع الغيار ويحاسبهم على تمن قطع غيار جديدة …ولما بيغير زيت العربية …يغير من الزيت بتاع الالف كيلو…ويحاسب على ابو تلتلاف كيلو….كانت العملية ماشية معاة نار …كل يوم يرجع لة بالفين تلتلاف جنية …كان بيدى ابوتقى مية وخمسين جنية فى اليوم ….بس ابو تقى ماكنش مبسوط …كان شايف ان الفلوس دى مش مظبوطة …ابو تقى بعد ماخلف تقى …قرر انة يسيب الشغل عند كبالن …ويضحى بالمية وخمسين جنية …قال انة عايز يوكل بتة حلال …ام تقى باعت حتيتين الدهب اللى معاها واجروا محل ايجار جديد …ابو تقى اشترى عدة وظبط المحل واتكل على الله ….عدى على ابو تقى سنة صعبة قوى …يادوب بيقدر يجيب العشا وهوة مروح كل يوم …..ابو تقى فضل صابر كان يقول فى نفسة اتقى ربنا يا واد …وبصراحة مراتة كانت دايما جنبة كانت تقولة اصبر الحلال مافيش احسن منة …وبعدين ياخى شوفتنى اشتكيت …و بعد شوية ابو تقى كان نايم على السرير بيفكر …بدأ الشيطان يلعب بدماغة …يعنى لو كنت بتعمل زى كبالن مش كان زمانها مبشبشة …وبعدين هوة بيعمل اية يعنى !! ماهى العربيات بتطلع من تحت ايدة زى الفل ومحدش اشتكى ….والبعدين الزبون من دول راكب عربية بالشىء الفلانى اية يعنى لو اتقلب فى مية ولا متين جنية …مش انت اولى ترجع بكيلو لبن للبت ….ولا تجيبلها لعبة بدل ماهى بصة لعيال الجيران …ياعم دماغك بقى …ماهوا كلة على دا الحال …ابوتقى راح تانى يوم المحل وكان مقرر انة يعمل زى كبالن …وجة اول زبون …ابو تقى مقدرش يعمل زى كبالن …وعمل اللى يرضى ربنا …الزبون طلع يجرب العربية ورجع يشكرة وقاله عمر العربية مااتظبطت كدة …ربنا يبارك لك ….ومرت الايام …وبرضة هما هما الزباين ماحدش جديد والدنيا مزنقة والمصاريف بتزيد …بس ابو تقى صابر …وفى يوم ماكنش عايز ينزل الشغل …كان زهقان وقرفان …مراتة قعدت جنبة وقالت لة قوم يابو تقى اتوضى وصلى ركعتين وانزل المحل دا ربك رب كريم وعالم بالحال ….حتفرج والنبى لا تفرج …نزل ابوتقى وفتح المحل ..ويادوب لسة بيقعد على الكرسى ولقى عربية تويوتا اخر موديل وقفت قدام باب المحل …نزل من العربية باشا كدة من ابو نضارة سودة …الراجل قالة انت ابو تقى ؟ ابو تقى اترعب وقلة ايوة يا باشا… خير …. قاله احنا توكيل تويوتا فى مصر ومش فى خطتنا نفتح مركز صيانة هنا …فقلنا نتفق مع حد هوة اللى يقوم بعملية الصيانة باسمنا …وعملنا ابحاثنا وعرفنا انك اشطر وانضف واحد فى المنطقة …فقررنا انك تكون مسئول على الصيانة لكل عربيات تويوتا …ابو تقى مضى العقد مع الباشا …نسيت اقولكوا …احمد كبالن فاكرينة …بيشتغل دلوقتى صبى عند ابو تقى …ماهو قفل الورشة …طبعا مش محتاجة اقولكوا لية ….بس حقولكوا …. علشان مابصش فى الكتالوج ….لكن ابوتقى بص ….

قالى تعالى : ومن يتق الله يجعل له مخرجا (2)ويرزقة من حيث لا يحتسب ومن يتوكل على الله فهو حسبه ان الله بالغ أمرة قد جعل الله لكل شىء قدرا (3) صدق الله العظيم . الطلاق

قالى تعالى : أفوا الكيل ولا تكونوا من المخسرين . صدق الله العظيم .الشعراء 181

قالى تعالى : وأوفوا الكيل اذا كلتم وزنوا بالقسطاس المستقيم ذلك خيرواحسن تأويلا . صدق الله العظيم . الاسراء35

فاصل اعلانى ونواصل تانى 2

فاصل اعلانى ونواصل تانى

سيراميكا بوكس

قومى يا خايبة ...اية اللى مقعدك ...اية مش عايزة جوزك يبقى زى مهند ولاحتى زى يحيى ...قومى وغيرى السيراميك ....مع سيراميكا بوكس .... الزبون حيتزحلق وهوة بيحلق ...تقوم راسة خابطة فى الحوض...اول حاجة حتتاكدى ان السيراميك بتاعنا جامد ومابيتكسرش ...تانى حاجة جوزك حيفقد الذاكرة .....تقومى تشكلية زى مانت عايزة ..تخلية مهند تخلية يحيى ...براحتك بقى ...قومى ماتتردديش ...اتصلى بـ 0900 حيجيلك السيراميك على العربية ...

للتواصل مع المعلم ابوالعينين بوكس

العنوان : كومبنيشن انترناشيونال ليمتد .....الفجالة ....مكتبة ولا زمان يا كتابى سابقا

E.mail : ARSAK @ HABAL .com

الكتالوج (5)

الكتالوج (5)

عم شيبة كان رئيس قطاع كبير فى شركة كبيرة ...عم شيبة بقى راجل عجوز عندة تمانين سنة....فى يوم... ساعة مغربية... طلب من الممرضة انها تقعدة فى الجنينة ...جنينة الدار ...دار المسنين ...نادية سندتة ووصلتة للجنينة ...جنينة جميلة ورد وشجر وزرع وحمام سباحة ...بصراحة الدار كلها جميلة... خدمة ورعاية كل حاجة موجودة ...ماهى غالية هية كمان خصوصا لما الاقامة تبقى فى اوضة سنجل ...زى اوضة عم شيبة كدة....نادية بعد ماقعدت عم شيبة جابت لة كباية ينسون وسابتة ومشيت ...مسك عم شيبة الكباية بايدة اللى بترتعش وخد اول شفطة من الكباية ..وقع شوية يانسون على الترينج ...عم شيبة قال فى نفسة الله يكون فى عون الاولاد ...ما نا عجزت برضة..ايدى بترتعش...والاكل بيقع على هدومى.... ومبقدرش البس نفسى ....ولا اوكل نفسى ..بقيت حمل عليهم ...بس ماهو انا ياما كنت باساعدهم وهما صغيرين ...بوكلهم واشربهم والبسهم ...وكنت باربطلهم رباط الجزمة... ماهم ماكنوش بيعرفوا يعملوا العقدة... اينعم انا ماعدش اقدر اقف تحت الدش لوحدى علشان استحمى ..بس كان نفسى ما يقرفوش منى ...ويفتكروا لما كنت بتحايل عليهم علشان احميهم ...ولما كنت بجيب اللعب واحطها فى البانيو ...واشتريلهم الشابو اللى مايخليهومش يدمعوا ...انا عارف انى بكرر كلامى واعيد وازيد فى زكرياتى ..انا عارف انها حاجة تزهق انهم يسمعوا الحكاية اكتر من مرة ..بس ياريت يفتكروا انى كنت باعيد وازيد واكرر فى حكايات وحركات علشان يضحكوا ويتبسطوا .......ايوة رجلى مابقتش تقدر تشيلنى ...مش مخليانى اعرف اتحرك زى زمان ياريتهم يرحموا ضعفى ويعرفوا ان ذاكرتى اللى بتروح وتيجى ..مابتسعفنيش فى الرد عليهم فياريت مايتعصبوش علية ويزهقوا منى ما ياما قعدت قدامهم وصبرت عليهم علشان يقولوا الكلام صح .... انا اللى علمتهم ازاى يتعاملوا مع الدنيا وعلمتهم اية الصح واية الغلط ......نفسى ما يقولوليش اية اللى يصح واية اللى ميصحش .... لنا لسة بقدر افرق بين اللى عايزة واللى مش عايزة ...بلاش يفرضوا عليا حاجة .....انا مش طالب كتير انا عايزهم بس يقدروا شيبتى ...يصبروا علية ...يفهمونى ...ويغفروا لى زلاتى ويستروا عوراتى ...وجايز اكون غلطت معاهم ولاعملت حاجات هما شايفين انها ضرتهم بس والله ماكنت باعمل حاجة الا ونيتى مصلحتهم ...انا كنت معاهم وهما بيتولدوا ...ونفسى يكونوا معايا وانا بموت ...عايزهم جنبى اكلمهم واحضنهم ....عم شيبة فاق على صوت نادية وهية بتقول لة عايز حاجة يا عم شيبة ... عم شيبة مسح الدمعتين اللى نزلوا من عنية و قال لها وصلينى لاوضتى يا بنتى ...نادية وصلتة للاوضة ..طلع عم شيبة على السرير ...حط راسة على المخدة ...نادية غطتة ...ابتسم لها وقال لها ربنا يبارك لك يابنتى ...عم شيبة راح فى النوم ......تانى يوم الصبح ......نادية اتصلت بولاد عم شيبة علشان يعملوا اجراءات الدفن والجنازة ...الولاد ماكنوش مع عم شيبة وهوة بيموت زى ما كان معاهم وهوما بيتولدوا ...الحقوا بصوا فى الكتالوج علشان ماتعملوش زى ولاد شيبة ماهى جاية جاية ...وبكرة ولا بعدة حنكون كلنا عم شيبة الله يرحمة ويغفر لأولادة

قالى تعالى : وقضى ربك الا تعبدوا الا اياة وبالوالدين احسانا اما يبلغن عندك الكبر احدهما او كلاهما فلا تقل لهما اف ولا تنهرهما وقل لهما قولا كريما . صدق الله العظيم . الاسراء 23

قالى تعالى : واخفض لهما جناح الذل من الرحمة وقل ربى ارحمهما كما ربيانى صغيرا . صدق الله العظيم .الاسراء 24


قالى تعالى : ووصينا الانسان بوالدية حملتة امة وهنا على وهن وفصالة فى عامين ان اشكر لى ولوالديك الى المصير .صدق الله العظيم . لقمان 14

قالى تعالى : وان جاهداك على ان تشرك بى ما ليس لك بة علم فلا تطعهما وصاحبهما فى الدنيا معروفا واتبع سبيل من اناب الى ثم الى مرجعكم فأنبئكم بما كنتم تعملون . صدق الله العظيم . لقمان 15

فاصل اعلانى ونواصل تانى

فاصل اعلانى ونواصل تانى

الاول كدة علشان ندى كل واحد حقة فكرة الفاصل دى فكرة سول عجبتنى فعملتها ...فشكرا يا سول

مع الشيخ فشار ليلك يبقى نهار

الشيخ فشار .... دكتوراة من جامعة هارفارد فى تفسير اللى مابيتفسرش

الشيخ فشار.... تلاتة ماجيستير من جامعة يوكوهاما فى تحليل اللى مابيتحللش

الشيخ فشار .... تمانية دبلومة من جامعة الازهر فى توصيف اللى مابيتوصفش

الشيخ فشار ...دبلوم صنايع قسم خراطة من مدرسة رزق شويل الميكانيكية فى شبرا

الشيخ فشار.... صاحب الكتاب الاكثر مبيعا ...".مع فشار تخلى الاسد فار "

كل اللى عليك انك تتعشى عشوة تقيلة قوى وتخش تنام على طول ...وخلى الغطا منزاح ...دى اهم حاجة .... خلى الغطا منزاح ....حيجيلك كابوس..... طبيعى ......اتصل بـــ 0900 مهما كان الكابوس مرعب .....مهما كان الكابوس يخوف ....ماتخفش حنفسرة حلو .......ونروقك وندلعك

للتواصل مع الشيخ فشار :

العنوان : فرش الشيخ فشار امام جامع القائد ابراهيم على البحر عد ل

E.mail : ARSAK @ HABAL .com