بأحلف بسماها وبتربها ...........لأخربها

بأحلف بسماها وبتربها ...........لأخربها

الدايرة اللى انا عايش فيها بياخدو منها اتنين لمجلس الشعب ...واحد فئات وواحد ياعمال يافلاحين...دا على اساس ان دلوقت فيه عمال لابسه العفريته الزرقا وماسكه فى ايديها مفتاح الانابيب وبتبنى مصر ....ولا اصلا بقى فيه فلاحين بتصحى الفجر تسرح الغيط علشان تزرع الدهب الابيض طويل التيله ... وللى مايعرفش احسن وقت بيبنى عليه الفلاحين بيوتهم على الارض الزراعيه ...هوه موسم الانتخابات ... حاكم الحكومه بيجيلها رمد حبيبى فى موسم الانتخابات مابتشوفش كويس المبانى وهيه طالعه على وش الارض الزراعيه ...مش ده اللى عايز اتكلم فيه ....اللى عايز اتكلم فيه ان الزفه بدأت بدرى ... عديت اليفط..... لقيتهم اتنين وستين واحد وواحده مرشحين نفسهم .... ايوه مالستات بقى لهم مقعد دلوقت شوفتوا احنا بنتطور ازاى.... طبعا كلهم مترشحين من اجلنا ...كلهم منا وبنا ... كلهم عايزين يغيروا ....كلهم بيحبوا مصر ....كلهم حيخدمونا ويبوسوا ايدينا ... ويعدوا علينا كل يوم باليل يشوفونا عايزين اى حاجه ولا لأ ...وقبل ما ننام يطرقعولنا صوابعنا ....

لو شوفتوا اسماء واشكال وتاريخ المرشحين ...تعرفوا ان الموضوع مافيهوش مصر خالص ...ولا تغيير ولا من اجلنا ولا صوابع ولا بدنجان...الموضوع ليه بعد تالت ورابع وخامس ....ياعالم ياهوه ...ياعالم حرام عليكوا الضرب فى الميت حرام ...مصر ماتت وعفنت والدود كلها خلاص ....مش هاين عليكوا تسيبوا لنا شوية العضم .... ولا لازم تطحنوه هوه كمان ....

نصيحه لوجه الله :

.... ظبطوا.... وسستموا ...وارشوا ...واعملو اللى فى نفسكوا فيه ....واخربوها على الاخر .... بس اعرفوا يوم ما البلد دى حتخرب ......حتخرب عليكوا قبلنا..... الهى يخرب بيوتكوا

محدش يشتغلنى ....انا بأشتغل نفسى

محدش يشتغلنى ....انا بأشتغل نفسى

السح الدح امبو...ادى الواد لابوه ...ياعينى الواد بيعيط ....الواد عطشان اسقوه ...شيلو الواد من الارض ...الواد محسود ارقوه ....اغنية من التراث المصرى القديم ....لمؤلف كان سابق عصره ...كان شايف اللى بيحصل من بدرى قوى ...فعلا الواد مالوش حيله فى نفسه ...مش عارف هوه عايز ايه ...رامى نفسه على الارض وبيعيط ...وسايب للى حواليه القرار ...اللى يقول دا عايز ابوه ...واللى يقول دا محسود ارقوه ...واللى يقول داعطشان اسقوه ...واللى يقول قوم يامصرى ...طالب بالتغيير ...تغيير الدستور او تغيير البامبرز مش مهم المهم قوم اعمل مظاهرة ...اشتم وصرخ واتعارك مع الشرطه ...وماتخافش انا وراك ...حاطلع فى الفضائيات واكتب فى الجرايد ...وحآخد خمستلاف جنيه فى الحلقه ...والفين جنيه فى المقاله ...مانت عارف الناس اد ايه تعبانه فى مصر ...دى قطع غيار المرسيدس بقت نار ...ومصاريف الكمبوند جهنم الحمرا ...يقوم الواد المصرى يطلع المظاهرة ...وهوه مش فاهم ليه ولا لحساب مين ...وعم المسخناتى سبوبته ماشيه ..من بره بقى من جوه ...المهم سبوبة الفلوس ماشيه ...دا طبعا غير السبوبه النفساويه ....سيط وشهرة وصور فى الجرايد ...عيشه يا معلم ....واللى يغيط ان الواد المصريه هوه اللى بيدفع تمن كل ده.

وشويه ويجى فى وسط المظاهرة واحد تانى ...يقول يامصرى ياعبيط انت مش فاهم حاجه..... انت مش عارف مصلحتك.... اتلم وخليك فى حالك أحسن لك ...علشان لو ماتلمتش حأضرب امك بالرصاص المطاطى ...يااسرائيلى يابن الكلب ... حتبوظ لنا السبوبه الله يخرب بيتك ...لسه ماكملناش المليار.... ياأهبل ... محدش عارف بكره فيه ايه ....وبعدين انت عايز ايه !! ...ما انا فكرت لك وبفكرلك وحفكر لك ازاى اطلعك فوق خط الفقر وانت نايم فى بيتكوا وقاعد على القهوة حاطط رجل على رجل وقدامك المارلبورو الحمرا ....عايز ايه تانى ...سيبنى ماتعطلنيش يا بنى ادم واصبر شويه ...

وياعينى الواد المصرى الغلبان لا فاهم حاجة.... ولادارى بحاجه ...ولاعارف لا مين معاه ...ولامين عليه ...مفروم ياولداه بين اشباه المثقفين اللى بيتاجرو بأى حاجه وعلى حساب كل حاجه ...وبين اشباه السياسيين اللى بيلمو كل حاجه واى حاجه.

وياعينى ليه ؟!!!... دا الواد المصرى يستاهل اللى بيجرى له ...مادام راضى انه يعيش عاله فى اكله وشربه وتفكيره ....يستاهل اللى بيحصل له ماهو مش عايز يبقى راجل بجد ...مش راجل بالبانجو والفياجرا ... يامصرى فوق واتشطر على بتاع الموبيل اللى بيقلبك ...وبتاع الماركتينج اللى بيشقلبك ...وبتاع الفيديو كليب اللى بيجيب لك الاحتقان ويبهدلك ...ولما تتشطركدة و تغير نفسك .... ابقى اطلب التغيير ... جاتك الهم جاهل مافيكش غير لسان.

أنا طبعا باتكلم على المصرى اللى فى اولى تانى ...لكن المصرى اللى فى اولى اول ...اللى هوه انا واللى معايا ...طبعا زى الفل ...فاهمين كل حاجه وعارفين كل حاجه ... عليه العوض ومنه العوض.

كلمة حق :

كلنا مسؤلين ....كلنا مسؤلين ....كلنا مسؤلين على الخراب اللى احنا فيه

مش بس كفايه والحزب ... كلنا فسدة.

من فات قديمه تاه

من فات قديمه تاه

عارفين احنا توهنا ليه....علشان انبهرنا بما يقدمه الغرب ...ونسينا ان كل اللى بيطنطوا علينا بيه دة بتاعنا ....والله بتاعنا ....وعلى رأى الاسكندرانيه ... كلامك ده كله بتاعى وكاتبه على دراعى ....وكل الابحاث والمؤتمرات والندوات والكتب فى علم النفس والتنميه البشريه ...لخصها جد من جدودنا اللى ماعرفوش يخلفوا ...اسمه حسن البصرى ...قايل الكلام اللى بيقولوه اصحاب الحظارة دلوقت...من ألف سنه ...ماغلطش فى الكتابه ظ مش ض...اقرأوا وقولوا رايكم :

فكن ايها العاقل مقبلا على شأنك ....راضيا عن زمانك (السعادة)...سلما لأهل دهرك ...جاريا على عادة عصرك (ايجابى)...منقادا لمن قدمه الناس عليك (ديموقراطيه)...حانيا على من قدمك الناس عليه (ادارة) ...ولاتباينهم بالعزله فيمقتوك...ولاتجاهرهم بالمخالفه لهم فيمقتوك (فن التواصل )...فانه لا راحه لمعادى ولا عيش لممقوت .

واجعل نصح نفسك غنيمة عقلك.. ولاتداهنها باخفاء عيبك ... فتنفع عدوك وتضر نفسك ....لانه من اصلح نفسه ..ارغم انف اعاديه .(تنميه بشريه)

فهذب ايها الانسان نفسك بافتكار عيوبك وانفعها كنفعك لعدوك فان من لم يكن له من نفسه واعظ ...لم تنفعه المواعظ .واعلم ان من اعمل جده بلغ امانيه

اعاننا الله واياكم على القول بالعمل وعلى النصح بالقبول ..وحسبنا الله وكفا

من كتاب ادب الدنيا والدين للحسن البصرى ..الكتاب منزلاه مكتبه الاسرة باربعه جنيه ونصف ...يعنى بتمن كانزايه واتنين مولتوا....وماسيج ...

صدقه جاريه : اى كلمه فى الكتاب صعبه ومش عارفين تفهموا معناها ...انا على استعداد كامل للترجمه والشرح وتوصيل الطلبات للمنازل ...ومن غير اى بقشيش

احنا اسفين ياصلاح

احنا أسفين يا صلاح

عناوين الاخبار النهاردة مش مريحانى :

مصر تستعيد أصبع اخناتون من سويسرا بعد اكثر من قرن.(ليه دلوقت)

مجلس الوزراء يوافق على تعديل قانون التوقيت الصيفى.(ليه عايزينها ضلمه)

الرئيس مبارك يرأس اجتماعا وزاريا بشرم الشيخ غدا.( ليه مستعجل )

يارب اكون فاهم غلط . وعموما انا مش من مؤيدى البرادعى ....هه....تانى ... انا مش من مؤيدى البرادعى..... ومن قبل الصوبع مايرجع

عم ياقوت جاب من الاخر

عم ياقوت جاب من الآخر


افتكرت ان كان عندى حتة قماشه محترمه ....قولت هوه انا ليه مبفصلهاش ..قمت قلبت عليها البيت ...انى الاقيها ...ابدا ...وفى يوم وانا قاعد جه فى بالى انها تكون فى الشنطة اللى تحت السرير ....نزلت تحت السرير وشديت الشنطة وفتحتها ...ولقيت القماشه ...لقيتها ملفوفه فى حتة حرير ....ومحطوطه فى كيس مرسوم عليه الاهرامات من ناحيه والكعبه من الناحيه التانيه ...فرحت قوى ...وخدت القماشة وطلعت جرى على عم ياقوت الخياط ...قولت له : ياعم ياقوت انا فى عرضك ...كل يوم بيبقى عندى حفله ...كل الناس اللى فيها محترمين ...او بيبانوا انهم محترمين ...كلهم بيبقوا على سنجة عشرة ...لابسين بدل اخر شياكه واخر موديل ...وانا فى وسطهم ببقى عرة ...والنبى ياشيخ تاخد القماشه دى وتفصل لى منها بدله شيك ...نفسى مرة احضر الحفله دى وانا بنى ادم ...والله ياعم ياقوت انا كويس ...وعندى حاجات كتيره حلوه ...ويمكن كمان اكون احسن من كل الى فى الحفله بس ماحدش بيعبرنى ولابيبصلى.....ودايما بيعاملونى على انى جاى اشحت منهم ...وساعات كتير بيعاملونى على انى بهيم ....بياكل ويشرب وينطح وبس ....مع انى ياعم ياقوت غير كدة خالص ....بس ماحدش مقدرنى ...عم ياقوت بص لى بنظرة عطف ومسك القماشه وفردها على البنك ...وقعد يقلب فيها يمين وشمال وفوق وتحت ...ويحطها قدام اللمبه ...كل دة وعلى وشه تعبيرات غريبه مرة اعجاب ومرة حسرة ومرة قرف ومرة استغراب ...وفجأه قالى : شوف يابنى لو انت كنت جبت القماشه دى من خمسين سنه ....كنت عملت لك بدله كل اللى حواليك يحسدوك عليها ...بس ياخسارة ...انت اتأخرت قوى ...القماشه شاطت ونكتت والعته هرتها...مش حينفع يابنى ....عوضك على الله ...رديت عليه باستعطاف ...والنبى ياعم ياقوت شوف لى حل الله يخليك ...عم ياقوت قالى : يابنى انا مش عايز اغشك ...القماشه دى ماتنفعش ولا حتى يتعمل منها لباس ...قولت له بيأس: طاب والحل ياعم ياقوت ...قالى: الحل انك تغزل لك حته قماشه جديدة ...على نضافه...هيه اه حتاخد وقت كتير بس هوه ده الحل الوحيد ...خليك فى الجديد ...دا طبعا لو ربنا قدرك وعرفت تعمل منه حاجه ...وسابنى وقعد يولع فى السبرتايه علشان يعمل فنجان قهوة محوجه بالحبهان والمستكه .... وانا ماشى سمعته بيقول لنفسه : ربنا مابيظلمش حد..... البنى ادم هوه اللى بيظلم نفسه.!

الطيب والشرس

الطيب والشرس

قوم ايه ... من سنه كده كنت قاعد فى النادى مع مجموعة من المؤهلات العليا ....يعنىدكاترة وصيادله ومهندسين ....مجموعه من الصفوه اللى بيقوم عليهم وعلى فكرهم وعلمهم اى مجتمع محترم ...قوم ايه ...انفتحت سيرة الدكتور يسرى الجمل وزير التعليم فى مصر .....قوم الراجل ما كنش عاجبهم قالو دا طيب ...وطيب فى زمن الماركتينج بقت شتيمه ...معناها انه لا بيهش ولابينش ...والناس بتستعبطه ... قوم ايه قالوا انه ماينفعش فى الوزارة اللى عفنت ...ولا بقى فيها لا تربيه ولا تعليم ....القصد قعدوا يشتموا فى الوزير والحكومه اللى خلت العيال مايعرفوش عن التعليم غير مدرسة المشاغبين ...والدروس الخصوصيه اللى بياخدوا فلوسها من اهاليهم ويجيبوا بيها سجاير وبانجو ...ودباديب فى الفلانتين ....قوم ايه سابو العيال واتدوروا على المدرسين اللى مابيرحوش المدرسه الا علشان يقبضوا الكادر وليل نهار قاعدين فى مراكز الدروس الخصوصيه يلموا فلوس ...قوم ايه جابوا سيرة المناهج وصعوبتها وانها مابتطلعش غير حفيظه ...دا طبعا على اساس انهم بيعرفوا عياله بياخدوا ايه ....ماطولش عليكوا اتفقوا على انهم عايزين وزير شرس يلم العالم دى ويرجع للتعليم هيبته اللى راحت ....ويضرب بايد من حديد .... الدكتور يسرى الجمل خد قعدته ...ساب الوزارة ....وروح على فيلته فى الكمبوند ....وجه الدكتور احمد ذكى بدر ...الراجل بصراحه شرس ...من اول يوم ...نزل بنفسه يلف على المدارس ...يرفد وينقل ويحول للتحقيق ...ويدور بابره على حد يدى له مكافأة ..... قوم الاسبوع اللى فات قعدت مع نفس الشله من المؤهلات العليا المثقفين ...ماذادش عليهم حاجه غير ان كل واحد فيهم بقى معاه بدل الموبيل اتنين ...قوم ايه بدأ الكلام على احمد ذكى بدر ....بقى دة اسلوب وزير تعليم ...ايه مافيش رحمه ...نازل رفد ونقل وتحقيق ...مش حرام ده ...مش المدرسين اللى اتنقلوا دول عندهم بيوت وعيال ...وازاى يرفد التلامذه ..هوه جاى يعلم ولا جاى يطلع جيل من ولاد الشوارع ...دا كدة حيبوظ التعليم ...دا على اساس ان التعليم فله ....هوه فاكر نفسه مين ... ولا علشان ما ابوه كان وزير الداخليه ....لا احنا فى زمن الديموقراطيه ...ارفع راسك يا اخى فقد ولى زمن الاستعباد ....
طبعا انا كنت قاعد اسمع الكلام اللى بيتقال وانا فاتح بقى ومدلدل لسانى زى الاهبل .
هوه ليه احنا مش عاجبنا حاجه ...ليه كل ما وزارة تيجى وقبل حتى ماتقعد على الكرسى نبدأ فى الهجوم عليها.... لما حكومه نظيف جات قالوا يانهار اسود حكومه رجال اعمال يعنى حيسرقونا ...فين ايام وزارة اساتذة الجامعه المحترمين ...وايام حكومه اساتذة الجامعة ..قالوا هما يعرفوا حاجه دى ناس طول النهار بين الكتب والمراجع والابحاث ...فين ايام وزارة ظباط الجيش ...وايام وزارة ظباط الجيش ...ياعم دول ظباط جيش يعنى مايفهموش غير فى الدبابات والمدافع ....
طاب ظباط الجيش ماينفعوش ...واساتذة الجامعه مالهومش فيه ...ورجال الاعمال اتجوزوا السلطه مسيار ودخلوا عليها فى عز النهار ...والوزير الطيب وحش والشرس وحش والقبيح وحش ...وحسنى مبارك وحش وجمال وحش والبرادعى لو جه ويارب ما يجى وحش ...امال ياعالم يا هوه.. مين الحلو ...ونلاقيه فين ...وان لقيناه حيرضى يجى ؟!! والختمه الشريفه ما حيرضى يجى ...حيقولنا انتوا عالم عبيطه ..عالم عشوائيه من زمن خالد يوسف ...مابيعجبكوش العجب ولا الصيام فى رجب ...عايزين تكيه تقعدوا تكلوا وتلغوا وتناموا على حساب اى حد ...من الاخر اكل ومرعه وقله صنعه ...جاتكم الهم عايزين جنازة وتشبعوا فيها لطم ...ويارتكم حتشبعوا

وجهة نظر :
عندما اجد رجلا يحمل بين طياته دهاء انور السادات ...واصرار رجب طيب اوردغان ...والمصحف لانزل انتخبه علشان يحكم مصر ...مش تقولى حمدين وايمن والبرادعى وعباس العفش ....

فى حب مصر

فى حب مصر

تعلن قناة...كله ماشى الفضائية عن قرب بدايه برنامجها الجديد ...فى حب مصر

وتطلب على وجه السرعة ....اعلامى ...لتقديم البرنامج.

المواصفات المطلوبة :

1- أى مؤهل ينفع ....بكالوريوس ...ليسانس ...دبلوم ...ونقبل الاعدادية

2- يستطيع ان يلوى زراع الحق ليظهر الباطل

3- يملك موهبة المتاجرة بالآم الناس وأحزانهم

4- ان يكون مبدأه فى الحياه اللى تغلب به العب به

5- ان يكون من لابسى بوكسر الشفايف ...ومطلقى اللحيه ومقصرى البنطلون

6- أن يملك المقدرة على السب واللعن وتسخين البشر

7- ان يكون من مريدى البرادعى والاخوان المسلمين

8- ان يكون من انصار الحزب الوطنى وحركة كفايه

9- ان يكون من مؤيدى عمرو خالد وخالد يوسف

10- من الآخر عايزين واحد زباله يقدر يدمر لنا المجتمع

المميزات :

1- مرتب مغرى جدا وبالدولار وخالص الضرايب

2- شقة تمليك جنب الاستوديو فى مدينة الافساد الاعلامى

3- عموله مجزيه على كل موضوع سافل أو ضيف شاذ يستضيفه

4- تأمين صحى من اللى على نفقة الدوله

5- سيارة فخمه موديل السنه دى وتمليك كمان

6- نسبه فى ارباح المسجات والرنات والمسابقات.

سؤال عبيط ....فيه فى الدنيا ...بلد ناسها بيحبوها كدة ؟!!! فعلا كم فيكى يا مصر من مضحكات ولكنه ضحك كالبكاء.

حد يقولى ... حد ينصحنى ...اعمل ايه ...بابا نام وانا عايز ادخل الحمام ....... ارجّع

شويه كدة مع نفسى

شويه كدة مع نفسى

بصوا كان فيه دعوة للاضراب على الفساد عملتها السنه اللى فاتت ... وبكرر الدعوة تانى ...انا مقتنع بالفكرة ...وفيه ناس مش قليلين هما كمان مقتنعين ... فياريت اللى مقتنع ولسه عنده نفس ياريت يكمل المسيره السنه دى ...اما بالنسبه ليه ...فالواضح انى بمر بحاله من الياس والاحباط بل والاكتئاب الحاد الذى لا ينفع معه سوى رحمة ربنا ..وبصراحه كدة ماعنديش اى امل فى ان اى حاجة تتغير او تتصلح اوتتعدل ....... انا عارف.... شويه كدة وحارجع اعافر تانى ... ماهو اللى فيه داء مابيبطلهوش .... بس شويه كده مع نفسى.

على فكرة فيه دعاء اتعلمته حلو قوى.. ادعوه ربنا حيكرمكوا

ربى دبر لى امرى فاننى لا احسن تدبيرة

ماتريكس3

ماتريكس 3

فيه حاجه غريبه اتكررت اكتر من خمس مرات الاسبوع ده قدامى .....الواضح كده انها بداية ظاهرة ...او الله اعلم انها ظاهره موجودة بس انا اللى لسه شايفها ...شباب حلو كدة تالته اعدادى ....اولى ثانوى ...فصلوا ... عملوا حياه موازيه للى احنا عايشينها ...حياه افتراضيه ....فصلوا بين نفسهم وجسدهم ......الجسد مبقاش اكتر من توك توك يتنقلوا بيه من مكان لمكان ....لكن العقل والتفكير والعيشة بقت فى مكان تانى خالص ...الواد لما بيتكلم عن الفلوس يقولك مسابقات فى النت ...لعبة الحياه ....فوركس .. دى وسيله عمل الثروة...لما قلبه الاخضر حب ...حب واحده ماشفهاش ....ماسمعش صوتها .... بيحبها بالكتابه ...بيكلمها بالكتابه ...بيخاصمها ويصالحها بالكتابه ....ولما ماسورة هرموناته تضرب ....يفتح نيو ويندو ..ولا نيو تاب ....وهاتك ياهلاوس ...ويااوهام ...وتطلع كالعادة القدرات السريه ....ولما يحب يلعب رياضه ...بيشغل فيفا 2010 وينزل الملعب ويلعب ويضيع اجوان ويجيب اجوان ...ويرمى نفسه على ارض الاودة ويسجد وينطق الماوس .... وبعد مايحقق انتصاراته ويحس انه بطل ...يقرر انه يبص على احوال البلد اللى مش عجباه ....ويشارك فى حركات التحرير اللى على الفيس بوك ...ويسمى نفسه سعد باشا زغلول ... ولما يحب يقرب من ربنا ...يحط خلفية توكلت على الله ...ويغير رنات الموبيل كلها ويخليها ادعيه ...

الواد عنده خمستاشر سنه ....وعنده تيبس فى مفاصل الركبه ...وغضروف بين الفقره التانيه والتالته...وعين -3 وعين -3.5 ....كل ده مقدور عليه .....اللى تاعبه بجد ....البواسير ....وكل امانيه انه يجيب لاب توب ....علشان يعيش حياته وهوه ممد على السرير ....ويترحم من وجع البواسير ....

الغريبه ان الواد مابيرحش المدرسه ....ومابيفتحش كتاب ...والاغرب انه بينجح .....وابو ه واخد له شقه بالقسط علشان لما يتخرج من الطب يعملها عيادة ....ماتشتغربوش ...حيتخرج ...ويفتح عيادة ...ويبقى استشارى ...والدخول له حيبقى بالحجز ...دا طبعا فى عالمه الافتراضى ....او فى عالمنا ...ماهو مافيش حاجه غريبه على مصرنا ....دى ام الدنيا ...

اموت واعرف اسم الندل ..........ابو الدنيا دى .

تصدقوا .....انا مابقيتش خايف على القدس ......انا كل خوفى دلوقت بقى على الكعبه

أحلى من الشرف ما فيش

أحلى من الشرف مافيش

علشان نعرف أد ايه ريحة الزباله وحشه ...لازم نشم الورد ....وعلشان نعرف كآبة اللون الاسود لازم نحط جنبه اللون الابيض ....وعلشان نفهم يعنى ايه دعارة ....لازم نفهم الاول معنى الشرف ...وعلشان تفهموا قصدى ...لازم احكيلكوا حكايتى ...من يومين كنت قاعد اتفرج على على حلاوة وجمال ونضافة ورقى وشياكةوابداع وعبقريه كليب قلبك حنين يا نبى ....ومافيش شوية صغننين ....وانفجرت على الشاشه ماسورة مجارى معفنه ....طلع منها كابتن بومه ....فيلم ...لبطل كل منايا فى الدنيا انه يستحمى ...اول عشر دقايق فى الفيلم بتدور احداثها فى نهار رمضان ....هه...نهار رمضان ...واتفرجو معايا ....مشرفة اتوبيس المدرسة ...واقفه فى ممر الاتوبيس بين الكراسى ...وبتعاكس كابتن بومه سواق الاتوبيس ....وتقوله ياجمال امه عسوله ياخواتى ...كابتن بومه قالها انا عايز اعدى ...قالت له ماتعدى ...الدنيا واسعه ....ماهو لو عدى ماقدمهوش غير انه يتحرش يا شابه ....تانى ....الاحداث بتدور فى نهار رمضان ....وشويه وجه مشهد لأمور وأمورة قاعدين على سفرة ....والامور بيبص للامورة بنظرات سهتانه لها معانى كتير مافيهاش ولا معنى واحد محترم ...وفجأه يعلو صوت آذان المغرب ....فتقول الامورة وهيه مستغربه نظرات الامور ...ايه مش حتاكل ؟!... هوه انت مش صايم ولا ايه ؟!.... سؤال لعم نكسه محروس عين امه المخرج من واحد جاهل بامور الابداع والدراما ....ايه الحكمه الابداعيه الدراميه فى ان الاحداث دى تكون فى رمضان ...هيه حبكت ...على راى صلاح منصور ....ماعندك ياسيدى ذو القعدة ورجب وجمادى ....القصد ....شويه وجات اغنيه اقل ما توصف بيها انها سافله ....وبدأ المعفن يغنى ويقول للأمورة ...ايه اكتر حاجه بيحبها فيها ...قالها قلبك وطيبة قلبك ...طبعا لما تشوفوه وهوه بيعنى وبيقطع فى الكلام ...تعرفوا على طول ان الموضوع مافيهوش لا قلب ولا طيبه ...الموضوع كله ان المعفن كان بيغنى للسيليكون ...ومكان ترسيب الدهون ....فيه سفاله كدة ...فيه وضاعه كدة...فيه فٌجر كدة يابنى ادميين ...مش عارف اقول ايه ولا اعمل ايه ولا اتصرف ازاى ....

وعزتك وجلالك يارب ما أنا عارف اغير غير بلسانى وقلبى ....أقبلها منى بحق جاه حبيبك النبى وقلبه الحنين ؟

قلبك حنين يانبى

قلبك حنين يانبى

http://www.youtube.com/watch?v=L352YajnV7U

مع نفسه

مع نفسه

كان زهقان قرفان متدايق ...على رأى قرد الغناء العربى ...مش شتيمه والله ...دا مدح ...ماهو لما بيغنى بيبقى فيه مرونه وطاقه زى اللى بنحسدوا القرد عليها....المهم صاحبنا فكر بهبل انه يتصل بحد من معارفه علشان يقعد معاه يتكلم ويفضفض ...ماهو البنى آدم مننا لو ما فضفضش ينفجر ...مسك الموبيل لقى عليه ستميت اسم ...مابين اصحاب وزمايل... جيران واصدقاء ...قرايب ومعارف..المفاجأه ان ولا واحد فيهم ينفع ...ماكنش عارف هما ماينفعوش ليه ...بس اهو ماينفعوش وخلاص ...وقرر انه يخرج مع نفسه ...ماهيه الوحيدة اللى حتفهمه وتسمعه وتنصحه لله فى لله ...عزم نفسه على فنجان قهوه فى الركن البعيد الهادى ...وقعد يحكى لها اد ايه هوه مش مبسوط ...وازاى الناس مش عايزه تتقى ربنا ...وحكى لها عن الدنيا اللى مبقاش فيها حاجه حلوه ...وهوه بيحكى ..نفسه ماكانتش معاه خالص ...كانت بتسمعه من غير نفس ...ماكانتش طيقاه ولا طايقه كلامه ....وفجأه انفجرت فيه ....ياعم ارحمنا بقى ...انت بتدور على حاجه مش موجودة اصلا ...هيه دى العيشه ان كان عاجبك ...اعتقنى بقى لوجه الله ....انا كمان عايزه اعيش زى الناس ماهى عايشه ...عايزة اعمل زى الناس ما بتعمل ....وانت هارى امى ...عيب ...مايصحش .... ماينفعش ...مايجوزش ...ما الناس عايشه ومبسوطه اهيه ....رد عليها : ومين قالك ان الناس مبسوطه ....الناس تعبانه ...ردت عليه : الناس مش تعبانه انت اللى تعبان وتاعبنى معاك ....انت اللى عايز تصلح الكون ...انت مالك انت ...انت مالك باللى بيعملو فيديو كليب وبيشلحوا ...انت مالك باللى بيلبسوا نقاب ولا بيقصوا رجل البنطلون ...انت مالك بالراجل ومراته بتتدخل فى حياتهم ليه ....ماهم عايشين ومبسوطين وبيخلصوا من بعض ...ردعليها : ماهو ده بيأثر على العيال ....قالت له : وانت مالك .....العيال كده كده حيتربوا ويكبروا ...هما مرتاحين كده يا اخى ...سيب الناس فى حالها ...مش قاعد لى طول النهار تتريق على ده وتنصح ده وتشتم ده ... رد عليها : انا بقول الصح ...انا بقول الحق... قالت له : صح بالنسبه لمين ...وحق عند مين ...كل زمن وله نظامه ...وده نظام الزمن ده ...مش عارف تتعامل معاه تبقى دى مشكلتك ....مش مشكلتنا ...ماتقرفناش بقى ......رد عليها : ازاى بقى ماهو لو كل واحد شاف الغلط وسكت الدنيا حتخرب ...ردت عليه : ماتخرب يا اخى ...ماهى كده كده حاتخرب ...كده كده حتنتهى ...ماتكولش فيه وتوجع قلبك وقلبى معاك ...وعيش واتمتع بالدنيا .... قال: هوه علشان اعيش واتمتع لازم ابقى فاسد واشرب بانجو وانام للعصر وامشى مع نسوان ...هوه ده النظام اللى بتقولى عليه ؟!....وربنا ...ربنا مش فى الحسبان ولا ايه ؟!!!...ردت عليه : ربنا كبير يا اخى ...ربنا بيسامح وبيغفر ...انت اللى عايز تعيش فى الجنه ...لا يا بابا ...لا يا حبيبى احنا على الارض ...عايز تعيش معانا اهلا وسهلا ...حترتاح وتريحنى معاك ....مش عايز انت حر ...بس اعتقنى وسيبنى اعمل اللى انا عايزاه حتى لو غلط ...مش لازم كله يبقى صح ...وبعدين كفايه عليك كده ...وياريت تنسانى وماتقوليش اقعدى معايا تانى ...على فكره اوعى تفكر انك تمنعنى انى اعيش بمزاجى ...علشان لو حاولت حأنكد عليك عيشتك ...سلام ياعم الصح ...مشت نفسه وسابته قاعد لوحده ...وكمان القهوه بردت ...قال : ياه كان عندى ستميت واحد ماينفعوش يقعدوا معايا ...دلوقت بقوا ستميه وواحد ...مش مهم ..... طظ .......طظ فى الستميه .......طظ فى نفسى ....طظ فى العالم كله ....مادام ربنا معايا يبقى كله طظ .... نادى على الجرسون وطلب قهوه دوبل على الريحه بدل اللى بردت

مرجيحة الزمن

مرجيحة الزمن

اسكتوا ...مش نسيت اخد الحبايه امبارح ...آه والله ...والهلاوس رجعت تانى ...لقيت نفسى راكب مرجيحة الزمن ...مرة تاخدنى ناحيه يوم السبت اللى فات ومرة تاخدنى ناحية يوم السبت اللى من خمسة وتلاتين سنه ...مرة اقابل فيها ابو ميدو ...ومرة اقابل فيها ابو كمال ....الغريبه ان السبتين شبه بعض ...اليوم اربعة وعشرين ساعة ...وبرضه الشمس بتشرق من الشرق وبتغرب من الغرب ....ما فيش جديد ...المرجيحة خدتنى على ابو كمال لقيته راجع هوة ومراته من الشغل بعد ما قبضوا المرتب ....ابو كمال بياخد تسعه جنيه ...وام كمال بتاخد سبعه جنيه ....وشويه ورجعتنى المرجيحه ناحية ابو ميدو ....لقيته راجع هوه وام ميدوا من الشغل بعد ما قبضوا المرتب ...ابو ميدو بياخد تسعميت جنيه ....وام ميدو بتاخد سبعميت جنيه ..... رحت لابو كمال لقيته بيدفع الايجار سته جنيه ونص ... يعنى اربعين فى الميه من دخله .....رجعت على ابو ميدو لقيته بيدفع الايجار خمسميت جنيه ....يعنى واحد وتلاتين فى الميه من دخله .... رحت على ابو كمال لقيته بيشترى كيلو لحمه بخمسه وتمانين قرش ....يعنى يعنى خمسه فى الميه من دخله ....رجعت لابو ميدو لقيته بيدفع خمسين جنيه تمن كيلو اللحمه ....يعنى تلاته فى الميه من دخله...رحت لام كمال لقيتها بتعمل كيكه للعيال فى حله الكيك ....رجعت لام ميدو لقيتها بتعمل تورته للعيال وبتزوقها بالكمبوت والكيوى ....رحت لأبو كمال لقيته بيجيب لمراته هديه عيد الجواز .... خاتم اربعه جرام من الصاغة ودفع اتناشر جنيه ....يعنى خمسه وسبعين فى الميه من دخله ...رجعت لابو ميدو لقيته بيجيب خاتم لمراته اربعه جرام ايجيبت جولد من المول بتمنميت جنيه ....يعنى خمسين فى الميه من مرتبه ...... رحت لابو كمال لقيت عيشته اغلى ....رجعت لابو ميدو لقيت عيشته ارخص ...رحت لابو كمال لقيت ماعندوش غير وظيفته ....رجعت لابو ميدو لقيت عندة بدل السبوبه اتنين ....رحت لابو كمال لقيته مبسوط عن ابو ميدو ...صحته احسن من ابو ميدو ...مزاجه اعلى من ابو ميدو ...باله مرتاح عن ابو ميدو ...مابياخدش فياجرا زى ابو ميدو ...المرجيحه وقفت وقعدت اسأل ليه ؟؟ لقيت ابو كمال ناصح ...مخلاش حد يضحك عليه ...ماخلاش حد يبيع له ال.... الطاقيه بالشيئ الفلانى لمجرد انها ماركه... سينييه ... ماخلاش حد يبيع له اوبشن ويدفعه تمنها وهوه مش بيستخدمها ....ماخلاش حد يبيع له افكار هبله وعبيطه وهوه مايعرفش يطبقها ...ماخلاش حد يبيع له جناح الفرخه بتمن الفرخه المشويه بسلاطتها وبابا غنوجها .... ماخلاش حد يسهره للفجر قدام التليفزيون ويحرق فى دمه وينكد عليه عيشته ...ماخلاش حد يقلبه ويطلع اللى فى جيبه ويعيشه الوهم ويملكه اسبوع فى عماره مش موجودة ...

اكتشفت ان مشكله ابو ميدو مش فى الواقع اللى عايشه ...مشكله ابو ميدو فى نظرته للواقع اللى عايشه ...

اسيبكوا بقى واروح اخد الحبايه علشان اعرف اعيش مع ابو ميدو فى الواقع بتاعه ماهو انا مش حينفع ارجع واعيش مع ابو كمال!!!

آ ه ...قبل ماخد الحبايه ...ابو كمال كان مبسوط بمزاجه ولا علشان ماكنش ايامه فيه 0900

صبره يارب

صبره يارب

عم صابر ورث عن ابوة محل مديون وعربيه 124 موديل 1963 ...عم صابر كان عندة 10 عيال ربنا مايكتبهم عليك ....عم صابر كان بين نارين ...نار الديون والاعداء اللى فى السوق ...ونار مصاريف العيال وطلباتهم اللى مابتخلصش ....العيال كبرت وعم صابر لسه بيعافر لوحدة فى المحل والمصاريف ...وبدال ما العيال يقفوا جنبه ويسددوا الديون ....اجتمعوا على العشا وقرروا يطلبوا من عم صابر عربيه جديدة بدال حتة الحديدة اللى راكبينها دى ...اول واحد قال :احنا نجيب لادا حنينه فى بنزينها وقطع غيارها ...رد التانى :لادا ايه يا ابو لادا ...احنا نجيب يابانى ...رد التالت: الا اليابانى ....انت مش شايف اللى بيحصل فى التويوتا ...احنا نجيب لانسر ...رد الرابع : ما اللانسر يابانى يافالح ...احسن عربيه الالمانى ....نجيب اوبل ....رد الخامس : مادام دخلنا فى الالمانى نجيب مرسيدس ...رد السادس :ايوه ...علشان ندفع ضرايب اد دماغنا كل سنه ...احنا نجيب لكل واحد عربيه صغيرة احسن ...رد السابع: وليه صغيرة ...انا عايز عربيه كبيرة ...رد الثامن: بصوا احنا نجيب عربيه 7 راكب علشان تكفينا ...رد التاسع :ومين قالك انها حتكفينا كده فيه اتنين مش حيركبوا ....احنا نجيب عربيه برستيج نجيب كوبيه ....رد العاشر : كده ياعبقرى فيه تمانيه مش حيركبوا ....احسن حاجه ناخد فلوس وكل واحد يعمل اللى هوه عايزة ...العشر عيال راحوا لابوهم المحل وقالوا له احنا عايزين نغير العربيه الكهنه دى ...عم صابر قالهم خلاص تعالوا اشتغلوا معايا .... وكل واحد فيكوا يساهم فى العربيه ...انا معييش فلوس وعليه ديون .... العيال معجبهومش الكلام ...وطلعوا من المحل وهما بيبرطموا ...يعنى هوه يخرب المحل وعايزنا احنا اللى نصلحه ....احنا ملناش دعوة ...هوه السبب ...هوه اللى معرفش يدير المحل ...واحد فيهم راح رايح رافع قضية حجر على عم صابر ابوه ...والتانى فضل يسيح لابوه فى السوق لغاية ماطفش الزباين ....والتالت ساب الجمل بما حمل وطلع على الامارات ....والرابع اشتغل مع اكبر عدو لابوة علشان يخسره ....والخامس قاطع ابوه ومكلمهوش ...والسادس ربى دقنه وقص البنطلون وقال العربيه دى حاخدها فى الجنه ان شاء الرحمن ....والسابع قرر انه يعيش حياه البانجو والحشيش والحريم ...والثامن بقى بينام 18 ساعه فى اليوم ...والتاسع كل يوم الصبح يمسك يافطه مكتوب عليها مش حأفضل صابر على عم صابر ويقف بيها قدام محل ابوه ...والعاشر عمل مدونه وقعد يهلفط فيها ليل نهار ...عم صابر ماستحملش ...تعب ...وقع ...جروا بيه على المستشفى ...وهوه فى العنايه المركزة ولاده كانوا واقفين بره ....مش علشان يتطمنوا عليه ...لا طبعا دول كانوا واقفين بيفكروا لو الراجل ده مات ....مين اللى حيجيب لهم العربيه ...وان ماممتش ازى حيخلوه يجيب لهم العربيه اللى لغاية دلوقت مش عارفين هما عايزينها ليه؟!!!!!!!

مضاد غنى

مضاد غنى

الغنى : انت باصص لى فى رزقى ليه؟!

الفقير: انا عمرى مابصيت لك فى رزقك ...انت اللى بتبص لى فى رزقى

الغنى : انا.... انا ابص لك انت فى رزقك .... اما عجايب والله

الفقير : ايوه ...وبتحسدنى كمان ...بتقول دا باله مرتاح وصحته كويسه وعندة عيال كتير

الغنى : مش دى الحقبقه ولا ايه ...انت بتحط دماغك على المخدة تنام ...وصحتك ماشاء الله ...تعتل عربيه نقل لوحدك !....وعيالك حواليك يسندوك لما تكبر .... لكن انا مابنمش الا بمنوم ...وماشى على طول بالدوا ....وماعنديش عيل يسندنى لما اكبر.

الفقير : انت مابتنمش علشان قلقان على فلوسك ....وصحتك تعبانه من كتر الاكل ....وفلوسك تسندك احسن من ميت عيل !

الغنى : شفت انت بتنام علشان بالك مرتاح مش قلقان على حاجة ...ماعندكش حاجه تخاف عليها

الفقير :هيه دى مشكلتك ...انا كمان مابنمش ياباشا ...بس علشان بفكر ازاى ادفع ايجار الاودة اللى متاويانا .... انا عيان زيى زيك بالظبط ....بس انا عندى انيميا من قلة الاكل ...لكن انت عندك كولستيرول من كتر الاكل ....انا لما باتعب باروح مستشفى وزارة الصحة ابوس الايادى علشان قرار علاج على نفقة الدوله ....لكن انت لما بتتعب بتاخد اول طياره لامريكا تعمل تحاليلك .

الغنى : مافيش فايدة الفقير ده نمرود ...مابيحمدش ربنا على النعم اللى فى ايده

الفقير : مافيش فايدة الغنى ده طماع ....مابيحمدش ربنا على اللى عنده ...دايما عايز اكتر واكتر ..

الغنى : علشان انا فاتح بيوت ناس كتير ....انا اللى باصرف عليهم

الفقير : لا ياجميل ...هما اللى بيصرفوا عليك ....لولاهم ماكنتش تعيش العيشه اللى انت عايشها دى

الغنى : ماهم بياخدوا مقابل شغلهم !!!

الفقير : دا مش حقهم ...انت مابتديهمش اللى يستاهلوه

الغنى : عرفت بقى انكوا بتبصوا فى رزقى ...انا اللى بفكر ...انا اللى باتحمل المخاطر ...انا اللى بادفع الضرايب ...

الفقير : وهما الى بيشتغلوا ويعرقوا علشان تزود فلوسك ! ...ولو ماشتغلوش مش حتعيش فى الفيلا ولا تركب المرسيدس

الغنى : ايييييييييه ...عايزنى اوزع فلوسى عليهم ولا ايه

الفقير : هما مش عايزين اكتر من حقهم ...اديهم مرتبات على قد جهدهم وعرقهم ...امن عليهم علشان يطلع لهم معاش ...اعمل لهم تامين صحى ...مش تمضيهم على استمارة 6 قبل حتى مايمضوا على استمارة 2

الغنى : هما اللى مابيبطلوش شكوى ...مابيبطلوش زن ...وبعدين مافيش غنى وفقير ...فيه غنى وغبى ...الفقير ده غبى ...مابيفكرش ...مابيغامرش ...مابيكافحش ...يبقى يحط لسانه فى بقه ويرضى باللى يجيله.!!

الفقير :دا كلام بتقوله علشان تريح ضميرك وانت بتاكل حقوقهم ...وبعدين مش الطبيعى ان الناس كلها تفهم فى البيزنس ...ولا تبقى رجال اعمال زى جنابك ...لكن الطبيعى ان اللى زيك يقف جنب اللى زيهم ويساعدهم مش يستغلهم ...؟!

الغنى : هما مش عايزين حد يقف جنبهم ...هما عايزين تكيه ....ياكلوا ويشربوا ويناموا على حساب غيرهم ...بس خلاص زمن التكايا راح وانتهى ...

الفقير : ياعينى على الفقير يا ولداه ...دايما يطع هوه الغلطان ...هوه السبب ...لكن الاغنيا ملايكه وعاملين اللى عليهم وزيادة ...وفى الاخر يستكتروا علينا الرغيف ابو شلن والطعميتين وعود الجرجير.!!

ياترى مين فيهم عنده حق ...الغنى ولا الفقير ...ياترى فعلا عكس غنى غبى ولا عكس غنى فقير ...ياترى نقول ان ربنا يرزق من يشاء بغير حساب ....ولا نقول ان الله لا يغير مابقوم حتى يغيروا ما بانفسهم ...ياترى الرزق فلوس بس ولا حاجه تانيه احنا مس حاسيين بيها ...ياترى الفلوس هبلتنا ولا احنا فعلا من غير الفلوس مانساويش ....ياترى ستى الله يرحمها كان عندها حق لما قالت ربنا لما وزع الارزاق محدش عجبه رزقه ولما وزع العقول كل واحد انبسط بعقله....ياترى حدفيكوا يقدر يقول لى المفرمه دى ممكن تقف ازاى ....!!

المجانين فى جحيم

المجانين فى جحيم

بما انى زبون ( فى اى بى ( فى مستشفى المعمورة للامراض العقليه ....وبما انى برضه زبون متعب ماباخدش الدوا فى ميعادة فنسيت امبارح آخد الحبايه ....فالهلاوس رجعت لى تانى ...وبدات اشوف اللى محدش بيشوفه غيرى ...شوفت كل اللى كانوا بيشتموا الشيخ سيد طنطاوى الله يرحمه وهوه عايش .....بيقولوا عليه عالم جليل خسرته الامه الاسلاميه جمعاء جمعاء ...على رأى محيى اسماعيل فى فيلم خلى بالك من زوزو ....وفجأة بعد ما كان اول امبارح سيد بيه اوكى ....بقى امبارح عالم جليل وعلم غزير وخساره فادحه ...وشويه والهلاوس زادت ...شفت ان اى رمز للاسلام من اول القرضاوى لغايه حسن شحاته ....لازم يتبهدل ويتشكك فيه وفى نواياه وفى علمه ...طبعا الهلاوس بينت لى ان المقصود مش الشخص ...المقصود الرمز ...ماهو لما اقول ان الرمز وحش يبقى كل اللى بيقوله الرمز وحش ...يعنى الاسلام وحش ....شفت برضه ان المؤامرة موجودة ومتحضرة مش عايزة كلام ....بس المؤامرة ماتنفعش من غير منفذين .....المصيبه بقى ان احنا اللى بننفذ المؤامرة اللى علينا ...احنا اللى بندمر نفسنا واسلامنا....احنا مين ....احنا انصاف المتعلمين ...اللى بنردد الكلام زى البغبغنات...احنا اللى بنقلد وبس .... بنقول اللى بيكبوه فى ودانا من غير مانفكر....

ولو حد نسى الحبايه هوه كمان وقام وقال ياجماعه فى عرض دين النبى ...بلاش تمسوا الرموز ...يبقى مجنون ...واشتراكى ...وشيوعى....وابن كلب جزمه مش متحضر ...ومعندوش ثقافة الحوار....ونظريه المؤامرة واكله دماغه ..ومايعرفش ان الاسلام مافيهوش كهنوت ...

والله والله والله وكمان والله ماهوعيب انى اقول ماعرفش ...العيب انى اخوض فى الناس بدون علم ...العيب انى اكون معاهم معاهم عليهم عليهم ...العيب انى اخالف بس علشان اتعرف حتىولو على حساب دينى....العيب ان احنا فى القرن الواحد والعشرين ولسه بتحكمنا ثقافة البسطة (بسطة السلم ...لان فيه ناس بتقول على الهريسه بسطه ولو انها كلمه قديمه ماعتقدش انها لسه بتتداول فى زمن البون فريت والكرسبى ستربس)

الله يرحمك يا شيخ سيد ويوسع لك قبرك ويسامحك ويغفرلك .....ويغفر لنا ويهدينا.

الشو والبير

الشو و البير

الشو فى حد ذاته مش حاجه وحشه ...بالعكس ...دا بيشد الانتباه ويوصل المعلومه ...بس لما تكون معلومه محترمه ...حاجه كدة كويسه فيها عقل وفكر وهدف وتطوير...وبرضه مش عيب ان الواحد يعمل من ورا الشو ده فلوس وشهرة ...حقه مادام بينفع الناس ...لكن العيب اللى مبيبقاش عيب لو طلع من اهل العيب ...ان الواحد يقع فى بير الوضاعه والسفاله....العيب فى استغلال النفوذ والعلاقات والتحصينات ...العيب فى استغلال المنابر اللى بقت لكل من هب ودب مادام مظبط ومسستم ...وبدال ماتستغل فى التنوير والتطوير بقت تستغل فى الشتيمه والتلميحات الخارجه وتصفية الحسابات....بس تعمل ايه فى شهوة المال والشهرة والنفوذ...واللى تغلب به العب به ....مبدأ المفلسين والجهله واللى ملهومش مبدأ ولا قيم ...الهطوا فلوس وعبوا شهره وسلطه ...والبسوا البدله الموف والكرافته الزرقا .....بس برضه الخلفيه حتفضل حمرا ....وافضلوا ضلمونا بطلعتكم البهيه كل يوم وكل ساعة ....وياخوفنا لا تطلعولنا من فرن البوتجاز ....ويارعبنا واحنا بنشد السيفون ....آه يانى يامه على الحياه واللى فيها ....جاتكوا الهم مليتوا البلد ......بس ارجع واقول الحق على عبحق ...ماحنا اللى مش عايزين نتحكم عن بعد ....يالله ....الله يرحم المبادئ والاخلاق ...الله يرحم كل ثابت على مبدأه ويرضى كل منصور على نصره ....والفاتحه لسيدى ابراهيم الدسوقى وسيدى المرسى ابو العباس ....وبالمرة للسيد البدوى وكل الاوليه الجدد...

ويارب ترجع لنا بالسلامه ياريس ....ومعلش فقعنا مرارتك ...بس ماهو انت كمان اللى جبت لنا اللى خلونا كده... خلونا بعد ماكنا بنبنى السد بقينا منكمل عليه!!!!!!!!!!!!!!!!!

الفرق بين الرجل والمرأة 11

حكايه ورا كل باب .........أودة نوم
شوف يا دوك احنا كشعب متخلف وبيضحك على نفسه بنخاف نواجه المشاكل فبنهرب منها ونستخبى بقى تحت مسميات كتير اوي

وفى اعتقادي الشخصي ان الجانب ده من الحياه رغم استحواذه على جزء كبير من تفكير الناس (فى الواقع ما نقدرش ننكر )الا انه فى نفس ذات الوقت غير معروض للطرح بامانه

يمكن دلوقتي الحكايه بقى اهون شويه والى هايدور ممكن يفهم

المشكله اننا مش معترفين بوجود مشكله اصلا

فى رايي المتواضع ان المشكله الاساسه تكمن فى اننا بنربى البنت والولد فى جزرتين مختلفتين من الطباع والقوانين والافكار

وبعد كده نطلب منهم يعشوا مع بعض طب ازاي ؟

بالظبط كانك بتركب قطعتين بازل على بعض كل قطعه منهم من صوره مختلفه
حتى لو اتركبوا فى بعض مش هايبقوا مريحين وجايز طروفهم تتكسر

الحل
برضه من وجه نظري المتواضعه

من فضلكم الى مش فاهم يدور ويفهم
والى مش عارف يعرف
واتكلموا مع بعض بصراحه اكتر من كده
والى عنده مشكله عجز عن حلها حتى لو كانت نفسيه يلجأ لطبيب مختص
واعرف نفسك اعرف انت عايز ايه وبتعمل ايه
واعرف شريكك اعرف هو عايز ايه وبيفكر ازاي

افهم واعذر وبدي شريكك عليك وانتم تبقوا تمام
غير معروف


بعبعه يقول... اهو شوفت بقى ؟

مجرد ما شاورت من بعيد على البطحه الى بتوجع كله طلع يجري وما حدش قال حاجه

بنجعجع فى الفاضي احنا حلوين فى الجعجعه موت

من كتر ما باشوف عندي على المدونه بدأت اقتنع ان 99% من المشاكل بين المتجوزين سببها الخفي هى عدم التوافق الجنسي والمشاكل من النوع الى ما حدش بيتكلم عنها

والمشكله انهم هما نفسهم ما بيكونوش فاهمين ايه مشلتهم تحديدا

عارف لما يكون حاجه بتوجعك وانت مش عارف تحدد هى ايه ؟

انا بيجينى حالات على الاميل عباره عن كده عشان الثقافه فى الموضوع ده فى الحضيض فى مجتمعنا

انا كتبت بوستين قبل كده واحد نصائح للستات والتاني نصائح للرجاله
مش عارفه شوفتهم انت ولا لا بس هاجيبلك وصلاتهم

http://b3b3a.blogspot.com/2009/09/blog-post_26.html

http://b3b3a.blogspot.com/2009/10/blog-post_24.html

وكتبت قبل كده اسرار البنات واوجاع الرجال

هاتلاقيهم عندي برضه فى شهر مايو 2008 تقريبا

معلش انا جبت الوصلات عشان الكلام اكتر من انه يتقال فى تعلي














مع جزيل الشكر

الفرق بين الرجل والمرأة10

الفرق بين الرجل والمرأة 10

هشام بيقول انا من يوم ما اتجوزت وأنا بأدى وبأضحى ....وماباخدش مقابل ...سماح بتقول محدش بيدى أدى ...محدش بيضحى أدى ...وبرضه بتقول مافيش مقابل ....هشام مش فاهم ان سماح بتدى ....وسماح مش فاهمه ان هشام بيدى ...الاتنين بيدوا بس بيدوا غلط ...هشام بيدى سماح اللى هوه عايزه كراجل مش اللى هيه عايزاه كست ....وسماح بتدى هشام اللى هيه عايزاه كست مش اللى هوه عايزه كراجل ....هما الاتنين بيدوا بس مش حاسين انهم بياخدوا المقابل...وعايشين بس مش مبسوطين مع انهم بيحبوا بعض ....مثال : راجل شغلته بتستدعى انه على طول مسافر طول الاسبوع بيقعد فى فنادق ويحضر فى قاعات وبياكل فى مطاعم ...لما رجع البيت مراته قالت له انا عزماك على العشا بره ....ادت ولا ما ادتش ...ادت ...بس ياترى هوه دة اللى عايزة ....لا ...لانه زهقان من برة وعيشة برة واكل برة ...اللى عايزه طاجن باميه بالحمه الضانى ياكله على الطبليه وهوة لابس البيجامه فى وسط العيال .

الرجاله والستات عايزين ست حاجات بس السته بتوع الرجاله غير السته بتوع الستات ....كدة مطلقه ؟ لا الرجاله برضه عايزين السته بتوع الستات والعكس ...بس هيه اولويات يعنى لو الست عايزه رعايه والراجل عايز ثقة ...معنى كدة ان الست مش عايزه ثقه والراجل مش عايز رعاية ...لا طبعا ...بس الاهم عند الراجل الثقه وبعدين تيجى الرعايه فى المرتبه التانيه ...والعكس عند الست .

1 سماح عايزه رعايه وهشام عايز ثقة :

لما هشام يراعى مشاعر سماح ويهتم بيها من قلبه سماح حاتحس ان هشام بيراعيها فتبدأ تثق فيه فهشام يحس بالثقه اللى محتاجها من سماح يقوم يهتم بيها اكتر ويراعيها اكتر فتثق فيه اكتر ....والعجله تلف

2 سماح محتاجه تفهم بفتح التاءوالفاء وهشام محتاج تقبل بفتح التاء والقاف :

لما هشام يسمع لسماح وهيه بتعبر عن مشاعرها من غير مايحكم عليها ولا يقدم حلول ...بس بيسمع ويتعاطف ويتواصل ...سماح حتحس انه بيفهمها فتبدأ تتقبل هشام من غير ما تحاول تغيرة فياخد احتياجه من التقبل فيبدأ يديها تفهم ......والعجله تلف

3سماح محتاجة احترام وهشام محتاج تقدير :

لما هشام بيدى سماح الاولويه فى حقوقها ورغباتها ...لما يقدر رغباتها ...لما يجيب لها ورد ولا هديه من غير مناسبة حتحس انه بيحترمها فتبدأ تقدرة التقدير اللى يستحقه ويحس هشام ساعتها ان اللى بيعمله مابيرحش على الارض فيحترمها اكتر ....وتلف العجله

4 سماح محتاجه الاخلاص وهشام محتاج للاعجاب :

لما هشام يخلص لسماح ويفخر بيها حتحس انه بيحبها وبيديها من وقته فتعجب بيه وتبدأ تتكلم عن اخلاقه وصفاته الحلوه فيحس هشام انها معجبه بيه فيخلص لها اكتر ....والعجله تلف..

5 سماح محتاجة التصديق وهشام محتاج للاستحسان :

هشام لما مايعترضتش على مشاعر سماح ومايجادلش ويصدق على كلامها فتبدأ تستحسن افعاله لان هشام دايما عايز يكون بطل وفارس فى عين مراته ..بدون تريقه سبعها وجملها...لما يلاقى دة يبدأ يصادق على كلامها .....والعجله تلف

6سماح محتاجه للتطمين وهشام محتاج للتشجيع :

لما هشام يهتم ويتفهم ويراعى ويحترم ويصدق سماح حتحس انها متطمنه ومحبوبه فتثق وتقدر وتستحسن هشام فيتشجع انه يطلع كل اللى عنده .....والعجله تلف

انا بدأت بهشام علشان ياخد الخطوه الاولى ...بس ممكن سماح هيه اللى تاخد الخطوه الاولى ...اى حد اى حد يبدأ بس العجله تلف .

الموضوع مش سهل والمهمه صعبه وعايزة تدريب وصبر ومحاوله ...بس اللى عايز العسل لازم يستحمل قرص النحل....السعاده والعيشه الهاديه تستاهل نتعب ونحاول ومنركبش دماغنا ونقف جنب شريكنا مش قدامه ...ونبطل كبر وعناد ونبطل نقول مجتمع ذكورى ونبطل نقول الستات اتفرعنت.

المركب واحدة وصلوها لبر الامان ....علشانكوا وعلشان حياتكوا ... والاهم علشان ولادكوا يكبروا فى بيئه صحيه وربنا يكرمنا وهما اللى يحرروا القدس .

فاضل حاجتين :

اولا :موضوع الفرق بين الرجل والمرأة دة من وحى كتاب الرجل من المريخ والمراة من الزهرة للكاتب د.جون جراى

ثانيا : فاضل نقطه مهمه جدا انا ما اتعرضتلهاش ...ونفسى انتوا اللى تكتبوها ...لان الموضوع ده ماينفعش فيه وجهة نظر واحدة ....وبصراحه انا لو كتبته حلطش جامد قوى ...علشان انا اصلا مخنوق من هشام وسماح ومش طايقهم من الاخر.

الموضوع اللى بقول لكوا عليه دة من وجهة نظرى سبب تسعين بالميه من الخلافات بين الازواج مع انه مابيتقالش وعمرة ما حيتقال ....اكتبوا اكتبوا ووقعوا غير معروف ...بس اكتبوا اللى ليكوا واللى عليكوا ...

البوست الجاى حيبقى العنوان بس ....وحاسيبه فاضى ....وحاخد التعليقات احطها فيه ...

مع اطيب تمنياتى بحياه سعيدة جديدة مديدة .....باى شله

الفرق بين الرجل والمرأة 9

الفرق بين الرجل والمرأة9

هشام وسماح لما حسوا ان العلاقة بينهم بدأت تتوتر قرروا ينزلوا يتفسحوا لوحدهم من غير العيال ...عدوا على بتاع الايس كريم ...ضرب كل واحد اللى هوه عايزة ...وميشيوا يتفرجوا على الفتارين وهما ماسكين ايديهم فى ايد بعض ....هشام : على فكرة ياسمسم أنا حاخد جزء من الفلوس اللى محويشينها ...اشتغل بيها فى البورصه ...الموضوع بيكسب كويس ....هشام كان بيفكر مجرد فكرة بيقولها لسماح ...لسه ماخدش قرار ...سماح بقى فهمت ان هشام بيتصرف لوحدة وبيعتبرها غير موجودة وملهاش رأى ....سماح راحت ردة بسخريه : هوة انت بتفهم فى البورصة ولا حتضيع لنا القرشين اللى شايلينهم للزمن ....هشام فهم ان سماح مابتثقش فيه وفى قدراته وبدا يهاجم :انت اصلك فاهمة ان البورصة زكى رستم يخسر الفلوس ويمسك قلبة بايدة ويقول قلبى ويطب ساكت ...هشام هاجم افكار سماح السلبيه ناحيته ...سماح حست انة بيستهزأ بيها ماسكتتش :يعنى انت اللى بتفهم فى البورصه ..عموما انت حر ...بس ياريت تبقى تشوف حد يعلمك بدال ماتعك وتطير القرشين ...وبدأ كل واحد يلطش فى التانى والموضوع اتقلب من نقاش الى جدال..لغاية ما هشام سكت وقفل بقه وفضلوا ماشيين ساكتين والفسحة اللى بدأت بالايس كريم ساحت على دماغهم ...والرسمه اللى كان راسمها هشام فى دماغة بعد مايرجعوا وينيموا العيال باظط ....يعنى نكد من كله...

المشكله مش فى الاختلاف المشكله فى الاسلوب اللى بندير بيه الخلاف .

هشام وسماح بدأوا النقاش ويادوب بعد دقيقتين بقى جدال ومن غير مايحسوا بدأوا يجرحوا فى بعض ...

هشام ماكنش واخد قرار فى موضوع البورصة كان لسه بياخد رأيها ...وبدال ماسماح تسمعه سمعت مشاعرها السلبيه ناحيته.....ايه بيتاجاهلنى يعنى ...ايه هو انا ماليش لازمة ...ايه هو انا طرطور ....وسخنت نفسها فكانت لازم ترد وتدافع عن ذاتها فقالت له هوه انت بتفهم فى البورصه ...لو هشام بيفهم كان عداها ...وكمل نقاش موضوعى ...بس هوه كمان خد الموضوع بشكل شخصى ..اه يعنى انا عبيط ...اه يعنى انا مايعتمدش علية...وسخن نفسه وفى الاخر سكت واتكتم علشان مايتخانقوش فى الشارع ....هوه السكوت وقفل الكلام فى الموضوع دا حل ....حنشوف

فيه تلت اساليب الازواج والزوجات بيستخدموها علشان يتخلصوا من الم الجدال ..هما فاكرين انهم بالاساليب دى بيتفادوا الموقف لكن فى الحقيقة العكس هوه اللى بيحصل .

اول اسلوب غلط وهوة اسلوب الهجوم ...لما الحوار يبدأيبقى بايخ ...الراجل يتحول للهجوم على اساس ان الهجوم خير وسيله للدفاع ....فيهاجم باللوم واصدار الاحكام السلبيه ...وانت مابتفهميش ...انت ايش عرفك ...ويعلى صوته ويصرخ وبكدة يغصب على الست انها تسمع كلامه وتتقبل وجهة نظرة ...ساعتها بيحس انه منتصر ...والحقيقة انه مهزوم لان الاكراه بيضعف الثقه فى العلاقة ...

الاسلوب التانى واللى استخدمه هشام وهو اسلوب الهروب ...او بالبلدى تكبير الدماغ ...يسكت ومايردش ..ومايتكلمش فى مواضيع شامم فيها ريحه جدال ..وشويه شويه يتحول الى الرجل الصامت اللىكل ستات مصر والغالم بتشتكى منه وتقول عليه فى القعده اياها ...طول ماهو فى البيت قاعد ساكت ومخروس ..ولما يجيله تليفون من صاحبه ياسلام على الرغى والضحك والقهقهة ......الرجاله مايعرفوش انهم بكدة بيجرحوا الستات بطرق غير مباشر ...والنتيجه تلاقى الست تقوم الفجر تشغل الغساله ...وتبدأ تطلع هما فى الاكل ليل نهار لغايه ماتبقى زى الفيل ..

الاسلوب التالت وهوة التظاهر والاستسلام ....ودة غالبا مابتعمله الستات ...بتتظاهر ان مافيش مشكله وان كله تمام ...وتلطع على وشها ابتسامه ساذجه تبين انها مقتنعة وموافقه على اللى بيقوله ...مع انها مضغوطة وزهقانه لانها بتحس انها بتدى بس مش بتاخد وساعات تستسلم وتقبل اللوم والنقد وتسكت ...وشويه شويه تفقد ذاتها وببقى مش مخليه الزبون عايز حاجة بس فى نفس الوقت مش سعيدة ....ودة برضه اللى بيخلينا نشوف واحدة بتطلب الطلاق بعد عشرين سنه جواز ....وتلاقى كل اللى حواليها مستغربين ...ازاى دول عمرهم ما اتخانقوا ...

الحل ياعم الخبير ....عارف اكيد زمانكوا بتقولوا كدة !

الحل ان الاتنين مايخدوش المواضيع بشكل شخصى ....مايفسروش كل كلمه على انها اهانه او سخريه ... مايهاجموش ومايهربوش ومايستسلموش ....وواحد فيهم اى واحد واكيد الواحد دة هوه الاعقل ...بغض النظر عن ذكورية المجتمع ...اى واحد فيهم يقف ويعتذر ...طبعا الاعتذار صعب على النفس ..مش اى حد يقدر عليه ....بس اعتذر بدون ماتعتذر ...اقف وخد نفس وقول او قولى انا شايف انك متدايقة ....وابدا فى مناقشة الموضوع ....الموضوع ..هه ....الموضوع مش الافكار السلبيه ونظريه المؤامرة وذكورية المجتمع ...حوار بين اتنين مصلحتهم واحدة ...مش مهم مين وجهة نظرة اللى تطلع صح ...مش مهم مين اللى يكسب فى الكلام ...المهم المصلحه للجميع

هانت فاضلى حلقتين الحلقة اللى جاية انا حاكتبها واللى بعديها انتوا اللى حتكتبوها علشان نخلص من موضوع هشام وسماح اللى صدعونى ....واشوف بقى موضوع حلو كدة اتكلم فيه ...بلا جواز بلا بطيخ على راى اخوانا السوريين