حىّ إكلينيكياً

حىّ إكلينيكياً

عمود الخرسانة اهم حاجة فى العمارة ....هوّه اللى شايلها ....لوتآكل العمود ...العمارة تتصدع ...زى معهد الاورام كدة ....ولو العمود وقع العمارة تتهد على دماغ اللى فيها ....زى هايتى كدة ....وعمود خرسانة حياتنا هوه اعصابنا ...واعصابنا بدأت تتآكل وحياتنا بدأت تتصدع ...عملت فيها استشارى من كلية الهندسة وقعدت ادور على سبب التآكل ...لقيت السبب حاجة كدة اسمها القلق ...القلق دة بياكل فى اعصابنا ... بينخر فيها زى السوس ...بيمحى اى لون او طعم او معنى للحياة.....

بنقلق لما نجيبش مجموع فى الثانوية العامة بعد الهم بتاع الدروس ...وان جبنا مجموع بنقلق لما ندخلش الكلية اللى احنا عايزينها مع ان مجموعنا كبير ...وان دخلنا الكلية اللى احنا عايزينها نقلق لمانعرفش نلاقى شغل فى زمن البطالة ...وان اشتغلنا بنقلق لنترفد بسبب الازمة المالية العالمية ....وان مااترفدناش نقلق لما نعرفش نعمل فلوس ..وان عملنا فلوس نقلق لاماتكفيش طموحاتنا ..... وان كفت نقلق لمانعرفش نزودها ...

نقلق لمانعرفش نحب ...وان حبينا نقلق لنفترق ...وان مافترقناش نقلق لامانتجوزش ...وان اتجوزنا نقلق لانتطلق ونخسر شقى السنين ...وان ما اتطلقناش ...نقلق لما نخلفش ....وان خلفنا نقلق لمانجيبش الولد ...وان جبنا الولد والبنت ...نقلق عليهم من الدش والنت ....وان بعدناهم نقلق لاميندمجوش مع المجتمع ...وان سيبناهم نقلق لينجرفوا فى تيار التشليح ...

بنقلق على صحتنا ...وان مرضنا بنقلق لمانعرفش نتعالج ...وان اتعالجنا نقلق لا الدوا مايجيبش نتيجة ....

نقلق لما الموبيل يرن ليل نهار ...ونقلق لما نعملة سيلنت (صامت) ليكون حد طلبنا....

نقلق لما نلحقش القطر ....وان لحقناه نقلق لمانلقيش مكان نقعد....وان قعدنا نقلق ليتقلب بينا فى العياط مع اننا رايحيين اسكندرية ...

نقلق لا الحزب الوطنى يفضل فى الحكم ونقلق لا الاخوان المسلمين يوصلوا للحكم ....

نقلق من حكومة رجال الاعمال لايقلّبونا ...ونقلق ليجيبوا حكومة اساتذة جامعة ليضيعونا...

نقلق من شيخ الازهر اللى بيحلل كل حاجة وأى حاجة لاحسن ندخل بسببه النار ...نقلق من شيوخ قناة الناس اللى بيحرموا اى حاجة وكل حاجة لنعيش فى نار ...

نقلق من الزرع المرشوش ...ونقلق من الاورجانيك ...نقلق من مية الحنفية لتجيب تيفود ...ونقلق من المية المعدنيه لماتطلعش معدنية ...نقلق من الكهربا والغاز والطاقة النووية للاغراض السلمية ...نقلق من امريكا واسرائيل وحزب الله ...نقلق من السودان ومنابع النيل والحوثيين,,,

بقينا قلقانين من كل حاجة ...دا حتى بقينا قلقانين من القلق ذاتة ....

ياترى ينفع نصلح العمود وننكس حياتنا قبل ما تتهد على دماغنا ....ولا حنفضل كدة مبسوطين وراضيين بأن احنا نعيش بس.............. اكلينيكيا

كشرى مصراوى

كشرى مصراوى

معرفش اية اللى خلانى اربط بين الاكلة المشهورة لكل بلد وبين افكار البلد دى وتوجهاتها واسلوبها ....امريكا مثلا عملية وسريعة فمشهورة بالكنتاكى ....السعودية مرحرحة فمشهورة بالكبسة لغ يامعلم ...ايطاليا المزاج والروقان فمشهورة بالبيتزا .....مصر كله على كله ولما تشوفة قوله فمشهورة بالكشرى المصراوى ...رز ومكرونة وشعرية وعدس وحمص على بصل وصلصة وشطة....وساعات يحطوة فى نص رغيف ...يعنى عيش كمان ...كله ماشى ....كله ينفع ...واقعد يامصرى كل من الطبق الكبير ...طبق فية الراسمالية بأفكار الاشتراكية...علية الديموقراطية بمفهوم الديكتاتورية ....على تداول السلطة بس بنفس الاشخاص ...على مابنطبعش مع اسرائيل بس نصدر لها غاز ونعمل واجب كمان ...على حجاب ملزق ونقاب ...ومرسيدس على تكتك...وكمبوند على اشلاء عشش الغلابة ..وبعد ماتاكل وتستطعم غصب عن عين اهلك....اطلب كمالة ...كمالة شوف الواوا...ويونيسكو مابيخدش غير رجالة ... على منتخب الساجدين على سامح الهربانين بقرار جمهورى ....دا الرقص على العارضة يشفع ...على قومية عربية على ملناش دعوة ياولية ...على سخنها يامعلم علشان 0900 ...على حقوق المرأة والطفل وحضارة وهرم وخوفو وشارع الهرم ودينا ولوسى ...والرجالة الخوجات توتو وميمى اللى بيرقصوا بلدى ...ولمبى... وبوبوس...... وابراهيم توشكى ..... شكل البلد دى قلبها حيقف قريب على رأى ابراهيم توشكى..... بس قلبها قلبها ....ماهو مافاضلش غير قلبها

مى وآسر اتجوزوا بعض

مى وآسر اتجوزوا بعض

آسر بعد مافك خطوبتة ....اكتشف اواتهيأله انه اكتشف انه بيحب مى ...حب حب مش اخوات وصداقة ...وفضل وراها لغاية ما اقنعها ...او برضة هية اللى سابتة يقنعها ..ماهو معناه اية انها كانت بتتدايق لما كان بيروح يتفسح مع خطيبته ...ومعناه اية لما كانت بتصلح بينهم وهيه من جواها بتتمنى انهم يسيبوا بعض ...معناة ايه غير انها بتحب آسر مش صداقة وأخوات والعبط دة ...الحقيقة ان ماحدش فاهم آسر قدها ...ومحدش فاهمها قد آسر ...وبعدين ماهما الاخوات فى الدراسة ممكن يتجوزوا مافيش مايمنع شرعا ...وان كان على قرطسة المجتمع ... دى سهلة ... المجتمع خد على كدة ...اخوات ..متجوزين ...متطلقين ...كاتبين الكتاب فى القسم ..ماعادتش تفرق ...شوية وحلاوة اللبانة تروح ويشوف غيرها وصلى على رسول الله ....واتجوزوا بعد ماعملوا فرح وزفة وفندق خمس نجوم دفعوا فيه دم قلبهم علشان يرقصوا ...ورقصوا ...ماتوا من الرقص ..الله بفلوسهم ...وبدأت الحياة ...الايام الاولانية كانت فى منتهى السعادة ...فاهمين بعض بقى ...حاسيين بعض ....(نفسى اعرف هما بيشيلوا الباء اللى قبل بعض لية....معلش يا اخونا فلاح بقى )...قريبيين من بعض ...المصيبة بقى فى قريبيين وحاسيين وفاهمين دى ...فاهمين وقريبيين وحاسيين زيادة عن اللزوم ...كل واحد فاهم التانى اكتر من نفسه ..حتى كلمات الاعجاب والحب اللى بينهم كانت معروفة مسبقا ...نظرة آسر للبنات الى فى الشارع وهوة ماشى مع مى مفقوسة ماهى عارفاه وعارفة زوقة ...كانت ردود افعال مى قدام اى موقف معروفة لآسر ...ماهوة اللى مربيها ...وشوية شوية ... التفاهم والاحساس اللى بينهم بقى عامل زى الفيلم الابيض والاسود اللى بيتشاف للمرة المليون ...بس اللى كان بيوجع مش انهم شافوا الفيلم قبل كدة ...اللى كان بيوجع انهم لازم يضحكوا ويبكوا ويتشدوا على نفس المشاهد اللى حفظوها... يضحكوا ويبكوا ويتشدوا بنفس الحماس اللى كان موجود فى اول مرة شافو فيها الفيلم ....وبدأت الخلافات ...خلافات من نوع غريب ...خلافات نتيجة عن زيادة الفهم مش نتيجة لعدم الفهم ...وبدأ آسر ومى يفكروا ...هوة كان صح انهم اتجوزوا ولا كان الاحسن يفضلوا صحاب ...وبعدين فكروا اكتر ...هما كانوا صحاب ولا اخوات فى الدراسة ولا دة كان حب ولا دى كانت طبطبة ..ولايكونش دة كان تعود ...لا لا دا كان حب تملك ...الاكيد انه دة طبع البنى آدم ...عايز كل حاجة ...ومش عاجبة اى حاجة ..آسر ومى حمدوا ربنا انهم ماخلفوش ...واتفقوا على الطلاق ...

وخسروا.... خسروا الجوازة وخسروا الصداقة والاخوة فى الدراسة

انا كدة خلصت بس ححكى ليكوا حدوتة....صلوا على النبى :

كان ياما كان فيه 3سمكات ...سمكة غبية وسمكة ذكية وسمكة اذكى ...كانوا عايشين فى بحيرة صغيرة جنب البحر ....وفى يوم عدى عليهم اتنين صيادين ...الاولانى قال للتانى شايف التلت سمكات دول ...واحنا رجعين نبقى نصطادهم ....السمكة الاذكى سمعت الكلام ماكدبتش خبر ....راحت نطة فى البحر وهربت بعمرها ....رجع الاتنين صيادين ...السمكة الذكية عملت نفسها ميتة وطفت على وش المية ...خدها الصياد ورماها فى البحر ...فنجت هية كمان ....الغبية بقى فضلت تلف وتدور حوالين نفسها .....وطبعا انتوا عارفين نهايتها ....كانت الذ عشوة سخنة بالفلفل والكمون

ماينفعش.... ماينفعش ... والله ماينفع ...ولا حل من التلاتة ينفع ...لأن اصلا العود معووج ...ومدام العود معووج عمر ضله ماحيطلع عدل ...ويارب... يارب...نسمع كلام ربنا علشان نرتاح ...

التتر

يارب نسمع كلام ربنا

((اخوات فى الدراسة))

قصة

صبرنى يارب

سيناريو وحوار

حنعيش يعنى حنعيش

بطولة

آسر

مى

شكر خاص لــــــ

جوز مى

مرات آسر

تصوير

خيال كل واحد

انتاج

الكتالوج للانتاج والتوزيع

اخراج

بلوج اسبوت

مى وآسر مابقوش اصحاب

مى وآسر مابقوش اصحاب

مى بعد ما أتجوزت عرفت انه مش حينفع ان الصداقة اللى بينها وبين آسر تستمر ..لا جوزها حيسمح بكدة ولا مرات آسر حتوافق على كدة ...آسر كمان وصل للحقيقة دى...وماتت الصداقة ...بس موت اكلينيكى ...ماهم كانوا مركبين لها جهاز تنفس صناعى ...وبدأت الحياة تمشى فى طريقها المعتاد ...وزى اى جوازة فى العالم لازم يكون فية اختلاف ...اختلاف طباع ..اختلاف ثقافة ..اختلاف رغبات ...العادى يعنى ...حاكم المشكلة مش فى الاختلاف المشكلة فى ازاى ندير الاختلاف دة ...وبدال ما آسر ومى يقربوا وجهات النظر بينهم وبين اجوازهم ...استسهلوا حالة الطبطبة على النفس ....آسر بدا يقول فى نفسة يعنى مش لو كانت مى وافقت واتجوزنا مش كان زمانى اسعد من اللى انا فيه دلوقت ..مى الوحيدة اللى كانت بتفهمنى حتى من غير ما اتكلم ...كانت عارفة انا بحب اية وبكرة اية ...وبدأت حاله الطبطبة والندم والحسرة تتضخم ...بقى كل حاجة تعملها مراتة يسأل نفسة ياترى لو كنت اتجوزت مى كانت حتعمل اية فى الموقف دة ...وعاشوا التلاتة مع بعض آسر ومراتة ومى ...وياعينى على جوز الاتنين خصوصا لما واحدة فيهم تكون فى الخيال ....مى بقى كان حظها مش حلو حبتين ...جوزها ماطلعش فرى ومتحضر ..طلع من الرجاله اللى بنسمع عليهم فى حداويت تيتا الحاجة ...عاشت ...ماهو كل اللى حواليها بيقولها عيشى ...بس مش دى العيشة اللى كانت عايزاها ...كانت عايزة واحد فاهمها ...فين ايامك يا آسر كان فاهمنى من غير ماتكلم ...كان عارف بحب اية وبكرة اية ...وكانت كل مايحصل حاجة بينها وبين جوزها تجرى تقعد مع نفسها وتحلم لها حلمين يقظة وتشوف آسر لو كان مكان جوزها كان حيعمل اية ..وتندم على خيبتها وقلة عقلها لما ما وفقتش أسر لما قلها نتجوز ...ممكن نستحمل ان احنا نعيش فى الخيال بس لما يكون موازى للواقع ..بس لما الخيال يغطى على الواقع تبقى المصيبة ....مصيبة لا ن احنا بنصدق الخيال وبنكدب الواقع ...لا آسر ولا مى استحملوا ومن غير ما يتفقوا كل واحد فيهم اتطلق .... واتقابلوا بعد سنتين ...كانت مفاجأة ...بس المفأجاة الاكبر ...انهم اكتشفوا انهم اتغيروا ...لا مى فضلت مى ولا آسر بقى آسر ...

وخسروا.... خسروا الجوازة وخسروا الصداقة والاخوة فى الدراسة

والى اللقاء فى الحلقة الثالثة

مى وآسر فضلوا اصحاب

مى وآسر فضلوا اصحاب

آسر بعد مافك خطوبتة ...ومى قالت له خلينا صحاب ....شاف بنت الحلال واتجوزها ..وبعدية بشهرين مى كمان اتجوزت ...البنت اللى اتجوزها آسر كانت جميلة ...جميلة فى كل حاجة ...شكل وروح وتعليم ....كمان جوز مى كان جميل فى كل حاجة ...رجولة وشهامة وعلم وثقافة ...الغريب ان الاربعة كانوا متفقين انهم يبقوا كلاس ...فرى ...حضارة....آسر اقنع مراته...اوهيه عملت انها مقتنعة ...بأن مى صديقة واخت فى الدراسة ...وعادى يعنى نتكلم ونحكى ونتقابل ...اخوات اخوات ...مى هية كمان اقنعت جوزها انه يخنق نخوته بحبل التحضر والفرى ..ويقتنع بأن آسر صديق واخ فى الدراسة ...وان الموبيلات والماسجات والمقابلات دى مابتدعداش حدود الاخوة عادى يعنى ....مرات آسر وجوز مى كانوا فاكرين ان الموضوع حيبقى عادى ..بس البنى آدم اية ياخوانا غير شوية دم واعصاب ...دا البنى آدم هه....والمجتمع وان كان عامل نفسة كلاس وفرى هوة كمان...بس ماكنش بالع الموضوع ..وماصدق يلاقى لبانة ..واية بالنعناع كمان ...بدأت مرات آسر تتلكك وتتخانق وتنكد علية ...وجوز مى هوة كمان بدأ يحس ان حبل التحضر بيحز على نخوتة كل مايشوف آسر ومى بيتكلموا مع بعض ...رغم انه عارف انهم اخوات فى الدراسة وانهم مايجوزوش لبعض ...دا طبعا غير كلام الناس وتلميحاتهم المكتومة وشوية شوية مرات آسر الجميلة فى الشكل والروح والتعليم ماستحملتش ...اتطلقت من آسر ...وعلى آخر لحظة جوز مى لحق نخوته قبل ماتفطس وفك حبل التحضر وطلق مى ...مى وآسر بقوا متطلقين ...وكمان مابقوش صحاب ...ماهو من غير مايقولوا لبعض ...كل واحد فيهم حمل التانى مسؤلية اللى حصل له ...خسروا الجوازة وكمان خسروا الصداقة والاخوة فى الدراسة

والى اللقاء فى الحلقة الثانية

صبرنى يارب على مى وآسر

صبرنى يارب على مى وآسر

آخر بوست لصبرنى ...من الاخر كدة.... روعة ...حاجة كدة من السنما الواقعية بتاعة عم صلاح ابو سيف....بصراحة البوست استفز فية رحلات الدماغ اللى كنت باعملها ...قولت ياواد ماتيجى نعيش مع اختنا مى واخوها فى الدراسة على رأى صبرنى ...آه ماهو اليومين دول مش زى زمان ...زمان كان فية اخ فى الرضاعة ....لكن فى زمن الماركتينج بقى فية اصناف كتير ...اخ فى الدراسة ...واخ فى المواصلات ...واخ فى الخروجات ...وأخ فى الأخ.....القصد علشان ما اطولش عليكوا لقيت فيه احتمالين مالهومش تالت ....الاحتمال الاول انهم يتجوزوا ...الاحتمال التانى انهم مايتجوزوش وكل واحد ياخد نصيبة ....لقيت الاحتمال التانى ينبثق على احتمالين ...يا ميتجوزوش ويفضلوا اصحاب ...يا مايتجوزوش ويفترقوا ...وفجاة لقيت الموضوع بيكبر معايا ....وماينفعش يتقال فى بوست واحد ....قولت اخد كل احتمال فى بوست ...ونمشى معاهم ....ونشوف حيوصلوا لفين ....وياترى اية الصح .....الى اللقاء فى الحلقة الاولى

الحقيقة الغائبة

الحقيقة الغائبة

ولأن الحقيقة دائما غائبة ....ولأننا غالبا لانعرف كل شى ولكن ندعى ذلك ...ولأننا دائما نكمل الأحداث من وحى افكارنا ...لكل ذلك ولغير ذلك ...ترتفع الاصوات وتعلوا الكلمات على خلفية الطبول الجوفاء....فتحدث ضجيجا يصم العقل عن التفكير ...ويصبغ التدوينة العربية باللون الاسود...حزنا على انسان بلا كرامة ولاوطن....ولاحقيقة ,,,

الحقيقة الوحيدة عندما ندرك اننا لانملك الحقيقةالكاملة.... هى ان لا نحكم على الاشياء...فى هذة الاحيان لانملك سوى ان نشاهد.. ونتابع...ونتسأل ...مجرد تساؤلات...ليس وراءها أى تجاوزات ...أو مزايدات ...أو مناورات ...أومرابحات ....فقط تساؤلات تبدو منطقية تحتاج الى اجابة ارجو ان تكون منطقية ....وبالبلدى علشان تكون سهله

--الطوب اللى بيترمى ناحية الغرب دة مش الاولى انه يترمى ناحية الشرق؟!

--اللى بيضرب الرصاصة فى قلب الفتحى علشان هوه مش حماسى ...مش الاولى يضربها فى قلب الاشكينازى ؟!

--هية البدلة المستوردة السينييه دى مين بيدفع تمنها؟!

--ماحدش حارب لنا حربنا (دا يمكن فية اللى كان عايز يبوظها ) طاب ليه عايزينا نحارب حرب غيرنا ؟!

--هوة مش من حقى احمى بيتى وحرمتة حتى لو من اخويا شقيقى؟!

--هوة لما حد بيحب يزور حد بيخبط على الباب ولا بينط من الشباك ؟!

--هل من المفروض اقدم اسباب حمايتى لبيتى واطلب الاذن ؟!

--فتحى وحماسى بيتفاوضوا بقالهم سنتين علشان يرتبوا البيت من الداخل ...هوة البيت مكركب قوى كدة؟!

--ام كلثوم زمان كانت حاسة باللى حيحصل لنا فغنت للصبر حدود ...حتى الصبر محتاج لحدود ...بس لما الصبر يبقى له حدود ...أكيد حتبقى حدود فولازية

وبرضة مش حأحكم علشان مش عارف كل الحقيقة

اشكالا للحل

اشكالا للحل

المشكلة مش فى المشكلة ...المشكلة فى طريقة تعاملنا مع المشكلة ....لما بيحصل لنا مشكلة ....آخر حاجة بنفكر فيها أن احنا ندور على حل للمشكلة دى...اللى بيحصل ان اول حاجة بنعملها ...ان احنا بندور على حد ...اى حد نحملة سبب المشكلة ...وننزل فية لوم ونقد ...وبعدين نريح على الكنبة ونمسك التليفون ..ونشتكى ...نشتكى من اللى كان السبب ...نشتكى ان مافيش حد بيقف جنبنا ...ونشتكى من حظنا القليل وبختنا المايل ....وبعدين نبدأ فى المقارنة ..نقارن بينا وبين غيرنا اللى مابيحصلوش مشاكل ....ونقارن بينا وبين اللى حصل له نفس المشكلة بس حلها ...لكن حلها ازاى ...ماهى الواسطة والمعارف والفلوس هية اللى ساعدتة ...لكن احنا غلابة ملناش ضهر ...علشان كدة بننضرب على بطننا ...ونرجع نلوم الدنيا والظروف ونشتكى من قلة البخت والحظ الهباب

ونبدا بقى حلقة الزهق والنكد وان مافيش فايدة ..وانها باظط ...وندخل فى جالة اكتئاب ...مع ان من الطبيعى انه يحصل لنا مشاكل ...علشان هية دى الدنيا ... ولو الدنيا مافيهاش مشاكل تبقى جنة ...والجنة مش موجودة غير فى الاخرة ...لكن لو اول حاجة عملناها لما تحصل لنا مشكلة ...ان احنا نفكر فى حل المشكلة ...نفكر فى الحل وبس ...من غير مانطبطب على نفسنا ونواسيها ...حنحل المشكلة ....ومش حيشغلنا لا مين اللى كان السبب ولا مين اللى ضربنا العين ...ولا حنفضل فى حالة الاكتئاب المزمن اللى وصلنا له ومستمتعين بية

جاى اهدى النفوس

جاى أهدى النفوس

شوفت انه كفايه بقى نكد.... وشويه كدة تهدية نفوس ...البوست دة جانى على الميل ....يعنى مش انا اللى كتبه .... بس بصراحة عجبنى وياريت اسمع رد علية من البنات ...

نصائح للمخطوبات

لو ربنا فك عقدتك.. واتخطبتي.. فإليك نصائحي حتى تأخذي بخطيبك من مركب الخطوبة إلِّي محدش عارف هاترسى على إيه.. إلى مثوااااه الأخير في قفص النسانيس.. قصدي قفص الزوجية السعيد

أجمل ما في الخطوبة العزومات الرومانسية.. على أحلى محلات أكل ف البلد.. واللي عمرك مانتي شايفاها بعد الجواز ... المهم نصائحي لك عند أي عزومة مع ختيبك .. قلنا رقَّه بقى ....

· الأول لازم تعرفي إن الشوكة والسكينة بيتمسكوا من إيديهم من الطرف يعني مش م الوسط ولا م البوز زي الخنجر ولا من فوق طبعًااا

· العيش أوعي تفضحينا وتقطعيه بسنانك.. ولا الرغيف نصين بأيدك وكل نص لقمة وتحشري ... أوعي .. العيش بيتقطع بالسكينة ف الطبق .. وبعدين تاخدي لقمة .. لقمة .. بالعافية .. قال يعني نفسك مسدودة .. اضغطي على أعصابك جدااا وبعدين لما تروَّحي .. إبقي حِفِّي زي مانتِ عايزه ... أهلك اهم عارفين انك طفسه ومش هيفضحوكى

· الشوووربة.. أبوس كعب رجلك .. بند الشوربة ده مهم جدًاااا.. الشوربة تتشرب من غير صوت خالص .. ومن غير ماتقعدي تنفخي فيها .. زي القهوجي اللي بينفخ ف الحجر للزبون .. وطبعًاااااا عايزك تنسى تمامًا ... السلطانية اللي بتقيميها على بقك ف البيت.. وتدلدقي على روحك ... بالمعلقه وبدون صوت .. سخنة ولعة برضه بدون صوت .. وتسيبي تلت الطبق ع الأقل .. مش تميليه.. عشان تلهطيها لآخر نقطة ......

· الرز طبعاً ... بيتاكل بالشوكة .. أوعي إيدك تتمد ع المعلقة .. وتغرفي من طبق الرز وتعبي .. إوعي ...... الرز بالشوكة .. وكأنك بتبوسيه مش بتاكليه ...

· المكرونة ... الاسباجيتي .. برضه بالشوكة .. تتلف على طرف الشوكة .. لحد ما تخلص وبعدين تحطيها ف بؤك من سكات .. مش تشفطي المكرونة عود عود وتبهدلى خلقتك ويبقى منظرك زبالة .... خلى دا بعدين لما الزبون ينطس ف نظره ويجوزك ... ويلاقى نفسه قدام الأمر الواقع ....

· السمك .. مشكلة ... شوفي .. بتفصلي اللحم عن الشوك .. إزاي ..؟ تقطعي اللحم من النص .. بالطول وبعدين تفردي اللحم ع الجانبين. ولما تخلصي ناحية .. متقلبيش السمكة .. بلاش فِلح .. شيلي السلسلة بالشوكة والسكينة وحطيها ف جنب الطبق وكملي أكل النص التاني ... وبدل الفيلم الهندي ده .. نصيحة .. ماتكليش السمك خالص .. قولي مابحبش السمك وخلصي نفسك

· الجمبري .. دا يعنى اذا كنتي عارفاه ... أول ماطبق الجمبري ينزل .. بصيله بقرف واحتقار شديدين .. آل يعني زهقانة من كتر أكل الجمبري الجامبو ف بيت بابّااااا.. وأتنهدي جامد وقولي .. برضه ..؟ وتروحي قاطعة راس الجمبريياية ... بالشوكة .. أنا ف عرضك إنسي المصمصة دلوقت .....

· البطاطس سواء مسلوقة أو محمرة .. أوعي تهرسيها وتدبيها ع الرز وتدي ... لا.. لآ... لآ... بالشوكة حتة حتة وإنتى زي ما تكوني هاتعيطي من كتر ما البطاطس صعبانة عليكي ....

· الفاكهة .. لو الفاكهة فيها بذر .. طلعيه من بؤك بالراحة وحطيه ف إيدك وهي مقفولة .. وبعدين فى طفاية السجاير اللي ع الترابيزه .. أوعي ياحبيبتي من نظام التفتفة للبذر .. إنسي .....

ولما تخلصي أكل تحطي إيدك على بطنك ... اللي عصافيرها بتصوصو من العينات اللي كلتيها ... وتقولي له مش ممكن .. أنا عمري ما اتفجعت كدة .. أنا أودامي أسبوع .. هابطل أكل فيه .....

وبعدين تمسكي الفوطة اللي دايمًا موجودة ع التربيزة من غير لازمة ... وتبوسيها... آل يعني بتمسحي بؤك ... وبعدين تستأذني منه لدخول التوليت لإصلاح ماكياجك ...

وتخشي التواليت وتطلعي من شنطة إيديك .. لفة الفول والطعمية اللي جايباها معاكي ... وبالهنا والشفااااااااااااا

الكلمة فيها لمن غلب (2)

الكلمة فيها لمن غلب (2)

طلعت فى دماغ اهلى انى ادرس علم نفس ...فيها حاجة دى .....واحد عايز يطور نفسة ويتفكر فى خلق الرحمن ...فيها حاجة دى ...سألت ...قالو لى اقدم انتساب فى كلية الاداب ...وقفت قدام الموظفة بتاعة شئون الطلبة ...كان قدامها جرجير وفجل وبصل اخضر وكرات... وبتفطر ....سألتها على الاوراق المطلوبة علشان التقديم ....قالت لى : تقدم طلب... وتجيب شهادة الميلاد وشهادة الجيش .....وشهادة الثانوية العامة بالدرجات ....قولت لها : قصد حضرتك شهادة البكالوريوس ...قالت لى : لأ شهادة الثانوية العامة بالدرجات ....بسذاجتى المعهودة قولت :حضرتك انا معايا ماجستير فى الطب البيطرى ....ومش ممكن اكون اخدت الماجستير من غير ما اكون خدت البكالوريوس ....والطبيعى انى ماخدش البكالوريوس الا لو كان معايا الثانوية العامة ... فانا اجيب لحضرتك شهادة البكالوريوس والماجستير ...لأنى صعب قوى الاقى شهادة الثانوية العامة ....دى من ايام الاتحاد الاشتراكى ......دخل علينا مدير شئون الطلبة ...سمعنا واحنا بنتكلم ...رمى الجاكتة ....مشيها الجاكتة .....ومد ايدة قدام الموظفة وخد حزمة فجل وضربها على بق واحد ...وقالى وهوا بيمضغ : يا أستاذ مش ممكن تكون مش جايب مجموع فى الثابوية العامة ....رديت برضة بنفس السذاجة : طول عمر الطب البيطرى بياخد مجموع اكتر من اللى بتاخدة كلية الاداب ....قالى وهوة لسة بيمضغ : هوة كدة ان كان عاجبك ...ياشهادة الثانوية العامة يا بلاش ....طلعت من عندهم على اول جزماتى خليتة يحط لى حديد فى كعب الجزمة ...واشتريت حزمة فجل وربطة جرجير وباتنين جنية بصل اخضر وبتلاتة جنية كرات علشان اتغدى حاكم انا كنت جعان قوى ...دخلت على مراتى رميت الجاكتة ....مشيها الجاكتة ..وقولتها والنبى يام جحيش والنبى املى لى الجردل علشان انا عطشان ...كدة احسن... كدة اسعد.... كدة اهدى ...بلا علم نفس بلا بنى ادمين بلا عقل بلا وجع قلب

الكلمة فيها لمن غلب 1

الكلمة فيها لمن غلب(1)

هوة كدة...اخبط راسك فى الحيط ..اشرب من البحر ..ان كان عاجبك ....قالى الكلام دة ...قولت له : ياعم والنبى نتكلم بالعقل ...طاب بالمنطق ...طاب رد عليا حتى ...عبرنى ...حس بية ....ولاحياة لمن تنادى ...

طاب ياعم والنبى... قولى اقدم اقرار ضريبى على اودة وصاله والحمام عند الجيران لية ؟!!

طاب ياعم والنبى ...هوة مش الشقة اللى انا اشتريتها دى دافع تمنها من مرتبى اللى انت واخد علية ضريبة اصلا ادفع تانى لية مش دة برضة اسمة اذدواج ضريبى ؟!

طاب ياعم والنبى ...الشقة انا كنت جايبها من عشرين سنة بستين الف دلوقت وبسبب التضخم اللى انت سبب فية بقت بستميت الف انا ذنبى اية ؟!!

طاب ياعم والنبى ...الراجل اللى عندة اربع شقق كل شقة بخمسميت الف ياخد اعفا وانا اللى عندى شقة واحدة بستميت ادفع ضريبة لية ؟!

طاب ياعم والنبى ...مش الدستور بيكفلى سكن ادفع ضريبة علية لية ؟!!

طاب والنبى ياعم ابوس كعب رجلك رد علية ؟!

طاب سؤال يدل على غبائى استحملنى ورد علية ....الشركات بتعمل اعلانات علشان تقنع الزبون انه يشترى منتجاتها ...دا طبعا علشان الزبون حر يشترى او مايشتريش ...صح ؟!!!....طاب انت بتعمل اعلان لية ....هوة انا كزبون يعنى عندى الحرية انى ما اقدمش الاقرار الضريبى ؟!!سؤال تانى معلش غبى بقى استحملنى ....مش فلوس الاعلانات دى انا اللى بادفعها ولا انا متهيألى ؟؟!!

آة يانى ياأمة

عم عشم حى يرزق

عم عشم حى يرزق

سيدنا عمرو بن العاص رضى الله عنه سألوة مرة عن مصر .....وصفهالهم وقال : نيلها عذب ...وارضها خصب ...ورجالها طرب ....ونساؤها لعب ....والكلمة فيها لمن غلب ....ولأننا فى عصر المعجزات ....لسة الكلام هوة هوة ...بعد الف وربعميت سنة ...لسة الكلام هوة هوة ...لسة النيل هوة هوة ...عذب برغم صرف المصانع ورمى الحمير الميتة فية ....ولسة الارض هية هية ..خصب وبتطلع زرع رغم انها بتتروى بمية المجارى وتترش بالمبيدات المحظورة ...لسة الرجالة هما هما ...قاعدين على القهوة بيشدوا فى الشيشة ...وعاملين دماغ كورة وحشيش وجوزة الطيب على ورقة اللحمة ...مع خلفية موسيقية حزينى من نوعية كتاب حياتى ياعين ...والنساء هن هن ....اينعم مش بيض ولا شعرهم اصفر ولا عنيهم خضرا ...بس يروشوا اهلك ....انوثة على دلع على شبشب يطرقع على دماغ اللى يقل ادبة ...على وقفة رجاله ساعة الزنقة ...خلطة سرية خاصة جدا ..........اية .......فاضل حاجة ...ايوة ياسيدى ..هما هما برضة ...ولسة برضة ماسكين فى نفس السياسة ...سياسة اللى فى قلعك انفضة ....والدليل فى انتخابات النقابات ..ماهو اليومين اللى فاتوا كان فية اسهال انتخابات النقابات...اللى نجح هوة اللى نجح الانتخابات اللى فاتت واللى قبلها واللى قبل قبلها ...اللى نجحوا هما هما اللى نجحوا وهما هما اللى مصدعين دماغ ابونا بتداول السلطة والديموقراطية والحرية والمهلبية والمادة 76...هما هما ...الكلام دا فى انتخابات النقابات ...امال فى الانتخابات اللى بجد ...برضة هما هما .....

وحيفضلوا هما هما ...وحنفضل احنا احنا ...واكلنا العشم ومستنيين الخلاص ...الخلاص اللى مستنينة من زمان ....مستنينة من ايام الرومان ومجاش ...من ايام اليونان ومجاش ...استنينا الخلاص من العرب وبرضة مجاش ...من العثمانيين مجاش ...من المماليك مجاش ...من محمد على مجاش ...من الاخوان مجاش ...من الثورة مجاش ....................وووو.....وبرضة مجاش...ومش جاى وحياة ابويا ماهو جاى ...طول ما عم عشم عايش جوانا ...الخلاص مش جاى ...طول ما ازازة مية النيل العذب اللى طالعة مشبرة من التلاجة ..وطبق العنب اللى من ارضنا الخصب جنبنا مش جاى ...طول ما احنا عاملين دماغ الكروسات والبانجو وبنسمع حزينى وقرص الفياجرا بقى زى الملبس ....الخلاص مش جاى ...طول ما البرا والبانتى ابوفيونكة سهل الفك آخر همنا الخلاص مش جاى ...وحيفضل هما هما راكبين ...وحنفضل احنا احنا مركوبين

ملحوظة : الموضوع من وحى مكان ما فى مصر قعدت فية يومين ...بس لسة عندى امل ان يكون فيه مكان تانى فى مصر فية طاقة نور

جربت احساس الطحن قبل كدة

جربت احساس الطحن قبل كدة

عماد اتولد سنة 1981 وفى سنة 1987 لبس المريلة الصفرا وهط الكرافتة الحمرا ودخل المدرسة ...1993 دخل الاعدادى وكان بينط من على السور علشان يلعب كورة مع العيال ...1996 وصل عماد للثانوى ...اتعلم البانجوا وضرب الاساتذة ...1999 دخل كلية الحقوق ...محاضراتة كانت على الكفاتيريا ....واتجوز تمانية عرفى ...دا غير اللى باسهم بس ...2003 اتخرج عماد .....ابوة كان محضر له مية الف جنية .....دخل بهم النيابة ...قصدى بقى وكيل نيابة ....2005 بقى قاضى واتجوز وعمل فرح حضرة الصفوة ....2006 عماد جاب واد زى القمر سماه عماد برضة ...2009 دخل عماد كى جى ون ...2016 اعدادى ...2019 ثانوى ... 2022 دخل كلية الفنون الجميلة ....الواد نابغة بجد أو مش نابغة .....2026 اول معرض لعماد ....2033 اتجوز ... 2035 دى بقى كانت سنة مميزة خلف فيها ابنة الوحيد عماد ...ايوة سماه عماد برضة ....وعمل معرض عالمى وخد جايزة عالمية ....2036 مصر كلها كانت بتكرمة ...فخر المصريين ...حفيد الفراعيين .......احتفالية كبيرة لتسليم عماد قلادة النيل ...ارفع واعلى الاوسمة ....القاعة كلها واقفة بتسقف لعماد وهوة رايح يستلم القلادة ....اغنية والله وعملوها الرجالة بتجلجل فى المكان ....عماد يقترب اكثر من المنصة ....كاميرات العالم كلها مسلطة على عماد رمز مصر ....رمز العروبة ....رمز الاستقرار ....يصل عماد الى المنصة ...يتسلم القلادة من الوزير الفنان فاروق حسنى .....يطلب عماد الكلمة ....يمسك الميك ...الدموع تنساب من عينيه ...يقول شكرا ...شكرا للوزير الفنان فاروق حسنى ...شكرا لمصر اللى اكلت من خيرها وشربت من نيلها .... اسمحولى اهدى الجائزة دى لرب العائلة المصرية وقائد الضربة الجوية ...الرئيس محمد حسنى مبارك ......طبعا التسقيف اية ماقولكش طحن طحن طحن .......طحن ...جربت احساس الطحن دة ؟؟؟؟!!!!!!!!!

تحديث

فينك من زمان ياشيخ خالد

الله ينور عليك ياشيخ خالد ....من زمان وانا نفسى اشوف شيخ يقدر يدافع عن الاسلام بالقوة دى ... ويارب دى تكون البداية ويكون الدور على الجريئة وابو حجاج وبقية الاشكال اللى مابتعرفش تشتهر غير بالسفالة وقلة الادب ....الله ينور عليك ياشيخ خالد ويعزك وينصرك
جبت وصلة جديدة بتبين الزعيم وهوة بيكدب ....جاتك نيلة زعيم
نصيحة للزعيم : بلاش تلعب مع الكبار وخليك مع طيور الظلام
انا فرحان قوى ونفسى اقف فى الشارع واقول هيييييييييييييييييييييييييييييييييييييييييييييييييييييييييه

اوعى تمسك العمود

أوعى تمسك العمود

امبارح الدنيا كانت بتشتى جامد قوى ....سيول وهوا وجو صعب كدة ....وقتها كنت فى الشارع...جريت على الرصيف علشان امشى تحت البلكونات ...الناس كلها عملت كدة ...الرصيف كان زحمة واللى يعدى لازم يمسك فى عمود النوروالا يقع فى المية ... وجة الدور علية ...مسكت العمود علشان اعدى .... وفجأة سمعت صوت امى بيرن فى ودانى : اوعى تمسك العمود لأحسن تتكهرب ....لقيت نفسى بقول حاضر ....وسبت العمود ...ووقعت من على الرصيف وسط بركة المية ...البنطلون بقى مية لغاية الركب ...ضحكت وقولت فى نفسى :معقولة ....معقولة جملة كانت بتتقالى من اكتر من اربعين سنة تأثر عليه كدة ....؟!!

معقوله اللى كانوا بيقولوه لنا زمان بيفضل مأثر علينا حتا بعد ماكبرنا وبقينا رجالة وعندنا عيال وقربنا نطلع على المعاش ...واكتشفت حاجه غريبة قوى ...اكتشفت ان الجواز بدل مايبفى سعادة وسكن بقى حرب وسجن ....علشان اتربينا على ادبح لها القطة وجوزك على ماتعودية ....اكتشفت ان احنا مابنشتغلش وبنزوغ علشان قالوا لنا انك لما تشتغل كتير تغلط كتير تتجازى كتير ...فاماتشتغلش احس لك ....اكتشفت ان احنا ماعندناش طموح علشان اتربينا على ان احنا نمد رجلينا على قد لحافنا ...واكتشفت ان احنا مابنروحش ندى صوتنا فى انتخابات مجلس الشعب ...علشان فهمونا اننا لو نزلنا لبلد بتعبد العجل نحش ونرمي له ....واكتشفت واكتشفت ...واكتشفت اكتشافات كتير ....المشكلة مش فى اللى اهلنا زرعوه فينا ...لانى متأكد ان دة اللى كانوا يعرفوة ودة كان احسن حاجة عندهم ...المشكلة الحقيقية فينا احنا ....احنا اللى ماعندناش استعداد ولا بنفكر نحلل الكلام ونشوف فيه اية الصح وايه الغلط ...هية كدا ..طول عمرنا على كدة ...ابآؤنا الاولون عملوا كدة ...اتخيلوا معايا كدة لو احنا مسكنا فاس وكسرنا الاصنام السلبية دى وعلقنا الفاس على كتف الصنم الكبير اللى اسمه من فات قديمة تاه ....ساعتها نار الدنيا حتبقى برد وسلام علينا كلنا

ملحوظة : للحفاظ على الموضوعية...فية حاجات كتير كويسة اهلنا علموها لنا ...بس دا عيب البشر عندنا ...مابيستخدمش غير الحاجات السلبية.......لأنها اسهل !!!!!!

سوء تفاهم

سوء تفاهم

محمد رجع من المحكمة بعد ما خلص موضوع اعلام الوراثة بتاع المرحوم ابوه ...قعد يتغدى مع سارة اللى قالت له : اسكت مش نرمين سابت الشغل ...رد بسرعة : ماهى لسه واخدة يجى مليون جنيه نصيبها فى الميراث ...تشتغل لية بقى !!....سارة ردت : لا الموضوع مش كدة ...دى الشركة بتاعتها قررت تقفل فرعها فى مصر ...فسرحت الموظفين ....محمد قال : شريف هوه كمان ساب شغله فى الامارات وراجع الاسبوع الجاى ....ردت سارة بسرعة :اكيد سرحوهم ماأنا سامعة عن المشاكل الاقتصادية اللى عندهم ...رد محمد :لأ الحكاية ان امه تعبانة قوى ...فقرر انه يجى يقعد معاها ...بيقول كفاية غربة الحق اقعد مع امى شوية ....

لو قرأنا الجزء اللى فات تانى ...حنلاقى محمد كان متأثر بموضوع اعلام الوراثة والورث اللى حياخدة من ابوة ....فمسابش سارة تكمل كلامها وتقول نرمين سابت الشغل لية ...وكمل على طول من عندة ...وحط السبب اللى على هواة ....ورثت .

برضة سارة كانت متأثرة باللى حصل لنرمين ...فكملت حكاية شريف من عندها ...ماصبرتش علشان تسمع السبب الحقيقى من محمد .

هيه دى المشكلة اللى بتخلينا ناخد قرارات ونقول آراء ممكن تعمل لنا مشاكل وتزعل الناس مننا ...المشكله ان احنا مابنصبرش علشان نسمع النص التانى من الحكاية ...وبنستقبل الرسالة بطريقة غير اللى يقصدها اللى قدامنا

- ممكن نفضفض ونقول اللى احنا عايزينة بالطريقة اللى احنا عايزينها فى الوقت اللى احنا عايزينة ...حقنا الشرعى والقانونى ....لكن اللى مش من حقنا ان احنا نتكلم بما لانعلم وخصوصا فى موضوع الدين والرسول والصحابة ....ممكن نسأل اهل الذكر لو مش فاهمين لكن بلاش نعمل فيها جمال البنا ...

- العزة فى طاعة الله مش حتلاقوها فى حاجة تانية

- الدين غالى والرسول غالى والصحابة غاليين ...فبلاش نتكلم فى المواضيع دى من غير مانكون مستعديين اوى اوى اوى ....ويارب احسن ختامنا

اعتذار من القلب لستيتة

اعتذار من القلب لستيتة

قبل ما أعتذر احب اعترف ان ستيتة ومدونة ستيتة من اقرب المدونات الى قلبى ...لما فيها من اسلوب ينم على فكر رائع مستنير وشخصية جديرة بالاحترام
اعتذر بقى
ارجو قبول اعتذارى عن تعليقى على البوست الاخير لستيتة والذى جاء لنتيجة سوء فهمى للمقصود منة ....وعدم متابعتى للموضوع من اوله
على فكرة انا شيلت التعليق
اكرر : ستيتة ومدونة ستيتة لها كل التقدير والتبجيل
وحقك عليه يادوك

الشياطين الثلاثة

الشياطين الثلاثة

منظر البنت وهية بتجرى وتلعب والفرحة ملياها .... والضفاير بترقص على راسها... وايديها وهيه بتحاول تمنع الهوا من انه يطير الفستان ....بيخلينى احس انها ملاك ....مع انى ماشوفتش ملاك قبل كدة بس اكيد مش حيكون لا اجمل ولا اكتر براءة من كدة ...بس يا خسارة مابتلحقش تكمل فرحتها ولا ضحكتها ...يادوب تشد حيلها ويتنطط حواليها شياطين الانس التلاتة ....ويفرموها ..اى والله يفرموها ....الاول شيطان المساواة ...ودة بقى بييقعد على الودن اليمين ...وهاتك يامعلم ...البنت زى الولد ماهيش كمالة عدد ...زيك زى الراجل.... ليكى نفس الحقوق...اشمعنى انت بتحملى وتولدى وهوة لأ....شوفتى اد ايه انت مظلومة...ماتسكتيش ...حقك ...راسك براسة ...يغسل زى مابتغسلى ...يكنس زى مابتكنسى ...يرضع زى مابترضعى ...ولية ماتبقيش قاضى ...ومأذون...اة وايه يعنى لما تبقى امام جامع ....هوة اجدع منك فى ايه ...ماتخافيش ...اقفى قصادة ...القانون معانا والامم المتحدة وامريكا ...وحقوق الانسان ...اوعى يتحكم فيكى ...ايه اشتراكى بالقرشين اللى دفعهم مهر ...اخلعى وارميهم له على الجزمة ...انت راجل ...انت راجل ...انت راجل ....وصدقت الغلبانة ...مابقتش ست وبرضة مابقتش راجل ....

شيطان النيو لوك ماسكتش ...نط على الودن الشمال ...اصحى يابت ادى اخرة مشيك ورا شيطان المساواة ...فوقى بقى الست اية غير جمالها ودلالها وجاذبيتها ....سيبى لى نفسك ...حننفخ الشفة اللى فوق من الاجناب ...الحكاية دى بتولع الرجالة ...ونشفط شوية من الحتتين اللى ورا علشان الجينز يبقى نار ...وشوية سيليكون نعلى بيهم حائط الصد ॥منها اغراء ومنها حماية ... ونقشر الوش ولا اقولك نخلية برونزى ...ونصبغ بلوند ...والعين تركواز ....و نشلح حتة من الرجل على حتة ستومك ...كدة الرجالة تتهبل عليكى ...صدقت الغلبانة وبقت صورة مثيرة على غلاف مجلة بورنو ...

شيطان السلف قال فى نفسة هوة انا حاسكت ...دة انا اللى على حق ... نط هوة كمان مش على الودان بقى ..لا على الدماغ عدل ...حتموتى.... حتموتى ...حتتحاسبى فى القبر قبل يوم القيامة ...نار ....لعنة ربنا ...جحيم ....ماتسيبيش البيت ....ماتتعلميش ...غطى وشك وسيبى حواجبك تتغلغل وتنتشر ...البسى النقاب والجونتى وياريت نضارة شمس بس تكون اسلامى ...ماتفكريش غير فى اخرتك ....النار ...النار ...وغضب الجبار ...ادعى يا أختى فى سبيل الله ....ربى ولادك على الجهاد ..احنا فى زمن الجاهلية ... واللى حوالينا كلهم ابو جهل وابو لهب .....انجى بنفسك واستشهدى فى سبيل الله ....وصدقت الغلبانة وماتت شهيدة وهية حية وبرضة مابقتش رابعة ....

وكانت النتيجة ....

........ باربى لابسة نقاب وطالع لها شنب ......

ضاعت الملامح ...ضاعت ملامح نص المجتمع ....النص اللى المفروض انه يربى النص التانى اللى حيحرر القدس وينصر الاسلام ....!!!!!!!!!!!!!!!!

ياناس ياهوه ....شغلوا مخكوا لجل جاه النبى ...احنا بنتقلب ياعالم ....ماتسمعوش كلام حد ...خلى لكوا مرجعية ...ومش حتلاقوا احسن من كتاب الله وسنة رسوله ....سيبكوا بقى من شوية الصيع اللى بيطلعوا فى التليفزيون ويكتبوا فى الجرايد ...دى سبوبة ...والله العظيم سبوبة ...والدليل شوفوهم ساكنين فين ...وراكبين عربيات شكلها اية ...ورصيدهم كام فى البنك ...البنك اللى فى سويسرا طبعا مش دفتر توفير المدخر الصغير ولا البوستة اللى بتدى احداشر فى المية؟؟؟؟؟؟!!!!!!!!

اختاروا النهاية اللى تعجبكوا

اختاروا النهاية اللى تعجبكوا

حكاية ندا وجمال ليها 3نهايات .... كل واحد يختار النهاية اللى تعجبة .... اما انا فاخترت النهاية التالتة ...

النهاية الاولى :

ندا بعد ماصدمتها هديت ...ودموعها نشفت ....قعدت مع نفسها تحاسبها ....لقت ان جمال استحمل اكتر من اللازم ...ماهو مافيش راجل يستحمل كدة ...دايما كانت تحسسة انها كتير علية ...وانه ماكانش يحلم يطول ضوفرها ...مش يتجوزها !...ماكنش ينفع على طول تطلعة غلطان ....لابيعرف يلبس ولايعرف يتكلم حتى طريقة فى الاكل بايخة ...على طول ماكانتش شايفة غير اخطاؤة ....حتى مناخيرة ماكنتش مقتنعة بيها ...كانت دايما تقولة مناخيرك مش ماشية مع وشك ...كل حاجة كويسة يعملها تبقى هية السبب ...هية اللى قالت ....هية اللى شارت ...لكن لو حاجة وحشة حصلت يبقى هوة السبب ...ماهو ماينفعش وسط عيلتة تقولهم دا مابيغسلش ايدية قبل الاكل ...ووسط صحابة تقولهم انها هية اللى وقفت جنبة وشجعتة علشان يوصل للى هوة فية ....ماينفعش تخلى العيال مايسمعوش كلامة ...ماينفعش انها عمرها ماقالتلة حتى ولو من ورا قلبها كلمة شكرا على هدية جابهالها ...ماينفعش تمنع نفسها عنة لمجرد انة اتأخر على ميعاد العشا ...ماحدش يستحمل كدة ...

ياه ...فية حد غبى كدة .....؟!

النهاية الثانية :

جمال برغم انة رئيس مجلس ادارة شركة من اكبر شركات البلد ...الا انه ماكنش عارف يدير نفسه ....وبرغم نجاحة وفلوسة ...ماكنش عارف يثق فى نفسه ...كان دايما حاسس انه اقل من ندا ومن اهلها وفلوسها ...ماكنش قادر ينسى انه ابن الموظف الغلبان اللى بيكمل الشهر على النوتة من البقال والجزار ...كان بيحاول يغطى ضعفة بالهدايا الغالية ...كان بيجيب لها اللى ماكانتش تحلم بية ....مع انها عمرها ماطلبت منه حاجة ...ماكنش شايف اوماكنش عايز يشوف اد اية هية فخورة بيه ووخداة مثل اعلى ...ماكنش مصدق او ماكنش عايز يصدق انهابتحبه وبتموت فية ....ماكنش شايف ولامصدق غير ضعفة وقلة ثقتة فى نفسة واحساسة بالدونية ...لما كانت تقولة ماما وبابا والعيلة ...كان قصدها تتوازن مع شخصيتة ونجاحة ...كانت عايزة تحس انها تستاهله ...بس هوة كان بيفهم انها بتفكرة بأصلة ...وكان قصدها تقول له انا احسن منك وعيلتى احسن من عيلتك ....كان كل كلمة وكل حركة يفسرها على انها بتتعالى علية ...وكبرت الفكرة فى دماغة واتسرطنت ...ماعدش شايف غير انه اقل من ندا ... والمفرمة بقت على تلاتة ....مااستحملش ...طلقها ....او بمعنى اصح ....هرب منها

ياه ...فية حد غبى كدة.... ؟!

النهاية الثالثة :

ندا هية مصر بجمالها وسحرها وخيرها ....وجمال هوة كل مصرى شريف بيحبها وبيموت في ترابها ...وبيستحملها وبيعمل علشانها ...جمال هوة كل مصرى ماعرفش يفرق بين مصر الام ..الارض والسما والشمس ....وبين ولاد الحرام اللى جم فى ساعة كان الشيطان شاطر فيها وضحك على مصر ...جمال هوة كل مصرى بيحاول يقف على رجلية وياخد مصر فى ايدية ...لكن بيلاقى ولاد الحرام يخبطوة على دماغة فيقع على الارض ويقاوم لغاية مايقف تانى ...فينضرب تانى بس المرة دى على قفاة .....ويقف ويقع ويقف لغاية ماتعب ...زهق ...انهار ...قام سايب ذكرياتة واماله ...كنوزة اللى تساوى الماظ الدنيا كله ...ومشى ....هاجر ....سابها مع انه بيموت فيها ...وعمرة ماحيحب حد قدها ....

ياه .... يبقى غبى اللى يعمل كدة ...؟!

حطوا انتوا النهاية

حطوا انتوا النهاية

ندا بنت حلوة ... وعارفة انها حلوة ...ايوة هيه مش ملكة جمال ....بس حلوة من الحلاوة اللى ماتستغناش عنها ...نوع الحلاوة الكامل ....شقية ...ذكية .... رشيقة رقيقة ....انيقة شيقة ...نوع من الحلاوة اللى تخليك تحس ان الدنيا كلها بين ايديك وانت قاعد معاها ...لما بتتكلم مابتبقاش عايز تسمع غيرها ولا تبقى عايز تفتح بقك ......ماتقدرش تعمل حاجة غير انك تسكت وتسمعها ....وتتوة او تغرق او تغوص فى عينيها ...شباب كتير كان عايز يتجوزها ....وشباب اكتر اكتفى انه يحلم بيها ...واتجوزت جمال ...شاب من اللى مابنسمعش عنهم دلوقتى الا فى الحواديت ...بنى نفسة بنفسة ...بدأمن تحت الصفر ...كان بيشتغل ويدرس وياخد كورسات انجليزى علشان يعوض الفشل اللغوى بتاع مجانية التعليم ....وبدأ السلم من اوله ...من محاسب صغير تحت التمرين لغاية ما وصل لرئيس مجلس الادارة ...كان اصغر رئيس مجلس ادارة فى تاريخ الامة...كان اول مرة يشوف فيها ندا لما اشتغل فى الشركة ...مكتبة كان بيطل على شقة ندا ...اول ماشافها قرر انة يتجوزها ...حبها حب غريب قلب كيانة ...بقى كل حاجة بيعملها كانت علشان يتجوز ندا ....كان بيشتغل علشان يتجوز ندا ...بياكل علشان يتجوز ندا... بيلبس علشان يتجوز ندا ...بينام علشان يتجوز ندا ...حياته كلها بقت ندا ...واتجوز ندا ....حبه لندا كان بيزيد بطريقة سرطانية ...واحتفلوا بعيد جوازهم الخامس وكان بينهم احلى طفلين فى الدنيا ...يوسف وفرحة ...ولسه برضة حبه لندا بيتضخم ...ولسه الناس بتحسد ندا على جمال ....وبتحسد جمال على ندا .....عدت كمان سنه ...وفى عيد جوازهم السادس ....دخلت ندا الاودة لقت جمال بيرتب هدومة فى الشنطة الكبيرة ....قالتله : انت مسافر ولا اية ! دا النهاردة عيد جوازنا ....جمال راح على الدولاب وطلع علبة قطيفة زرقاء فيها عقد الماظ يجى اتناشر قيراط ...باسها فى جبينها وقالها كل سنة وانت طيبة ياحب عمرى ...دخل عليهم يوسف وفرحة ...خدهم بالحضن وباسهم وقالهم روحوا يا ولاد على اوديتكم ...ندا كانت واقفة مستغربة قوى من اللى بيحصل ...سألتة هوة فية اية ياجمال مالك؟!!...قرب جمال لندا مسك ايديها وبص فى عنيها وقالها: انت كنت حلم عمرى ...ماحبيتش ولا يمكن احب حد ادك ...بس سامحينى مش قادر استحمل اكتر من كدة ...انت ...انت ...انت طالق ياحب عمرى ...خد جمال الشنطة وخرج وقفل باب الشقة وراة ...انهارت ندا على اول كرسى قابلها مش قادرة تتحرك من الصدمة ومافيش غير سؤال واحد على لسانها هوة طلقنى لية ؟...هوة طلقنى لية ؟

تقدروا تقولوا لى يا جماعة هوة طلقها لية ؟؟!!!!

ملحوظة :

بلاش والنبى نهايات من نوع يا مامنة للرجال يامامنة للمية فى الغربال ...ولا الرجالة كدة اندال ...ولا برة وجوة فرشتلك وانت مايل واية يعدلك...والنبى والنبى