الحق على عبد الحق

الحق على عبد الحق

لو انت مصرى على حق كنت قولت لقطر العياط لأ...لو انت مصرى على حق ماتقولش للتوريث لأ...... لو انت مصرى على حق قول للحرية لأ....لو انت مصرى على حق ماتقولش لقانون الطوارىء لأ......لوانت مصرى على حق قول للحجاب لأ....وماتقولش للمنى جيب لأ...قول للكرامة لأ....وماتقولش للتطبيع لأ....قول للتصدير لأ.... وماتقولش للصينى لأ....قول للعلم لأ....وماتقولش للجهل لأ....قول للدين لأ....وماتقولش للفيديو سليب لأ.....قول للمعارضة لأ ....وماتقولش للحزب الوطنى لأ....قول لاعدام هشام طلعت مصطفى لأ.....وماتقولش لبراءة تامر حسنى لأ.....قول للعفه لأ....وماتقولش للتحرش لأ.....قول للأمانة لا ....وماتقولش للرشوة لأ....قول للجواز لأ ....وماتقولش للعرفى لأ....قول للشغل لأ....وماتقولش للبطالة لأ...قول للنخوة لأ....وماتقولش للجينز والبدى لأ....قول للتكنولوجيا لأ....وماتقولش للاب توب لأ....وعلشان تبقى مصرى على حق ......حق حق ...لازم تهتف وتقول بالروح بالدم نفديك ياباشا ......وانشالله نموت ولا نروح فى ستين داهية .....بس ولى النعم يعيش ويتهنى ...وياخد قروض ويتمنى واللى يقع منة يوكلنا ....واهرشى لى يامه فى ضهرى

بيان رقم تسعين مليون وتلتماية وتلتاشر

قررنا نحن الناس اللى عارفة كل حاجة ....ان نبلغ الناس اللى مش عارفه مصلحتها ....انه نتيجة للدراسات والاستشارات المستفيضة للنهوض بمصرنا الغالية قررنا ماهو ات:

تم تغيير اسم مصرنا الحبيبة من جمهورية مصر العربية الى جمهورية مصر للامراض العقلية

ولو انت مصرى على حق اوعى تقول لأ

الفرق بين الرجل والمرأة 1

فرق فسيولوجى

ربنا لما خلق المخ خلقة نصين ...فصين....فص يمين وفص شمال ...وخلق بينهم صمام يوصل وينقل بينهم ...وخلى الفص اليمين مسؤل عن العاطفة والخيال والذوق والابداع ...اما الفص الشمال فمسئول عن الارقام والتحليل والترتيب والقرارات ...ولما خلق الرجل خلاه يستخدم الفص الشمال ....ولما خلق المرأة خلاها تستخدم الفص اليمين ...علشان كدة تلاقى المرأة حنينة اكتر ...ذوقها احسن ...خيالها اوسع ...ومن حكمة ربنا ..انه خلى الصمام اللى بيربط بين الفصين اوسع عند المرأة ...علشان تقدر تنقل من دة لدة بسرعة ...وعلشان كدة تلاقيها بتدير البيت بكل طلباتة ومشاكلة بطريقة يعجز عنها اجدع خبير معاه دكتوراة فى الادارة والاقتصاد من جامعة هارفارد...لأن البيت عايز فى ادارتة حد على طول فى حالة طوارىء....على طول فصين دماغة شغالين ...ولو خدتوا بالكوا من الست تلاقيها بترضع الواد ...وتخرط الملوخية وتتفرج على التمثيلية وترد على التليفون فى نفس الوقت ...الراجل بقى لو عايز تلخبطة ...اطلب منه حاجتين فى نفس الوقت ...حيفشل... وففى الحاجتين ....ولو بتلاحظوا شلة ستات قاعدين مع بعض تلاقيهم بيتكلموا كلهم فى نفس واحد وفى نفس الوقت سامعيين بعض كويس وبيردوا على بعض ....لكن الرجاله لأ ...مايقدرش ...فلما نطلب من الراجل يبقى زى الست ....نبقى عاملين زى اللى بيطلب من واحد مقطوع له رجل انة يدخل سباق 100 متر حواجز ....حكمتك يارب ...خليت التستستيرون (هرمون الذكورة) عند الراجل اعلى بكتير قوى من المرأة ...علشان الهرمون دة هوة اللى يخلية بيجرى ورا الست ....ويبوس ايد ابوها وخالها علشان يتجوزها ...وهية قاعدة فى بيت ابوها معززة ومكرمة ولا الاميرة ....شوفوابقى لو ان التستستيرون هو اللى عالى عند الست ...كان الراجل حيرضى انها تيجى تطلب ايدة ولا تقول له ياللا النهاردة ليلة الجمعة ؟؟!! شكل الراجل كان حيبقى وحش قوى ....-مع الاحتفاظ الكامل بحق المرأة فى ان تطلب زوجها ليلة الجمعة – عرفتوا بقى لية الراجل عينة زايغة ...غصب عنه والله مش بمزاجه ....تستستيرونة عالى ...نعمل ايه؟ نخلية مايبصش برة ازاى ؟ ....ماهو يا نخلية أغا علشان نرتاح ....ومش حنرتاح ...يا اما نرفع مناعته ونملى عينة ونهدى تستستيرونه ... مش عشانة بس ...عشانك انت كمان ...جربى كدة واقعدى فى البيت وانت رابطة الطرحة ...ولا عاملة شعرك كحكة ....ولابسة البيجامه ومية غسيل المواعين بلة وسطك ...وهباب الحله على خدك ...وشوفى حاسة بإية ؟؟!! وجربى كدة بعد ماتخلصى شغل بيتك ...وافردى شعرك ..والبسى قميص نوم حلو ...واتمكيجى ...واتبرفنى ...حاسة بإية؟ حاتحسى بانوثتك ...حتبقى فرحانة بنفسك وواثقة فيها ...وبالمرة ياستى حترفعى مناعة ابو تستستيرون ....بس خلى بالك ...ساعات بنعمل كدة من غير نفس ...وتضربى القميص الاحمر وانت بتقولى فى سرك ايكش يطمر فى المفترى ابن المفترية .....لأن اللى ماتعرفيهوش انه بيسمعك مع انك ما بتقوليهاش بصوت عالى ....أما انت بقى يا ابو عين زايغة ....وانت راجع كدة من الشغل وتعبان وعرقان ومترّب ....اول ماتدخل خد لك دش واحلق دقنك ...والبس بيجاما نضيفة ...بلاش تقعدش بال..... ياريتة كان بوكسر كنت عديتها ....ماهوانت طول النهار حلو وشيك ومتبرفن ...خليك كدة كمان فى بيتك ...كمل يومك وانت شيك وحلو وفرحان بنفسك وبمنظرك ....ماهواذا كان عندك شوية تستستيرون معذبينك ...فمراتك برضة عندها حبة تستستيرون ....

الأمور كلها بسيطة ...اولها نفهم..... وتانيها نقدّر.... وثالثها ننسى الافكار المسبقة ....ورابعها نبطل نتهم بعض ....وخامسها نحب نفسنا قبل مانحب اللى قدامنا ....وسادسها انا تعبت بس برضة حأكمل لأنى مقتنع ان الدنيا على حسب ما نعوزها ....حلوة أو مُرة ... احنا اللى بنختار

سؤال للتفكير وليس للإجابة:

لية اتحولت الحكاية الى واجب روتينى ...له طقوس محددة....وزى رسمى ...وميعاد معروف مسبقاً...ليلة الجمعة ؟

إذبحوا بقرة

إذبحوا بقرة

وجهة نظر تحاول ان تكون حيادية حتى لا اتهم بأننى لا أقول الحق ...ولكنها فى الوقت ذاتة يُأخذ منها ويرد ..وابدأها ببعض الاسئلة ...لماذا نستعذب دائما العذاب؟...لماذا نبحث دائما عن وسيلة تجعلنا فى صورة المظلومين ؟ ....لماذا نطالب بحقوقنا ولا نعترف بواجبتنا ؟... لماذا لانؤدى واجباتنا دون النظر الى التقدير ؟..-رغم اننا نردد دائما :لاشكر على واجب-...لماذا يقول الرجل دائما انا كالثور فى الساقية ...اعمل ليل نهار كى ألبى طلبات بيتى؟ ...لماذا تقول المرأة انا اعمل كالخادمة فى بيتى ...اغسل واطبخ واربى الاولاد؟...اليس هذا واجبهما ؟...ارى ان المشكلة اننا لا نعرف هدفا لحياتنا ...ونبحث ونبحث وعندما نجد هدفا غالبا مايكون هدفا ماديا...رغم ان هدفنا واضح كوضوح الشمس فى يوم بلا سحاب ..هدفنا هو .. نصرة دين الله واعمار الارض ...هدفنا ان نجعل اولادنا يحملون الراية من بعدنا ...ليسلموها لاحفادنا ...حتى اذا قامت الساعة وفى يدنا او يد ابناءنا او يد احفادنا فسيلة ...نغرسها ...ولكننا نسينا الهدف وتشاجرنا على الوسيلة وجعلنا الزواج تفاضلا وليس تكاملا ...نسينا.... وتناسينا حكمة الله فى خلق الرجل والمرأة ...وضعنا اصابعنا فى آذاننا حتى لا نسمع كلمات سكن ومودة ورحمة ويأثرون على انفسهم ...ورفعناها لنسمع كلمات حقى وكرامتى وحريتى وأنا ...برغم ان الحقوق محفوظة والكرامة مصانة...والحرية ملك للجميع .. وانا وانت مكرمين من الله عز وجل ...ولكنها التفاضلية....لم نحاول ان نفهم حكمة الله فى خلق الرجل بهذه الهيئة وهذه العقلية ...لم نحاول ان نفهم حكمة الله فى خلق المرأة بهذة الهيئة وهذه العقلية....لم نحاول ان نفهم مشاعر الرجل وتصرفاتة ....لم نحاول ان نفهم مشاعر المرأةوتصرفاتها ....لم نفهم ولم نتفهم ...لم نقبل ولم نتقبل ....وقررنا بعقلنا العاجز ان نغير خلق الله ..وطالبنا بمعرفة تفاصيل مواصفات البقرة ..رغم ان الامر كان سهلا ...اذبحوا بقرة ...اى بقرة ...لكن لماذا ننفذ الامر ؟! اليس لناعقول ؟! فالمرأة تريد ان يصبح الرجل مثلها ...يتكلم مثلها ..يفكر مثلها ...يشعر مثلها ...ينظر الى الامور مثلها ...وكذلك الرجل يريد نفس الشئ ...لو كان هذا هوالحل الذى يجلب السعادة ...فلماذا لم يخلق الله نوعا واحدا ؟! وحاشاه ...ولكنها الموروثات المتخلفة ...والمبثوثات التى تريد ان نصبح اكثر تخلفا ....انها شياطين النفس والإنس التى توسوس فى صدورنا حتى تبقينا دائما فى المرحلة صفر ....وكلما تقدمنا خطوة نرجع خطوتان ....ايها الرجل افهم وتفهم معنى المرأة ...ايتها المرأة افهمى وتفهمى معنى الرجل ....افهموا وتفهموا حكمة الله على مراد الله وليس على مرادكم ...وقتها تصبح الدنيا جنة الله فى ارضة ....حتى لو كانت هذه الارض هى مصرنا العظيمة ...وقتها ستجدون السعادة التى تبحثون عنها

وسأبدأ سلسلة قصيرة عن الفرق بين الرجل والمرأة فأرجوا تواصلكم لانها كما قلت وجهة نظر يُأخذ منها ويرد

ملحوظة : هذا البوست والسلسلة التى تلية من وحى بوست المخدماتى وليس ردا عليه

حتى على الموت لا أخلو من الحسد

حتى على الموت لا أخلو من الحسد

انا من البنى ادمين اللى بيقدروا اللى بيعملوة الزوجات ....وكمان من انصار حقوق المرأة....بس اللى بيقول عليها ربنا ...مش اللى بتقول عليها ماما امريكا...دا غير انى حاسس بكل كلمة كتبتها صبرنى فى بوست المخدماتى ...وبرضة علشان انا من البنى ادمين اللى دايما يشوفوا نص الكباية المليان ..كتبت البوست دة ...تضامنا وليس تعارضا مع صبرنى وكل صبرنى على وجه الارض

أولا : الشغالة بتاخد مرتب علشان تحوش وتقدر تجهز نفسها وتستر نفسها ...لكن احنا لقينا اللى يجهزنا ويعمل لنا الفرح فى قاعة المؤتمرات ويقطع لنا التورتة ام اربع ادوار

ثانيا : الشغالة بتاخد يوم اجازة بس لما بيتروح بتعمل فى بيتها شغل الاسبوع فى يوم علشان ماعندهاش شغاله...لكن احنا عندنا اللى بيساعدنا ...وبنزعل قوى لما نعمل شغل يوم فى

الاسبوع

ثالثا : الشغالة برضة لما بتروح بتذاكر للعيال وبتودى العيان المستوصف ...وتلبسهم من العتبة ...لكن احنا زهقانين من كراسة المتابعة والحجز اللى بعد اسبوعين عند الاستاذ الدكتور ..والزحمة اللى بقت فى المول

رابعا : الشغالة لما بتشتغل شغلتين بتروح تشتغل التالتة ...وبتصرف اللى بتاخدة فى البيت....واحنا لما نشتغل الصبح بيبقى علشان نثبت ذاتنا

خامسا : الشغالة بتلاقى اللى يقول حرام لبسها ووكلها ...وماتعرفوش انها بتوفر لقمتها وهدمتها لعيالها .....واحنا بنلبس الطقم مرتين ونقول كفاية زهقنا ...وبنخرج نتعشى برة

سادسا :الشغالة بتلبس اى حاجة وشكلها مش مهم ...بس اللى ماتعرفوش انها نفسها تلبس حلو وتروح تعمل وشها عند الكوافير بدل صاحبتها اللى بتشعوط لها وشها ...ولماتروح برضة بتضحك فى وش جوزها .....لكن احنا زهقنا من لانجيرى جويا ....بقى بيئة

سابعا : الشغالة لما بتتعب بنجيب لها الدكتور والدوا ..بس لما تروح مابتقدرش ترتاح وراها بيتها وجوزها ...لكن احنا ماما بتييجى تمرضنا وبنجيب دليفرى

ثامنا : الشغالة مابيتمنش على مرتبها ...اللى هية بتصرفه على بيتها علشان تكمل العيشة ...لكن احنا بنصرفة على الموضة والمكياج

تاسعا : الشغالة ممكن فى اى وقت تسيبنا وتمشى ...بس علشان لقت شغل فى حتة تانية بمرتب اعلى يساعد على المعايش ...لكن احنا بنسيب ونمشى علشان مارضيش يحجز فى مارينا

عاشرا : الشغالة لو اتعمل معاها حاجة مش تمام هية كمان حتخش النار.... ولما تروح برضة حتبقى حاجة ببلاش كدة ...وبرضة جوزها عينة على المسلكنين والعريانين ... ويبص عليهم من الخرم كمان

هما الرجالة كدة ...يندب فى عينهم رصاصة

حادى عشر : نحمدوا ربنا بقى ان احنا مش شغالة ...ونرضى بالشقى اللى بيخلى الجنة تحت اقدامنا

ونفتكر كلام نبينا محمد :امك ثم امك ثم امك ...ونعرف جايزتنا ولا لسة برضة بصين للغلبانة فى السبوبة ونفسنا نبقى شغالة

خموسين المبستر

خموسين المبستر

على حد علمى اعتقد ان احنا البلد الوحيد اللى عندة اسامى مثنى ...يعنى محمدين ...حسنين....حمدين ...عوضين ...خموسين ..ودة الاسم اللى لسة سامعة قريب ...ومعناة خميس وخميس ...هية زمان كانت اسامى ...بس الظاهر انها بقت افعال ...عموما انا مابحبش التعميم ...بس من اللى شايفة اقدر اقول انا نفسى بقيت اسلامين ...واللى حوالية ...اشرفين ...وايهابين ...وهشامين ...حتى بتى الصغيرة ...بقت روانين ...كلنا بقينا اتنين ..ورغم ان احنا اتنين بس عايشيين مع بعض مبسوطين ...مش زعلانين ...لابنتعارك ولابنتخاصم ...مع اننا يا اخى عكس بعض خالص....شوف مثلا خموسين ...خميس الاولانى اشتراكى بوليتارى ..وخميس التانى راسمالى امبريالى ...خميس الاولانى عندة تلاتين سنة ...خميس التانى على وشة كرمشة واحد فى التمانين...خميس الاولانى بيحب اللمة والافراح والهيصة ...خميس التانى حابس نفسة فى البيت وعندة اكتئاب ....خميس الاولانى جزمتة مقطعة ...خميس التانى ماسك موبيل نوكيا تاتش من ابو الفين جنية ...خميس الاولانى بيستحمل ويصبر ويكتم ...خميس التانى لوحد لمسة فى الاوتوبيس يصرخ ويصوت ويسب...خميس الاولانى ذكى وعبقرى وطموح ...خميس التانى غبى وبليد وكسلان ...خميس الاولانى يسمع درس الشيخ فى الجامع وهوه طالع يبوس ايدة ... خميس التانى بيطلع على المسرح يرقص مع الرقاصة وينقطها ...بس مش فى ايديها ....خميس الاولانى لسانة بينقط سكر ...خميس التانى كل كلمة وراها شتيمة ..خميس الاولانى بيحب مصر للنخاع ...خميس التانى بيشرط كرسى القطر بالموس ....خميس الاولانى بيسمع كلام الحكومة ...خميس التانى بيكره الحكومة عمى ...خميس الاولانى مايستغناش عن مراته ...خميس التانى بيحلم يتجوز هيفاء وهبى ولو يوم واحد ...

كلنا بقينا خموسين ...نسخن لدرجة الغليان وفجأة نبرد لدرجة صفر ...ولا اجدع بسترة ..وغطينى يامة وصوتى ...بس ماتنسيش بعد ماتخلصى صويت ..تصبغى شعرك وتتمكيجى وتروحى النادى

من حديقة مستشفى المعمورة للامراض النفسية والعقلية

اكتوبر 2009

(العيد السادس الثلاثون)

لا صينى ولا يابانى الصح هوة الربانى

لا صينى ولا يابانى الصح هوة الربانى

قررت انى اسمى كل حاجة با سمها كدة اريح ...وعلى فكرة بدون اى تجاوزات

بكار واد حليوة بعيون زرقة زى بتوع السيما اللى بيهبلوا البنات العبيطة واللى مش عبيطة بشكلهم وتصرفاتهم....بكار ماسبش واحدة عرفها الا وزنى معاها ....ايوة ...ماهوة زانى ...وبيتباها بكدة ....بس مابيقولش انا زانى ...بيقول انا دون جوان ...كدة بتبقى اشيك وتلم بنات اكتر ....ماهو فتك ومقطع السمكة وديلها ومقرقش شوكها كمان ...كان دايما يقول مافيش بنت ما قدرش اجيبها ....وفضل على كدة لغاية ماتعب وزهق

بكارة قررت انها تعيش ...خمرة ورقص وزنى ...عادى ...كانت بتزنى بسهولة فتح الكانز ...بس اوعى تفتكر انها من اياهم ...دى ماكنتش بتزنى الا مع اللى تحبة ويحبها ..... وطبعا كانت بتحب يوم بعد يوم ....وعمرها ماخدت فلوس... .فبلاش تبقى فلاح ودماغك تروح بعيد ..كل الحكاية انها مقتنعة ان جسمها دا شىء ملكها تعمل فيه وبيه اللى هية عايزاة ....بس بكارة كانت واعية ....فتح الكانز كان برة المنطقة خالص ...مش عايزين وجع دماغ....

الدكتور سقاطة ...زهق من العيانين الفقر وقرر يلم فلوس ....وفتح سنتر تجميل بس تجميل من نوع خاص ....ماهو كلة تجميل والفكرة الاساسية فى التجميل هو ارجاع الشىء لاصلة ....واقنع نفسة انه بيعمل خير ....بيرجع الشىء لاصلة ويتستر على الولايا اللى زنوا بس بيقولوا انهم انضحك عليهم .... دا غير انة بيرحم العيال اللىكانت حتيجى من انهم يسمعوا كلمة ابن الحرام ....اكيد كانو حيتدايقوا ؟؟؟

ام بكار قالت لبكار شوف بقى يا ابنى كفاية بقى سرمحة انت لازم تتلم بقى ...شوف لك واحدة بنت ناس محجبة تصونك وتصون شرفك ....بكار قال لها فعلا يامه انا تعبت شوفى انتى وانا موافق....ام بكار قعدت تدور وتلف فى دماغها مش لاية حد كويس ماهى مش عيزاها شريفة وعفيفة بس ...ياسلام لو تكون غنية كمان .... شوية ودخلت عليها اختها خدوا بعض بالاحضان وقعدوا يتكلموا فى موضوع جوازة بكار ....خالة بكار قالت لها جرى اية ياام بكار انتى ناسية ليه بت الدكتور سقاطة ....ادب وكمال جمال ...وحجابها مغطيها من ساسها لراسها

وابوها ربنا فتح علية وركب المرسيدس دلوقت ...ماكدبوش خبر وراح بكار وامة علشان يشوفوا البنت ...البنت عجبت بكار وامةقالت ادب واخلاق وتدين مافيش بعد كدة دا حتى ابوها مارضيش يسيبهم يتكلموا لوحدهم قال: الشرع قال لازم يكون فية محرم ...هيى دى اللى حتصون شرف ابنى ...واتفقوا على الشبكة والمهر وكافة شىء...وجه المأذون وفتح الدفتر وبدأ يكتب الكتاب

المأذون : اسم العريس انشاء الله

بكار : بكار سلف ودين

المأذون : اسم العروسة انشاء الله

د. سقاطة : بكارة سقاطة النتن

طبعا فية ناس ساذجة حتقول اية اللى حصل ليلة الدخلة .....اقولهم ولا حاجة ...مالصينى وصل ولو عايز كل يوم دخلة احنا تحت امرك

على فكرة ابن بكار كان ابن سبعة بس اللى يشوفة يقول ماشاء الله ابن تسعة ...وافى كدة وحلو ...بكار كان فرحان بية قوى ....وسماة بكرى

رحلة فى دماغ بنى آدم 5

رحلة فى دماغ بنى آدم 5

حماة امانى

الحاجة لولا لبست العباية ولفت الطرحة ونزلت علشان تقبض المعاش .....وبالمرة تجيب حاجات رمضان ....كانت خايفة علشان دى اول مرة تستخدم فيها كارت الفيزا...هية ماكانتش عايزة لافيزا ولا ميزا ...بس البنك اللى صمم....كانت خايفة لامتعرفش تستخدمة ...وخايفة من الحرامى اللى حياخد الفلوس اول ما تطلع ...لما وصلت للمكنة كان عليها زحمة ....اتطمنت شوية ...كدة مافيش حرامى ...وكدة ممكن تسأل حد لو ماعرفتش تستخدم الكارت ....وقفت الحاجة لولا فى الطابور وسرحت مع نفسها ....انا مش حأكتر من حاجات رمضان ....الواد وابوة مابيكلوهاش ...وفى الاخر بيترمى نصها .....هية مصاريف على الارض ؟؟ داحتى يبقى حرام ....هوة كيلو تمر مافيش غيرة ...على شوية زبيب على ربع جوز هند علشان الكنافة والقطايف ....وكفاية على كدة ...لازم امسك على ايدى ...انا لسة عايزة اجوز الواد الصغير ....وبعدين محدش عارف بكرة فية اية ....لازم اعمل حساب الزمن واسيب قرشين للعيال يستروهم فى الغلا دة ...خصوصا الواد احمد علشان حتى يساعدوة فى المعايش ....ماهو معاة واحدة خروبية ومتدلعة ...عاملة فيها بت ناس .....مابتكلش العيش ابو شلن بتاعنا ...قال اية ؟ مابعرفش ابلعة ياطنط .....طاب ماتشربى وراة حبة مية ياروح طنط ...دلع ومياصة ...ولا العفريت اللى عليها اللى اسمة بيتزا ...ماتطبخى يافالحة هوة الواد حيكفى منين فواتير التليفرى....ولا الهدوم اللى مابتجيش الا من المول ...مالها بس محلات القماش ..ماتنزل تشترى حتتين قماش وتفصلهم وتوفر لجوزها الشقيان اللى بيطلع من صباحية ربنا ...مابيرجعش الا نص الليل ....علشان يكفيها ويكفى العيال بتوع كى جى وان وكى جى تو ...مالها بس مدارس الحكومة ....الا ترد علية العيال فىمدارس الحكومة بيئة يا طنط ...وانا عايزة عيالى يطلعوا استيل ..وكل ما قول لها على حاجة تقولى مش واخدة على كدة يا طنط ..مش متعودة على الحاجات دى يا طنط ....والختمة الشريفة ما كنت عايزة الجوازة دى ...انا كنت عايزالة شيرين بت اختى ...ادب وجمال وكمال ...ومدرسة بالحصة عارفة قيمة القرش ...دا غير انها من دمة يعنى حتشيل همة ...بس هوة كدة طول عمرة عايز يعيش عيشة المعوجيين دول ...كان دايما يقولى ياما انا عايز اخد واحدة من ولاد الذوات ....عايز اناسب ناس هاى ...انا فاكرة لما جة من عندهم اول مرة ...كان فرحان قوى بكلمة مامى ودادى ...كان فرحان بالشقة الى فى الزمالك والامن اللى فى العمارة من تحت ... قالىوهوة مبسوط قوى: يامة دول قدمولى الشاى فى فناجيل ومعاة جاتوة على عربية تحفة ...دا غير السكر كان مكعبات يامة ...اهو بيشرب الفالح؟!

انا فاكرة لما جات لى فى عيد الام وجايبالى اسورة طلعت بخمس تلاف جنية ...كان باين عليها انها غالية بسانا كمان نزلت وزنتها تانى يوم .....اية جاى تقولى يعنى انك غنية ولما بتهادى بتهادى قيمتك ...بس انا ماقولتلهاش شكرا ولاحتى مرسى زى مابتقول ...ايوة خليت وشها يجيب الوان ...قولت لها اصل انا ماليش فى الدهب ...ماشى يا امانى يابت عديلة ...النهاردة ...حاجيب ممبار وسقط ...وابعت لك تيجى تفرشى جنبى على الارض وتحشى الممبار وتنضفى الكرشة ....واياك تقولى مش واخدة على كدة ياطنط ..ونشوف حدايق القبة ولاالزمالك ....فاقت لولا على صوت الست اللى وراها بتقولها دورك ياحاجة ....الحاجة لولا حطت الكارت فى المكنة وبصت للست اللى وراها وقالت والنبى يا اختى اعمل اية بعد كدة ؟؟؟!!

كل سنة وانتوا طيبين

كل سنة وانتوا طيبين

دا اول رمضان معى عيلتى الجديدة ....بجد بجد احلى رمضان كل سنة وانت طيبة ياصبرنى وانتى ياستيتة وطبعا الحنان كله ام مالك وريم اللى البوست الجاى مشاركة وجدانية منى ليها والقدر وانا وابراهيم وعاشقة الرومانسية ودكتور ياسرواحساس طفلة محبة للرومانسية وسول اللى محش سامع له حس وشمس النهار وكل اللى دخل وشرفنى فى المدونة كل سنة ورمضان عليكوا بخير وعايشيين ومتهنيين وعاملين اللى فى نفسكوا

رحلة فى دماغ بنى آدم 4

رحلة فى دماغ بنى آدم 4

حماة احمد

الحاجة عديلة حماة احمد قامت من النوم ...ركبها بتنشر عليها ....يادوب نزلت رجليها على الارض...وسندت على ايديها ....قالت فى نفسها ...جرى اية يابت يا عديلة ....انتى عجزتى ولا اية ....اوعى يابت الروماتيزم يغلبك...لا انا مش حاسكت على نفسى ...النهاردة حاروح للدكتور اللى قالت لى علية عنايات ...لما كنا فى النادى ....بتقول علية بركة ....يادوب حط ايدية على ركابها ...قامت زى الحصان ....شوف الولية المايصة قال لما حط ايدية صحت ....يعنى الدوا مش هوة اللى صحاها ....ماهى طول عمرها متدلعه وصحتها حلوة مع انها اكبر منى بسنتين ....طول عمرها بختها حلو ...جوزها مدلعها ومهنيها.....ومش مخلى فى نفسها حاجة .....حتى بناتها..... الناصحة جوزتهم معاها ....ماهى عملت شقةلكل واحدة ....حسرة علية ....طول عمرى شقيانة ...وتعبانة وماشفت يوم حلو ....البنات اتجوزوا والراجل مات...يعنى وهوة حى كان بيعمل اية ....ماهو ليل نهار كان منكد عليةوعلى عيشتى وكان كاتم على نفسى ...الا مافى واحدة فكرت تخش علية بحتة كيكة ولا نص صينية بسبوسة ...ولا يقولوا لى تعالى اقعدى معانا يومين ...بدال مانتى قاعدة لوحدك كدة ....وهوة انا حارضى اروح عند واحدة منهم ...علشان المعدول جوزها يسمعنى كلمة كدة ولا كدة ......خصوصا اللى اسمة احمد جوز امانى دة ...دة يهودى ...ماحدش بياخد منه لاحق ولا باطل ....والهبلة مش عارفة تطوية ....مش شاطرة اللى كل ماتيجى تقعد تشتكى منة ومن عمايلة ....بس والنبى ومن نبى النبى نبى لانكد علية ...واخد لها حقها العبيطة دى .....اللىمش دريانة باللى بيحصل حواليها ...دا طول النهار برة ...لاهى عارفة بيعمل اية ولا بيروح فين ....بس فالحة تقولى شغلة كدة ياماما ...لية هوة احنا مشتغلناش ولا اية ...دا تلاقية بيلعب بديلة ويتسرمح ...ايوة هوة الصنف دة كدة ......انا عارفاة ...ماهو لوماكنش بيلعب بديلة ...كان زمانة داخل عليها بجزمة ولا شنطة ولاحتة سيغة ...يبقى بيودى الفلوس اللى بياخدها فين ... مش بعيد يكون متجوز عرفى عينى عليكى يابتى ....بختك زى بخت امك ..ولا المنيل التانى اللى بيلهف مرتب البت على داير مليم ....لا...لا..والله لفوقلكوا ...بس ارجع من رحلة شارم الشيخ اللى عاملها نادى المسنين ....ورحلة مطروح اللى عملاها جمعية رسالة ...واخلص من العمرة ...واوريكوا ...النبى لا اخلص القديم والجديد ....مبقاش ورايا حاجة الراجل ومات والشغل وبقيت معاش والروماتيزم وحاروح للدكتور بتاع عنايات ايوة لازم اخد بالى من صحتى ..,,بناتى عايزينى ...قامت عديلة من السرير وراحت تتصل بعنايات تاخد منها نمرة الدكتور اللى بيحط ايدة يخلى الركب ولا ركب ابو تريكة

رحلة فى دماغ بنى آدم 3

رحلة فى دماغ بنى آدم3

حبيبة

يوم الجمعة حبيبة صحت قبل امانى واحمد ....قالت فرصة اتفرج على التلفزيون براحتى ....فتحت التليفزيون وقعدت تقلب فى القنوات ...جابت فيلم اجنبى البطل فية كان بيبوس البطلة...قالت فى نفسها هما بيبوسو بعض ولا بيعضوا بعض ....لو بابا صاحى دلوقت كان ضير القناة وقال مناظر زبالة ....ماعرفش هوة بيعمل كدة لية ؟ .... مع انة لما بيتتفرج لوحدة مابيديرش القناة ولا حاجة ...بابا دة له حاجات غريبة مش بفهمها ....فرصة وهما نايمين اجيب نيكلوديان علشان افرج على جيمى نيترون وساندى ...من زمان ماشفتهمش ....والمدارس قربت وحيغلسوا علية ...ويقولى قومى نامى علشان تصحى بدرى للمدرسة ....ماأنا اول يوم لازم اقوم بدرى علشان اقعد جنب صاحبتى هانيا واوريها الشنطة الجديدة اللى حيجيبها لى بابا ....انا حاخلى بابا يجيب لى شنطة عليها فلة ...انا بحبها قوى ...مع ان تيتا مابتحبهاش وتقول عليها اية البت الغم دى اللى على طول ملبسينها اسود ... بس انا عارفة ان بابا حايجيب لى اللى انا عايزاة ...انا بحبة قوى علشان هوة بيجيبلى كل اللى نفسى فية ...مع انة ساعات بيغلس علية ويشخط فية ويقولى قومى صلى ...انا لسة صغيرة ...تيتا بتقول كدة ....وبابا دايما يتعارك مع ماماويقول لها خلى امك تبعد عن البت ...وتبعد لية هية مش تيتا ولا اية ....وماما كمان مش بتحب تيتا ام بابا .....مع انها على طول بتجيب لنا هدايا ولعب وتدينا فلوس ...وبرضة ماما بتاخد مننا الفلوس ....لما هية مابتحبش تيتا بتاخد مننا الفلوس اللى بتديها لنا ليه....النهاردة حنروح نزور خالتى ...وحالعب مع الواد زياد كونكت فور واغلبة زى ماغلبتة الاسبوع اللى فات لما كانوا عندنا ...واغيظة واقولة يا مغلوب ....زى مابيغيظنى ويقولى يا طخينة ....طاب مايبص لنفسة وسنانة البايظة واللى مركب لها تقويم ....احمد صحى ونادى على حبيبة وقالها يابت سيبى التليفزيون وتعالى نامى جنب بابا ....هوة انتى علطول كدة سيبانى ونايمة جنب امك ...حبيبة قالت له بس بشرط تحكى لى حدوتة ...قالها ماشى يابت الكلب بس تعالى

رحلة فى دماغ بنى ادم 2

رحلة فى دماغ بنى ادم 2

أحمـــــــــــــد

جات لأحمد سفرية القاهرة تبع الشغل .....قطع تذكرة القطر ... واشترى المصرى اليوم علشان يسلى نفسة فى السكة ....وقف على المحطة يستنى القطر ...عينة جات على الساعة اللى على المحطة .....قال فى نفسة : آه يابلد.... الساعة دى من ايام الانجليز .... المحطة كلها من ايام الانجليز ... وبعدين الساعة دى بقالها عشرين سنة واقفة على ستة الا ربع...... ياه لو الزمن يقف كده ولايرجع عشرين سنة ....كان الواحد يغيير حاجات كتير ....كان يسافر برة ...ولايعمل مشروع بدل الذل اللى الواحد شايفة فى الشركة بت الكلب دى ...وينقى بقى .....ينقى واحدة حلوة كدة ....ياسلام يا واد لو تصبح تلاقى معاك مليون جنية .....أول حاجة اعملها أروح الشركة واكتب استقالتى على اوسخ ورقة ...وارميها فى وش المدير ....وقول له :يلعن ابوك وابوشركتك وابو الايام السودة اللى اشتغلتها معاك ....واضربة ...ايوة اضربة قلم سخن على وشة يطلع القديم والجديد ....وانزل من عندة اشترى عربية اوكتافيا بالتكييف والبور ....وابيع اللادا المعفنة اللى ذلانى كل يوم الصبح للى يسوى واللى مايسواش علشان يزقنى ...ولا على اية ابيعها ....ارميها ... واجيب شالية فى الساحل الشمالى ....وآكل برة ...ماقولش اوفر الفلوس ولما ارجع ابقى آكل ...وافضل جعان طول اليوم ...والاهم بقى ياحلو تدلع نفسك وتشوف لك يومين ....وتدور لك على بت حلوة كدة زى بتوع الفيديو كليب ....بس حاشطرت عليها ...آه الشرط نور ....حاشطرت عليها انها ماتهتمش بحد غيرى ...ايوة ...لاتقول عيال ولا بيت ولاطبيخ ولا غيرة ...اناوبس ...قايمة نايمة عشانى ....وكفاية كدة على ام العيال ...خلى بقى العيال تنفعها ....ماهى اصلها افترت قوى ...ولا اكنى بنى آدم يا اخى ....بقيت كارت فيزا تحطة فى المكنة يطلع فلوس ...لية هوة انا مش بنى آدم لحم ودم ومشاعر ...وبعدين حابقى جدع معاها ...عايزه تفضل على زمتى اهلاوسهلا....عايزة تتطلق هية حرة ...وساعتها حاديها قرشين حلوين .... انا عارف من دلوقت ....حتختار الفلوس .....وبعدين العيال كدة كدة حتتربى ....افرض انى انا مت ....كانوا حيعملوا اية ...حيكبروا ويتربوا ويتجوزوا ....عادى الدنيا بتمشى الواحد بس اللى بيعرضها ....وانا مش حاسيبهم كدة انا حاحطلهم قرشين باسمهم فى البنك ....اتنطر احمد على صوت الموبيل ....ماهى دى رنة المدير ...الو ..صباح الخير ياباشا ....معلش ياباشا ....والله غصب عنى ياباشا......ماهو القطر هوة اللى اتاخر ياباشا ....انا اسف يا باشا .....والله دا اول قطر بيطلع من عندنا ياباشا

اللىتشوفة ياباشا ...اتفضل ياباشا .....حط الموبيل فى جيبة ...وفتح المصرى اليوم يقرا المانشيت

الحكم باللإعدام على هشام طلعت مصطفى فى قضية سوزان تميم

رحلة فى دماغ بنى ادم1

رحلة فى دماغ بنى ادم

قررت اعيش دور قارىء افكار على المدونة بس!!!.... مش طالع فى الفضائيات!!!..... بس مايمنعش لو جات الفرصة اهبش فيها ....ماهو محدش يقول للسبوبة لأ....ولا اييييييييييييييييييييييية؟

نتكلم جد بقى...دى فكرة جديدة عبارة عن خمس دقايق فى دماغ بنى ادم وهوة مع نفسة نشوف هوة بيقول اية ؟

يارب تطلع حلوة......يارب

أمانى

بعد ما قطفت أمانى الملوخية حطيتها على الصينية ....جابت المخرطة وقعدت على الارض تخرطها...قالت لنفسها : جربت كتير وقليل ...بس الملوخية مابتطلعش ملوخية الا بالمخرطة ...لا الخلاط نفع ولا الكبة شفعت...ياه الايام بتجرى بسرعة ...انا فاكرة لما كنت باروح لجارتنا ام حمدى استلف منها المخرطة لماما ...كانت ديما تدينى طوفى وتقولى حلى بقك يابت ...الله يرحمها كانت ست طيبة قوى ...ولا عم بدر البقال هوة كمان كان بيدينى طوفياية لما كنت باجيب منة التموين ....نسيت اقول لأحمد يصور شهادة الميلاد بتاعة البت حبيبة علشان نضيفها على بطاقة التموين ....هوه مش حقنا ولا ايه ...احسن من عين الحكومة اللى مابناخدش منها حاجة ...كلة بالغلا والكوى ...لما اخلص عايزة اكوى قمصان أحمد الا يجى يفتح صوتة ....ماهى نقصاة هوة كمان ...مابخدش غير زعيق ونرفزة ...مافيش رحمة ...مافيش مرة يدخل علية بهدية ....بلاش هدية ...يقول كلمة حلوة ...الا اول كلمة يقولها وهوة داخل : الاكل جاهز؟... واقع من الجوع...طبيخ وغسيل ومسح ومكوة وطلبات عيال وطلبات جوز ...ادى الجواز اللى كنتى حتموتى علية ياهبلة ....طلبات طلبات ....دا لسة طلبات رمضان ....دا انا لازم اقول لماما تيجى تفطر معايا اول يوم ماهو ماينفعش تفطر لوحدها اول يوم رمضان.....ماانا اعمل اية؟... لاهية راضية تقعد عندى ولا احمد راضى نقعد عندها ...وانا اعملهم اية بقى ....بالمرة وانا باجيب حاجة رمضان ابقى اشترى شنطة للبت حبيبة ....مع ان شنطتها لسة بحالتها ...بس اعمل اية فى ابوها اللى مابيرفضلهاش طلب....بتتدلع ومابتذاكرش .....ياختى يعنى هما اللى ذاكروا وتعبوا وسهروا وخدوا شهادات عملوا اية؟ ...قعدوا فى البيت زى الخدامين ....وياريت عاجب ...كلة بينتش فية ...محدش مقدر ...محدش راحم....ياسلام لو الواحدة كدة يكون عندها عربية ...وتسافر كدة لوحدها بعيد كام يوم ....وافرد شعرى واقلع الطرحة ....والبس بنطلون جينز ....وبلوزة كت ....والبس مايوة وانزل البحر....واسمع مزيكا وارقص واسهر واعمل زى البنات بتوع اليومين دول واروش ....استغفر الله العظيم ...استغفر الله العظيم ...اية اللى بتقولية دة يا بت ....انتى اتعبطى ولا اية ....اييييية ....حتخيبى على كبر ولا اية ؟ ....استغفر الله العظيم فوقى يابت دا بدال ماتقولى عايزة اعمل عمرة ....بس ماهوبرضة مش حرام ان الواحدة تشوف نفسها.....والعيال اسيبهم عند ماما يومين تلاتة ايه اللى حيحصل يعنى ....مالناس بترمى عيالها بالاسبوع والاتنين....يوووة

استغفر الله العظيم اللهم اخزيك يا شيطان....خدت امانى الملوخية وراحت علشان تفورها ...قعدت تسقطها حبة حبة علشان ماتسقطش .....جرس الباب ضرب ...راحت تفتح ...لقتة احمد ...احمد دخل من الباب واول كلمة قالها :الأكل جاهز؟.....انا واقع من الجوع

خصيمك النبى تدعي له يغور

خصيمك النبى تدعي له يغور

جلبى جايد نار ...جملة طول عمرى بأسمعها بس عمرى ما حسيت معناها زى اليومين دول ...بقالى اسبوع بأغلى ...نفسى اوطى على الارض اخد طوبة حمرة ....واحدفها فى دماغ الكائن اللى فى بالى واعور بيها اهله ...واشفى غليلى ...حتقولو لى طوبة حمرة لية ...ماهو لو متغاظ منه قوى كدة ....احدفة بظلطة اهى اجمد من الطوبه ...اقولكوا لاااااااااااااا ...لانى اتعلمت ايام زمان لما كنا بنتعارك مع العيال بتوع سنة ستة اللى فى المدرسة اللى قدامنا ....ان الطوب الاحمر احسن فى التعوير....علشان بيتفرفت فى الجرح من جوة يقوموا فى المستشفى يضطروا ينضفوا الجرح قبل ما يخيطوة ...وبكدة الزبون يتعذب تلت مرات ...مرة لما الطوبة تيجى فى دماغة ...ومرة لما ينضفولة الجرح ...ومرة لما يخيطوة ...نوع من انواع العذيب الذيادة ....زمانكوا بتقولوا دا ارهابى وغلاوى ومعندوش رحمة ...بس هوه يعنى شفتونى عملت حاجة ...اهو كلام ابن عم حديت ...فضفضة تهوى على النار اللى جوايا من الكائن اللى رجلة والقبر ومش عايز يتقى ربنا ....ياشيخ عيب على سنك دا انت عندك خمسة وسبعين سنة يا متصابى ...بتبيع دينك بدنياك يا شايب ...تبيع دينك علشان تترقى يا عايب ...يا اخى ترقية الندامة عليك وعلى اهلك ... ولعت فى الخلق وقولنا الناس هيه اللى غلطانة كان المفروض تمسك طفاية حريق زى ماهى ماسكة الموبيل .....غلطت فى الطرحة وقولنا زلة لسان من كائن بيقول انة فنان ....اخرة المتمة جاى تصقف وتكافىء اللى بيغلط فى الاديان .....اقولك اية ...روح يا شيخ الهى وانت جاهى تترقى وتغور من وشنا ...وتسافر لاسيادك ...وتنول رضاهم قادر يا كريم والهى تموت هناك ....ولا بلاش لساعتها يرجعوك على حسابنا ويدوك لقب شهيد ما هو كله دلوقت بقى شهيد ...والشهيد بقى ارهابى ...؟!!!!

على فكره انا رجعت فى كلامى .... والختمة الشريفة خسارة فيك الطوبة الحمرة ...خليها... يمكن تنفعنا ...اهو نحك بيها ضمايرنا يمكن تنجلى ولانخوتنا يمكن تورد ...ولا نحطها قدامنا تفكرنا لما كنا عيال رجالة قبل مانكبر ونقعد ندعى زى الولايا

الحبال الدايبة

الحبال الدايبة

وانا صغير فى المدرسة....كانوا المدرسين يحكولنا على السراب ....ويقولولنا لما تمشى فى الصحرا ....تشوف مية قدامك ...بس لما توصلها ماتلاقيهاش ......عجبتنى قوى حكاية السراب دى ....وبقيت ادخلها فى كل كلامى وحكاياتى ......وبقيت ادخلها فى مواضيع التعبير علشان اخد نمرة حلوة......كل دة وانا لاشفت السراب ولاغيرة.....وفى يوم كنت مسافر على الطريق الصحراوى الساعة اتنين الضهر .....وشفت السراب على الاسفلت.....بقيت اجرى بالعربية وهوة يجرى قدامى ....كانت لعبة حلوة هونت عليا المشوار .....وخلصت السكة بسرعة ...سرحت شوية مع نفسى ....لقيت السراب مش بس فى الصحرا ولاعلى الاسفلت .....اكتشفت ان الحياة كلها سراب .....من ساعة ما بنيجى الدنيا واحنا بنجرى ورا سراب كل مايتهيئلنا ان احنا وصلنا نلاقى سراب ابعد نقوم نجرى وراة ....بنجرى ورا الشهادة وتطلع سراب ....نجرى ورا النجاح نلاقية سراب ....الفشل سراب ....الحب سراب ....الجواز سراب ....حتى العيال هما كمان سراب ....الصحاب سراب ....الاعداء سراب .....الفلوس سراب ....المتع والفسح سراب ....الزعل سراب ....والسعادة هية كمان سراب ......وكل ما نخلص سراب نجرى ورا سراب ...نجرى ونجرى ونجرى لغاية ما ينقطع نفس اللى جابونا ....سألت نفسى : احنا بنعمل فى نفسنا كدة ليه؟....مالقيتش غير اجابة واحدة : ما اهلنا كانوا بيعملوا كدة .....سألت تانى : طاب احنا بنقلدهم لية ؟....مالقيتش برضة غير اجابة واحدة : غباوة ...ايوة غباوة ....والله غباوة ...بنجرى ورا سراب الدنيا وسايبين الحقيقة اللى احنا جايين الدنيا علشانها ....نعبد ربنا ونعمل لاخريتنا ...مش لاقى حاجة اقولها غير المثل اللى دايمنا تقولة الحاجة : اتعلقى يا خايبة بالحبال الدايبة

هٌوة احنا غلابة ولا عٌبط

هٌوة احنا غلابة ولا عٌبط

اشترى بدلة نضيفة او أجرها ....لمع الجزمة ...واحلق عند جولدن فينجر واضرب الجيل ....وعدى على اى مدير قناة فضائية...اومذيعة ...او مٌعد ...اوحتى ريجيسير ....وظبط معاة تطلع فى برنامج ....واختار موضوع ...اى موضوع !!! واعمل حاجة من اتنين يا تكشكشها قوى يا تعرضها زيادة عن اللزوم يعنى يا تقول حرام والدين بيرفض ....يا تقول فكوها وسيبوا الناس تعمل اللى هية عايزاة .....وياريت تختار موضوع فى الدين ...وياسلام بقى لو اخترت موضوع عن الجنس ولا الشذوذ ....فلة يا معلم ....ومتنساش شوية حاجات كدةحتنفعك وتزود السبوبة ....اول حاجة اختار الصفة اللى حتتحط على الشريط ...عندك شوية حاجات اختار منها اللى يعجبك ....عندك استشارى وطنى ...خبير دولى ...محاضر عالمى ....فلة مالتى ناشيونال .....روش اخر حاجة ....تانى حاجة خلى المذيعة او المذيع اللى حيقدمك ....يقول على الشهادات اللى خدتها من اكسفورد.... ونورث كارولينا ...ويوكوهاما ...داغير الخمستاشر دبلومة والستة ماجستير ....الاربع دكتورهات .... وياسيدى اللى مش مصدق يروح اكسفورد ولا يوكوهاما يسأل فى الارشيف .... وطبعا مش حقولك .... لما الكاميرا تيجى عليك اتكسف كدة واتواضع ....وابدا بقى وسخن وشعلل زى مانت عايز ...وكل ما تهلفط زيادة وتسخن وتشعلل ...السبوبة حتزيد ...ماهى الاتصالات حتزيد..... والمداخلات حتزيد ..والفاصل ونواصل حتزيد ...والاعلانات حتزيد ....بس نصيحة بسرعة حلقتين تلاتة ورا بعض على كام ندوة كدة على الماشى ....علشان احنا بنزهق بسرعة .....نصيحة كمان حب لاخيك ما تحب لنفسك ....الهط وسيب غيرك يلهط ......ماتنساش ان فية طابور من المستشارين والمحاضرين والمبدعين اللى قاعدين على قهوة الانتاج الاعلامى مستنين السبوبة ..... وتحيا مصر ويحيا شعب مصر الغلبان ال......طيب ويكتر يارب مستشارية وخبراءة ومحاضرية
رحت لابويا وانا مذهول قولت له يابا : الكلب ركب الجمل
رد بهدوء غاظنى : ماهو يابنى الحق علية نخ لية

وحشتونى

وحشتونى

وحشتونى بجد وقوى كمان

شكرا جزيلا لصبرنى وام مالك على السؤال وبرضة شكرا للى سأل عنى بس فى سرة .الحمد للة مش عيان ولا بصيف بس كنت بعيد عنوكوا بوضب الشقة يعنى ببساطة ساعات بانام فى اوضة النوم الصبح الاقينى فى البانيو........ اسبوع وافوق ونرجع للكتالوج اوعوا تكونوا نسيتوة
سلام ياعائلتى الكبيرة

الكتالوج (9)

الكتالوج (9)

خدعة العمر

طلعت من الباب ويادوب نزلت سلمتين ....رجلى مابقتش شيلانى ....رحت قاعد على السلم ....ماحسيتش باية اللى بيحصل حواليا ....ولا مين طالع ولا مين نازل ...كنت عامل زى اللى قاعد فى اوضة ديقة فى بدروم ....شباكها حديد باصص على الرصيف ... جدرانها متبيضة بالجير ومنشعة مية من الرطوبة ....نورها جاى من لمبة سهارى بتضلم اكتر ما بتنور ....وبابها خشب مسوس مقفول بترباس كبير ...وانا جوة الاوضة دى ونفسى مكتوم لا قادر يطلع ولا قادر يدخل ...وصوتى محبوس والعرق مغطينى من راسى لرجلية .... فوقت على صوت ست عجوزة وهية بتهزنى وبتقولى مالك يابنى فية حاجة ....بصيت لها وماردتش ...والله كنت عايز ارد بس صوتى ماكنش قادر يطلع ......سالتنى تانى فية حاجة يا ضنايا ...اتسندت على الدرابزين ووقفت ...وقولت لها لا ياأمى مافيش حاجة ....وطلعت من باب العمارة ووصلت للعربية وفتحت الباب ....اول مرة اخد بالى انى عندى عربية ....بقاللى عشرين سنة با سوق ....واول مرة اخد بالى انى عندى عربية ....طلعت الشقة ولأول مرة برضة اخد بالى ان فية يافطة على الباب عليها اسمى ....وحمدت ربنا ان البنات وامهم فى النادى علشان مايشوفنيش بالحالة دى ....اية دة وكمان عندى اشتراك فى النادى ....عملتة امتى دة ؟!....اترميت على السرير ....وعينى لزقت فى السقف ....وشفت فيلم قصة حياتى ....من ايام ما كنت بانط من على لسور المدرسة علشان اروح السيما اشوف فيلم بروسلى .....لغاية مادخلت الكلية وافتريت فى الكفتريا مش المحاضرات طبعا ...ولما عديت على الجماعات الاسلامية ولما ضحكوا علية وخلونى اوزع منشورات ....اللى لغاية دلوقت ماعرفش كان فيها اية ...بس كان دفاع عن الاسلام ....!!! وشفت ايامى فى الحزب الاشتراكى الوحدوى التقدمى .....والجيش والصحرا وبرانى اللى من ليبيا مسافة نص ساعة ....والسنتين ونص اللى دورت فيهم على الشقة علشان اتجوز ....والبنات اللى اتعمل فيهم مجهود غير طبيعى علشان يجوا ....والشغل وصراعاتة ....والترقية والمدير ومدير المنطقة ...والامانى اللى ماتحققتش والاحلام اللى اتقلبت كوابيس ......مشوار ابن كلب ...مالوش اى لازمة ....ايوة مالوش اى لازمة ...ماهو اخر المشوار ...رقم متعلم علية بالماركر .....ولستة طويلة الممنوع فيا اكتر من المسموح ...واوامر وان ماكنش اوامر تبقى نصايح وان ماكنتش نصايح تبقى مصمصة شفايف ....وحبة عين امة ....وياكبدى علية دا لسة صغير وولادة لسة لحمة حمرا ....ومبقاش غير انى اعمل صوان واجيب مقرىء واقف اخد العزا فيـّة ....وفجأة خطر على بالى الاية الكريمة اللى بتقول . قالى تعالى : كبر مقتا عند الله ان تقولوا ما لا تفعلون . صدق الله العظيم . قولت لنفسى هوة اللى على الشط عوام ولا اية اجرى ياواد على الكتالوج ..... قمت اتوضيت ومسكت المصحف وقريت ....

قالى تعالى : هو الذى خلقكم من طين ثم قضى اجلا واجل مسمى عندة ثم انتم تمترون .صدق الله العظيم .الانعام 2

قالى تعالى : ولنبلونكم بشىءمن الخوف والجوع ونقص من الاموال والانفس والثمرات وبشر الصابرين . صدق الله العظيم . البقرة 155

قالى تعالى : ام حسبتم ان تدخلوا الجنة ولما يعلم الله الذين جاهدوا منكم ويعلم الصابرين . صدق الله العظيم . ال عمران142

قالى تعالى : وعسى ان تكرهوا شيئا وهو خير لكم . صدق الله العظيم .البقرة 216

بعد ماخلصت قمت لبست الترينج ونزلت علشان العب مع العيال فى النادى ...وحاكمل مشاريعى ...وحكمل المدونة ...وحكمل حياتى ...وحنعيش يعنى حنعيش ...بس المرة دى حاخد بالى اكتر واستمتع اكتر وحاعيش الحياة اكتر واكتر ...

الخدعة بقى فين ....شوف ياسيدى ...وانا رايح النادى رن الموبايل ....دكتور المعمل اللى عملت فية التحليل ....قالى عايزينك ضرورى فى المعمل ....دخلت علية ...قام من على المكتب وسلم علية وهاتك يا اسف ويا اعتذارات ...قولت له ياعم لخص فية اية ...قالى تحليلك اتلخبط ما واحدة اسمها اسلام ...كانت جاية تعمل تحليل سكر حمل ...وبدال مالدكتورة تكتب اسمها على التقرير كتبت اسمك ....وعطانى التقرير بتاعى اللى طلع مافيهوش سكر ....وقالى دى ورقة تعمل فيها التحاليل اللى انت عايزها لمدة ست شهور ببلاش ......قطعت الورقة وقولت له المهم تشوف الست اللى طلعتوها ماعندهاش سكر دى ...انت عارف ان كدة يبقى خطر على البيبى ....شوفتوا بقى كنت حاطلع واحدة ست وحامل كمان ............ بس خلاص

فاصل اعلانى ونواصل تانى

استرجل ياعيل

عارف البغل جامد لية ؟....علشان بياكل شعير .....عارف التور مفترى لية ؟....علشان بياكل شعير ...عايز تبقى جامد ؟.... عايز تبقى مفترى ....استرجل واشرب انت كمان مية شعير ...قربع علبة تبقى عشر رجالة فى بعض ....اتصل بـ 0900 توصلك العلبة لغاية باب النادى ...

للتواصل مع شركة قربع لمشروبات البهايم

العنوان : معصرة الطوالة .... زريبة المعلم قربع ......توشكى

E.mail : ARSAK @ HABAL .com

الكتالوج (8)

الكتالوج (8)

ظلم نفس

ممكن يكون الفرق فى السن هوة السبب ...ماهو الراجل عندة اربعين سنة والست عندها خمسة وعشرين سنة ...ولا يمكن علشان امة الست العجوزة قاعدة معاة فى الشقة....ولاجايز علشان الراجل موظف حكومة ومرتبة على قدة....وبيشتغل ليل ونهار ومش فاضى يفسح ....ولايكونش حماتة اللى بتدخل فى حياتة لغاية ماوصلت لجدولة مواعيد الحقوق الشرعية ......ولااحتمال يكون خالها وخالتها وعمة واخوة الكبير اللى كانو بيهدوا النفوس ....ولاربما تكون اختة اللى عندها تلاتين سنة ولسة ماتجوزتش يكون لها يد ...ولايكون ابن خالتها المحامى اللى قوى قلبها واقنعها انها حتطلع كسبانة من الجوازة والف مين يقدر جمالها ويتجوزها بعد ماتتطلق...ولا المستشار ابن عمة اللى اقنعة انه ممكن يمرمطها فى المحاكم وفى الاخر حتخلع وتسيب الجمل بما حمل ...ولاتكونش محكمة الاسرة اللى قوت المفترى وجات على الغلبان ...ولاهوة افترى الرجالة ولايكون كيد بنات حوا ...ولا قلة العقل ....ولا الموروثات المايلة بتاعة جوزك على ماتعودية وادبح لها القطة ...ولا يكونش علشان ماتفقناش من الاول ....من الاخر يولعوا الاتنين بجاز ...كل واحد يستحمل اللى بيعملة فية عقلة ....اللى مزعلنى ان كل دة حصل بعد ولادة يوسف ....واللى ماشفش ابوة رغم انة دلوقت عندة سنتين ....مع ان ابوة خد حكم رؤية ....بعد ماطلبها فى الطاعة لما هية رفعت علية قضية طلاق ولزقت فيها قضية نفقة بس هية ماسكتتش ....ورفعت علية قضية تبديد قايمة .....داغير قضية الضرب اللى ماعرفتش تجيب عليها شهود....وطبعا كل قضية قصادها قضية ...دا غير استخدام التكنولوجيا ....فى الضغط النفسى ....يعنى الرسايل اللى على الموبيل اللى بتجيب سيرة الام والاب والاخت والسمعة ....والاحلى بقى ...ورق القضايا اللى بيتصور ...ويتحط فى ملف علشان الواد لما يكبر يشوف امة كانت بتعمل اية فى ابوة ....كل دة حصل فى تسع شهور جواز!!! ...هوة السؤال هنا .... لية كدة ؟؟!! اية اللى خلاهم يعملوا كدة ؟!! اخر ماذهقت من التدوير على الاسباب رجعت للكتالوج اللى محدش بيبص فيه لقيت الموضوع ابسط مما يمكن بس المشكلة ان الكتالوج محطوط فى دولاب الصينى اللى بيسموة دلوقتى النيش .....وبعدين يا اخى لسة حاقوم وافتح النيش وابص فى الكتالوج يا اعم ارحمنا دا هوة اللى بيقول ...يارب ارحمنا دا انا بقى اللى بقول

قالى تعالى : وان خفتم شقاق بينهمافايعثوا حكما من اهلة وحكما من اهلها ان يريدا اصلاحا يوفق الله بينهماان الله كان عليما خبيرا . صدق الله العظيم. النساء 35

قالى تعالى : خذ العفو وامر بالعرف واعرض عن الجاهلين .صدق الله العظيم الاعراف 199

قالى تعالى : واذا طلقتم النساء فبلغن اجلهن فامسكوهن بمعروف او سرحوهن بمعروف ولا تمسكوهن ضرارا لتعتدوا ومن يفعل ذلك فقد ظلم نفسه ولا تتخذوا آيات الله هزوا واذكروا نعمة الله عليكم وما انزل عليكم من الكتاب والحكمة يعظكم به واتقوا الله واعلموا ان الله بكل شىء عليم. صدق الله العظيم .البقرة 231

تاج وامرى لله

يا اخونا اتدبست فى تاج من سول........ ماشى ماشى

من أنت ؟

واحد من سبعين مليون واحد

وما الذى تفعله هنا ؟

اقول اللى فى نفسى

إسرائيل تقصف كل جنوب ممكن بحثا عنك ، أى شمال ستقصد؟

اكيد اللى حضرب منة اسرائيل

أنت مكلف بحذف حرف من حروف اللغة العربية .. أيها ستختار ولماذا ؟

السين ..لانة مأجل كل حاجة فى حياتنا

لو قدر لك أن تدخل السجن فما هي القضية التي تتمنى ان تدخل بها إليه؟

لا يا عم الا السجن

بالمناسبة.. منذ متى اكتشفت نفسك؟

وانا عندى 34 سنة كتير مش كدة بس انا اللى لاقيها لوحدى

على مفترق طريق الافتتان ، اليمنى تقول ( إلى حلمك ) واليسرى تقول : ( إلى مالم يحلم به البشر ) ، أي الطرق ستسلك ؟

لو فهمت السؤال صح ...انا لا عايز اروح لا يمين ولا شمال كدة رضا وربنا يحسن ختامنا

نحن لا نعيش حياتنا بل نتعلم فيها كيف نعيش ما تعليقك؟

صح بس المفروض ما نقعدتش كتير نتعلم

بجملة واحدة فقط أكتب تعريفاً لكل كلمة من الكلمات التالية

الوطن

بجد بجد تحيا مصر

الأم

الحضن والدفا والضهر

الليل

دماغ يا معلم

الحب

هوة اللى بيدينا الامل

أمريكا

واحد بيدور على مصلحتة زعلان منة لية ما تعمل زية!

المرأة

لو رجعت مرأة الدنيا حتبقى حلوة

الصمت

والله العظيم دهب وبندقى كمان

الانترنت

نعمة كبيرة محدش عارف قيمتها

أخترمنصباً واتخذ قرارا ؟

وزير الشباب والرياضة

اللعبة اللى متحققش بطولات حألغيها

قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟

مستتنيين لما يتجوزوهم بعد كدة مش صموت بقى ....الخرس حيبقى من نصيب عم قيس وصحابة

أن تكون مطلوبا لارتكابك جريمة ، خير لك من ألا تكون مطلوباً مطلقاً " ، هل تتفق مع هذه العبارة ؟ علل

هوة دة يا دة ؟!!!

إلى أين تمضي كلمات الحب .. بعد أن نقولها؟

الى غير رجعة

هل تجد علاقة بشكل أو بآخر بين المرأة وقطاع الطرق ؟

الاتنين بيخطفوا اللى معدى

هذا فراق بيني وبينك .. متى ولمن تقولها ؟

مافيش فرق بين حد والتانى كلنا بشر وكلنا بيتنا من ازاز

كيف هو غداً ؟

انت عايز تشوفة ازاى؟؟؟؟

تمرر التاج لمين ؟

الدكتور محمد الزبون الجديد صاحب مدونة قرات لك

الزائر رقم الف لمدونى

صبرنى

ريم

ام مالك

ستيتة

د ياسر عبد الفتاح

نبضات قلب ولهات