الأربعاء، 29 أبريل 2009

مين فينا الظالم (1)

من حوالى شهر كدة كنت عملت بوست ادعى فيها لعمل اضراب من نوع خاص اضراب يبنى مش يهد ... فية ناس وافقت... وفية ناس رفضت ..... سكت بس بصراحة ماقدرتش اسكت كتير .....فقررت اقول لكوا وجهة نظرى وانتوا بقى تشوفوا انا عندى حق ولا ماعنديش ووجهة نظرى دى حتكون برضة فى سلسلة ....عجبتنى حكاية السلسلة دى!!!!!!! وحأسميها مين فينا الظالم

مين فينا الظالم (1)


انفلونزا الطيور........ مرض خطير....... مش المشكلة فى انة بيقضى على الفراخ ولابيضيع الثروة الداجنة....دى هينة .. ولا المشكلة انة بيصيب البنى ادمين ..... دى سهلة اهى ليها علاج هوة شرطة السرعة والتشخيص الدقيق ....بس فية حل ....المصيبة الكبيرة بقى ...ان الفيروس دة يتحور فى الانسان ويبدأ يتنقل بين البنى ادمين .....ساعتها بقى حيبقى وباء ....زى وباء الكوليرا اللى حصل فى مصر زمان ......يعنى موت بالجملة ......ايوة ...الناس حتموت بالجملة .....وخصوصا ان فيروس الانفلوانزا على قد ماهوا فيروس عبيط ...شوية شمس تموتة ...الا انة فيروس رزل .....كل ما تعمل لة مصل يحور نفسة ....تعمل مصل تانى يحور نفسة تانى ..... يعنى بالبلدى كدة لو حصل واتحور وبدأ يتنقل من انسان لانسان ...يبقى مافيش حاجة حاتنفعنا غير رحمة ربنا ..... واتعلمنا زى كل اللى درسوا الطب مااتعلموا.... انة لما بيظهر وباء اول حاجة بنعملها ان احنا نرفع درجة الاستعداد ونعمل حاجة اسمها كارنتين ......بمعنى ان لو فية حالة اشتباة واحدة فى مكان يبقى لازم نقفل المكان دة .....لاحد يدخل ولا حد يطلع ....لغاية مانسيطر على المرض .....حاجة عادية جدا ومن اساسيات الطب الوقائى فى اى بلد متخلف فى العالم ......لغاية كدة حلو ..؟؟ لا مش حلو ....لية ..؟؟ علشان احنا مصريين ومانقدرش مانفتيش ....علشان احنا بنفهم فى الطب والهندسة وادارة الازمات والحكم كمان..... هية كيميا؟....وعلية فقد قررنا نحن المصريين الوطنيون بناة الاهرام ....ان نضع ايدينا فى يد بعضنا ...ونتصدى .....لحكومة الاعداء ..الممثلة فى نظيف واعوانة .....التى اثبتت الايام انهم من سلالة راشيل وحننيا ....كما اثبتت الاستخبارات الحديثة كونهم ياكلون انواع خاصة من الفراخ تربى فى مزارع تحت الارض ...ويتركون الشعب الغلبان يكح تراب ...على رأى الاعلان الرخم ....وقررنا ان نتصرف بما يتراءى لمصلحتنا فبدأنا بما هو آت ....
خبينا الفراخ وقفلنا عليهم فوق السطح ...علشان لما الطب البيطرى يجى مايلاقيش حاجة ...والفراخ اللى تموت نرميها بسرعة فى الشارع الا تعدى اخواتها ....وبعدين ما احنا طول عمرنا بنرمى الفراخ الميتة فى الشارع اية اللى جد .....وعم ريشة صاحب مزرعة الفراخ اللى بان فيها الاعراض ...طبعا ما بلغش لية هوة عبيط علشان يعدمولة المزرعة ولا اية ...انت باين عليك مش من هنا !!!...واتصل بسرعة بعم عريف التاجر اللى طبعا كان فرحان وهوة بياخد المزرعة بنص التمن ...نسيت اقولكوا انة استلم الفراخ ...الفجر وطلع بالعربية من الطريق اللى ورا ....علشان يبعد عن لجنة المرور ....وراح المحافظة اللى جنبنا اللى ماكنش فيها انفلوانزا .....لغاية كدة .....كلة يهون.... طاب والدكتور البيطرى اللى بيطلع علشان يحصن اللى يقدر يلاقية ..وينسى يحط التحصين فى التلج ...ويقولك....ياعم ...اهم حاجة عند حكومة الاعداء ان الدفاتر تكون متسددة ....وانا بسدد الدفاتر صح .....وطظ بقى فى اللى بتدفعة الحكومة ....مهما اعداء ولاد كلب بقى....ولى كان يتلم بمليون بقى عايز مليار ...وانتشر المرض ....وناس اتصابت ...وناس ماتت ....وبدأنا الحملةالاعلامية المعروفة (جنازة ونشبع فيها لطم )......المانشيتات الحمرا فى الصحف الصفرا اتلمت على عمور وميزو ومنمن ....وصوتى يا للى مانتيش غرمانة ....وسخنى ياللى ولعتى الفرن .....وبدل مايوعوا بناة الاهرمات ... مسكوا فى حكومة الاعداء اللى مش عارفة تشوف شغلها وفى الفاسد ابن الفاسد اللى لغاية دلوقت مش عارفين مين هوة....اللى اتغنى من مجايب التحصين اللى اكيد هوة كمان فاسد ....داغير السمك واللحمة اللى غلوا وحكومة الاعداء مابتتحركش ....وقعدوا يعيطوا على الناس الغلبانة اللى بيتبهدلوا بسبب حكومة الاعداء ...وطبعا مانسيوش يقولوا ان دا كلة علشان مافيش ديموقراطية ...ولاتداول سلطة ...وحودوا على التوريث ...وحقوق الانسان ...وماهو لوماكنش فية ضرب فى الاقسام ...ماكنتش الانفلونزا تقدر تهوب ناحيتنا .....الآ..... مين تبع اية وهما الاتنين رايحين على فين .....عرفتوا بقى لية انا عايز اعمل اضراب 17 مايو
ملحوظة : بدات تظهر اتفلوانزا الخنازير .....ودى بقى لوماتعدلناش يبقى علية العوض بجد

هناك 8 تعليقات:

  1. أنا موافق مع كلام حضرتك 100% لكن مش بنفي فساد الحكومة وظلمها للناس وهي بصراحةلها دور كبير في كل المشاكل اللي بتحصل لنا
    لكن مشكلتنا الكبيرة اننا لقينا شماعة كبيرة عليها غسيل وسخ فرحنا احنا كمان حطينا علها غسيلنا احنا الوسخ كمان دي مشكلة المشاكل
    ورأيي والله اعلم ان التغيير اللي بيحصل بإيد اي حكومة بيكون اكثر فاعلية وجدية من التغيير بيد الأفراد لأن ساعتها التغيير هيكون بالعافية سواء كنت موافق ولا مش موافق
    لكن الأفراد في ناس كويسة كتير وعاوزين يصلحوا لكن للاسف في وراهم ناس اكتر بيفسدوا اللي صلحوة والاسوأ انهم مش بيلاقوا حد يوقفهم عند حدهم
    ده رأيي الشخصي واستشهد بقول الرسول صلى الله عليه وسلم في حديث فيما معناه
    " إن الله ليزع بالسلطان ما لا يزع بالقرآن "

    ردحذف
  2. شوف يا استاذنا

    خراب الزمم ده بقى كاس وداير للاسف

    بقى هو الوباء الاصلي الى مالوش علاج

    احنا شعب ولاد تيييييت وعندناش زمه ولا ضمير ولا نقبل بالنظام
    ماشي معاك والله بجد


    لكككككككككككككن

    فين الحاكم
    فين ولي الامر الى يعاقب الى يغلط والى يقطع رقبة الظالم ؟؟؟


    بررررررررررررضه هالف هالف وكمان لفه واقولك هما الى ولاد ستين تييييييييت ومش ماسكين ام البلد زي ما المفروض تكون

    بالنسبه بقى لموضوع انفلونزا الطيور

    طبعا مش هافتي انا ومالك فى المدينه
    انما
    انا من بؤ مهندس زراعي فى مزارع كوهيه لو حضرتك تعرفها
    قالي احنا جبنا المصل بتاع الحكومه الى هو الصينى واعطينا للفراخ ولا حياة لمن تنادي كله وقع بالصلاه على النبى
    والمزرعه الوحيده الى لحقناها فلان بيه صاحب المزرعه سافر بنفسه السعوديه اشترى من هناك مصل على حسابه تاااااني بس مصل اوربي ودي المزرعه الوحيده عندهم من اسطول المزارع الى عندهم الى نجت
    كله راح بما فيهم مزرعة فؤاد كوهيه الى تعد ثاني اكبر مزرعة فراخ فى مصر

    قشطه ؟؟

    قولي انت مين فينا الظااااااااااالم

    والنبى المره الجايه شوفلنا انسيال بقى على خاتم عشان نكمل الطقم

    تحياتي لحضرتك يا فندم ومعاك فى الاضراب ضد الفساد

    ردحذف
  3. الله ينور عليك ياعم ابراهيم سبقتنى وبوظت السلسلة انا مش بنفى فساد الحكومة لكن مش قادر اشوف الشماعات اللى احنا بنعلق عليها خيبتنا واسكت الحكومة ممكن يكون فيها شياطين بس مش معنى كدة ان احنا اللىملايكة وحاكمل وجهة نظرى فى اللى جاى

    ردحذف
  4. ماشى يا عم اتريق على السلسلة بس تصدقى قعدت كتير علشان افهم قصدك اية بالخاتم اللى مع السلسلة ....زميهر بقى على فكرة انا عارف انها زهيمر بس كلهم بيقولوها كدة

    ردحذف
  5. ياعم حنعيش
    نجيب من اخر الكلام الكبير الجامد اللى قلته كله
    من اخر جملة فى الموضوع .. لانها للاسف الشديد هى دى الخلاصة والنهاية فى نفس الوقت
    علييييييييييييييييييييه العوض
    ولو شفت القاهرة اليوم لمدة يومين متتاليين
    وذوى المصالح والدكتور حاتم الجبلى فى مناقشة حامية عن طريقة الوقاية من انفلونزا الخنازير قبل ما تتحول لوباء وتخلص على المصريين .. تقول
    عليييييييييييييييييييه العوض

    ردحذف
  6. انا اكتر حد مؤيد ليك في اضراب 15 مايو

    ( طبعا دا ليس له اى علاقة بان اليوم دا عيد ميلادي )

    لا بجد بغض النظر عن فساد الحكومة فالناس فعلا محتاجين صحوة

    كله بيقول يلا نفسي وبس ومش بيهمه غير مصلحته الفردية زى صاحب المزرعة اللى باع لتاجر فراخ مصابة مثلا خاف على نفسه من الخسارة ومش مهم يحصل ايه للناس مع انه لو فكر صح هيلاقي انه بردو هاينضر في الاخر

    للاسف حتى بعد النظر مش موجود

    وبعدين انا بجد بستغرب جدا من حاجات يمكن في ناس تشوفها بسيطة بس هى فعلا كبيرة
    يعنى ايه اصلا يرمو فراخ ميتة في الشارع حتى لو سليمة؟ .. ليه دا بيحصل في بلدنا بس ؟
    ليه احنا الشعب الوحيد اللى مش بيحافظ على نظافة الشوارع ؟

    ليه بيكسرو كباين التليفونات العامة او يسرقوها مفيش اى حفاظ على اى مرفق عام او خدمات في الشوارع

    دا كله محتاج وقفة مع الناس اكتر من الحكومة
    ومش بدافع عن الحكومة بس كمان الناس محتاجين يتعلمو كتير

    انا خرجت عن الموضوع انا عارفه

    على فكرة اسعدتنى جدا فكرة السلسلة التانية دى

    لانى عارفة مسبقا انها ان شاء الله هاتكون ذات قيمة كبيرة
    سامحنى على الرغي الكتير

    ردحذف
  7. ريم انتى ماخرجتيش عن الموضوع انتى فى قلب الموضوع وربنا يخليكى زى ما دايما بترفعى روحى المعدنية

    ردحذف
  8. عيب يا باشا انا اقدر اتريق

    ده انا باهزر بس والله



    انا باجهز البانر

    عايزه بس منك شعار للاضراب

    شوف كده وقولي

    ردحذف