الثلاثاء، 21 أبريل 2009

انت عارف معنى الحب اية(4)

انت عارف معنى الحب اية(4)

أبو نور.... نور فاكرينة .....جوز جميلة الاولانى ...ابوة بقى كان عامل بسيط على مكنة فى شركة من شركات الغزل والنسيج من بتوع الحكومة ....هوة اللى بناها على كتافة من ايام باحلف بسماها وبتربها ...طول عمرة عندة ضمير فى شغلة ...وساعات كتير كان بيطبق ورديتين علشان يكفى مصاريف العيال ...بس العيشة ما بقتش مكفية ...واشترك فى مظاهرة ...كل اللى كان قصدة انهم يزودوا الحوافز .... ويرجعوا وجبة التغذية اللى قطعوها ...وعلشان هوة اقدم واحد ...العمال خلوة الزعيم ...زعيم المظاهرة ....أبو نور لقى ان المظاهرات اكسب من حكاية الورديتين دول ....المرتب زاد والوجبة رجعت ...وشغلوا نور فى بنك استثمارى كبير ...بمرتب الف وخمسميت جنية ....هوة نفسة بقالة اربعين سنة شغل ومابياخدهمش ...ومن يومها وأبو نور بقى حريف مظاهرات واضرابات خصوصا لما وصل للدش وطلع مع منى الشاذلى ....وهبد منها الف جنية فى الربع ساعة اللى طلع فيها ...و برضة ماشتمش فيها الحكومة ....دول شغلولى الواد ..اشتمهم برضة ....القصد نور فرح بالوظيفة وراح ضارب موبيل فخم ..وجاكتيتين وكام قميص على تلت كرفتات ....وجزمة ببوز وتوكة من الجنب ... بقى واد استثمارى بجد .....البنك بعت نور دورة تدريبية... اسبوع فى فندق خمس نجوم ....فول بورد ....الواد اتهبل وقعد يكلم نفسة ...انفتحت لك طاقة القدر يا نور ...دخلت من باب الجمال يانور ...بقيت رجل اعمال يا نور .....وفى التدريب اتعرف على زميلتة ..اسمها شرويت ...يعنى حاجة كدة اسبيشيال ...مال وجمال ....مدير البنك صاحب ابوها ....لا بباها... داللى جاى باينة فلة ....نور لقى فى شرويت البرستيج والعيلة والنسب والقيمة والناس النضيفة ....وشرويت لقت جدعنة ولاد البلد والشهامة والرجولة ....كان بالنسبة لها دنيا جديدة عمرها ماشافتها ....وكانت بالنسبة لة الدنيا اللى عمرة ما كان يحلم يشوفها .....اية طبعها شوية منفتح ...عادى بس بصراحة البت مؤدبة ...وقرر انة يطبع ....ماحنا بنطبع مع اسرائيل مش حنعرف نطبع مع شرويت ...وطبـّع ...واتجوزوا وفى الفرح اللى كان فى فندق خمس نجوم... جه ابو نور وامة واخواتة البنات .... كانوا حاجزين لهم تربيزة فى اخر القاعة ..فى الركن.... نور كان ملبسهم كويس ...كان شارى الهدوم من نفس المحل اللى بتشترى منة شرويت ...دا حتى دافع بالفيزا؟!! ....بس برضة قعدوا فى الركن فى اخر القاعة ...نور قال لنفسة او برر لنفسة ...ابويا وامى مابيحبوش الدوشة والاختلاط..... كدة احسن ...وخلص الفرح على خير وخد نور عروستة وطلع على الفيلا بتاعة ابو شرويت ...ماهم قرروا انهم يعيشوا فى الفيلا ....ماهى شرويت وحيدة وامها ....مامتها عايزاها جنبها ...سيبك من الشكليات المهم الحب والتطبيع (هوة فهم التطبيع غلط ولا اية ).وفى الصباحية ام نور راحت هية واختة علشان يصبحوة ....عادى يعنى ...بس ابوة مرضيش يروح معاهم كان عندة وردية اوقال ان عندة وردية .....دخلت شرويت والسفرجى وراها بيزق عربية الشاى ...وقدم لهم الشاى والجاتوة ....بصراحة البت رحبت بحماتها واخت جوزها كويس قوى ....ومشيت ام نور واختة بعد مااعتذروا عن انهم يتغدوا معاهم ...وفى السكة اخت نور كانت مولعة ....شفتى شفتى يامة ...مستكبرة تقدم لنا الشاى باديها ...اية مستوطية حطيتنا لية ..؟!! دا انا اخويا محاسب فى بنك قد الدنيا ...ياعينى عليك يا اخويا وعلى بختك ....شرويت ماكانتش بتروح تزور حماتها ...بس عمر ام نور ماكانت بتقولة حاجة ...ماكنتش عايزة تنكد علية ....بس اختة كانت بتقول ...نور كان عارف ان شرويت مابتحبش تروح لأمة ...مش مستكبرة لاسمح الله ...بس مافيش لغة حوار ....شرويت بتقول كدة ....بعد شوية نور لاحظ ان الحفلات اللى كانت بتتعمل فى الفيلابدأت تقل ...وبدأت تتعمل برة ....وبدأ محدش يقولة تعالى ....عادى اكيد عندهم اسبابهم ...المهم الحب .....وذود جرعة التطبيع شوية ......وفى يوم كان حاسس انة زهقان وان امة وابوة واحشينة واحشينة قوى ...راح سهر معاهم لبس البيجاما ونزل جاب قرطاس طعمية سخنة وجرجير ....واتعشوا وانبسطوا ...من زمان ماانبسطش كدة ....لما روح لقى شرويت جايبة لة بدلة جديدة وقميص وكرافتة ....عادى ماهى على طول بتجيب لة ...بس المرة دى كان حاسس بحاجة غريبة ...وفاق على صوت شرويت وهية بتقولة عايزاك تكون اشيك واحد فى حفلة بكرة دى اهم حفلة ...سالها وهوة سرحان حفلة اية ادى ....قالت لة اصل بابا اشترى المصنع اللى بيشتغل فية عمى من الحكومة .....وبكـــــــ ......وماسمعش حاجة تانى .....سرح وهوة شايف حماة وهوة داخل المصنع والعمال حوالية بيهتفولوة ....وفى وسط العمال شاف ابوة ....وشاف ابوة وهوةواقف قدام مكتب حماة مستنى الاذن علشان يكلمة فى الحوافز ...ماهى المظاهرات مابقتش تنفع ...ماهو بقى قطاع خاص ياحلو .....وحس نور انة بيقصر ...ويقصر ....ويقصر.....لغاية مابقى قد عقلةالصباع ....وصحى على صوت شرويت بتقولة .. اكيد ماما واخواتك وعمى حيكونوا ماشغولين ....فبلاش ندايقهم ونعزمهم مش كدة يا حبيبى ...؟!!بص نور فى عين شرويت وقالها برضة الواحد مابيتعلمش ....الحب ماطلعش واحد وواحدة ....دا طلع واحد واهلة.... ووحدة واهلها .....وعلشان الحب يمشى ويكمل ...لازم مستوى العلتين يكون زى بعض ....ردت شرويت وقالت ..انا كمان اكتشفت دة ...مش كفاية التبادل والتطبيع لازم كمان المستوى الاجتماعى.... مهم طبعا... ................................................ وهوة لوحدة المرة دى اللى روح لامة ...لان هية ماكنتش سابت فيلة امها ......

هناك 6 تعليقات:

  1. اه يا عديم الحب والعاتفه والرومانسيه

    تعالى شوف الى بيقولك ماليش دعوه باهلها المهم هي هو انا هاتجوز ابوها ؟؟

    يا بنتى ده مستواه مش من مستونا خالص

    انا باحبه وايدى فى ايده هانكبر ووهو ده دكتور يا ماما وهو انا هاتجوز اهله
    ما عادش حد بيفكر كده

    ........................................


    والحقيقه من وجهة نظري انهم بيبقوا فى اغلب الاحوال طمعانين فى الطرف العالي
    اه طمعانين بس سعات بيكون ده فى المعاميع الجوانيه فى العقل الباطن مش بيصرح به لنفسه

    بوس هايل كالعاده

    ردحذف
  2. سوري بووووووست هايل نسيت التاء لامؤخذه يا اخويا مش قصدي
    ههههههههههههههههههههههههه

    يلا عشان تثبت عليا التهمه الموجه الى مدونتي الشماء

    ردحذف
  3. روعة
    انا قرأت كل الأجزاء
    ده انت شرحت الموكف تمام التمام
    حب واحاسيس ومشاعر وتطبيع
    روعة روعة روعة
    تسلم ايدك
    أهم شيء في الجزء الرابع انه خد البؤجه وهو اللي راح على أريد حلا هههههههههههههههههههه

    تحياتي

    ردحذف
  4. الله عليك والله

    انا بنتظر كل بوست جديد لك بفارغ الصبر

    رائع كعادتك دائما

    مش بس التقارب الاجتماعى والمادى بيفرق كمان التقارب الفكري

    انت عندك حق جدا الرجل مش بيتجوز واحده لوحدها لا دا بيتجوزها هى واهلها وهى كمان بتتجوزه هى واهله

    بجد الجواز دا موضوع كبيييييييير لازم يتعمله الف حساب ويتفكر له صح عشان يستمر وينجح

    ردحذف
  5. عندي واحد صاحبي كان عامل كده تقريبا
    بس كان في مرحلة الخطوبة بس
    واخد واحده مش من مستواه مع انها كانت اكبر منه سنا " وان كان ده مش مشكلة عند كل الناس " وماكنتش جميلة " والجمال مش كل حاجة طبعا" خالص لكن تقول ايه بقى في الطمع
    المهم الموضوع فشل في الآخر وماكملوش مع بعض

    ردحذف
  6. ينفع التأخير ده

    امبارح دخلت قريت وما لحقتش اعلق

    ام هند

    طيب اقول ايه بقى


    ما انت خلصت الليله كلها

    دايما اغلب الناس تحب تبص لفووووق والى يبص لفوق يتعب

    ودايما المجهول والجديد حلو وشيق

    ودايما دايما ما بيسمعوش كلام حد

    والحب هو الشماعه الى بيعقلوا عليها هبلهم

    تحياتي لحضرتك

    ردحذف